2
Rë́ꞌëndaꞌ inö́ziliꞌ ruíꞌidaꞌ ládxaꞌa runaꞌ le gácalen libíꞌiliꞌ,
encaꞌ le gácalen bönachi yödzö Laodicea,
en le gácalen caꞌ yúguꞌtë nupa bitiꞌ ilaꞌléꞌeni nedaꞌ.
2 Runaꞌ caní para ilaꞌdipa ládxiꞌgaquiëꞌ,
en iláquiëꞌ tuz lu yöl-laꞌ nadxíꞌi,
en uluꞌziꞌë xibé yúguꞌtë yöl-laꞌ tsahuiꞌ que yöl-laꞌ run löza idú le runna yöl-laꞌ réajniꞌi queë́ruꞌ.
Caní raca para ilúnbëꞌë le bigachiꞌ queëꞌ Dios Xuz,
lë naꞌ naca cazëꞌ Cristo.
3 Lu nëꞌë Cristo ruzíꞌiruꞌ xibé yúguꞌtë yöl-laꞌ tsahuiꞌ que yöl-laꞌ rácadaꞌ,
en yöl-laꞌ réajniꞌi.
4 Lë ni reaꞌ libíꞌiliꞌ,
para cabí gaca nu siꞌ yeꞌe libíꞌiliꞌ,
nu güíꞌi didzaꞌ tséajlëꞌëruꞌ le cabí nácatë.
5 Sal-laꞌ zoaꞌ ziꞌtuꞌ ga zóaliꞌ lu idútë le nacaꞌ,
lu böꞌ naca cazaꞌ zóalenaꞌ libíꞌiliꞌ,
en rudzéjadaꞌ tuꞌ riléꞌedaꞌ röꞌö xibá queë́liꞌ,
en nácaliꞌ tsutsu ca réajlëꞌëliꞌ Cristo.
6 Que lë ni naꞌ,
ca naꞌ guzxíꞌ lu náꞌaliꞌ Xanruꞌ Jesucristo,
lëscaꞌ caní ral-laꞌ gunliꞌ yúguꞌtë le gunliꞌ,
dzáguiëꞌ Lëꞌ libíꞌiliꞌ.
7 Ca naꞌ nun ga rëꞌ luí yaga,
encaꞌ ca naꞌ nayás zöꞌö lu xilibi zöꞌö,
guliꞌsóalen Cristo.
Guliꞌsóa tsutsu ca réajlëꞌëliꞌ Lëꞌ,
ca naꞌ chinazë́daliꞌ.
Guliꞌguíëticaꞌsëꞌ Dios:
“Xclenuꞌ.”
Le cubi nácaruꞌ tuꞌ dzágaruꞌ-nëꞌ Cristo
8 Guliꞌgún chiꞌi cuinliꞌ para cabí güíꞌiliꞌ lataj nu siꞌ yeꞌe libíꞌiliꞌ,
nu ugún dxin yöl-laꞌ réajniꞌi quégaca bönachi,
en yuguꞌ didzaꞌ taꞌnnasëꞌ nácagaca idútë li,
ca naca le taꞌlë́bi tun bönachi,
en ca naca le tuꞌsedi bönachi le naca que yödzölió ni,
en calëga le naca xtídzëꞌë Cristo.
9 Idútë le naca cazëꞌ Dios zóalen Cristo sal-laꞌ böáquiëꞌ bönachi,
10 ateꞌ libíꞌiliꞌ nápaliꞌ idútë le náquiëꞌ Dios tuꞌ dzágaliꞌ-nëꞌ Cristo,
Nu rinná beꞌe yúguꞌtë nupa taꞌnná bëꞌ,
en yuguꞌ bönniꞌ dë lu náꞌagaquiëꞌ.
11 Narugu lu xipë́laꞌgaquiëꞌ bönniꞌ judío le ruluíꞌi dáꞌgaquiëꞌ Dios,
pero libíꞌiliꞌ,
tuꞌ dzágaliꞌ Cristo,
zóalen libíꞌiliꞌ le ruluíꞌi néquiliꞌ queëꞌ Dios,
le cabí néquini lu niꞌa lu náꞌagaca bönachi.
Yuguꞌ bönniꞌ judío tuꞌgǘëꞌ tu guídidoꞌ,
pero libíꞌiliꞌ,
nadúa idútë yöl-laꞌ bönachi queë́liꞌ le bénlenliꞌ dul-laꞌ.
Caní naca queë́liꞌ tuꞌ benliꞌ tsözxö́n Cristo cateꞌ gútiëꞌ lëꞌe yaga cruz.
12 Cateꞌ bidílaliꞌ nisa guca ca bigáchiꞌlenliꞌ-nëꞌ Cristo tsözxö́n yeru ba,
en bubánlenliꞌ-nëꞌ tsözxö́n tuꞌ guyéajlëꞌëliꞌ Dios,
len yöl-laꞌ huáca queëꞌ busubanëꞌ Cristo lu yöl-laꞌ guti.
13 Zíꞌatëlö gúcaliꞌ ca nupa chinátigaca tuꞌ nözi dul-laꞌ gubágaꞌliꞌ,
en bitiꞌ guzóalen libíꞌiliꞌ le ruluíꞌi néquiliꞌ queëꞌ Dios,
pero naꞌa Dios nunëꞌ ga nabánlenliꞌ-nëꞌ tsözxö́n Cristo,
en buniti lahuëꞌ libíꞌiliꞌ ca naca yúguꞌtë dul-laꞌ gubágaꞌliꞌ.
14 Dios busúluëꞌ yuguꞌ le nabágaꞌruꞌ le nazúajgaca lu xibá queëꞌ,
lë naꞌ tuꞌzegui rëꞌu didzaꞌ.
Bugǘëꞌ lë naꞌ nabágaꞌruꞌ,
en budë́ꞌë le lëꞌe yaga cruz ca tu le nabáguëꞌë Cristo.
15 Cateꞌ gútiëꞌ Cristo lëꞌe yaga cruz,
bugǘëꞌ yöl-laꞌ huáca unná bëꞌ quégaca böꞌ xihuiꞌ unná bëꞌ,
en quégaca böꞌ xihuiꞌ dë lu në́ꞌeguequi yöl-laꞌ huáca,
tuꞌ buluꞌe lahui le nácagaca böꞌ xihuiꞌ naꞌ,
en bugǘëꞌ idutë le gutaꞌ lu në́ꞌeguequi.
Ral-laꞌ güíꞌi ládxiꞌruꞌ le naca que yehuaꞌ yubá
16 Que lë ni naꞌ,
bitiꞌ güíꞌiliꞌ lataj nu uzegui libíꞌiliꞌ didzaꞌ ca naca le rëꞌaj ráguliꞌ,
o tuꞌ cabí runliꞌ zxön yuguꞌ dza laní,
o tuꞌ cabí runliꞌ zxön beoꞌ siꞌ ruzë́,
o tuꞌ cabí runliꞌ zxön yuguꞌ dza láꞌayi quégaca bönachi.
17 Yúguꞌtë lë ni naca ca tu bixín que le ral-laꞌ gaca,
ateꞌ le ruluíꞌi yúguꞌtë lë ni náquiëꞌ Cristo caz.
18 Bitiꞌ güíꞌiliꞌ lataj nu gun ga unítiliꞌ le ral-laꞌ síꞌiliꞌ,
nu rundaꞌ bayudxi ga ilaca nöxaj ládxiꞌgaca bönachi,
en ilún zxön yuguꞌ gubáz láꞌayi.
Tuꞌgutsaꞌ cuíngaquiëꞌ le cabí bilaꞌléꞌenëꞌ,
en tun ba zxön cuíngaquiëꞌ ca naca le dzö́ꞌösö ícjagaquiëꞌ lu yöl-laꞌ bönáchisö quégaquiëꞌ.
19 Nu run caní bitiꞌ daꞌ Cristo.
Náquiëꞌ Xanruꞌ,
en ruzóëꞌ tsutsu idútë le naca cazëꞌ,
le nácaruꞌ rëꞌu.
Rugahuëꞌ le,
en runëꞌ ga naca tuz niꞌa que le zeaj lu dxita lu bin,
ateꞌ rizxö́n idútë le naca cazëꞌ ca rë́ꞌënëꞌ Dios uxönëꞌ le.
20 Libíꞌiliꞌ chinátilenliꞌ-nëꞌ Cristo para cabirö ilaꞌnná beꞌe xibá que yödzölió libíꞌiliꞌ.
¿Bizx que runliꞌ tsca ni nácaliꞌ que yödzölió,
en runliꞌ ca taꞌnná bëꞌ xibá que?
21 Caní taꞌnná yuguꞌ xibá que yödzölió ni:
Bitiꞌ quítjanuꞌ lë ni.
Bitiꞌ gaguꞌ lë naꞌ.
Bitiꞌ canuꞌ iaꞌtú le dë.
22 Yúguꞌtë lë ni ilaꞌniti cateꞌ chibugunruꞌ léguequi dxin.
Caní nácagaca le taꞌnná bëꞌ bönachi,
en yuguꞌ xibá nazíꞌ lu në́ꞌeguequi.
23 Le nácatë,
yuguꞌ xibá ni,
téqui bönachi nápagaca yöl-laꞌ réajniꞌi.
Tun ga tuꞌluíꞌi cuínguequi ca bönachi yudoꞌ,
en ga tuꞌluíꞌi cuínguequi nöxaj ladxiꞌ,
en ga tuꞌsacaꞌ zíꞌgaca idútë le zeaj naca caz,
pero xibá ni bitiꞌ caꞌ tácalen rëꞌu para gaca inná béꞌeruꞌ yuguꞌ le rizë́ ládxiꞌruꞌ lu yöl-laꞌ bönáchisö queë́ruꞌ.