Le rusedi rëꞌu ulídzaruꞌ-nëꞌ Dios
2
Que lë ni naꞌ le naca lo le richíziaꞌ icja nágagaca bönachi naca ca ral-laꞌ ulídzaruꞌ-nëꞌ Dios,
en ca ral-laꞌ gátaꞌyuruꞌ lahuëꞌ,
en ca ral-laꞌ inábiruꞌ-nëꞌ gunnëꞌ bi riquíniruꞌ,
en ca ral-laꞌ guië́ruꞌ-nëꞌ:
“Xclenuꞌ.”
Yuguꞌ lë ni ral-laꞌ gunruꞌ uláz quéguequi yúguꞌtë bönachi.
2 Lëscaꞌ caní ral-laꞌ gunruꞌ uláz quégaca nupa taꞌnná bëꞌ,
en quégaca yúguꞌtë nupa nácagaca lo.
Caní ral-laꞌ gunruꞌ para gaca dxiꞌa queë́ruꞌ,
en gataꞌ queë́ruꞌ yöl-laꞌ riböza tsáhuiꞌdoꞌ.
Ral-laꞌ gunruꞌ caní lu yöl-laꞌ réajlëꞌ queë́ruꞌ Dios,
en lu yöl-laꞌ baꞌa ladxiꞌ queë́ruꞌ.
3 Lë ni naca dxiꞌa,
en le raza ládxëꞌë Dios,
Nu rusölá rëꞌu.
4 Dios caz rë́ꞌënëꞌ uluꞌlágaca yúguꞌtë bönachi,
en rë́ꞌënëꞌ ilúnbëꞌe le naca idútë li.
5 Tuzëꞌ náquiëꞌ Dios,
en tuzëꞌ bönniꞌ ruúnëꞌ dzaga Dios,
en bönachi.
Nu ni naca Jesucristo,
Nu gulaj bönachi.
6 Lë cazëꞌ budödi cuinëꞌ lu yöl-laꞌ guti,
le benëꞌ tuꞌ nözi dul-laꞌ nabágaꞌgaca yúguꞌtë bönachi.
Dios benëꞌ ba nalí queëꞌ cateꞌ bidxín dza queëꞌ gútiëꞌ.
7 Ca naca lë ni,
Dios buzóëꞌ nedaꞌ para gunaꞌ libán que,
en gacaꞌ gubáz nasö́l-lëꞌë Cristo,
para usédigacadaꞌ bönachi izáꞌa ca naca le réajlëꞌëruꞌ Cristo,
en ca naca le naca idútë li.
Rilítedaꞌ,
en bitiꞌ caꞌ rizíꞌ yëꞌa.
8 Naꞌa,
rë́ꞌëndaꞌ uluꞌlidzëꞌ bönniꞌ Dios,
en ilátaꞌyuëꞌ lahuëꞌ gátiꞌtës,
nácagaquiëꞌ idú dxiꞌa,
en cabí ilaꞌlenëꞌ luzáꞌagaquiëꞌ,
en cabí ilaꞌdil-la dídzaꞌgaquiëꞌ.
9 Lëscaꞌ caní,
rë́ꞌëndaꞌ ilácunu nigula le naca baꞌa.
Le naca lachi le ral-laꞌ uluꞌluíꞌinu lahui naca yöl-laꞌ nöxaj ladxiꞌ,
en le naca idú ladxiꞌ,
en calëga le tuꞌpáꞌasinu icja lógacanu len oro,
en yuguꞌ bugá,
en lariꞌ nazácaꞌdaꞌ.
10 Yuguꞌ le dxiꞌa tunnu uluꞌluíꞌi lahui le nácagacanu ca naꞌ run le tácunu le naca baꞌa.
Caní ral-laꞌ ilunnu nigula núnbëꞌgacanu Dios.
11 Ral-laꞌ ilaꞌcuáꞌanu yuguꞌ nigula dxisö cateꞌ nu rusedi légacanu,
en ilaꞌcuáꞌanu nöxaj.
12 Bitiꞌ runnaꞌ yuguꞌ nigula lataj uluꞌsédinu,
en calëga ilaꞌnná béꞌenu yuguꞌ bönniꞌ.
Ral-laꞌ ilaꞌcuáꞌanu dxisö ga nudúbigaca bönachi queëꞌ Cristo.
13 Caní ral-laꞌ gaca,
tuꞌ buzóëꞌ Dios zíꞌalö Adán,
ateꞌ gudödi naꞌ buzóëꞌ-nu Eva.
14 Adán naꞌ,
bitiꞌ guzxíꞌ yeꞌe tuꞌ xihuiꞌ lëꞌ,
pero nigula queëꞌ,
guzxíꞌ yeꞌe lënu.
Caní guca,
gudítsjanu xibá queëꞌ Dios,
15 pero ulanu nu nigula ruzóanu-biꞌ bíꞌidoꞌ channö gúnticaꞌsinu ca röjlö́z le réajlëꞌëruꞌ Dios,
en yöl-laꞌ nadxíꞌi,
en channö gácanu idú dxiꞌa,
en idú ladxiꞌ.