LE BUZÚAJËꞌ LU GUICH SANTIAGO
Santiago rugapëꞌ Dios bönniꞌ judío taꞌdë́ꞌë Cristo
1
Nedaꞌ,
Jacobo,
nacaꞌ huen dxin queëꞌ Dios,
encaꞌ queëꞌ Xanruꞌ Jesucristo.
Rugapaꞌ Dios libíꞌiliꞌ,
nácaliꞌ idxinnu cöꞌ diꞌa dza quégaca bönachi Israel,
násilasiliꞌ idú yödzölió ni.
Yöl-laꞌ réajniꞌi le runnëꞌ Dios queë́ruꞌ
2 Böchiꞌ luzáꞌadoꞌ,
cateꞌ gaca bi gaca queë́liꞌ le siꞌ bëꞌ libíꞌiliꞌ,
ral-laꞌ udzéjaliꞌ idú ládxiꞌliꞌ
3 tuꞌ nöz quéziliꞌ,
cateꞌ bi raca queë́liꞌ le rizíꞌ bëꞌ libíꞌiliꞌ ca réajlëꞌëliꞌ Cristo,
lë ni rusedi libíꞌiliꞌ cö́zaliꞌ zxön ladxiꞌ.
4 Guliꞌgüíꞌ ládxiꞌliꞌ gaca idú yöl-laꞌ zxön ladxiꞌ queë́liꞌ,
para údxi gácaliꞌ bönniꞌ taꞌyéajniꞌinëꞌ,
en bitiꞌ bi yadzaj queë́liꞌ ca nácagaca lë ni.
5 Channö zoa ladaj libíꞌiliꞌ nu bitiꞌ réajniꞌini,
nu naꞌ ral-laꞌ inabi-nëꞌ Dios,
ateꞌ Dios caz gunnëꞌ yöl-laꞌ réajniꞌi que,
tuꞌ runödzjëꞌ yödxi yanaꞌ quégaca yúguꞌtë bönachi,
en bitiꞌ caꞌ réqui quézinëꞌ gunnëꞌ queë́ruꞌ.
6 Naꞌa,
nu bi rinabi-nëꞌ Dios,
run bayudxi tséajlëꞌ Lëꞌ,
en cabí gaca chopa ladxiꞌ.
Nu raca chopa ladxiꞌ,
raca que ca raca que bidxinaꞌ que nísadoꞌ cateꞌ rutá böꞌ le,
ruzéaj böꞌ le nilö náꞌalö.
7 Nu naca caní bitiꞌ ral-laꞌ gun löza siꞌ bi unödzjëꞌ Xanruꞌ.
8 Bönniꞌ naꞌ reaj böꞌ ládxiꞌdaꞌahuëꞌ bitiꞌ ridzö́linëꞌ nácalö gunëꞌ.
9 Channö zoëꞌ tu bönniꞌ bö́chiꞌruꞌ réajlëꞌë Cristo,
en náquiëꞌ cáꞌasö yödzölió ni,
ral-laꞌ udzéjanëꞌ tuꞌ chinadéliꞌnëꞌ tu lataj lo lahuëꞌ Dios.
10 Bönniꞌ bö́chiꞌruꞌ naꞌ riléꞌenëꞌ yöl-laꞌ tsahuiꞌ queëꞌ ral-laꞌ udzéjanëꞌ cateꞌ runëꞌ Dios ga bítiꞌrö ruzxöni ládxëꞌë lë naꞌ dë queëꞌ.
Nu ruzxöni ladxiꞌ yöl-laꞌ tsahuiꞌ que,
gaca que nu naꞌ ca raca que xiyija guíxiꞌdoꞌ,
laꞌ ridö́ditë que.
11 Caní naca,
tuꞌ gaca que nu naꞌ ca raca que xiyija guíxiꞌdoꞌ naꞌ cateꞌ rilén gubidza,
en rudzáꞌadaꞌ,
laꞌ ribídxitë guixiꞌ naꞌ,
en riguínnaj xiyija,
en riniti yöl-laꞌ lachi que.
Lëscaꞌ caní gaca queëꞌ bönniꞌ riléꞌenëꞌ yöl-laꞌ tsahuiꞌ queëꞌ,
inítiëꞌ tsanni ni runëꞌ dxin riguiljëꞌ yöl-laꞌ tsahuiꞌ naꞌ.
Le taꞌzíꞌ bëꞌ rëꞌu
12 Bicaꞌ ba bönniꞌ bö́chiꞌruꞌ naꞌ ruáꞌ rilenëꞌ le rizíꞌ bëꞌ lëꞌ.
Cateꞌ chiburúajëꞌ tsahuiꞌ,
idéliꞌnëꞌ yöl-laꞌ naꞌbán idú,
ca naꞌ rideliꞌ nu nutsaꞌ lu huitaj,
nu rideliꞌ tu breguiꞌ zin.
Bönniꞌ bö́chiꞌruꞌ naꞌ náquiëꞌ bicaꞌ ba tuꞌ idéliꞌnëꞌ yöl-laꞌ naꞌbán idú naꞌ guzxíꞌ lu nëꞌë Dios unödzjëꞌ quégaca nupa nadxíꞌiguequi Lëꞌ.
13 Cateꞌ bi raca queë́ruꞌ le run ga guë́ꞌëniruꞌ gunruꞌ le ruáꞌ döꞌ,
bitiꞌ ral-laꞌ innaruꞌ:
“Dios rizíꞌ bëꞌë rëꞌu len le naca xihuiꞌ.”
Dios bitiꞌ rizíꞌ bëꞌë nu bönniꞌ len le cabí naca dxiꞌa.
14 Naꞌa,
channö nu bi raca que le rizíꞌ bëꞌ le len le cabí naca dxiꞌa,
naca tuꞌ rizë́ ladxiꞌ le ruáꞌ döꞌ,
ateꞌ lë ni ben ga gúꞌuni gun le ruáꞌ döꞌ.
15 Lë naꞌ rizë́ ládxiꞌruꞌ le ruáꞌ döꞌ run ga gunruꞌ dul-laꞌ,
en cateꞌ chibudxi benruꞌ dul-laꞌ naꞌ,
laꞌ dul-laꞌ náꞌasö rusubagaꞌ rëꞌu xíguiaꞌ gátiruꞌ.
16 Böchiꞌ luzáꞌadoꞌ,
bitiꞌ siꞌ yeꞌe laꞌ cuínsiliꞌ.
17 Yúguꞌtë le naca dxiꞌa,
en yúguꞌtë le naca idú le ruzíꞌiruꞌ xibé,
záꞌgaca sacaꞌ xitsáꞌalö,
en taꞌrúaj ga zoëꞌ Xúziruꞌ Dios,
Nu ben yuguꞌ le taꞌyëpi yösa lúzxiba,
yuguꞌ le tuꞌtsáꞌ cuínguequi,
pero Lëꞌ bitiꞌ rutsáꞌ cuinëꞌ,
en bitiꞌ rutsë́ꞌë ca runëꞌ,
rúnnaticaꞌsëꞌ queë́ruꞌ le naca tsahuiꞌ.
18 Ca rë́ꞌëni quézinëꞌ Dios,
benëꞌ ga nácaruꞌ bönachi cubi queëꞌ.
Bugunëꞌ dxin didzaꞌ queëꞌ le naca idútë li,
para gácaruꞌ ca tu gulapa zíꞌalö queëꞌ ladaj yúguꞌtë nupa naꞌ gurö́ cazëꞌ Dios.
Le reaj ládxiꞌruꞌ-nëꞌ Dios le naca li ladxiꞌ
19 Que lë ni naꞌ reaꞌ libíꞌiliꞌ,
böchiꞌ luzáꞌadoꞌ,
yúguꞌtëliꞌ ral-laꞌ sóaliꞌ sinaꞌ yö́niliꞌ,
pero bitiꞌ ral-laꞌ innë́tëziliꞌ,
en bitiꞌ ilétëziliꞌ.
20 Nu naꞌ riletëz bitiꞌ run le naca tsahuiꞌ lahuëꞌ Dios.
21 Que lë ni naꞌ,
guliꞌcáꞌana yúguꞌtë le ruáꞌ döꞌ,
en yúguꞌtë le zián le cabí naca tsahuiꞌ,
ateꞌ lu yöl-laꞌ nöxaj ladxiꞌ guliꞌsíꞌ lu náꞌaliꞌ didzaꞌ naꞌ chinayaza icja ládxiꞌdoꞌoliꞌ,
tuꞌ huáca gun didzaꞌ ni ga uláliꞌ.
22 Naꞌa,
guliꞌgún ca rnna didzaꞌ ni,
en cabí yö́nisiliꞌ,
tuꞌ channö yö́nisiliꞌ didzaꞌ ni,
siꞌ yéꞌeliꞌ laꞌ cuínsiliꞌ.
23 Nu riyö́nisö didzaꞌ ni,
en bitiꞌ run ca rnna,
nu ni naca ca tu bönniꞌ ruyúëꞌ lahuëꞌ tu lu guíë dxili,
24 tuꞌ ruyú cuinëꞌ,
en söhuö́jëꞌ,
ateꞌ laꞌ ral-latë ládxëꞌë ca rinë́ꞌë.
25 Naꞌa,
nu bönniꞌ bitiꞌ ral-la ládxëꞌë le riyönnëꞌ,
pero ruíꞌi ládxëꞌë xibá queëꞌ Dios le naca idú li,
en le gaca gun ga uláruꞌ,
ateꞌ ugáꞌanëꞌ tsutsu,
en gúnticaꞌsëꞌ ca rinná bëꞌ xibá naꞌ,
gaquiëꞌ bicaꞌ ba ca naca yúguꞌtë le runëꞌ.
26 Channö nu bönniꞌ ladaj libíꞌiliꞌ réquinëꞌ naca dxiꞌa ca reaj ládxëꞌë Dios,
pero bitiꞌ rapa chiꞌë lúdxëꞌë para cabí innësëꞌ caꞌ,
bönniꞌ ni rizíꞌ yéꞌenëꞌ laꞌ cuinsëꞌ,
ateꞌ bitiꞌ raza ládxëꞌë Dios ca reaj ládxëꞌë bönniꞌ naꞌ Lëꞌ.
27 Le reaj ládxiꞌruꞌ-nëꞌ Dios,
le naca idú,
en le naca dxiꞌa,
naca gácalenruꞌ yuguꞌ biꞌi uzë́bidoꞌ,
encaꞌ yuguꞌ nigula nagáꞌananu túzinu,
cateꞌ taꞌguíꞌi taꞌzacaꞌ nupa naꞌ,
en cabí gútsaꞌruꞌ le cabí naca tsahuiꞌ le raca yödzölió ni.