Xibá dxiꞌa le ral-laꞌ usë́diruꞌ
2
Naꞌa,
ral-laꞌ guꞌu didzaꞌ le röjlö́z xibá dxiꞌa.
2 Busedi yuguꞌ bönniꞌ gula:
Bitiꞌ ral-laꞌ ilë́ꞌajëꞌ.
Ral-laꞌ iláquiëꞌ baꞌa ladxiꞌ,
en bönniꞌ taꞌyéajniꞌinëꞌ.
Ral-laꞌ gaca idú ca taꞌyéajlëꞌë Cristo.
Ral-laꞌ ilaꞌdxíꞌinëꞌ luzáꞌagaquiëꞌ,
en ilaꞌbözëꞌ zxön ladxiꞌ.
3 Busedi yuguꞌ nigula gula:
Ilunnu le raza ládxëꞌë Dios.
Cabí ilaꞌnnënu que luzáꞌagacanu,
en cabí ilë́ꞌajnu.
Ral-laꞌ uluꞌsédinu le naca dxiꞌa.
4 Ral-laꞌ uluꞌsédinuꞌ nigula niꞌ yúꞌugacanu iz cuidiꞌ
para ilaꞌdxíꞌinu bönniꞌ que queë́gacanu,
encaꞌ zxíꞌinigacanu.
5 Ral-laꞌ ilácanu nigula taꞌyéajniꞌinu,
en nigula dxiꞌa ladxiꞌ.
Ral-laꞌ ilún chíꞌinu le dë lídxigacanu,
en ilácanu dxiꞌa.
Ral-laꞌ ilunnu bal bönniꞌ que queë́gacanu.
Ral-laꞌ cabí bi ilunnu le güíꞌi lataj nu innë́ ziꞌ que xtídzëꞌë Dios.
6 Busedi yuguꞌ bönniꞌ niꞌ nacuꞌë iz cuidiꞌ:
Ral-laꞌ ilácagaquiëꞌ bönniꞌ taꞌyéajniꞌinëꞌ.
7 Ral-laꞌ gúnticaꞌsuꞌ le naca dxiꞌa,
uluíꞌinuꞌ bönachi caní ca ral-laꞌ ilúngaca.
Ca rusédinuꞌ ral-laꞌ uluíꞌi nacuꞌ idú ladxiꞌ,
en baꞌa ladxiꞌ.
8 Ral-laꞌ usédinuꞌ didzaꞌ dxiꞌa le cabí gaca nu bi innë́ que.
Caní gunuꞌ ga utuíꞌinëꞌ bönniꞌ ridáꞌbaguëꞌë,
en bitiꞌ gaca bi innë́ꞌ queë́liꞌ runliꞌ le ruáꞌ döꞌ.
9 Busedi bö́chiꞌruꞌ niꞌ taꞌyéajlëꞌë Cristo,
en nadóꞌogaquiëꞌ:
Ral-laꞌ ilaꞌcuꞌë nöxaj lógaquiëꞌ xángaquiëꞌ.
Ral-laꞌ ilunëꞌ yúguꞌtë le ilaꞌyaza ládxiꞌgaquiëꞌ xángaquiëꞌ.
Bitiꞌ ral-laꞌ táꞌbagaꞌgaquiëꞌ le taꞌnná bëꞌë.
10 Bitiꞌ bi uluꞌcáchiꞌlanëꞌ.
Ral-laꞌ uluꞌluíꞌi cuíngaquiëꞌ tsahuiꞌ ca naca yúguꞌtë le tunëꞌ.
Caní uluíꞌi lo naca dxiꞌa xibá queëꞌ Dios,
Nu busölá rëꞌu.
11 Cristo,
bönniꞌ naꞌ buzáꞌ ládxëꞌë Dios queë́ruꞌ chibuluíꞌi lahuëꞌ lógaca yúguꞌtë bönachi para uluꞌlágaca.
12 Lëꞌ rusédinëꞌ rëꞌu ucáꞌanaruꞌ le cabí raza ládxëꞌë Dios,
en cabí së ládxiꞌruꞌ le naca que yödzölió ni,
pero cö́zaruꞌ zxön ladxiꞌ,
en gácaruꞌ tsahuiꞌ dza ni zóaruꞌ naꞌa,
en gunruꞌ ca rë́ꞌëni quézinëꞌ Dios.
13 Ral-laꞌ cö́zaruꞌ le runruꞌ löza le gun ga gácaruꞌ bicaꞌ ba,
lë naꞌ gaca dza niꞌ cateꞌ uluíꞌi lahuëꞌ Jesucristo lu beníꞌ idú queëꞌ.
Náquiëꞌ Dios zxön,
Nu rusölá rëꞌu.
14 Lë cazëꞌ budödi cuinëꞌ uláz queë́ruꞌ,
para böáꞌuëꞌ rëꞌu lu yúguꞌtë le naca xihuiꞌ,
ateꞌ ruúnëꞌ rëꞌu tsahuiꞌ para gácaruꞌ bönachi queëꞌ,
en güíꞌi ládxiꞌruꞌ gunruꞌ le naca dxiꞌa.
15 Yuguꞌ lë ni bëꞌ didzaꞌ,
en guchiza icja nágagaca bönachi niꞌ,
ateꞌ len yöl-laꞌ unná bëꞌ gudil-la léguequi.
Bénticaꞌsö caní,
para cabí siꞌ lataj nu ucáꞌana cáꞌasö xtídzuꞌu.