Uluíꞌi lahuëꞌ Bönniꞌ Xihuiꞌ
2
Naꞌa,
ca naca que dza huödëꞌ Xanruꞌ Jesucristo,
en ca gaca,
udutubëꞌ rëꞌu queëꞌ Lëꞌ,
rátaꞌyutuꞌ loliꞌ,
böchiꞌ luzáꞌatuꞌ,
2 para cabí güíꞌiliꞌ lataj nu gun chixi libíꞌiliꞌ ca nácagaca le guzxíꞌ lu náꞌaliꞌ.
Bitiꞌ cuéqui böniga icja ládxiꞌdoꞌoliꞌ niꞌa que bi taꞌnnë́ꞌ bönniꞌ taꞌzíꞌ yëꞌë,
taꞌnnë́ꞌ zóalenëꞌ Dios Böꞌ Láꞌayi légaquiëꞌ,
o niꞌa que bi didzaꞌ tuíꞌi bönachi,
o niꞌa que bi nazúaj tu lu guichi taꞌnnë́ꞌ netuꞌ gusö́l-laꞌtuꞌ,
le rnna:
“Chigudödi dza huödëꞌ Xanruꞌ.”
3 Bitiꞌ caꞌ güíꞌiliꞌ lataj nu siꞌ yeꞌe libíꞌiliꞌ,
tuꞌ cabí idxín dza niꞌ huödëꞌ Jesús channö cabí ilaꞌláꞌ lahui zíꞌalö zián nupa ilaꞌdáꞌbagaꞌ Dios,
ateꞌ iláꞌ lahuëꞌ Bönniꞌ Xihuiꞌ,
bönniꞌ naꞌ ral-laꞌ tsáziëꞌ lu guíꞌ gabila.
4 Bönniꞌ ni uzáguëꞌë,
ateꞌ lu yöl-laꞌ run ba zxön cuinëꞌ táꞌbaguëꞌë yúguꞌtë le nequi queëꞌ Dios,
o le tun zxön bönachi lu yöl-laꞌ run Dios bal quéguequi.
Gunëꞌ bönniꞌ naꞌ caní ga idxintë cöꞌë ca Dios caz lu yudoꞌ ga naca xilatjëꞌ Dios,
en gun cuinëꞌ ca Dios.
5 ¿Naruꞌ cabí röjneliꞌ busiyöndaꞌ libíꞌiliꞌ yuguꞌ lë ni cateꞌ niꞌ zóalenaꞌ libíꞌiliꞌ?
6 Naꞌa,
núnbëꞌëliꞌ Nu ruzagaꞌ xinözëꞌ Bönniꞌ Xihuiꞌ naꞌ,
para cabí iláꞌ lahuëꞌ zíꞌalö ga idxinrö dza queëꞌ.
7 Chirún dxin le nagachiꞌ que le naca xihuiꞌ,
pero náꞌatë zoa Nu ruzagaꞌ xinözëꞌ Bönniꞌ Xihuiꞌ naꞌ ga idxinrö dza ucuíta cuini Nu naꞌ ruzagaꞌ xinözëꞌ.
8 Níꞌirö iláꞌ lahuëꞌ Bönniꞌ Xihuiꞌ naꞌ,
ateꞌ Xanruꞌ Jesucristo ucul-lëꞌ lëꞌ len böꞌ irúaj ruꞌë,
en usunítiëꞌ lëꞌ len le tsëpi yösa beníꞌ que dza huödëꞌ.
9 Cateꞌ idxinëꞌ Bönniꞌ Xihuiꞌ naꞌ,
len yöl-laꞌ huáca que Satanás tuꞌ xihuiꞌ iláꞌ lahuëꞌ.
Len yöl-laꞌ huáca que le cabí nácatë,
gunëꞌ yúguꞌtë yöl-laꞌ huáca zxön,
en yúguꞌtë le ilaca bëꞌ,
en yúguꞌtë le ilún ga uluꞌbani bönachi.
10 Len yöl-laꞌ huáca que le cabí nácatë,
gunëꞌ caní lógaca nupa ilaꞌniti tuꞌ cabí gulaꞌzíꞌ lu në́ꞌeguequi idú ládxiꞌguequi le naca idútë li,
para uluꞌláguequi.
11 Que lë ni naꞌ Dios guꞌë lataj idxín quéguequi tu nu run yöl-laꞌ huáca,
nu siꞌ yeꞌe léguequi para ilaꞌyéajlëꞌ le cabí nácatë.
12 Caní gaca para ilaꞌbagaꞌ xíguiaꞌ yúguꞌtë nupa bitiꞌ gulaꞌyéajlëꞌ le naca idútë li,
pero gulaꞌyaza ládxiꞌgaca le cabí naca tsahuiꞌ.
Nupa gurö́ cazëꞌ Dios para uluꞌlágaca
13 Böchiꞌ luzáꞌatuꞌ,
libíꞌiliꞌ naꞌ nadxíꞌinëꞌ Xanruꞌ libíꞌiliꞌ,
ral-laꞌ guíëticaꞌstuꞌ-nëꞌ Dios:
“Xclenuꞌ” niꞌa que le naca queë́liꞌ,
tuꞌ chigurö́ cazëꞌ Dios libíꞌiliꞌ dza niꞌte para uláliꞌ niꞌa que le runëꞌ Dios Böꞌ Láꞌayi,
para gácaliꞌ idú tsahuiꞌ tuꞌ réajlëꞌëliꞌ le naca idútë li.
14 Para gaca caní queë́liꞌ,
Dios caz bulidzëꞌ libíꞌiliꞌ,
para idéliꞌliꞌ gunliꞌ tsözxö́n Xanruꞌ Jesucristo lu beníꞌ queëꞌ.
Caní gaca niꞌa que didzaꞌ dxiꞌa runtuꞌ libán que.
15 Que lë ni naꞌ,
böchiꞌ luzáꞌatuꞌ,
guliꞌsóa tsutsu,
en guliꞌgún chiꞌi didzaꞌ naꞌ nazë́daliꞌ,
le bë́ꞌlentuꞌ libíꞌiliꞌ,
en buzúajtuꞌ queë́liꞌ lu guichi.
16,17 Rinábituꞌ-nëꞌ Xanruꞌ Jesucristo, en Xúziruꞌ Dios, utipëꞌ ládxiꞌliꞌ, en gunëꞌ ga gácaliꞌ tsutsu ca naca yúguꞌtë le naca tsahuiꞌ runliꞌ, en yúguꞌtë didzaꞌ dxiꞌa ruíꞌiliꞌ. Lë cazëꞌ nadxíꞌinëꞌ rëꞌu, en bennëꞌ queë́ruꞌ le ruhuíꞌ zxö́nticaꞌsö rëꞌu, en le naca dxiꞌa runruꞌ löza, yuguꞌ lë naꞌ buzáꞌ ládxëꞌë Dios queë́ruꞌ.