DIDZAꞌ GUSÖ́L-LËꞌË PABLO YÖDZÖ COLOSAS
Pablo rugapëꞌ Dios bönachi queëꞌ Cristo nacuꞌë Colosas
1
Nedaꞌ,
Pablo,
nacaꞌ gubáz queëꞌ Jesucristo tuꞌ rë́ꞌënëꞌ Dios caní,
ateꞌ dzágabiꞌ biꞌi bö́chiꞌruꞌ Timoteo nedaꞌ.
2 Rugapaꞌ Dios libíꞌiliꞌ,
zóaliꞌ Colosas.
Nácaliꞌ bö́chiꞌtuꞌ réajlëꞌëliꞌ Cristo,
en nácaliꞌ quez queëꞌ Dios.
Rinábidaꞌ-nëꞌ Xúziruꞌ Dios uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Pablo rulidzëꞌ Dios, en rëꞌ Lëꞌ: “Xclenuꞌ”
3 Rë́ticaꞌstuꞌ-nëꞌ Dios,
Xuzëꞌ Xanruꞌ Jesucristo:
“Xclenuꞌ” cateꞌ rulidztuꞌ-nëꞌ Dios,
en rinábituꞌ-nëꞌ bi gunëꞌ queë́liꞌ
4 tuꞌ biyö́nituꞌ didzaꞌ ca réajlëꞌëliꞌ Jesucristo,
en ca nadxíꞌiliꞌ yúguꞌtë nupa néquiguequi quez queëꞌ Dios.
5 Caní runliꞌ tuꞌ runliꞌ löza le nuzóëꞌ Xanruꞌ queë́liꞌ niꞌ yehuaꞌ yubá,
lë naꞌ biyö́niliꞌ que cateꞌ bë́ꞌlentuꞌ libíꞌiliꞌ didzaꞌ,
le naca löza síꞌiliꞌ niꞌa que didzaꞌ dxiꞌa.
6 Didzaꞌ dxiꞌa naꞌ bidxín queë́liꞌ ca ridxín caꞌ idútë yödzölió.
Run dxin,
en raca libán que,
idútë yödzölió,
laꞌ tuz ca raca ga zóaliꞌ,
dza niꞌte ga ridxintë naꞌa dza,
cateꞌ niꞌ biyö́niliꞌ,
en bénbëꞌëliꞌ idútë le ruzáꞌ ládxëꞌë queë́ruꞌ Dios.
7 Epafras,
bönniꞌ nadxíꞌiruꞌ-nëꞌ,
busë́dinëꞌ libíꞌiliꞌ lë ni.
Lëꞌ rúnlenëꞌ netuꞌ tsözxö́n dxin,
en rácalenëꞌ libíꞌiliꞌ.
Náquiëꞌ huen dxin idú queëꞌ Cristo.
8 Bönniꞌ ni gudíxjöiꞌinëꞌ netuꞌ ca nadxíꞌiliꞌ luzáꞌaliꞌ,
ateꞌ runëꞌ Dios Böꞌ Láꞌayi ga gaca gunliꞌ caní.
9 Que lë ni naꞌ netuꞌ caꞌ,
dza niꞌte ga ridxintë naꞌa dza,
tuꞌ réquibeꞌetuꞌ lë ni,
bitiꞌ caꞌ rizóa dxituꞌ rulidztuꞌ-nëꞌ Dios,
en rinábituꞌ-nëꞌ gácalenëꞌ libíꞌiliꞌ,
en gunëꞌ ga gúnbëꞌëliꞌ idú le rë́ꞌëni quézinëꞌ Lëꞌ,
en gunnëꞌ queë́liꞌ yúguꞌtë yöl-laꞌ rácadaꞌ,
en yöl-laꞌ réajniꞌi le riguꞌë Dios Böꞌ Láꞌayi rëꞌu.
10 Caní rinábituꞌ-nëꞌ para gaca gunliꞌ ca ral-laꞌ ilún nupa néquiguequi queëꞌ Xanruꞌ,
gunliꞌ yúguꞌtë le raza ládxëꞌë Lëꞌ,
en séquiꞌliꞌ gunliꞌ yúguꞌtë le naca dxiꞌa,
en gácarö idú ca núnbëꞌëliꞌ-nëꞌ Dios.
11 Rinábituꞌ-nëꞌ utipëꞌ ládxiꞌliꞌ,
en gunnëꞌ queë́liꞌ yöl-laꞌ huáca idú queëꞌ,
para gaca guáꞌ ilenliꞌ yúguꞌtë,
en cö́zaliꞌ zxön ladxiꞌ,
en udzeja ládxiꞌliꞌ.
12 Lu yöl-laꞌ rudzeja queë́liꞌ guliꞌguíëꞌ Dios Xuz:
“Xclenuꞌ”,
tuꞌ budödëꞌ lu náꞌaruꞌ gataꞌ queë́ruꞌ lataj lu beníꞌ queëꞌ,
en gunruꞌ tsözxö́n nupa néquiguequi quez queëꞌ.
13 Dios Xuz naꞌ busölë́ꞌ rëꞌu lu naꞌ nu rinná bëꞌ lataj chul-la,
en budödëꞌ rëꞌu ga naꞌ rinná bëꞌë Zxíꞌini cazëꞌ,
Nu nadxíꞌinëꞌ.
14 Zxíꞌinëꞌ naꞌ böáꞌuëꞌ rëꞌu,
tuꞌ gútiëꞌ uláz queë́ruꞌ,
ateꞌ buniti lahuëꞌ rëꞌu ca naca dul-laꞌ gubágaꞌruꞌ.
Nuhuöácaruꞌ tuz len Dios tuꞌ gútiëꞌ Cristo uláz queë́ruꞌ
15 Cristo náquiëꞌ tuz ca náquiëꞌ Dios caz,
Nu bitiꞌ gaca iléꞌeruꞌ.
Zoa cazëꞌ Lëꞌ zíꞌatëlö ca yúguꞌtë le benëꞌ Dios.
16 Lu nëꞌë Cristo benëꞌ Dios yúguꞌtë le dë,
le nacuáꞌ lúzxiba,
en le nacuáꞌ luyú,
yuguꞌ le riléꞌeruꞌ,
en yuguꞌ le cabí gaca iléꞌeruꞌ,
lë naꞌ nácagaca lataj lo,
en yuguꞌ yöl-laꞌ unná bëꞌ,
en le nápagaca yöl-laꞌ zxön,
en yuguꞌ yöl-laꞌ huáca que yehuaꞌ yubá,
en que luyú ni.
Yúguꞌtë benëꞌ Dios lu nëꞌë Cristo para uziꞌë xibé Lëꞌ.
17 Cristo zoa cazëꞌ zíꞌalö ca yúguꞌtë le dë,
ateꞌ yúguꞌtë nacuáꞌticaꞌsö niꞌa queëꞌ Lëꞌ.
18 Cristo náquiëꞌ Xángaca bönachi queëꞌ,
en runödzjëꞌ quégaquiëꞌ yöl-laꞌ naꞌbán.
Náquiëꞌ caꞌ Nu gusí lo bubán tsaz lu yöl-laꞌ guti.
Zíꞌalö Lëꞌ bubanëꞌ tsaz lu yöl-laꞌ guti para tsë́pisëtërëꞌ ca yúguꞌtë le dë.
19 Caní guca,
tuꞌ guyaza ládxëꞌë Dios Xuz sóalen Cristo idútë le naca cazëꞌ Lëꞌ.
20 Niꞌa que le benëꞌ Cristo,
Dios benëꞌ ga gaca uluꞌhuöáca tuz len Lëꞌ yúguꞌtë le dë,
le nacuáꞌ luyú,
en le nacuáꞌ lúzxiba.
Bunëꞌ léguequi tuz len Lëꞌ tuꞌ bulaljëꞌ Cristo xichönëꞌ cateꞌ gútiëꞌ lëꞌe yaga cruz.
21 Libíꞌiliꞌ,
zíꞌatëlö nuláꞌalenliꞌ-nëꞌ Dios,
en gúcaliꞌ ca yuguꞌ bönniꞌ bitiꞌ taꞌléꞌenëꞌ Dios dxiꞌa lu icja ládxiꞌdoꞌoliꞌ niꞌa que döꞌ biáꞌaliꞌ,
pero naꞌa chibunëꞌ libíꞌiliꞌ tuz len Lëꞌ.
22 Caní guca,
tuꞌ budödi cuinëꞌ Cristo,
en gútiëꞌ uláz queë́liꞌ para gaca usudxinëꞌ libíꞌiliꞌ lahuëꞌ Dios,
nácaliꞌ quez queëꞌ,
en idú dxiꞌa,
ateꞌ cuntu nu bi gaca innë́ queë́liꞌ.
23 Caní gaca channö ugáꞌanaliꞌ tsutsu ca réajlëꞌëliꞌ Cristo.
Gácaliꞌ ca tu yuꞌu zxoa ga rëꞌ xilibi zöꞌö que,
en bitiꞌ tseaj böꞌ ládxiꞌdoꞌoliꞌ ca runliꞌ löza didzaꞌ dxiꞌa biyö́niliꞌ,
lë naꞌ raca libán que idútë yödzölió le benëꞌ Dios zxan lúzxiba.
Dios buzóëꞌ nedaꞌ,
Pablo,
para gacaꞌ huen dxin que didzaꞌ dxiꞌa naꞌ.
Dxin budödëꞌ Dios lu nëꞌë Pablo
24 Rudzéjadaꞌ naꞌa ca naca le riguíꞌi rizácaꞌa para gácalenaꞌ libíꞌiliꞌ,
en ruúdxi rizáꞌa lu idútë le nacaꞌ le riguíꞌi rizácaꞌlenaꞌ tsözxö́n Cristo uláz que idú le naca cazëꞌ Lëꞌ,
le naca bönachi queëꞌ.
25 Dios benëꞌ ga nacaꞌ huen dxin quégaca bönachi queëꞌ Cristo,
ateꞌ runaꞌ xichinëꞌ Dios,
le budödëꞌ lu naꞌa gunaꞌ para gácalenaꞌ libíꞌiliꞌ,
quíxjöꞌa idú ca naca xtídzëꞌë Dios.
26 Ruzéajniꞌidaꞌ bönachi le nagachiꞌ,
lë naꞌ bigachiꞌ dza niꞌte,
ateꞌ cuntu nu benbëꞌ le,
pero naꞌa Dios chibuluíꞌinëꞌ bönachi néquiguequi quez queëꞌ ca naca que.
27 Dios gúꞌuni quézinëꞌ gunëꞌ ga ilúnbëꞌe yuguꞌ yöl-laꞌ tsahuiꞌ idú que le nagachiꞌ ni,
lë naꞌ taꞌyöni bönachi izáꞌa.
Caní rnna lë naꞌ bigachiꞌ:
“Cristo náquiëꞌ tuz len libíꞌiliꞌ,
en náquiëꞌ le naca löza idéliꞌliꞌ tsazliꞌ lu beníꞌ queëꞌ.”
28 Runtuꞌ libán queëꞌ Cristo,
en rusáꞌatuꞌ ládxiꞌgaca yúguꞌtë bönachi,
ateꞌ rusë́dituꞌ léguequi idútë yöl-laꞌ réajniꞌi,
para gaca usudxintuꞌ yúguꞌtë bönachi lahuëꞌ Dios,
naca idú ládxiꞌgaca tuꞌ nácagaca tuz len Jesucristo.
29 Para gaca caní runaꞌ dxin,
en ruíꞌi ládxaꞌa údxi gunaꞌ lë ni,
rugúnaꞌ dxin yöl-laꞌ huáca idú naꞌ runnëꞌ Cristo quiaꞌ.