DIDZAꞌ ZÍꞌALÖ GUSÖ́L-LËꞌË PABLO QUEË́BIꞌ BIꞌI TIMOTEO
Pablo rugapëꞌ Dios biꞌi Timoteo
1
Nedaꞌ,
Pablo,
nacaꞌ gubáz nasö́l-lëꞌë Jesucristo.
Caní nacaꞌ tuꞌ caní gunná bëꞌë Dios,
Nu rusölá rëꞌu,
encaꞌ tuꞌ gunná bëꞌë caní Xanruꞌ Jesucristo,
Nu naꞌ runruꞌ löza.
2 Rugapaꞌ Dios liꞌ,
bö́chaꞌadoꞌ Timoteo.
Nacuꞌ ca zxíꞌini cazaꞌ tuꞌ benruꞌ tsözxö́n xichinëꞌ Dios.
Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo uzáꞌ ládxëꞌë quiuꞌ,
en huéchiꞌ ládxëꞌë liꞌ,
en gunëꞌ ga soa dxi icja ládxiꞌdoꞌo.
Pablo rusë́ꞌë ládxiꞌbiꞌ Timoteo ca naca xibá cabí naca idú
3 Rátaꞌyuaꞌ loꞌ naꞌa gunuꞌ ca naꞌ gútaꞌyuaꞌ loꞌ cateꞌ niꞌ guyijaꞌ luyú Macedonia,
para ugáꞌanuꞌ lu yödzö Éfeso,
en inná béꞌenuꞌ bal-lëꞌ bönniꞌ niꞌ cabí uluꞌsédinëꞌ tu xibá yúbölö,
4 en cabí ilunëꞌ zxön yuguꞌ didzaꞌ ridasö,
en lágaca ziántërö cöꞌ xuz xtóꞌogaca bönachi,
yuguꞌ le tun ga tuíꞌi ládxiꞌgaca bönachi le nácagaca nítisö.
Yuguꞌ le caní bitiꞌ tun tsutsu bönachi queëꞌ Dios ca naca le taꞌyéajlëꞌ Lëꞌ.
5 Le rë́ꞌëni gun lë ni reaꞌ liꞌ,
naca para ilaꞌdxíꞌi bönachi luzë́ꞌeguequi,
naca idú ládxiꞌgaca,
en gaca dxiꞌa le taꞌzáꞌ ládxiꞌgaca,
en gaca idú le taꞌyéajlëꞌ Dios.
6 Ca nácagaca lë ni,
bitiꞌ buluꞌrúajëꞌ bal-lëꞌ bönniꞌ dxiꞌa,
pero gulaꞌguélëꞌë tu nöza yúbölö,
en tunëꞌ bal yuguꞌ le bitiꞌ nácatë.
7 Të́ꞌënnëꞌ uluꞌsédinëꞌ bönachi ca naca le rinná bëꞌ xibá queëꞌ Dios,
sal-laꞌ bitiꞌ taꞌyéajniꞌinëꞌ lë naꞌ tuꞌsédinëꞌ,
en bitiꞌ taꞌyéajniꞌinëꞌ le taꞌnnë́ꞌ nácatë.
8 Rëꞌu nö́ziruꞌ naca dxiꞌa xibá gunná bëꞌë Dios,
channö nu rugún le dxin ca ral-laꞌ gun.
9 Lë ni nö́ziruꞌ:
Dios gudixjëꞌ xibá queëꞌ,
calëga para inná beꞌe bönachi tsahuiꞌ,
pero para inná beꞌe bönachi caní:
Nupa taꞌdáꞌbagaꞌ le rinná bëꞌ xibá naꞌ.
Nupa bitiꞌ túngaca ca rinná bëꞌ xibá naꞌ.
Nupa tuꞌcáꞌana Dios cáꞌasö.
Nupa tun le naca xihuiꞌ.
Nupa bitiꞌ túngaca Dios zxön.
Nupa tuꞌcáꞌana le nequi queëꞌ Dios cáꞌasö.
Nupa tuti xuz xináꞌaguequi.
Nupa tuti bönachi.
10 Nupa tun le ruáꞌ döꞌ.
Yuguꞌ bönniꞌ nacuáꞌlenëꞌ laꞌ löjödxi bö́nniꞌgaquiëꞌ.
Nupa taꞌbán yuguꞌ bíꞌidoꞌ.
Nupa taꞌzíꞌ yëꞌ.
Nupa tun tsutsu xtídzaꞌguequi,
taꞌnná le cabí nácatë.
Nupa taꞌdáꞌbaga yuguꞌ xibá tsahuiꞌ.
11 Nö́ziruꞌ naca caní tuꞌ bidxín queë́ruꞌ didzaꞌ dxiꞌa buzáꞌ ládxëꞌë Dios queë́ruꞌ.
Lëꞌ náquiëꞌ láꞌayi,
en budödëꞌ lu naꞌa didzaꞌ dxiꞌa naꞌ runaꞌ libán que.
Pablo rëꞌ Cristo: “Xclenuꞌ” tuꞌ buéchiꞌ ládxëꞌë lëꞌ
12 Reaꞌ-nëꞌ Xanruꞌ Jesucristo,
Nu rutipa ládxaꞌa,
“Xclenuꞌ” tuꞌ buzxöni ládxëꞌë nedaꞌ,
en buzóëꞌ nedaꞌ gunaꞌ xichinëꞌ.
13 Caní benëꞌ sal-laꞌ zíꞌalö nedaꞌ gunnë́ ziꞌa queëꞌ,
en gudxía ládxaꞌa bönachi queëꞌ,
en zián le biꞌa döꞌ quéguequi,
pero Cristo buéchiꞌ ládxëꞌë nedaꞌ,
tuꞌ benaꞌ caní lu yöl-laꞌ bitiꞌ réajniꞌi quiaꞌ cateꞌ niꞌ bitiꞌ réajlëꞌënidaꞌ Lëꞌ.
14 Naꞌa,
zxö́ntërö naca le buzáꞌ ládxëꞌë quiaꞌ Xanruꞌ Jesucristo,
lë naꞌ run ga réajlëꞌëruꞌ Lëꞌ,
encaꞌ ga nadxíꞌiruꞌ-nëꞌ.
15 Didzaꞌ idútë li lë ni,
en le naca lesacaꞌ ilaꞌzíꞌ lu náꞌagaca yúguꞌtë bönachi,
le rnna:
Lë cazëꞌ Jesucristo bidëꞌ yödzölió ni para busölë́ꞌ bönachi dul-laꞌ,
ateꞌ busölë́ꞌ nedaꞌ sal-laꞌ nácaraꞌ bönniꞌ dul-laꞌ ca yúguꞌtë bönachi.
16 Que lë ni naꞌ buéchiꞌ ládxëꞌë nedaꞌ,
ateꞌ buluꞌe lahui Jesucristo niꞌa quiaꞌ nedaꞌ,
bönniꞌ dul-laꞌ,
ca naca yöl-laꞌ zxön ladxiꞌ idú queëꞌ,
para gacaꞌ tu le ruluíꞌi lógaca nupa ilaꞌyéajlëꞌ Lëꞌ,
en gataꞌ quéguequi yöl-laꞌ naꞌbán idú.
17 Naꞌa rnníaꞌ:
¡Yöl-laꞌ ba Dios,
Nu rinná bë́ꞌticaꞌsö,
Nu catu caz údxi que,
en Nu bitiꞌ gaca iléꞌeruꞌ,
laꞌs dui Dios Nu nözi caz yúguꞌtë!
¡Queëꞌ Lëꞌ gácaticaꞌsö yöl-laꞌ run bal,
en yöl-laꞌ ba,
naꞌa dza,
en yúguꞌtë dza záꞌgaca!
¡Caꞌ gaca!
18 Zxíꞌinaꞌdoꞌ Timoteo,
rudödaꞌ lu noꞌo xibá ni para gunuꞌ xichinëꞌ Dios ca runëꞌ tu bönniꞌ idú ládxëꞌë rejëꞌ gudil-la,
en para uziꞌu xibé yuguꞌ le gulaꞌguíxjöꞌ zíꞌalö nupa niꞌ guluíꞌi didzaꞌ uláz queëꞌ Dios ca gaca quiuꞌ.
19 Len yöl-laꞌ réajlëꞌ quiuꞌ Cristo ral-laꞌ gunuꞌ caní,
naca idú dxiꞌa icja ládxiꞌdoꞌo.
Chigulaꞌchixi gulaꞌnigui bal-la bönachi,
nupa buluꞌzóa tsöláꞌalö le réajlëꞌëruꞌ Cristo.
20 Caní gulunëꞌ Himeneo,
en Alejandro,
nupa naꞌ busanaꞌ lu naꞌ Satanás tuꞌ xihuiꞌ para ilaꞌzëdëꞌ ca ral-laꞌ ilunëꞌ,
para cabirö ilaꞌnnë́ ziꞌë que le nequi queëꞌ Dios.