Le ral-laꞌ ilún bönachi taꞌyéajlëꞌ Cristo
3
Busáꞌ ládxiꞌgaquiëꞌ bö́chiꞌruꞌ niꞌ ilunëꞌ ca taꞌnnë́ꞌ bönniꞌ dë lu náꞌagaquiëꞌ,
en bönniꞌ yúlahuiꞌ,
para ilunëꞌ ca rnna xtídzaꞌgaquiëꞌ.
Ral-laꞌ ilaꞌcuꞌë sinaꞌ ilunëꞌ le naca dxiꞌa.
2 Bitiꞌ bi le ruáꞌ döꞌ ral-laꞌ ilaꞌnnë́ꞌ que luzáꞌagaquiëꞌ,
en bitiꞌ ilaꞌdíl-lalenëꞌ légaquiëꞌ didzaꞌ,
pero ral-laꞌ ilácagaquiëꞌ nöxaj ladxiꞌ,
en idú ladxiꞌ lógaca yúguꞌtë bönachi.
3 Lëscaꞌ rëꞌu,
zíꞌalö gúcaruꞌ yuguꞌ bönniꞌ bitiꞌ taꞌyéajniꞌinëꞌ,
en gudáꞌbagaꞌruꞌ Dios.
Gudaruꞌ nanítiruꞌ,
en gúcaruꞌ ca nupa nadóꞌogaca,
tuꞌ benruꞌ le guzë́ ládxiꞌruꞌ le ruáꞌ döꞌ,
en iaꞌbal-la le guyaza ládxiꞌruꞌ.
Benruꞌ caꞌ le ruáꞌ döꞌ,
en buzxéꞌeruꞌ luzáꞌaruꞌ.
Bitiꞌ bilaꞌléꞌe bönachi rëꞌu dxiꞌa,
ateꞌ rëꞌu bitiꞌ biléꞌeruꞌ dxiꞌa luzáꞌaruꞌ turuꞌ iaꞌturuꞌ.
4 Níꞌirö buluꞌe lahui Dios,
Nu rusölá rëꞌu.
Naca bëꞌ náquiëꞌ idú dxiꞌa,
en nadxíꞌinëꞌ yúguꞌtë bönachi,
5 tuꞌ busölë́ꞌ rëꞌu,
calëga tuꞌ zoa bi le naca dxiꞌa benruꞌ rëꞌu,
pero tuꞌ buéchiꞌ ládxëꞌë rëꞌu.
Bunëꞌ rëꞌu dxiꞌa,
en benëꞌ ga nácaruꞌ bönachi cubi.
Dios Böꞌ Láꞌayi rucubëꞌ rëꞌu.
6 Dios gusö́l-lëꞌë Dios Böꞌ Láꞌayi queë́ruꞌ tuꞌ néquiruꞌ queëꞌ Jesucristo,
Nu rusölá rëꞌu.
7 Buzáꞌ ládxëꞌë queë́ruꞌ,
en bunëꞌ rëꞌu tsahuiꞌ para gataꞌ yöl-laꞌ naꞌbán idú queë́ruꞌ,
le runruꞌ löza gunnëꞌ queë́ruꞌ.
8 Didzaꞌ idútë li lë ni nuzúajaꞌ lu guichi.
Rë́ꞌëndaꞌ usédideꞌenuꞌ yuguꞌ bönniꞌ niꞌ yuguꞌ lë ni para iluíꞌi ládxiꞌgaquiëꞌ ilúnticaꞌsëꞌ le naca dxiꞌa tuꞌ taꞌyéajlëꞌë Dios.
Lë ni naca dxiꞌa,
en nácadaꞌ lesacaꞌ ilaꞌzíꞌ lu náꞌagaca yúguꞌtë bönachi.
9 Naꞌa,
bitiꞌ guꞌu lataj nu güíꞌi didzaꞌ le cabí nazacaꞌ,
o nu güíꞌi ladxiꞌ ca nácagaca lágaca ziántërö cöꞌ xuz xtóꞌogaca bönachi,
o nu tsöjgutsaꞌ yuguꞌ didzaꞌ bizxaj,
en yuguꞌ le ridil-la didzaꞌ ca naca que xibá queëꞌ Moisés,
tuꞌ cabí bi nazácaꞌgaca le caní,
ateꞌ cuntu nu uzíꞌ xibé didzaꞌ caní.
10 Channö zoa nu bönniꞌ niꞌ,
rubéajëꞌ choplö bönachi queëꞌ Cristo,
tödi usóꞌo ládxëꞌë tu iaꞌtú luzuí,
bubéajëꞌ bönniꞌ naꞌ.
11 Nöz quézinuꞌ chiböáquiëꞌ caní nu bönniꞌ bitiꞌ náquiëꞌ tsahuiꞌ,
en runëꞌ dul-laꞌ.
Chinabáguëꞌë xíguiaꞌ niꞌa que lë naꞌ runëꞌ.
Le buzúajëꞌ Pablo lu guichi le gunbiꞌ biꞌi Tito
12 Cateꞌ isö́l-laꞌa-nëꞌ Artemas o Tíquico ga zuꞌ,
bëꞌ ladxiꞌ guíduꞌ ga ni zoaꞌ lu yödzö Nicópolis,
tuꞌ chinunaꞌ quiaꞌ ugáꞌanaꞌ ni yuguꞌ beoꞌ ziaga.
13 Zenas,
bönniꞌ naꞌ rudödëꞌ didzaꞌ ca rinná bëꞌ bönachi yúlahuiꞌ,
encaꞌ Apolos,
ilaꞌdxinëꞌ ga niꞌ zóaliꞌ.
Bugúꞌu légaquiëꞌ nöza lu yöl-laꞌ rácalen,
para cabí bi yadzaj quégaquiëꞌ.
14 Busedi yuguꞌ böchiꞌ luzáꞌaruꞌ ilúnticaꞌsëꞌ le naca dxiꞌa,
en bi uluꞌnödzjëꞌ quégaca nupa bi riyadzaj quéguequi,
para gaca bëꞌ caní le nácagaquiëꞌ queëꞌ Cristo.
Pablo rugapëꞌ Dios bönachi queëꞌ Cristo
15 Yúguꞌtë nupa nacuáꞌlen nedaꞌ tuꞌgapa Dios liꞌ.
Bugapa Dios nupa niꞌ nadxíꞌigaca rëꞌu tuꞌ taꞌyéajlëꞌ Dios.
Le ruzáꞌ ládxëꞌë Dios queë́ruꞌ gácalen yúguꞌtëliꞌ.
¡Caꞌ gaca!