DIDZAꞌ BUROPI GUSÖ́L-LËꞌË PABLO YÖDZÖ TESALÓNICA
Pablo rugapëꞌ Dios bönachi queëꞌ Cristo nacuáꞌ Tesalónica
1
Nedaꞌ,
Pablo,
rugapaꞌ Dios libíꞌiliꞌ,
zóaliꞌ Tesalónica.
Nácaliꞌ queëꞌ Xúziruꞌ Dios,
encaꞌ queëꞌ Xanruꞌ Jesucristo.
Silvano,
en biꞌi Timoteo dzágagaquiëꞌ nedaꞌ.
2 Rinábituꞌ Xúziruꞌ Dios,
en Xanruꞌ Jesucristo,
uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Dios ichúguiëꞌ quégaca bönachi dul-laꞌ ilaꞌnítigaca cateꞌ huödëꞌ Cristo
3 Ral-laꞌ guíëticaꞌstuꞌ-nëꞌ Dios:
“Xclenuꞌ” ca naca queë́liꞌ,
böchiꞌ luzáꞌatuꞌ,
ateꞌ naca dxiꞌa guntuꞌ caní,
tuꞌ zeaj rácarö idú ca réajlëꞌëliꞌ-nëꞌ Dios.
Lëscaꞌ caní,
ca nadxíꞌiliꞌ luzáꞌaliꞌ tuliꞌ iaꞌtuliꞌ zeaj rácarö idú.
4 Que lë ni naꞌ,
len yöl-laꞌ rudzeja riguíxjöꞌötuꞌ ca naca queë́liꞌ lógaca bönachi queëꞌ Dios ni,
tuꞌ ribö́zaliꞌ zxön ladxiꞌ,
en réajlëꞌëliꞌ Dios sal-laꞌ taꞌbíadaꞌ ládxiꞌgaca bönachi libíꞌiliꞌ,
en riguíꞌi rizácaꞌdaꞌaliꞌ,
pero ruáꞌ rilenliꞌ yúguꞌtë.
5 Yuguꞌ lë ni taca bëꞌ naca tsahuiꞌ ca ruchiꞌa rusörö́ëꞌ Dios bönachi.
Ruꞌë lataj riguíꞌi rizácaꞌliꞌ naꞌa,
para gácaliꞌ lesacaꞌ tsázaliꞌ ga niꞌ rinná bëꞌë Lëꞌ.
6 Naca tsahuiꞌ ca gunëꞌ Dios,
ubiꞌë quégaca nupa tuꞌsacaꞌ ziꞌ libíꞌiliꞌ,
gunëꞌ ga ilaꞌguíꞌi ilaꞌzacaꞌ nupa naꞌ.
7 Iaꞌstú,
libíꞌiliꞌ riguíꞌi rizácaꞌliꞌ naꞌa,
ateꞌ ubiꞌë Dios queë́liꞌ,
gunëꞌ ga uzíꞌ ládxiꞌliꞌ tsözxö́n len netuꞌ,
dza niꞌ iláꞌ lahuëꞌ Xanruꞌ Jesucristo,
cateꞌ irúajëꞌ yehuaꞌ yubá.
Yuguꞌ gubáz láꞌayi niꞌa nëꞌë ilunëꞌ Lëꞌ tsözxö́n,
en uluꞌluꞌë lahui yöl-laꞌ huáca zxön queëꞌ.
8 Iláꞌ lahuëꞌ Cristo dza niꞌ ca tu guíꞌ zxön cateꞌ niꞌ gunëꞌ ziꞌ nupa bitiꞌ núnbëꞌgaca Dios,
en bitiꞌ túngaca ca rnna didzaꞌ dxiꞌa queëꞌ Xanruꞌ Jesucristo.
9 Yuguꞌ bönniꞌ caní,
uzíꞌ lëbëꞌ légaquiëꞌ,
ateꞌ tsaz tsöjtsázagaquiëꞌ lu guíꞌ gabila.
Ilaꞌcuitëꞌ tsaz lahuëꞌ Xanruꞌ,
ga naláꞌgaca yöl-laꞌ zxön queëꞌ,
en yöl-laꞌ huáca queëꞌ.
10 Caní gaca dza niꞌ cateꞌ huödëꞌ para gaca queëꞌ yöl-laꞌ ba niꞌa que le nácagaca bönachi láꞌayi queëꞌ,
ateꞌ uluꞌbani niꞌa que le benëꞌ ga nácagaca yúguꞌtë nupa taꞌyéajlëꞌ Lëꞌ.
Caní gaca caꞌ queë́liꞌ tuꞌ guyéajlëꞌëliꞌ le bentuꞌ ba nalí que loliꞌ ca naca queëꞌ Jesús.
11 Que lë ni naꞌ caꞌ,
rulídzaticaꞌstuꞌ-nëꞌ Dios queë́ruꞌ,
en rinábituꞌ-nëꞌ gácalenëꞌ libíꞌiliꞌ,
en gunëꞌ ga gácaliꞌ lesacaꞌ idéliꞌliꞌ lë naꞌ bulidzëꞌ libíꞌiliꞌ para uzíꞌiliꞌ xibé.
Lëscaꞌ rinábituꞌ-nëꞌ gunëꞌ ga gaca idú yúguꞌtë le ruíꞌi ládxiꞌliꞌ gunliꞌ le naca dxiꞌa,
en yúguꞌtë dxin runliꞌ lu yöl-laꞌ réajlëꞌ queë́liꞌ Lëꞌ.
Len yöl-laꞌ huáca queëꞌ Dios huáca gunliꞌ lë ni.
12 Caní gaca,
gaca yöl-laꞌ ba que Lëꞌ Xanruꞌ Jesucristo niꞌa que le runliꞌ,
ateꞌ gácaliꞌ libíꞌiliꞌ bicaꞌ ba niꞌa que le gunëꞌ Lëꞌ,
gaca ca naca le buzáꞌ ládxëꞌë queë́liꞌ Dios queë́ruꞌ,
encaꞌ Xanruꞌ Jesucristo.