DIDZAꞌ GUSÖ́L-LËꞌË PABLO QUEË́BIꞌ BIꞌI TITO
Pablo rugapëꞌ Dios biꞌi Tito
1
Nedaꞌ,
Pablo,
nacaꞌ huen dxin queëꞌ Dios,
en gubáz nasö́l-lëꞌë Jesucristo.
Gusö́l-lëꞌë nedaꞌ para gunaꞌ ga ilaꞌyéajlëꞌ bönachi chigurö́ cazëꞌ Dios,
para uluꞌúnbëꞌ le naca idútë li ca ral-laꞌ gun nu nunbëꞌ Dios.
2 Caní nacaꞌ tuꞌ runaꞌ löza uziꞌa xibé yöl-laꞌ naꞌbán idú le guzxíꞌ lu nëꞌë Dios gunnëꞌ queë́ruꞌ dza niꞌte,
cateꞌ siꞌ gusí lo rataꞌ yúguꞌtë le dë,
ateꞌ run cazëꞌ Lëꞌ le nazíꞌ lu nëꞌë gunëꞌ.
3 Cateꞌ bidxín dza que,
Dios buluꞌe lahui xtídzëꞌë,
le guluꞌë lu naꞌa gunaꞌ libán que.
Caní gunná béꞌenëꞌ Dios,
Nu busölá rëꞌu,
nedaꞌ.
4 Rugapaꞌ Dios liꞌ,
bö́chaꞌadoꞌ Tito.
Nacuꞌ idú zxíꞌini cazaꞌ tuꞌ naca lë́bisö ca réajlëꞌëruꞌ Cristo.
Rinábidaꞌ-nëꞌ Dios Xuz,
en Xanruꞌ Jesucristo Nu busölá rëꞌu,
uzáꞌ ládxëꞌë quiuꞌ,
en huéchiꞌ ládxëꞌë liꞌ,
en gunëꞌ ga soa dxi icja ládxiꞌdoꞌo.
Dxin queëꞌ Cristo runbiꞌ biꞌi Tito luyú Creta
5 Que lë ni naꞌ bucáꞌanaꞌ liꞌ luyú Creta,
para usóꞌo le riyadzaj quégaca bönachi queëꞌ Cristo nacuáꞌ niꞌ,
para ilácagaca idú bönachi queëꞌ Cristo,
en para ucúꞌu bönniꞌ gula yúguꞌtë yödzö para ilún chiꞌë bönachi queëꞌ Cristo nacuáꞌ tu tu yödzö niꞌ,
ca naꞌ chigunná béꞌedaꞌ liꞌ gunuꞌ.
6 Nu bönniꞌ gula rapa chiꞌë bönachi queëꞌ Cristo ral-laꞌ gáquiëꞌ:
Bönniꞌ cuntu nu bi gaca innë́ queëꞌ.
Zoa túzinu nigula queëꞌ.
Yuguꞌ zxíꞌinëꞌ ral-laꞌ ilaꞌyéajlëꞌëbiꞌ Cristo.
Bitiꞌ soa nu gaca innë́ quégacabiꞌ taꞌdá dzágasibiꞌ caꞌ,
o taꞌdáꞌbagaꞌbiꞌ xuz xináꞌagacabiꞌ.
7 Nu bönniꞌ rapa chiꞌë bönachi queëꞌ Cristo run bayudxi:
Bitiꞌ runëꞌ le güíꞌi lataj nu bi innë́ queëꞌ ca runëꞌ xichinëꞌ Dios.
Bitiꞌ gáquiëꞌ bönniꞌ zidi o bönniꞌ icja dzaꞌa,
o bönniꞌ reꞌjëꞌ,
o bönniꞌ ribízxjanëꞌ,
o bönniꞌ rizë́ ládxiꞌsëꞌ dumí.
8 Ral-laꞌ guꞌë ga ilaꞌcuꞌë bö́chiꞌruꞌ taꞌdxinëꞌ lidxëꞌ.
Ral-laꞌ së ládxëꞌë gunëꞌ le naca dxiꞌa.
Ral-laꞌ gáquiëꞌ bönniꞌ réajniꞌi,
en bönniꞌ tsahuiꞌ.
Ral-laꞌ gádxinëꞌ Dios,
en inná beꞌe cuinëꞌ.
9 Ral-laꞌ gun chiꞌë didzaꞌ idútë li ca chinazëdëꞌ,
para gaca ichíziëꞌ icja nágagaca bönachi ca saꞌyéaj xibá dxiꞌa,
en para gaca usayjëꞌ rúꞌagaca bönachi taꞌnnë́ que.
10 Caní ral-laꞌ gáquiëꞌ tuꞌ taꞌdáꞌbaguëꞌë zián bönniꞌ,
en tuꞌë didzaꞌ bitiꞌ nazacaꞌ,
en taꞌzíꞌ yéꞌenëꞌ bönachi.
Zián bönniꞌ tunëꞌ caní nácagaquiëꞌ judío.
11 Yuguꞌ bönniꞌ ni,
run bayudxi gunuꞌ ga tsayaj ruáꞌagaquiëꞌ,
tuꞌ tunëꞌ ga taꞌchixi taꞌnigui yúguꞌtë bönachi nacuáꞌ yuꞌu gapa taꞌyáziëꞌ,
en tuꞌsédinëꞌ le cabí ral-laꞌ uluꞌsédinëꞌ.
Caní tunëꞌ para ilaꞌzíꞌisëꞌ dumí.
12 Tuëꞌ bönniꞌ gubábëꞌ bönachi Creta ga naꞌ zuꞌ,
bönniꞌ naꞌ bëꞌë didzaꞌ uláz que yudoꞌ quégaquiëꞌ,
gunnë́ꞌ:
“Taꞌzíꞌ yë́ꞌticaꞌsëꞌ bönniꞌ Creta,
en nácagaquiëꞌ ca böaꞌ guíꞌa síniaꞌ.
Nácagaquiëꞌ bönniꞌ huágulëꞌë xöhuëdi.”
13 Didzaꞌ ni benëꞌ ba nalí quégaquiëꞌ naca idútë li.
Que lë ni naꞌ gudil-la légaquiëꞌ para gaca idú ca taꞌyéajlëꞌë Cristo,
14 en para cabí uluꞌzë́ nágagaquiëꞌ yuguꞌ didzaꞌ ridasö quégaquiëꞌ bönniꞌ judío,
en bitiꞌ ilunëꞌ ca taꞌnná bëꞌ bönachi nucáꞌanagaca le naca idútë li.
15 Yúguꞌtë naca dxiꞌa quégaca nupa nácagaca dxiꞌa,
pero quégaca nupa nácagaca xihuiꞌ,
en bitiꞌ taꞌyéajlëꞌ,
bitiꞌ bi naca dxiꞌa,
pero nácagaca xihuiꞌ ga ridxintë le taꞌbequi ícjaguequi,
en le taꞌzáꞌ ládxiꞌgaca.
16 Taꞌnnë́ꞌ núnbëꞌgaquiëꞌ Dios,
pero le túngaquiëꞌ bitiꞌ röjlö́z le taꞌnnë́ꞌ tuꞌ nácagaquiëꞌ bönniꞌ tuꞌdíꞌinëꞌ Dios.
Taꞌdáꞌbaguëꞌë xtídzëꞌë,
en bitiꞌ caꞌ gaca ilunëꞌ le naca dxiꞌa.