Le ral-laꞌ inábiruꞌ-nëꞌ Dios
3
Iaꞌstú,
böchiꞌ luzáꞌatuꞌ,
buliꞌlidzëꞌ Dios,
en inábiliꞌ-nëꞌ gácalenëꞌ netuꞌ,
runtuꞌ libán ni,
para së xtídzëꞌë Xanruꞌ,
ateꞌ ilún le bal bönachi,
para gaca ni ca naꞌ guca ga niꞌ zóaliꞌ libíꞌiliꞌ.
2 Inábiliꞌ-nëꞌ caꞌ para ulatuꞌ lu náꞌagaquiëꞌ bönniꞌ xihuiꞌ tuáꞌ döꞌ,
tuꞌ cabí taꞌyéajlëꞌ yúguꞌtë bönachi Dios.
3 Naꞌa,
tuꞌ runëꞌ Xanruꞌ ca rnnëꞌ,
gunëꞌ ga gácaliꞌ tsutsu,
en gun chiꞌë libíꞌiliꞌ,
para cabí idzunliꞌ lu naꞌ tuꞌ xihuiꞌ.
4 Ruzxöni ládxiꞌtuꞌ-nëꞌ Xanruꞌ ca naca queë́liꞌ,
gunliꞌ yuguꞌ lë ni siꞌ gunábituꞌ libíꞌiliꞌ,
ca naꞌ chirunliꞌ.
5 Rinábituꞌ-nëꞌ Xanruꞌ usë́ꞌë ládxiꞌliꞌ para idxíꞌiliꞌ-nëꞌ Dios,
en cö́zaliꞌ zxön ladxiꞌ ca naꞌ benëꞌ Cristo.
Ca run bayudxi gunruꞌ dxin
6 Niꞌa que Lëꞌ Xanruꞌ Jesucristo ruchíꞌatuꞌ libíꞌiliꞌ,
böchiꞌ luzáꞌatuꞌ,
icuítaliꞌ ga nacuꞌë böchiꞌ luzáꞌaruꞌ taꞌdasëꞌ caꞌ,
en bitiꞌ tunëꞌ ca naca xibá busédituꞌ libíꞌiliꞌ.
7 Nöz quéziliꞌ ral-laꞌ gunliꞌ ca runtuꞌ netuꞌ.
Bitiꞌ gudásituꞌ caꞌ netuꞌ ga niꞌ zóaliꞌ.
8 Bitiꞌ gudágusötuꞌ le bénnaliꞌ queë́tuꞌ,
pero lu yöl-laꞌ ruúbi ruguíꞌi,
en lu yöl-laꞌ ricuidiꞌ bentuꞌ dxin rëla,
en te dza para cabí usacaꞌ zíꞌituꞌ nituliꞌ libíꞌiliꞌ.
9 Caní bentuꞌ para gácatuꞌ loliꞌ ca tu le ruluíꞌi libíꞌiliꞌ ca ral-laꞌ gunliꞌ,
sal-laꞌ dë lu naꞌtuꞌ inábatuꞌ bi gunliꞌ queë́tuꞌ.
10 Lëscaꞌ cateꞌ niꞌ guzóalentuꞌ libíꞌiliꞌ,
buchíꞌatuꞌ libíꞌiliꞌ caní,
le rnna:
“Channö cabí rë́ꞌënëꞌ nu bönniꞌ gunëꞌ dxin,
bitiꞌ güíꞌiliꞌ le gahuëꞌ.”
11 Canísö rnnatuꞌ tuꞌ riyö́nituꞌ nútsaꞌgaquiëꞌ ládjaliꞌ yuguꞌ bönniꞌ taꞌdasëꞌ caꞌ,
bitiꞌ bi dxin tunëꞌ,
pero taꞌdasëꞌ caꞌ bi tun bi taꞌnnë́ꞌ.
12 Niꞌa queëꞌ Xanruꞌ Jesucristo ruchíꞌatuꞌ yuguꞌ bönniꞌ tunëꞌ caní,
en richízatuꞌ icja nágagaquiëꞌ ilunëꞌ dxin lu yöl-laꞌ riböza dxíꞌadoꞌ,
para gaca ilahuëꞌ le nequi quégacasëꞌ.
13 Naꞌa,
böchiꞌ luzáꞌatuꞌ,
bitiꞌ soa dxiliꞌ,
gúnticaꞌsiliꞌ le naca dxiꞌa.
14 Channö nútiꞌtës bönniꞌ bitiꞌ gunëꞌ ca rnna xtídzaꞌtuꞌ,
le ruzúajtuꞌ lu guichi ni,
guliꞌgún ga gaca bëꞌë bönniꞌ naꞌ,
en bitiꞌ gunliꞌ tsözxö́n lëꞌ para utuíꞌinëꞌ.
15 Bitiꞌ ral-laꞌ iléꞌeliꞌ-nëꞌ ca tu bönniꞌ bitiꞌ riléꞌenëꞌ libíꞌiliꞌ dxiꞌa,
pero guliꞌsáꞌ ládxëꞌë ca böchiꞌ cázaliꞌ.
Pablo riguꞌë lu nëꞌë Dios yuguꞌ bö́chiꞌruꞌ nacuꞌë Tesalónica
16 Rinábituꞌ-nëꞌ Xanruꞌ gúnticaꞌsëꞌ ga cuía dxi icja ládxiꞌdoꞌoliꞌ ca naca yúguꞌtë le runliꞌ,
en sóalenëꞌ yúguꞌtëliꞌ.
Lë cazëꞌ runëꞌ ga röꞌö dxi icja ládxiꞌdoꞌoruꞌ.