Ca ral-laꞌ ilácagaquiëꞌ bönniꞌ tapa chiꞌë bönachi queëꞌ Cristo
3
Didzaꞌ idútë li lë ni rnna:
Channö ruíꞌi ládxëꞌë nu bönniꞌ gáquiëꞌ nu gapa chiꞌi bönachi queëꞌ Cristo,
dxin dxiꞌa rizë́ ládxëꞌë.
2 Nu bönniꞌ rapa chiꞌë bönachi queëꞌ Cristo run bayudxi gáquiëꞌ:
Tu bönniꞌ cuntu nu gaca bi innë́ queëꞌ.
Zoa túzinu nigula queëꞌ.
Ral-laꞌ gáquiëꞌ ban ladxiꞌ,
en idú ladxiꞌ,
en nöxaj ladxiꞌ.
Ral-laꞌ guꞌë ga ilaꞌcuꞌë bö́chiꞌruꞌ taꞌdxinëꞌ lidxëꞌ.
Ral-laꞌ gáquiëꞌ bönniꞌ nazéquiꞌdeꞌenëꞌ usédinëꞌ bönachi.
3 Bitiꞌ gáquiëꞌ bönniꞌ reꞌjëꞌ,
en calëga bönniꞌ síniaꞌ.
Bitiꞌ gaquiëꞌ bönniꞌ rizë́ ládxiꞌsëꞌ siꞌë dumí.
Ral-laꞌ gáquiëꞌ bönniꞌ dxiꞌi ladxiꞌ,
en zxön ladxiꞌ.
Bitiꞌ gáquiëꞌ bönniꞌ ruhuídiꞌnëꞌ.
4 Ral-laꞌ gáquiëꞌ bönniꞌ rinná béꞌenëꞌ dxiꞌa bönachi nacuáꞌ lidxëꞌ.
Ral-laꞌ ilunbiꞌ zxíꞌinëꞌ ca rnna xtídzëꞌë lu yöl-laꞌ run bal xúzgacabiꞌ.
5 ¿Naruꞌ huácatsö tu bönniꞌ gapa chiꞌë bönachi queëꞌ Dios channö cabí raca inná béꞌenëꞌ dxiꞌa bönachi nacuáꞌ lidxëꞌ?
6 Bitiꞌ ral-laꞌ gáquiëꞌ tu bönniꞌ siꞌ gusí lahuëꞌ tëꞌë Cristo,
para cabí tödi bëꞌ gun ba zxön cuinëꞌ,
en bitiꞌ gaca queëꞌ ca naꞌ guca que tuꞌ xihuiꞌ,
nu ben ba zxön cuini,
ateꞌ Dios guchúguiëꞌ que tsöjgáꞌana lataj chul-la.
7 Lëscaꞌ ral-laꞌ gáquiëꞌ bönniꞌ taꞌnná dxiꞌa queëꞌ nupa cabí nabábagaca bönachi queëꞌ Cristo,
para cabí soa nu uzóa lëꞌ tsöláꞌalö,
en para cabí idzunëꞌ lu yalaj que tuꞌ xihuiꞌ.
Ca ral-laꞌ iláquiëꞌ bönniꞌ tácalenëꞌ bönachi queëꞌ Cristo
8 Lëscaꞌ caní ral-laꞌ iláquiëꞌ bönniꞌ tácalenëꞌ bönachi queëꞌ Cristo:
Ral-laꞌ iláquiëꞌ bönniꞌ idú ládxiꞌgaquiëꞌ.
Bitiꞌ iláquiëꞌ bönniꞌ tuꞌrixëꞌ didzaꞌ.
Bitiꞌ iláquiëꞌ bönniꞌ téꞌajëꞌ.
Bitiꞌ iláquiëꞌ bönniꞌ taꞌzë́ ládxiꞌsëꞌ dumí.
9 Ral-laꞌ gaca ilapa chiꞌë idútë le réajlëꞌëruꞌ Cristo.
Ral-laꞌ ilaca idú dxiꞌa icja ládxiꞌdoꞌgaquiëꞌ.
10 Yuguꞌ bönniꞌ ni ral-laꞌ siꞌ bë́ꞌëliꞌ légaquiëꞌ zíꞌalö,
ateꞌ níꞌirö gataꞌ lu náꞌagaquiëꞌ ilácalenëꞌ bönachi queëꞌ Cristo,
channö cabí zoa nu gaca bi innë́ quégaquiëꞌ.
11 Lëscaꞌ caní,
nigula que queë́gaquiëꞌ ral-laꞌ ilaꞌcuáꞌanu idú ládxiꞌgacanu,
en cabí ilácanu unnë́ que luzë́ꞌe.
Ral-laꞌ ilácanu zxön ladxiꞌ,
en ilácanu li ladxiꞌ lu yúguꞌtë le tunnu.
12 Yuguꞌ bönniꞌ ilácalenëꞌ bönachi queëꞌ Cristo ral-laꞌ soa túzinu nigula que queë́gaquiëꞌ.
Lëscaꞌ ral-laꞌ ilaꞌnná béꞌenëꞌ dxiꞌa zxíꞌinigaquiëꞌ,
encaꞌ bönachi ulidxi que queë́gaquiëꞌ.
13 Run bayudxi gaca caní,
tuꞌ taꞌdéliꞌnëꞌ lataj ga ilún bal bönachi xtídzaꞌgaquiëꞌ,
channö tunëꞌ dxiꞌa dxin tunëꞌ tácalenëꞌ bönachi queëꞌ Cristo,
ateꞌ ilácarëꞌ rugu ladxiꞌ para iluꞌë didzaꞌ ca naca le réajlëꞌëruꞌ Jesucristo.
Le bigachiꞌ que le reaj ládxiꞌruꞌ-nëꞌ Dios
14 Yuguꞌ didzaꞌ ni ruzúajaꞌ quiuꞌ lu guichi,
sal-laꞌ runaꞌ löza uduyúteaꞌ liꞌ.
15 Channö huadzédaꞌ,
ruzúajaꞌ quiuꞌ didzaꞌ ni para inö́zinuꞌ naca ral-laꞌ gunuꞌ lógaca bönachi nacuáꞌ lidxëꞌ Dios,
nupa nácagaca bönachi queëꞌ Dios ban,
en nácagaca tsutsu,
en taꞌguíxjöꞌ dxiꞌa le naca idútë li.
Nácagaca ca yuguꞌ yaꞌzxö́n,
en le nunídaꞌgaca zöꞌö,
le nácagaca tsutsu,
en taꞌzö́n yuꞌu.
16 Le nácatë,
zxö́ntërö naca le bigachiꞌ que le reaj ládxiꞌruꞌ-nëꞌ Dios,
ca naꞌ nazúaj lu guichi le rnna:
Dios buluíꞌi lahuëꞌ,
gúquiëꞌ bönachi.
Guca bëꞌ náquiëꞌ tsahuiꞌ tuꞌ guzóalenëꞌ Dios Böꞌ Láꞌayi Lëꞌ.
Gulácalenëꞌ gubáz láꞌayi queëꞌ Dios Lëꞌ.
Guca libán queëꞌ lógaca bönachi izáꞌa.
Gulaꞌyéajlëꞌ bönachi yödzölió Lëꞌ.
Dios buchisëꞌ Lëꞌ xitsáꞌ ga nayë́pisëtërëꞌ.