DIDZAꞌ BUROPI GUSÖ́L-LËꞌË PABLO QUEË́BIꞌ BIꞌI TIMOTEO
Pablo rugapëꞌ Dios biꞌi Timoteo
1
Nedaꞌ,
Pablo,
nacaꞌ gubáz nasö́l-lëꞌë Cristo.
Caní nacaꞌ tuꞌ rë́ꞌënëꞌ Dios gacaꞌ caní,
para caní gaca le guzxíꞌ lu nëꞌë,
gunnëꞌ queë́ruꞌ yöl-laꞌ naꞌbán idú,
le ruzáꞌ ládxëꞌë Jesucristo queë́ruꞌ.
2 Rugapaꞌ Dios liꞌ,
bö́chaꞌadoꞌ Timoteo.
Nacuꞌ ca zxíꞌini cazaꞌ tuꞌ benruꞌ tu zxön xichinëꞌ Cristo,
ateꞌ nadxíꞌidaꞌ liꞌ.
Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo,
uzáꞌ ládxëꞌë quiuꞌ,
en huéchiꞌ ládxëꞌë liꞌ,
en gunëꞌ ga cöꞌ dxi icja ládxiꞌdoꞌo.
Timoteo ral-laꞌ gunbiꞌ ba nalí queëꞌ Jesucristo
3 Reaꞌ-nëꞌ Dios:
“Xclenuꞌ” ca naca quiuꞌ cateꞌ rulidzaꞌ-nëꞌ Dios.
Bitiꞌ rizóa dxíaꞌ rinabaꞌ niꞌa quiuꞌ rëla,
en te dza lahuëꞌ Dios,
Nu naꞌ runaꞌ xichinëꞌ idú ládxaꞌa ca naꞌ gulunëꞌ xuz xtáꞌahuaꞌ.
4 Cateꞌ röjnedaꞌ ca naꞌ gurödxuꞌ,
rizë́ ládxaꞌa uléꞌedaꞌ liꞌ,
para gaca udzéjadaꞌ idú ládxaꞌa.
5 Reaꞌ-nëꞌ Dios:
“Xclenuꞌ” tuꞌ zoa le run ga röjnedaꞌ ca réajlëꞌu Cristo idú ládxuꞌu.
Lëscaꞌ caní,
gulaꞌyéajlëꞌënu xinóꞌo gula Loida,
encaꞌ xinóꞌo Eunice Lëꞌ zíꞌalö ca liꞌ,
ateꞌ runaꞌ löza,
lëscaꞌ caní réajlëꞌu Lëꞌ naꞌa.
6 Tuꞌ naca caní,
rusáꞌa ládxuꞌu para usubanuꞌ le bennëꞌ Dios quiuꞌ,
lë naꞌ bidxín quiuꞌ cateꞌ niꞌ guxóa naꞌa liꞌ,
en bulidzaꞌ-nëꞌ Dios.
7 Böꞌ naꞌ bennëꞌ Dios queë́ruꞌ bitiꞌ naca tu böꞌ le gun ga gádxiruꞌ,
pero bennëꞌ queë́ruꞌ Böꞌ Láꞌayi Nu run ga náparuꞌ yöl-laꞌ huáca,
en run ga nadxíꞌiruꞌ luzáꞌaruꞌ,
en run caꞌ ga rinná beꞌe cuinruꞌ.
8 Que lë ni naꞌ,
bitiꞌ utuíꞌinuꞌ gunuꞌ ba nalí queëꞌ Xanruꞌ,
en bitiꞌ utuíꞌinuꞌ ca raca quiaꞌ nedaꞌ ni,
nadzunaꞌ lidxi guíë tuꞌ runaꞌ xichinëꞌ,
pero ben tsözxö́n nupa taꞌguíꞌi taꞌzacaꞌ tuꞌ tun libán que didzaꞌ dxiꞌa.
Dios gunnëꞌ yöl-laꞌ huáca quiuꞌ para gunuꞌ caní.
9 Dios caz busölë́ꞌ rëꞌu,
en bulidzëꞌ rëꞌu para gácaruꞌ idú dxiꞌa.
Bitiꞌ bulidzëꞌ rëꞌu tuꞌ zoa le dxiꞌa benruꞌ,
pero bulidzëꞌ rëꞌu tuꞌ gúꞌuni quézinëꞌ Lëꞌ,
en tuꞌ ruzáꞌ ládxëꞌë caní queë́ruꞌ.
Dza niꞌte buzóëꞌ caní queë́ruꞌ zíꞌatëlö ca gutaꞌ yödzölió ni,
tuꞌ néquiruꞌ queëꞌ Jesucristo.
10 Naꞌa,
chibuluíꞌi lahui le ruzáꞌ ládxëꞌë Dios queë́ruꞌ,
tuꞌ buluíꞌi lahuëꞌ Jesucristo Nu rusölá rëꞌu.
Bugǘëꞌ yöl-laꞌ guti,
en buluꞌe lahui yöl-laꞌ naꞌbán idú naꞌ,
le cabí caꞌ initi.
Caní naca ca rnna didzaꞌ dxiꞌa.
11 Cristo buzóëꞌ nedaꞌ para gunaꞌ libán que didzaꞌ dxiꞌa naꞌ,
en para gacaꞌ gubáz queëꞌ para usë́digacadaꞌ bönachi izáꞌa.
12 Que lë ni naꞌ riguíꞌi rizácaꞌa caꞌ yuguꞌ le raca quiaꞌ ni,
pero bitiꞌ rutuíꞌidaꞌ,
tuꞌ núnbëꞌa Nu naꞌ réajlëꞌa.
Runaꞌ löza Lëꞌ,
napëꞌ yöl-laꞌ huáca gapa chiꞌë le budödaꞌ lu nëꞌë ga idxintë dza niꞌ huödëꞌ.
13 Didzaꞌ dxiꞌa naꞌ biyönnuꞌ benaꞌ libán que ral-laꞌ gaca quiuꞌ tu le ruluíꞌi ca ral-laꞌ usédinuꞌ bönachi ca réajlëꞌëruꞌ Jesucristo,
en ca nadxíꞌiruꞌ Lëꞌ.
14 Ben chiꞌi le naca dxiꞌa naꞌ nadödi lu noꞌo,
ateꞌ gaca gunuꞌ caní len yöl-laꞌ huáca queëꞌ Dios Böꞌ Láꞌayi,
Nu zóalen rëꞌu.
15 Chinö́z quézinuꞌ ca naꞌ gulunëꞌ zian bönniꞌ taꞌyéajlëꞌë Cristo nacuꞌë luyú Asia buluꞌbéaj ládxiꞌgaquiëꞌ nedaꞌ.
Figelo,
en Hermógenes nabábagaquiëꞌ bönniꞌ ni.
16,17 Rinábidaꞌ-nëꞌ Xanruꞌ Dios huéchiꞌ ládxëꞌë bönachi nacuáꞌ lidxëꞌ Onesíforo, tuꞌ butipëꞌ ládxaꞌa bönniꞌ ni zián luzuí. Cateꞌ bidxinëꞌ Roma, idú ládxëꞌë buguiljëꞌ nedaꞌ, ateꞌ budzö́linëꞌ nedaꞌ. Bitiꞌ butuíꞌinëꞌ niꞌa quiaꞌ nedaꞌ tuꞌ nadzunaꞌ lidxi guíë ni, nágaꞌa du guíë. 18 Rinábidaꞌ-nëꞌ Xanruꞌ huéchiꞌ ládxëꞌë lëꞌ dza niꞌ idxinëꞌ lahuëꞌ Dios.
Chinö́z quézinuꞌ ca naꞌ gúcalenëꞌ bönniꞌ ni rëꞌu,
cateꞌ niꞌ guzóaruꞌ yödzö Éfeso.