Jesús nayë́pisëtërëꞌ ca Moisés
3
Que lë ni naꞌ,
böchiꞌ luzáꞌadoꞌ,
libíꞌiliꞌ naꞌ nácaliꞌ quez queëꞌ Dios tuꞌ bulidzëꞌ Dios libíꞌiliꞌ,
buliꞌyú dxiꞌa ca náquiëꞌ Jesucristo.
Náquiëꞌ gubáz nasö́l-lëꞌë Dios,
encaꞌ bixúz lo que le nazíꞌ lu náꞌaruꞌ.
2 Jesús ni runëꞌ ca rnna xtídzëꞌë Dios,
Nu naꞌ buzóa Lëꞌ xilatjëꞌ,
ca naꞌ benëꞌ caꞌ Moisés,
benëꞌ ca rnna xtídzëꞌë Dios lógaca yúguꞌtë bönachi queëꞌ Dios.
3 Nayë́pisëtërëꞌ Jesús ca Moisés,
para gaca queëꞌ yöl-laꞌ ba,
ca naꞌ nácarëꞌ lo bönniꞌ nequi queëꞌ tu yuꞌu ca naca huen dxin zoëꞌ lu yuꞌu naꞌ.
4 Yúguꞌtë yuꞌu,
zoa nu ben le,
pero Dios náquiëꞌ Nu ben yúguꞌtë le riléꞌeruꞌ.
5 Le nácatë Moisés benëꞌ ca rnna xtídzëꞌë Dios lógaca bönachi queëꞌ Dios,
pero gúquiëꞌ ca tu bönniꞌ huen dxin,
ateꞌ benëꞌ ba nalí que didzaꞌ ral-laꞌ guꞌë Dios,
6 pero Cristo runëꞌ ca rnna xtídzëꞌë Dios,
en náquiëꞌ Zxíꞌini cazëꞌ,
ateꞌ nacuáꞌ lu nëꞌë bönachi queëꞌ Dios.
Rëꞌu ni,
nácaruꞌ bönachi naꞌ queëꞌ Dios channö gácaruꞌ tsutsu ga idxinrö dza údxi.
Ral-laꞌ gácaruꞌ tsutsu ca ridipa ládxiꞌruꞌ,
encaꞌ ca rudzéjalenruꞌ lë naꞌ runruꞌ löza.
Dë lataj ga uluꞌzíꞌ ládxiꞌgaca bönachi queëꞌ Dios
7 Que lë ni naꞌ,
nazúaj lu guichi ca rnnëꞌ Dios Böꞌ Láꞌayi le rnna:
Naꞌa,
channö riyö́niliꞌ didzaꞌ ruꞌë Dios,
8 bitiꞌ gácaliꞌ zidi lu icja ládxiꞌdoꞌoliꞌ
ca naꞌ gulaca nupa niꞌ gulaꞌdáꞌbagaꞌ Dios
cateꞌ niꞌ gulaꞌzíꞌ bëꞌ Lëꞌ lu lataj cáꞌasö.
9 Gulaꞌzíꞌ bëꞌë xuz xtóꞌoliꞌ nedaꞌ niꞌ
sal-laꞌ bilaꞌléꞌenëꞌ le benaꞌ idú ca choáꞌ iz.
10 Que lë ni naꞌ gulédaꞌ bönachi dza niꞌ,
en gunníaꞌ:
“Taꞌchíxiticaꞌsinëꞌ ca taꞌzáꞌ ládxiꞌgaquiëꞌ.
Bitiꞌ të́ꞌënnëꞌ ilaꞌnö́zinëꞌ le rë́ꞌëndaꞌ ilunëꞌ.”
11 Que lë ni naꞌ gulédaꞌ légaquiëꞌ,
en benaꞌ tsutsu xtídzaꞌa,
gunníaꞌ:
“Bitiꞌ ilaꞌyáziëꞌ ga uluꞌzíꞌ ládxiꞌgaquiëꞌ tsözxö́n len nedaꞌ.”
12 Guliꞌgún chiꞌi cuinliꞌ,
böchiꞌ luzáꞌadoꞌ,
para cabí gácaliꞌ nituliꞌ libíꞌiliꞌ tu bönniꞌ xihuiꞌ cabí réajlëꞌë,
en para cabí usanliꞌ-nëꞌ Dios ban.
13 Naꞌa,
buliꞌzéajniꞌi tuliꞌ iaꞌtuliꞌ yúguꞌtë dza,
tsanni ni naca dza ni zóaruꞌ naꞌa,
para cabí siꞌ yeꞌe le naca xihuiꞌ libíꞌiliꞌ,
en para cabí gácaliꞌ nituliꞌ libíꞌiliꞌ zidi lu icja ládxiꞌdoꞌoliꞌ.
14 Yúguꞌtëruꞌ gunruꞌ tsözxö́n Cristo channö gácaruꞌ tsutsu ga idxinrö dza údxi,
ca naꞌ gusí lo ridipa ládxiꞌruꞌ.
15 Caní ral-laꞌ gunruꞌ tsanni ni rnna:
Naꞌa,
channö riyö́niliꞌ chiꞌë Dios,
bitiꞌ gácaliꞌ zidi lu icja ládxiꞌdoꞌoliꞌ,
ca naꞌ gulaca nupa niꞌ gulaꞌdáꞌbagaꞌ Dios.
16 ¿Nupxi naꞌ bilaꞌyöni xtídzëꞌë Dios,
en gulaꞌdáꞌbagaꞌ Lëꞌ?
Gulún caní yúguꞌtë nupa niꞌ bubéajëꞌ Moisés léguequi luyú Egipto.
17 ¿Nupxi naꞌ gulénëꞌ Dios idú ca choáꞌ iz?
Gulaca nupa niꞌ gulún dul-laꞌ,
ateꞌ gulati lu lataj cáꞌasö.
18 ¿Nupxi niꞌ benëꞌ tsutsu xtídzëꞌë Dios,
gunnë́ꞌ bitiꞌ ilaꞌyaza ga uluꞌzíꞌ ládxiꞌguequi tsözxö́n len Lëꞌ?
Gulaca nupa niꞌ bitiꞌ gulún ca rnna xtídzëꞌë Dios.
19 Naꞌa,
réquibeꞌeruꞌ bitiꞌ guca ilaꞌyáziëꞌ tuꞌ cabí gulaꞌyéajlëꞌë Dios.