DIDZAꞌ GUSÖ́L-LËꞌË PABLO QUEËꞌ FILEMÓN
Pablo rugapëꞌ Dios Filemón
1
Nedaꞌ,
Pablo,
dzágabiꞌ nedaꞌ biꞌi bö́chiꞌruꞌ Timoteo.
Nadzunaꞌ lidxi guíë tuꞌ runaꞌ xichinëꞌ Jesucristo.
Rugapaꞌ Dios liꞌ,
Filemón.
Nacuꞌ bönniꞌ nadxíꞌituꞌ,
en runuꞌ xichinëꞌ Cristo ca runtuꞌ netuꞌ.
2 Rugapaꞌ Dios Apia,
nigula quiuꞌ.
Nácanu zanruꞌ réajlëꞌënu Cristo.
Rugapaꞌ Dios caꞌ zxíꞌinuꞌ,
Arquipo.
Nácabiꞌ queëꞌ Jesucristo ca tu bönniꞌ rejëꞌ gudil-la,
tuꞌ runbiꞌ xichinëꞌ Lëꞌ ca runtuꞌ netuꞌ.
Lëscaꞌ rugapaꞌ Dios bönachi queëꞌ Cristo tuꞌdubëꞌ lu yuꞌu lidxuꞌ.
3 Rinábidaꞌ-nëꞌ Xúziruꞌ Dios,
encaꞌ Xanruꞌ Jesucristo,
uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Ca runëꞌ Filemón tuꞌ réajlëꞌë Cristo
4 Rë́ticaꞌsaꞌ-nëꞌ Dios queë́ruꞌ “Xclenuꞌ”,
en röjnéticaꞌsidaꞌ liꞌ cateꞌ rulidzaꞌ-nëꞌ.
5 Caní runaꞌ tuꞌ ridxín quiaꞌ didzaꞌ ca nadxíꞌinuꞌ-nëꞌ Xanruꞌ Jesús,
en réajlëꞌu Lëꞌ,
en nadxíꞌinuꞌ caꞌ yúguꞌtë bönachi rö queëꞌ.
6 Rinábidaꞌ-nëꞌ Dios gunëꞌ ga gundaꞌ dxin libán runuꞌ ca naca le réajlëꞌu Cristo,
para uluꞌzíꞌ xibé nupa nacuáꞌ niꞌ yúguꞌtë le naca dxiꞌa,
le ruzáꞌ ládxëꞌë Jesucristo queë́ruꞌ.
7 Rudzéjadaꞌ,
en ruzíꞌ zxönaꞌ tuꞌ nadxíꞌinuꞌ yuguꞌ bö́chiꞌruꞌ,
en benuꞌ liꞌ,
bö́chaꞌa,
ga buluꞌhuöáca ládxiꞌgaca bönachi taꞌyéajlëꞌ Cristo.
Filemón ral-laꞌ uniti lahuëꞌ-biꞌ Onésimo, biꞌi nadóꞌo queëꞌ
8 Que lë ni naꞌ,
sal-laꞌ dë lu naꞌa tuꞌ nacaꞌ gubáz nasö́l-lëꞌë Cristo inná béꞌedaꞌ liꞌ ca ral-laꞌ gunuꞌ,
9 rátaꞌyuaꞌ loꞌ len yöl-laꞌ nadxíꞌi,
nedaꞌ ni chinacaꞌ bönniꞌ gula,
en yuꞌa lidxi guíë tuꞌ runaꞌ xichinëꞌ Jesucristo.
10 Rátaꞌyuaꞌ loꞌ uláz queë́biꞌ Onésimo,
biꞌi naꞌ benaꞌ ga böácabiꞌ queëꞌ Cristo,
en que lë ni naꞌ nácabiꞌ ca zxíꞌini cazaꞌ ga ni nadzunaꞌ lidxi guíë.
11 Biꞌi ni,
zíꞌalö bitiꞌ gúcabiꞌ lesacaꞌ quiuꞌ,
pero naꞌa nácabiꞌ lesacaꞌ quiuꞌ liꞌ,
encaꞌ quiaꞌ nedaꞌ.
12 Biꞌi ni rusö́l-laꞌa-biꞌ ga zuꞌ.
Ben bal lëbiꞌ ca nedaꞌ caz runuꞌ bal,
tuꞌ nadxíꞌidaꞌ-biꞌ.
13 Gúꞌunidaꞌ ugáꞌanalenbiꞌ nedaꞌ ni,
para uláz quiuꞌ gunbiꞌ xichinaꞌ tsanni ni yuꞌa lidxi guíë tuꞌ runaꞌ libán que didzaꞌ dxiꞌa,
14 pero bitiꞌ bi rë́ꞌëndaꞌ gunaꞌ le cabí naca didzaꞌ quiuꞌ,
para cabí gunaꞌ bayudxi gácalenuꞌ nedaꞌ,
pero huáca gácalenuꞌ nedaꞌ tuꞌ rë́ꞌëni quézinuꞌ caꞌ.
15 Nadxi caꞌ que lë ni naꞌ buzáꞌabiꞌ Onésimo ga zuꞌ tu chíꞌidoꞌ para udxinbiꞌ tsaz ga zuꞌ.
16 Naꞌa,
bítiꞌrö gácabiꞌ quiuꞌ ca tu biꞌi nadóꞌo,
pero gácabiꞌ quiuꞌ ca biꞌi böchiꞌ cazuꞌ,
tuꞌ nácabiꞌ biꞌi bö́chiꞌruꞌ réajlëꞌëbiꞌ Cristo,
en nadxíꞌiruꞌ-biꞌ.
Nácabiꞌ caní quiaꞌ nedaꞌ,
ateꞌ ral-laꞌ gácaröbiꞌ caꞌ caní quiuꞌ,
calë́gasö ca böchiꞌ luzóꞌo,
pero lëscaꞌ ca biꞌi bö́chuꞌu réajlëꞌëbiꞌ Xanruꞌ Jesucristo.
17 Que lë ni naꞌ,
channö nunuꞌ nedaꞌ tuz,
ben lëbiꞌ bal ca nedaꞌ caz runuꞌ bal.
18 Channö bi xíguiaꞌ benbiꞌ quiuꞌ o channö bi rál-laꞌbiꞌ quiuꞌ,
gunnátëz nedaꞌ ral-laꞌa.
19 Nedaꞌ,
Pablo,
len naꞌa cazaꞌ ruzúajaꞌ quiuꞌ lu guichi lë ni:
Nedaꞌ caz quizxjaꞌ bi rál-laꞌbiꞌ,
en calëga guíaꞌ liꞌ:
Lëscaꞌ ral-luꞌu quiaꞌ yúguꞌtë le dë quiuꞌ tuꞌ benaꞌ nedaꞌ ga napuꞌ yöl-laꞌ naꞌbán idú.
20 Caꞌ gaca,
bö́chaꞌa.
Channö dë le uziꞌa xibóꞌ tuꞌ néquiruꞌ queëꞌ Xanruꞌ,
ben lë naꞌ chigútaꞌyuaꞌ loꞌ tuꞌ nacaꞌ bö́chuꞌu réajlëꞌa Cristo,
ateꞌ caní gunuꞌ ga huöáca ládxaꞌa.
21 Ruzúajaꞌ quiuꞌ lu guichi ni,
tuꞌ ruzxöni ládxaꞌa liꞌ,
gunuꞌ ca rnna xtídzaꞌa,
en nözdaꞌ gunuꞌ iaꞌlatiꞌ ca lë naꞌ chigútaꞌyuaꞌ loꞌ.
22 Lëscaꞌ rinabaꞌ loꞌ upóꞌo quiaꞌ ga soaꞌ lu yuꞌu lidxuꞌ,
tuꞌ runaꞌ löza urúajaꞌ lidxi guíë ni,
ateꞌ guídaꞌ ga zóaliꞌ tuꞌ rulídzaliꞌ-nëꞌ Dios,
en rinábaliꞌ lahuëꞌ niꞌa quiaꞌ nedaꞌ.
Pablo ruzúajëꞌ lu guichi le rugapa Dios Filemón
23 Epafras,
bönniꞌ yúꞌulenëꞌ nedaꞌ tsözxö́n lidxi guíë ni tuꞌ runëꞌ xichinëꞌ Jesucristo,
rugapëꞌ Dios liꞌ.
24 Lëscaꞌ tuꞌgapëꞌ Dios liꞌ Marcos,
en Aristarco,
en Demas,
en Lucas,
yuguꞌ bönniꞌ ni túnlenëꞌ nedaꞌ tsözxö́n dxin queëꞌ Cristo.
25 Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ.
¡Caꞌ gaca!