2 Rë́ticaꞌstuꞌ-nëꞌ Dios:

“Xclenuꞌ” cateꞌ röjnetuꞌ ca naca queë́liꞌ yúguꞌtëliꞌ.

Röjnéticaꞌstuꞌ libíꞌiliꞌ,

bi rinábituꞌ-nëꞌ Dios niꞌa queë́liꞌ cateꞌ rulidztuꞌ-nëꞌ.

3 Röjnéticaꞌstuꞌ lahuëꞌ Xúziruꞌ Dios ca naca le runliꞌ tuꞌ réajlëꞌëliꞌ Cristo,

en ca naca dxin runliꞌ tuꞌ nadxíꞌiliꞌ-nëꞌ,

en ca naꞌ nácaticaꞌsiliꞌ tsutsu tuꞌ runliꞌ löza Xanruꞌ Jesucristo.

4 Böchiꞌ luzáꞌatuꞌ,

Dios nadxíꞌinëꞌ libíꞌiliꞌ,

ateꞌ nöztuꞌ gurö́ cazëꞌ Lëꞌ libíꞌiliꞌ.

5 Caní naca,

tuꞌ bidxín queë́liꞌ didzaꞌ dxiꞌa runtuꞌ libán que,

calëga len dídzaꞌsö,

pero lëscaꞌ len yöl-laꞌ huáca bidxín queë́liꞌ,

ateꞌ Dios Böꞌ Láꞌayi benëꞌ tsutsu le,

ateꞌ idú ládxiꞌliꞌ benliꞌ löza le.

Nöz quéziliꞌ ca gúcatuꞌ ga zóaliꞌ tuꞌ nadxíꞌituꞌ libíꞌiliꞌ.

6 Libíꞌiliꞌ butsáꞌ cuinliꞌ,

ateꞌ runliꞌ ca runtuꞌ netuꞌ,

encaꞌ ca benëꞌ Xanruꞌ,

tuꞌ guzxíꞌ lu náꞌaliꞌ xtídzëꞌë,

ateꞌ sal-laꞌ gudíꞌi guzxácaꞌdaꞌaliꞌ,

budzéjaliꞌ tuꞌ zóalenëꞌ Dios Böꞌ Láꞌayi libíꞌiliꞌ.

7 Caní naca,

chinácaliꞌ tu le naca bëꞌ lógaca yúguꞌtë bönachi taꞌyéajlëꞌ Cristo nacuáꞌ luyú Macedonia,

en luyú Acaya.

8 Caní naca,

tuꞌ guzë́ xtídzëꞌë Xanruꞌ niꞌa queë́liꞌ.

Calë́gasö luyú Macedonia,

en luyú Acaya,

pero lëscaꞌ yúguꞌtë lataj guzë́ didzaꞌ ca réajlëꞌëliꞌ Dios.

Caní naca,

bitiꞌ bi run bayudxi innatuꞌ,

9 tuꞌ taꞌguixjöꞌ laꞌ léguequisö bönachi niꞌ queë́tuꞌ ca benliꞌ netuꞌ bal,

en ca naꞌ butsáꞌ cuinliꞌ.

Bucáꞌanaliꞌ yuguꞌ budóꞌ guiö́j budóꞌ yaga,

en böácaliꞌ queëꞌ Dios para gunliꞌ xichinëꞌ Dios ban,

Nu naca idú Dios.

10 Naꞌa,

ribö́zaliꞌ dza huödëꞌ Zxíꞌinëꞌ Dios,

irúajëꞌ yehuaꞌ yubá.

Dios busubanëꞌ Lëꞌ lu yöl-laꞌ guti.

Nu ni naca Jesús,

Nu rusölá rëꞌu lu dul-laꞌ,

para cabí soa le gun ga ichúguiëꞌ Dios queë́ruꞌ dza siꞌ zaꞌ.