Bitiꞌ ral-laꞌ ucáꞌanaruꞌ cáꞌasö yöl-laꞌ rusölá
2
Que lë ni naꞌ,
ral-laꞌ güíꞌi ládxiꞌröruꞌ le chibiyö́niruꞌ,
para cabí gaca chopa ládxiꞌruꞌ.
2 Guca bëꞌ naca idútë li didzaꞌ naꞌ,
le bidxín dza niꞌte lu náꞌagaquiëꞌ gubáz láꞌayi queëꞌ Dios,
ateꞌ yúguꞌtë nupa gulaꞌdödi bëꞌ ca rnna didzaꞌ naꞌ,
en bitiꞌ gulún ca rnna,
Dios benëꞌ léguequi xíguiaꞌ ca naꞌ röjlö́z le gulúngaca.
3 Lëscaꞌ caní bitiꞌ caꞌ uláruꞌ rëꞌu lu xíguiaꞌ naꞌ channö ucáꞌanaruꞌ cáꞌasö yöl-laꞌ rusölá ni,
le benëꞌ Lë cazëꞌ Xanruꞌ libán que zíꞌalö,
ateꞌ nupa bilaꞌyöni Lëꞌ buluꞌluíꞌi rëꞌu naca idútë li.
4 Lëscaꞌ caní Dios caz benëꞌ tsözxö́n légaquiëꞌ ba nalí,
tuꞌ benëꞌ le nácagaca bëꞌ,
en le tun ga rubániruꞌ,
en yuguꞌ yöl-laꞌ huáca zxön.
Gudísiëꞌ caꞌ yuguꞌ le runödzjëꞌ Dios Böꞌ Láꞌayi quégaquiëꞌ tsca gúꞌuni quézinëꞌ Dios.
Dios benëꞌ ga böáquiëꞌ Jesús idú ca nácaruꞌ rëꞌu
5 Dios bitiꞌ budödëꞌ yödzölió siꞌ zaꞌ lu náꞌagaquiëꞌ gubáz láꞌayi que yehuaꞌ yubá queëꞌ,
lë naꞌ ruíꞌiruꞌ didzaꞌ que.
6 Naꞌa,
ca naca lë ni,
nazúaj lu guichi láꞌayi didzaꞌ bëꞌ nu run ba nalí le rnna:
Dios,
rubánideꞌedaꞌ tuꞌ ruíꞌi ládxuꞌu bönachi.
Rubánideꞌedaꞌ tuꞌ rácalenuꞌ léguequi.
7 Iaꞌlátiꞌsö cáꞌasö ca yuguꞌ gubáz láꞌayi que yehuaꞌ yubá quiuꞌ benuꞌ bönachi.
Buzúꞌ quéguequi yöl-laꞌ zxön,
en yöl-laꞌ run bal,
en budöduꞌ yúguꞌtë le benuꞌ Liꞌ lu në́ꞌeguequi.
8 Yúguꞌtë budöduꞌ lu në́ꞌeguequi para ilaꞌnná beꞌe le.
Nazúaj lu guichi láꞌayi lë naꞌ rnna:
“Budöduꞌ lu në́ꞌeguequi yúguꞌtë.”
Bitiꞌ bi bucáꞌanëꞌ le cabí budödëꞌ lu në́ꞌeguequi,
pero ga ridxintë naꞌa dza,
bitiꞌ riléꞌeruꞌ yuꞌu lu në́ꞌeguequi yúguꞌtë.
9 Réquibeꞌeruꞌ le guca queëꞌ Jesús.
Tu chíꞌisö,
Dios benëꞌ ga böáquiëꞌ iaꞌlátiꞌsö cuidiꞌ ca yuguꞌ gubáz láꞌayi que yehuaꞌ yubá queëꞌ.
Guljëꞌ bönachi para gútiëꞌ,
ateꞌ gudíꞌi guzxáquëꞌë Jesús lu yöl-laꞌ guti uláz quégaca yúguꞌtë bönachi,
tuꞌ buzáꞌ ládxëꞌë Dios queë́ruꞌ caní.
Tuꞌ benëꞌ Jesús caní,
Dios benëꞌ ga rataꞌ queëruꞌ yöl-laꞌ zxön,
en yöl-laꞌ run bal.
10 Dios benëꞌ yúguꞌtë le riléꞌeruꞌ,
en runëꞌ ga nacuáꞌticaꞌsö.
Dios benëꞌ ca ral-laꞌ gunëꞌ cateꞌ benëꞌ ga naca bëꞌ náquiëꞌ Cristo idú tsahuiꞌ niꞌa que le gudíꞌi guzxáquëꞌë.
Caní benëꞌ Dios queëꞌ Cristo,
Nu bideliꞌ yöl-laꞌ rusölá para gaca ichë́ꞌë bönachi zián yehuaꞌ yubá queëꞌ.
11 Cristo ruúnëꞌ tsahuiꞌ bönachi para ilequi quez queëꞌ Dios.
Tuzëꞌ náquiëꞌ Xúzguequi nupa naꞌ ruúnëꞌ Cristo tsahuiꞌ,
en Xuz cazëꞌ.
Que lë ni naꞌ,
bitiꞌ caꞌ rutuíꞌinëꞌ Zxíꞌinëꞌ Dios cateꞌ rnnëꞌ nácagaquiëꞌ böchiꞌ luzë́ꞌë.
12 Ca naca lë ni nazúaj lu guichi láꞌayi le rnna:
Usiyöndaꞌ böchiꞌ luzáꞌa ca nacuꞌ Liꞌ,
Dios.
Gatsaj láhuiꞌlö bönachi tuꞌdubi quiuꞌ,
gul-laꞌ yöl-laꞌ ba quiuꞌ.
13 Lëscaꞌ caní rnnëꞌ:
Uzxöni ládxaꞌa-nëꞌ Dios.
Ga yúbölö nazúaj le rnnëꞌ:
¡Buliꞌyútsöcaꞌ nedaꞌ,
en yuguꞌ zxíꞌinëꞌ,
nupa naꞌ Dios bennëꞌ quiaꞌ!
14 Que lë ni naꞌ,
tuꞌ néquiguequinëꞌ bëlaꞌ en rön yuguꞌ zxíꞌinëꞌ naꞌ,
lëscaꞌ caní Cristo ben cuinëꞌ ca nácagaquiëꞌ.
Guljëꞌ bëlaꞌ en rön.
Caní guljëꞌ para guca gútiëꞌ,
en caní guca busunítiëꞌ yöl-laꞌ huáca unná bëꞌ que tuꞌ xihuiꞌ,
nu naꞌ dë lu nëꞌe guti bönachi.
15 Caní benëꞌ Cristo para guca busanëꞌ yúguꞌtë nupa gulaca ca bönniꞌ nadóꞌogaquiëꞌ tsanni ni nacuáꞌ nabángaca,
tuꞌ guladxi yöl-laꞌ guti.
16 Naca bëꞌ bitiꞌ benëꞌ caní para gácalenëꞌ yuguꞌ gubáz láꞌayi que yehuaꞌ yubá queëꞌ Dios,
pero para gúcalenëꞌ yuguꞌ zxíꞌini xiꞌsóëꞌ Abraham.
17 Que lë ni naꞌ,
ben bayudxi böáquiëꞌ Cristo idú ca nácagaquiëꞌ böchiꞌ luzë́ꞌë naꞌ,
para gáquiëꞌ lahuëꞌ Dios tu bixúz lo,
tu bixúzi runëꞌ ca rnnëꞌ,
en ruhuéchiꞌ ládxëꞌë bönachi,
encaꞌ para gunëꞌ le gun ga gataꞌ lu nëꞌë ugǘëꞌ dul-laꞌ nabágaꞌgaca bönachi.
18 Naꞌa,
tuꞌ gudíꞌi guzxáquëꞌë Lë cazëꞌ Cristo,
ateꞌ guzxíꞌ bëꞌ tuꞌ xihuiꞌ Lëꞌ,
que lë ni naꞌ napëꞌ yöl-laꞌ huáca gácalenëꞌ nupa ni,
rizíꞌ bëꞌ tuꞌ xihuiꞌ léguequi.