DIDZAꞌ RUZÉAJNIꞌI YUGUꞌ BÖNACHI HEBREO
Dios bë́ꞌlenëꞌ rëꞌu didzaꞌ lu ruꞌë Zxíꞌini cazëꞌ
1
Zián luzuí,
en zián ca benëꞌ Dios,
bë́ꞌlenëꞌ xuz xtóꞌoruꞌ didzaꞌ dza niꞌte lu ruáꞌagaquiëꞌ bönniꞌ guluꞌë didzaꞌ uláz queëꞌ.
2 Naꞌa,
ga ruúdxi xtídzëꞌë,
dza ni zóaruꞌ naꞌa,
Dios bë́ꞌlenëꞌ rëꞌu didzaꞌ lu ruꞌë Zxíꞌini cazëꞌ.
Dios buzóëꞌ Lëꞌ para guequi queëꞌ Zxíꞌinëꞌ yúguꞌtë le nequi queëꞌ Lëꞌ,
ateꞌ lu nëꞌë Zxíꞌinëꞌ naꞌ,
Dios benëꞌ yödzölió ni.
3 Zxíꞌinëꞌ naꞌ náquiëꞌ ca tu le ruluíꞌi lahui yöl-laꞌ zxön queëꞌ Dios,
en ca náquiëꞌ Zxíꞌinëꞌ ruluíꞌi lahui idú le náquiëꞌ Dios caz.
Run cazëꞌ ga nacuáꞌticaꞌsö yúguꞌtë,
rugunëꞌ dxin didzaꞌ ruꞌë,
en yöl-laꞌ huáca queëꞌ.
Cateꞌ budxi benëꞌ le ruún rëꞌu dxiꞌa que le naca dul-laꞌ nabágaꞌruꞌ,
yöjchöꞌë cuita lëꞌë ibëla Dios,
Nu röꞌö rinná bëꞌ xitsáꞌtërö.
Zxíꞌinëꞌ Dios nayë́pisëtërëꞌ ca yuguꞌ gubáz láꞌayi
4 Zxíꞌinëꞌ Dios nayë́pisëtërëꞌ ca yuguꞌ gubáz láꞌayi queëꞌ Dios,
tuꞌ nácatërö lo le lëꞌ,
lë naꞌ Dios guluꞌë Lëꞌ tuꞌ náquiëꞌ Zxíꞌini cazëꞌ,
ca lágaquiëꞌ gubáz láꞌayi queëꞌ naꞌ.
5 Dios catu caz gudxëꞌ tuëꞌ gubáz láꞌayi queëꞌ ca naꞌ gudxëꞌ Zxíꞌinëꞌ.
Gunnë́ꞌ:
Zxíꞌinaꞌ nacuꞌ.
Buzóaꞌ Liꞌ naꞌa.
Catu caz bëꞌë didzaꞌ queëꞌ tuëꞌ gubáz láꞌayi ca naꞌ bëꞌë didzaꞌ ca naca queëꞌ Zxíꞌinëꞌ.
Gunnë́ꞌ:
Nacaꞌ Xuzëꞌ,
ateꞌ Lëꞌ náquiëꞌ Zxíꞌinaꞌ.
6 Lëscaꞌ caní,
cateꞌ Dios buzóëꞌ Biꞌi que cazëꞌ lu yödzölió ni,
gunnë́ꞌ:
Yúguꞌtë gubáz láꞌayi queëꞌ Dios ilaꞌyéaj ládxiꞌgaquiëꞌ Lëꞌ.
7 Ca nácagaquiëꞌ gubáz láꞌayi queëꞌ,
rnna:
Lëꞌ runëꞌ ga nácagaquiëꞌ gubáz láꞌayi queëꞌ ca böꞌ recja,
ateꞌ gubáz láꞌayi huen dxin queëꞌ,
runëꞌ ga nácagaquiëꞌ ca guíꞌ.
8 Naꞌa,
ca naca cazëꞌ Zxíꞌinëꞌ,
rnnëꞌ:
Ga röꞌu rinná bëꞌu,
inná bë́ꞌticaꞌsuꞌ,
Dios.
Tsahuiꞌ naca ca rinná bëꞌu.
9 Nadxíꞌinuꞌ le naca tsahuiꞌ,
en calëga le ruáꞌ döꞌ.
Que lë ni naꞌ Dios budödëꞌ lu noꞌo yöl-laꞌ unná bëꞌ,
en benëꞌ ga ruzíꞌitëruꞌ Liꞌ xibé yöl-laꞌ unná bëꞌ
ca le tuꞌzíꞌi xibé luzóꞌo.
10 Lëscaꞌ caní rnnëꞌ:
Liꞌ,
Xan,
cateꞌ gusí lo,
benuꞌ yödzölió,
ateꞌ len náꞌasuꞌ buzúꞌ lúzxiba.
11 Huadödi quéguequi,
pero Liꞌ,
tsaz idíꞌu.
Yúguꞌtë itë́bigaca ca ritëbi lariꞌ,
12 en ca lariꞌ utubuꞌ léguequi,
en utsóꞌo léguequi,
pero Liꞌ,
catu caz utsáꞌ cuinuꞌ
en catu caz iguluꞌ.
13 Dios catu caz gudxëꞌ tuëꞌ gubáz láꞌayi queëꞌ ca gudxëꞌ Zxíꞌinëꞌ,
gunnë́ꞌ:
Gurö́ꞌö cuita lëꞌa ibëla
cateꞌ gunraꞌ ga uluꞌzechu zxíbigaca loꞌ
nupa bitiꞌ taꞌléꞌe Liꞌ dxiꞌa.
14 Yúguꞌtë gubáz láꞌayi queëꞌ Dios nácagaquiëꞌ böꞌ huen dxin queëꞌ Dios,
ateꞌ nasö́l-lëꞌë légaquiëꞌ para ilácalenëꞌ nupa ni nulágaca.