6
Yúguꞌtë bönniꞌ nadóꞌogaca ral-laꞌ ilúndëꞌë bal xángaquiëꞌ,
para cabí gaca nu innë́ ziꞌ que La láꞌayi queëꞌ Dios,
en que xibá queëꞌ.
2 Nupa niꞌ nacuꞌë xángaca taꞌyéajlëꞌë Cristo,
bitiꞌ ral-laꞌ uluꞌcáꞌana cáꞌasö légaquiëꞌ tuꞌ nácagaquiëꞌ bö́chiꞌguequi.
Ral-laꞌ ilunrö dxiꞌa xichíngaquiëꞌ tuꞌ taꞌyéajlëꞌë Cristo,
bönniꞌ niꞌ tuꞌziꞌë xibé dxin dxiꞌa naꞌ,
tuꞌ nadxíꞌinëꞌ Lë cazëꞌ légaquiëꞌ.
Ca naca lë ni,
busëdi bönachi nacuáꞌ niꞌ,
en guchiza le icja nágagaquiëꞌ.
Le reaj ládxiꞌruꞌ-nëꞌ Dios le ruzíꞌiruꞌ xibé
3 Channö zoa nu bönniꞌ rusë́dinëꞌ xibá yúbölö,
en bitiꞌ rusë́dinëꞌ yuguꞌ didzaꞌ dxiꞌa queëꞌ Xanruꞌ Jesucristo,
ca naca xibá naꞌ rusedi rëꞌu ca ral-laꞌ gunruꞌ ca rë́ꞌënëꞌ Dios,
4 bönniꞌ ni run ba zxön cuinëꞌ,
en bitiꞌ bi nö́zinëꞌ.
Didzaꞌ bitiꞌ naca dxiꞌa rizë́ ládxëꞌë ca nácagaca didzaꞌ böniga,
en didzaꞌ bizxaj,
yuguꞌ le tun ga tuꞌzxéꞌe bönachi luzë́ꞌeguequi,
en taꞌdíl-lalen luzë́ꞌeguequi didzaꞌ.
Lëscaꞌ tun didzaꞌ caní ga taꞌnnë́ ziꞌ bönachi que luzë́ꞌeguequi,
en taꞌzáꞌ ládxiꞌgaca que luzë́ꞌeguequi le cabí nácatë.
5 Lëscaꞌ caní tun ga taꞌdíl-laticaꞌsëꞌ didzaꞌ bönniꞌ bitiꞌ taꞌyéajniꞌinëꞌ,
nupa bitiꞌ nazíꞌ lu në́ꞌeguequi le naca idútë li.
Téquini huáca ilaꞌzíꞌ dumí zián channö ilúngaca tsözxö́n nupa taꞌyéaj ládxiꞌgaca Dios.
Gucuíta ga nacuáꞌ bönachi caní.
6 Zxön naca le ruzíꞌiruꞌ xibé cateꞌ len yöl-laꞌ riböza zxön ladxiꞌ reaj ládxiꞌruꞌ-nëꞌ Dios.
7 Bitiꞌ bi nuáꞌaruꞌ cateꞌ ridxinruꞌ yödzölió,
en lëscaꞌ caní,
bitiꞌ bi uáꞌaruꞌ cateꞌ uzáꞌaruꞌ yödzölió ni.
8 Que lë ni naꞌ,
channö dësö queë́ruꞌ le gáguruꞌ,
en le gácuruꞌ,
ral-laꞌ udzéjaruꞌ.
9 Yuguꞌ bönniꞌ të́ꞌënnëꞌ gataꞌ quégaquiëꞌ yöl-laꞌ tsahuiꞌ,
gaca quégaquiëꞌ le siꞌ bëꞌ légaquiëꞌ le xihuiꞌ,
ateꞌ ilaꞌyuꞌë lu yalaj que tuꞌ xihuiꞌ,
ateꞌ lu yöl-laꞌ bitiꞌ bi nözi quégaquiëꞌ zián le ilaꞌzë́ ládxiꞌgaquiëꞌ,
le ilún ditaj légaquiëꞌ.
Yuguꞌ lë ni uluꞌsuniti légaquiëꞌ,
en ilún ga ilaꞌnítiëꞌ tsaz.
10 Tuꞌ taꞌzë́ ládxiꞌgaca bönachi dumí,
lë ni run ga tun yúguꞌtë le cabí naca tsahuiꞌ.
Bal-lëꞌ bönniꞌ,
tuꞌ taꞌzë́ ládxiꞌgaquiëꞌ le,
buluꞌcáꞌanëꞌ le gulaꞌyéajlëꞌë Cristo,
en chiraca quégaquiëꞌ zián le tuꞌsacaꞌ ziꞌ légaquiëꞌ.
Nu run dxin queëꞌ Cristo naca ca tu bönniꞌ rejëꞌ gudil-la
11 Naꞌa,
bönniꞌ queëꞌ Dios,
gucuíta ga raca le caní.
Bë́ꞌticaꞌsö ládxuꞌu gunuꞌ le naca tsahuiꞌ,
en le rë́ꞌënëꞌ Dios.
Guyéajlëꞌticaꞌsëꞌ Cristo,
en bidxíꞌi yuguꞌ luzóꞌo.
Bëꞌ ladxiꞌ gacuꞌ zxön ladxiꞌ,
en nöxaj ladxiꞌ.
12 Ca runëꞌ tu bönniꞌ idú ládxëꞌë rejëꞌ gudil-la,
ben dxin que le réajlëꞌëruꞌ Cristo,
ateꞌ beni quiuꞌ yöl-laꞌ naꞌbán idú.
Para gaca caní bulidzëꞌ Dios liꞌ.
Dxiꞌa guca le gunnóꞌ yalaj lulu ca réajlëꞌu Cristo,
lë naꞌ gunnóꞌ lógaca zián nupa tun ba nalí que didzaꞌ bëꞌu.
13,14 Niꞌa queëꞌ Xanruꞌ Dios, Nu naꞌ nabánigaca yúguꞌtë le nacuáꞌ, encaꞌ niꞌa queëꞌ Jesucristo, Nu ben ba nalí le naca dxiꞌa le gunnë́ꞌ yálajdoꞌ lahuëꞌ Poncio Pilato, rinná béꞌedaꞌ liꞌ gun chiꞌu yuguꞌ lë naꞌ gunná béꞌenëꞌ Cristo rëꞌu. Ral-laꞌ gacuꞌ idú tsahuiꞌ, en bitiꞌ bi gunuꞌ le güíꞌi lataj nu bi innë́ quiuꞌ, ga idxintë dza niꞌ uluíꞌi lahuëꞌ Xanruꞌ Jesucristo. 15 Cateꞌ idxín dza naꞌ huödëꞌ Jesús,
Dios uluꞌë lahui Lëꞌ.
¡Dios náquiëꞌ láꞌayi!
¡Tuzëꞌ Lëꞌ dë lu nëꞌë yöl-laꞌ unná bëꞌ,
en rinná béꞌenëꞌ yúguꞌtë nupa taꞌnná bëꞌ,
en náquiëꞌ caꞌ Xángaca yúguꞌtë nupa nácagaca xan!
16 ¡Tuzëꞌ Lëꞌ zóaticaꞌsëꞌ!
¡Zoëꞌ lu beníꞌ ga bitiꞌ gaca nu idxín rácasö que!
¡Catu caz nu biléꞌe Lëꞌ,
en bitiꞌ gaca nu iléꞌe Lëꞌ!
¡Queëꞌ Lëꞌ gácaticaꞌsö le run Lëꞌ bal,
en yöl-laꞌ unná bëꞌ!
¡Caꞌ gaca!
17 Gunná beꞌe yuguꞌ bönniꞌ dë quégaquiëꞌ yöl-laꞌ tsahuiꞌ dza ni zóaruꞌ naꞌa,
para cabí ilún ba zxön cuíngaquiëꞌ,
en para cabí uluꞌzxöni ládxiꞌgaquiëꞌ yöl-laꞌ tsahuiꞌ naꞌ bitiꞌ naca löza.
¡Ral-laꞌ ilunëꞌ löza Dios ban,
Nu rúnnadaꞌ queë́ruꞌ yúguꞌtë le ruzíꞌiruꞌ xibé!
18 Gunná beꞌe légaquiëꞌ ilunëꞌ le naca dxiꞌa,
para ilaꞌyandaꞌ dxin dxiꞌa tunëꞌ,
lë naꞌ naca tu yöl-laꞌ tsahuiꞌ idú.
Ral-laꞌ bi uluꞌnödzjëꞌ quégaca bönachi yechiꞌ,
en iluíꞌi ládxiꞌgaquiëꞌ léguequi.
19 Channö ilunëꞌ caní,
uluꞌtubëꞌ yöl-laꞌ tsahuiꞌ naꞌ naca idú,
le uluꞌziꞌë xibé dza siꞌ zaꞌ,
en ilaꞌdéliꞌnëꞌ yöl-laꞌ naꞌbán idú.
Le guluꞌë Pablo lu náꞌabiꞌ biꞌi Timoteo
20 Bö́chaꞌadoꞌ Timoteo,
ben chiꞌi le nadödi lu noꞌo.
Gucuíta ga nacuáꞌ nupa tuíꞌi didzaꞌ cáꞌasö,
en yuguꞌ didzaꞌ bitiꞌ nazacaꞌ,
en yuguꞌ didzaꞌ bizxaj,
yuguꞌ didzaꞌ naꞌ tuíꞌi nupa taꞌnnasö tácadaꞌ,
ateꞌ nazíꞌ yéꞌeguequi ca naca lë naꞌ tun.
21 Bal-la bönachi gulaꞌzíꞌ lu në́ꞌeguequi yuguꞌ didzaꞌ caní,
ateꞌ gulaꞌchixi gulaꞌnigui ca naca le réajlëꞌëruꞌ Cristo.
Rinábidaꞌ-nëꞌ Dios uzáꞌ ládxëꞌë quiuꞌ le nácagaca dxiꞌa queëꞌ.
¡Caꞌ gaca!