Nupa uluꞌhuö́aj ládxiꞌgaca ca naca le réajlëꞌëruꞌ-nëꞌ Cristo
4
Yálajdoꞌ riguíxjöꞌë Dios Böꞌ Láꞌayi,
rnnëꞌ:
Dza tsöjsétëgaca,
ilaꞌdáꞌbagaꞌ bal-la bönachi Cristo.
Uluꞌhuö́aj ládxiꞌgaquiëꞌ ca naca le réajlëꞌëruꞌ Cristo.
Uluꞌzë́ nágagaquiëꞌ xtídzaꞌgaca bönachi nacuáꞌlen böꞌ taꞌzíꞌ yëꞌ léguequi,
ateꞌ uluꞌzë́ nágagaquiëꞌ yuguꞌ xibá quéguequi böꞌ xihuiꞌ.
2 Uluꞌzë́ nágagaquiëꞌ xtídzaꞌgaca bönachi tuꞌluíꞌisö tsahuiꞌ cuínguequi.
Yuguꞌ bönachi naꞌ tuíꞌi didzaꞌ le cabí nácatë,
en chinazidi ládxiꞌdoꞌguequi,
para cabí uxösa léguequi.
3 Caní naca,
tuꞌzáguëꞌë xinö́zguequi nupa të́ꞌëni uluꞌtsaga náꞌagaca,
en taꞌnná béꞌenëꞌ bönachi para cabí ilágugaca le naguꞌë Dios para uzíꞌiruꞌ xibé,
lë naꞌ huáca ilágugaca nupa taꞌyéajlëꞌ Dios,
nupa naꞌ chinúnbëꞌgaca le naca idútë li,
en tëꞌ Dios:
“Xclenuꞌ” cateꞌ tahuëꞌ le.
4 Dxiꞌa naca yúguꞌtë le benëꞌ Dios,
en bitiꞌ bi ral-laꞌ uzóaruꞌ tsöláꞌalö channö ráguruꞌ le,
en rëruꞌ-nëꞌ Dios:
“Xclenuꞌ.”
5 Rusedi xtídzëꞌë Dios rëꞌu,
Lëꞌ únëꞌ dxiꞌa yúguꞌtë le gáguruꞌ channö ulídzaruꞌ-nëꞌ Dios,
en inábiruꞌ-nëꞌ gun láꞌayëꞌ lë naꞌ gáguruꞌ.
Ca rurúajëꞌ dxiꞌa huen dxin queëꞌ Jesucristo
6 Channö usédinuꞌ yuguꞌ böchiꞌ luzáꞌaruꞌ yuguꞌ didzaꞌ ni,
urúajuꞌ dxiꞌa,
en gacuꞌ huen dxin dxiꞌa queëꞌ Jesucristo,
en gaca bëꞌ nazë́duꞌ dxiꞌa ca naca didzaꞌ que le réajlëꞌëruꞌ-nëꞌ Cristo,
en ca naca xibá dxiꞌa rapa chiꞌu.
7 Gurúꞌuna yuguꞌ didzaꞌ ridasö que yödzölió ca naca didzaꞌ tuíꞌinu yuguꞌ nigula gula.
Bénticaꞌsö le gun ga gacuꞌ tsutsu para gunuꞌ ca rë́ꞌënëꞌ Dios.
8 Látiꞌdoꞌos uziꞌu xibé gunuꞌ le gun ga gácarö nál-la niꞌa noꞌo,
pero idú uziꞌu xibé gunuꞌ ca rë́ꞌënëꞌ Dios.
Cateꞌ runruꞌ caní,
lë ni run ga runruꞌ löza sóaruꞌ ibanruꞌ yödzölió ni,
encaꞌ sóaruꞌ ibanruꞌ dza záꞌgaca,
tödi uzáꞌaruꞌ yödzölió ni.
9 Didzaꞌ idútë li lë ni,
en le naca lesacaꞌ ilaꞌzíꞌ lu náꞌagaca yúguꞌtë bönachi.
10 Que lë ni naꞌ,
rusácaꞌdaꞌ ziꞌ cuinruꞌ runruꞌ dxin,
tuꞌ runruꞌ löza Dios ban.
Cristo gútiëꞌ para usölë́ꞌ yúguꞌtë bönachi.
Tuꞌzíꞌ xibé le benëꞌ nupa naꞌ taꞌyéajlëꞌ Lëꞌ.
11 Gunná beꞌe,
en busedi bönachi ilún yuguꞌ lë ni.
12 Cuntu nu ral-laꞌ uzóa liꞌ tsöláꞌalö tuꞌ nacuꞌ biꞌi raꞌbán,
pero ral-laꞌ gunuꞌ le uluíꞌi nupa taꞌyéajlëꞌ Dios ral-laꞌ ilún ca runuꞌ liꞌ.
Caní uluíꞌinuꞌ légaquiëꞌ:
Len didzaꞌ ruꞌu,
en len le runuꞌ.
Ca nadxíꞌinuꞌ luzóꞌo,
en ca ruꞌu lataj zóalenëꞌ Dios Böꞌ Láꞌayi liꞌ.
Ca runuꞌ ca rnnoꞌ,
en ca nacuꞌ idú tsahuiꞌ.
13 Tsanni zaꞌa idxinaꞌ quiuꞌ,
bë́ꞌticaꞌsö ladxiꞌ ulabuꞌ guichi láꞌayi lógaca bönachi nacuáꞌ ga niꞌ zuꞌ.
Guchiza icja nágagaquiëꞌ lë ni,
en busedi légaquiëꞌ.
14 Bitiꞌ udöduꞌ cáꞌasö le buzáꞌ ládxëꞌë Dios quiuꞌ,
lë naꞌ bennëꞌ quiuꞌ ca naꞌ gulaꞌnná nupa niꞌ guluíꞌi didzaꞌ uláz queëꞌ Dios,
cateꞌ niꞌ bönniꞌ gula tapa chiꞌë bönachi queëꞌ Cristo gulaꞌxóa náꞌagaquiëꞌ liꞌ,
en buluꞌlidzëꞌ Dios.