Ca ral-laꞌ gunbiꞌ Timoteo niꞌa quégaca bönachi queëꞌ Cristo
5
Bitiꞌ uzenuꞌ bach yuguꞌ bönniꞌ gula,
pero guchiza icja nágagaquiëꞌ didzaꞌ,
tsca nácagaquiëꞌ xuz cazuꞌ.
Guchiza icja nágagacabiꞌ biꞌi bönniꞌ raꞌbán didzaꞌ,
tsca nácagacabiꞌ biꞌi böchiꞌ cazuꞌ.
2 Guchiza icja nágagacanu nigula gula didzaꞌ,
tsca nácagacanu xináꞌ cazuꞌ.
Guchiza icja nágagacabiꞌ biꞌi nigula raꞌbán didzaꞌ,
tsca nácagacabiꞌ biꞌi zan cazuꞌ,
ca naꞌ röjlö́z le naca idú dxiꞌa.
3 Ben bal yuguꞌ nigula ba guti bönniꞌ que queë́gacanu,
nácagacanu túzinu.
4 Channö zóanu tu nigula caní nacuáꞌabiꞌ biꞌi queë́nu o zxíꞌini xiꞌsóanu,
ral-laꞌ ilaꞌzë́dabiꞌ ilunbiꞌ ca rë́ꞌënëꞌ Dios,
para ilácalenbiꞌ zíꞌalö bönachi nacuáꞌ lídxigacabiꞌ,
en uluꞌbíꞌibiꞌ quégaquiëꞌ xuz xináꞌagacabiꞌ.
Lë ni naca dxiꞌa,
en le raza ládxëꞌë Dios.
5 Naꞌa,
nigula naꞌ nagáꞌananu túzinu,
runnu löza Dios,
ateꞌ rëla,
en te dza rinábaticaꞌsinu lahuëꞌ Dios,
en rulídzanu Lëꞌ niꞌa quégaca bönachi queëꞌ,
6 pero nigula túzinu naꞌ runnu ca naca le rizë́ ládxiꞌnu nácanu ca tu nigula chinátinu cateꞌ ni zóanu nabannu.
7 Lëscaꞌ caní,
gunná beꞌe bönachi nacuáꞌ ga niꞌ zuꞌ,
para ilún ca saꞌyéaj yuguꞌ lë ni,
para ilaca bönachi cuntu nu gaca bi innë́ quéguequi.
8 Channö zoa nu bönniꞌ cabí rugahuëꞌ yuguꞌ diꞌa dza queëꞌ,
en le nácarö lo,
channö cabí rugahuëꞌ bönachi nacuáꞌ lidxëꞌ,
chigudáꞌbaguëꞌë le réajlëꞌëruꞌ Cristo,
en nácarëꞌ xihuiꞌ ca nu cabí réajlëꞌ Dios.
9 Túzinu nigula zoanu túzinu caní chiyúꞌurönu ca tsónnalalaj iz huáca ibábanu nupa gácalenliꞌ,
channö cabí bucáꞌananu-nëꞌ bönniꞌ queë́nu para sóalennu-nëꞌ iaꞌtúëꞌ bönniꞌ.
10 Run bayudxi soa nu gun ba nalí queë́nu ca nácagaca le dxiꞌa runnu.
Gácalenliꞌ-nu channö buscúlunu-biꞌ yuguꞌ bíꞌidoꞌ,
en channö ruíꞌinu ga ilaꞌcuáꞌ bö́chiꞌruꞌ záꞌgaquiëꞌ yödzö ziꞌtuꞌ,
en channö ruíꞌinu le ilëꞌaj ilágugaca bönachi queëꞌ Dios,
en channö rácalennu nupa taꞌguíꞌi taꞌzacaꞌ,
en channö rúnticaꞌsinu yúguꞌtë le naca dxiꞌa.
11 Yuguꞌ nigula túzinu bitiꞌ yuíꞌigacanu tsónnalalaj iz,
bitiꞌ ibábagacanu nupa gácalenliꞌ,
tuꞌ ilunnu ca taꞌzësö ládxiꞌgacanu,
en ilaꞌdáꞌbagaꞌnu Cristo,
en ilë́ꞌëninu uluꞌtsaga náꞌagacanu leyúbölö.
12 Caní gaca,
ilaꞌbágaꞌnu dul-laꞌ tuꞌ tuꞌzóanu tsöláꞌalö le gulaꞌyéajlëꞌënu Cristo zíꞌalö.
13 Lëscaꞌ ilácanu nigula xöhuëdi,
en nigula taꞌdasö caꞌ,
en calë́gasö ilácanu xöhuëdi,
pero lëscaꞌ ilácanu nigula unnë́ que luzë́ꞌe,
en tsöjgútsaꞌgacanu ga yúbölö,
en ilaꞌnnanu le cabí nácatë.
14 Que lë ni naꞌ,
rë́ꞌëndaꞌ uluꞌtsaga náꞌgacanu leyúbölö nigula túzinu cani yúꞌugacanu iz cuidiꞌ,
en uluꞌscúlanu-biꞌ yuguꞌ bíꞌidoꞌ,
en ilaꞌnná béꞌenu biꞌi nacuáꞌabiꞌ yuꞌu que queë́gacanu,
para cabí iluíꞌinu nu ridáꞌbagaꞌ rëꞌu lataj bi innë́ queë́ruꞌ,
rëꞌu naꞌ réajlëꞌëruꞌ Cristo.
15 Caní ral-laꞌ gaca,
tuꞌ chibuluꞌbígaꞌnu bál-lagacacnu,
ateꞌ tunnu ca rë́ꞌëni Satanás tuꞌ xihuiꞌ.
16 Channö nútiꞌtës bönniꞌ o nigula nu réajlëꞌ Cristo,
nacuáꞌanu nigula túzinu lídxigaca nupa naꞌ,
ral-laꞌ ilácalen légacanu,
para cabí uluꞌsacaꞌ ziꞌ bönachi queëꞌ Cristo.
Caní gaca,
bönachi queëꞌ Cristo naꞌ gaca ilácalen yuguꞌ nigula nagáꞌanagacanu túzinu.
17 Benrö bal yuguꞌ bönniꞌ gula tapa chiꞌë bönachi queëꞌ Cristo,
yuguꞌ bönniꞌ naꞌ taꞌnná bëꞌë dxiꞌa,
en béntërö caꞌ bal yuguꞌ bönniꞌ gula naꞌ tunëꞌ dxin,
tunëꞌ libán,
en tuꞌsédinëꞌ bönachi.
18 Nazúaj lu guichi láꞌayi le rnna:
“Bitiꞌ cuꞌu du ruáꞌabaꞌ bëdxi naꞌ rulíbibaꞌ zxoaꞌ xtila.”
Rnna caꞌ:
“Náquiëꞌ lesacaꞌ nu bönniꞌ huen dxin siꞌë lazxjëꞌ.”
19 Bitiꞌ siꞌ lu noꞌo didzaꞌ ruíꞌi nu ruzegui didzaꞌ tu bönniꞌ gula rapa chiꞌë bönachi queëꞌ Cristo,
channö cabí nacuáꞌ chopa tsonna nupa tun ba nalí que le benëꞌ.
20 Nupa túnticaꞌsö dul-laꞌ,
busidxi léguequi lógaca yúguꞌtë bönachi queëꞌ Cristo para iladxi iaꞌzícaꞌrö bönachi niꞌ Dios.
21 Niꞌa queëꞌ Xanruꞌ Dios,
en Xanruꞌ Jesucristo,
en niꞌa quégaquiëꞌ gubáz láꞌayi rö queëꞌ,
rinná béꞌedaꞌ liꞌ gunuꞌ ca taꞌnná didzaꞌ ni.
Tuz ca ral-laꞌ uchiꞌa usörö́uꞌ yúguꞌtë bönachi,
en bitiꞌ gunuꞌ bal tuzëꞌ bönniꞌ.
22 Cuntu nu bönniꞌ ixóatë noꞌo,
cabí gunuꞌ ga gáquiëꞌ huen dxin queëꞌ Cristo,
para cabí ibáguꞌu le runëꞌ channö gunëꞌ bönniꞌ naꞌ dul-laꞌ.
23 Bítiꞌrö guíꞌjuꞌ nísasö.
Tuꞌ rúnticaꞌsö bayáꞌ lëꞌu ral-laꞌ guíꞌjuꞌ látiꞌdoꞌ xisi uva nal-la para cöꞌ dxiꞌa lëꞌu.
24 Yuguꞌ dul-laꞌ quéguequi bal-la bönachi ilaꞌláꞌ lahui zíꞌalö cateꞌ siꞌ ilaꞌdxín ga uchiꞌa usörö́ëꞌ Dios léguequi,
ateꞌ tödi niꞌ ilaꞌláꞌ lahui dul-laꞌ nabágaꞌgaca iaꞌzícaꞌrö bönachi.
25 Lëscaꞌ caní,
ilaꞌláꞌ lahui dxin dxiꞌa núngaca bönachi,
ateꞌ channö cabí naláꞌgaca lahui,
cuntu nu bönniꞌ gaca ucáchëꞌë tsaz dxin naꞌ nunëꞌ.