Tuz ca ral-laꞌ gunruꞌ bönachi bal
2
Böchiꞌ luzáꞌadoꞌ,
channö réajlëꞌëliꞌ Xanruꞌ Jesucristo,
Nu nácatërö lo,
bitiꞌ ral-laꞌ utsáꞌaliꞌ ca gunliꞌ bal tu tu bönachi.
2 Channö tsáziëꞌ tu bönniꞌ ga naꞌ nudúbiliꞌ,
en naguꞌë xibö́n nëꞌë le néquini oro,
en nácuëꞌ lariꞌ nazácaꞌdaꞌ,
ateꞌ tsáziëꞌ caꞌ tu bönniꞌ yéchiꞌdoꞌ,
nácuëꞌ lariꞌ cáꞌasö,
3 channö gunliꞌ bal bönniꞌ naꞌ nácuëꞌ lariꞌ nazácaꞌdaꞌ,
en guië́liꞌ-nëꞌ:
“Gurö́ꞌölen rëꞌu ga ni naca dxiꞌa”,
pero guië́liꞌ bönniꞌ yéchiꞌdoꞌ naꞌ:
“Náꞌasö guzuí”,
o guië́liꞌ-nëꞌ:
“Guröꞌi lu yu ni.”
4 Channö caní runliꞌ,
rutsáꞌaliꞌ ca runliꞌ bal tu tu luzáꞌaliꞌ,
en run cuinliꞌ ca nu ruchiꞌa rusörö́ luzë́ꞌe,
bitiꞌ naca dxiꞌa ca rizáꞌ ládxiꞌliꞌ.
5 Böchiꞌ luzáꞌadoꞌ,
buliꞌzë́ nágaliꞌ lë ni.
Dios gurö́ cazëꞌ yuguꞌ bönniꞌ,
sal-laꞌ téquiguequi bönachi yödzölió ni nácagaquiëꞌ cáꞌasö,
para ilaꞌdéliꞌnëꞌ yöl-laꞌ tsahuiꞌ lahuëꞌ Lëꞌ tuꞌ taꞌyéajlëꞌë Cristo,
en gataꞌ quégaquiëꞌ lataj ga niꞌ rinná bëꞌë Lëꞌ.
Gataꞌ quégaquiëꞌ lë naꞌ guzxíꞌ lu nëꞌë Dios unödzjëꞌ quégaca nupa taꞌdxíꞌi Lëꞌ.
6 Libíꞌiliꞌ rucáꞌanaliꞌ cáꞌasö bönachi yechiꞌ caꞌ,
en runliꞌ bal yuguꞌ bönniꞌ dë yöl-laꞌ tsahuiꞌ quégaquiëꞌ,
ateꞌ bönniꞌ naꞌ dë yöl-laꞌ tsahuiꞌ quégaquiëꞌ tuꞌsacaꞌ ziꞌë libíꞌiliꞌ,
tuꞌ tuꞌgunëꞌ libíꞌiliꞌ dxin.
Lëscaꞌ tuꞌdödëꞌ libíꞌiliꞌ lu náꞌagaquiëꞌ bönniꞌ yúlahuiꞌ.
7 Yuguꞌ bönniꞌ naꞌ dë yöl-laꞌ tsahuiꞌ quégaquiëꞌ taꞌnnë́ ziꞌë caꞌ que Lëꞌ Jesucristo le nazácaꞌtërö,
en ca naca Lëꞌ nazíꞌi laliꞌ:
“Nupa Dáꞌgaca Cristo.”
8 Runliꞌ dxiꞌa channö runliꞌ idú ca rinná bëꞌ xibá lo,
le nazúaj lu guichi,
en rnna caní:
“Ral-laꞌ idxíꞌinuꞌ luzóꞌo ca nadxíꞌi cuinuꞌ.”
9 Naꞌa,
channö rutsáꞌaliꞌ ca runliꞌ bal tu tu bönachi,
runliꞌ dul-laꞌ,
en nabágaꞌliꞌ xíguiaꞌ lu xibá queëꞌ Dios,
tuꞌ riguítsjaliꞌ xibá naꞌ.
10 Channö runëꞌ tu bönniꞌ idú ca rinná bëꞌ xibá queëꞌ Dios,
pero channö ichíxinëꞌ ca naca tuz le rinná bëꞌ xibá naꞌ,
chinabáguëꞌë xíguiaꞌ que idútë le rinná bëꞌ xibá naꞌ.
11 Lë cazëꞌ Dios gunnë́ꞌ:
“Bitiꞌ gunuꞌ dul-laꞌ le riguitsaj xibá que yöl-laꞌ nutsaga naꞌ”,
en gunnë́ꞌ caꞌ:
“Bitiꞌ gútiuꞌ bönachi.”
Naꞌa,
channö cabí runuꞌ dul-laꞌ le riguitsaj xibá que yöl-laꞌ nutsaga naꞌ,
pero rútiuꞌ bönachi,
nabáguꞌu xíguiaꞌ que idútë xibá queëꞌ Dios.
12 Ca innaliꞌ,
en ca gunliꞌ,
ral-laꞌ gunliꞌ ca ral-laꞌ ilún nupa uchiꞌa usörö́ëꞌ Dios légaquiëꞌ ca rinná bëꞌ xibá naꞌ,
le run ga uláruꞌ.
13 Nupa cabí tuꞌhuechiꞌ ládxiꞌgaca luzë́ꞌeguequi,
uchiꞌa usörö́ëꞌ Dios léguequi,
ateꞌ cuntu nu huéchiꞌ ladxiꞌ léguequi,
pero nupa naꞌ tuꞌhuechiꞌ ládxiꞌgaca luzë́ꞌeguequi uluꞌrúaj dxiꞌa cateꞌ uchiꞌa usörö́ëꞌ Dios léguequi.
Le ral-laꞌ gunruꞌ tuꞌ réajlëꞌëruꞌ Cristo
14 Böchiꞌ luzáꞌadoꞌ,
bitiꞌ bi uziꞌë xibé tu bönniꞌ channö innasëꞌ:
“Réajlëꞌa Cristo”,
pero bitiꞌ runëꞌ le naca tsahuiꞌ.
Bitiꞌ gaca ulë́ꞌ bönniꞌ naꞌ channö innasëꞌ réajlëꞌë Cristo.
15 Channö nacuꞌë böchiꞌ luzáꞌaruꞌ taꞌyéajlëꞌë Cristo,
en bitiꞌ dë le ilácuëꞌ,
en calëga le ilahuëꞌ,
16 ateꞌ channö tu nu dzaga libíꞌiliꞌ guië́sö légaquiëꞌ:
“Böaj lídxiliꞌ tsáhuiꞌdoꞌ.
Chibölaj budzéꞌeliꞌ”,
pero channö cabí unödzaj quégaquiëꞌ lë naꞌ taꞌyádzjanëꞌ,
bitiꞌ caꞌ gúcalen légaquiëꞌ.
17 Lëscaꞌ caní raca que nu bönniꞌ rnnasëꞌ réajlëꞌë Cristo.
Channö cabí runëꞌ le naca bëꞌ naca idú ca réajlëꞌë Lëꞌ,
bitiꞌ naca lesacaꞌ yöl-laꞌ réajlëꞌ queëꞌ.
18 Nadxi caꞌ guië́ꞌ tu bönniꞌ luzë́ꞌë:
“Liꞌ réajlëꞌësuꞌ Cristo,
ateꞌ nedaꞌ runaꞌ le naca tsahuiꞌ.
Bitiꞌ gaca uluíꞌinuꞌ nedaꞌ réajlëꞌu Cristo channö cabí zoa le naca tsahuiꞌ runuꞌ.
Nedaꞌ uluíꞌidaꞌ liꞌ réajlëꞌa Cristo niꞌa que le naca tsahuiꞌ runaꞌ.”
19 Liꞌ réajlëꞌu tuzëꞌ náquiëꞌ Dios.
Naca dxiꞌa ca runuꞌ.
Lëscaꞌ caní taꞌyéajlëꞌ yuguꞌ böꞌ xihuiꞌ,
en taꞌzxizi tádxidaꞌ Lëꞌ.
20 Liꞌ,
bönniꞌ bitiꞌ bi nö́zinëꞌ.
Ral-laꞌ inözi quézinuꞌ channö zoa nu rnnasö réajlëꞌ Cristo,
pero bitiꞌ run le naca tsahuiꞌ,
bitiꞌ naca lesacaꞌ yöl-laꞌ réajlëꞌ Lëꞌ que nu naꞌ.
21 Naca bëꞌ burúajëꞌ xúziruꞌ Abraham tsahuiꞌ lahuëꞌ Dios niꞌa que lë naꞌ benëꞌ,
cateꞌ niꞌ guluꞌë-biꞌ biꞌi Isaac queëꞌ lahuëꞌ Dios.
Guluꞌë-biꞌ ca naꞌ tun bönachi taꞌgúꞌu le tuꞌzeguiꞌ lahuëꞌ Dios,
sal-laꞌ bitiꞌ buzéguiꞌë-biꞌ.
22 Naꞌa gaca inö́ziliꞌ ca guca queëꞌ Abraham.
Lë naꞌ benëꞌ guca bëꞌ guyéajlëꞌë Dios.
Caꞌ naca,
guca bëꞌ naca idú ca guyéajlëꞌë Dios niꞌa que lë naꞌ benëꞌ.
23 Caní guca lë naꞌ nazúaj lu guichi láꞌayi le rnna:
“Abraham guyéajlëꞌë Dios,
ateꞌ Dios biléꞌenëꞌ lë naꞌ benëꞌ ca tu le ben ga böáquiëꞌ Abraham tsahuiꞌ.”
Que lë ni naꞌ guzxíꞌi lëꞌ:
“Luzë́ꞌë Dios.”
24 Naꞌa,
riléꞌe quéziliꞌ naca bëꞌ rurúajëꞌ tu bönniꞌ dxiꞌa niꞌa que le runëꞌ,
en calë́gasö tuꞌ réajlëꞌë Dios.
25 Lëscaꞌ caní guca queë́nu Rahab,
nigula bë́ꞌënu bönachi lataj.
Lëscaꞌ naca bëꞌ burúajnu dxiꞌa tuꞌ zoa tu le tsahuiꞌ bennu,
lë naꞌ bennu cateꞌ niꞌ bennu bönniꞌ tuꞌyulan bal,
en gúcalennu légaquiëꞌ para buluꞌguélëꞌë yöjhuö́jgaquiëꞌ nöza yúbölö.
26 Ca naꞌ raca que idútë le naca cázaruꞌ channö cabí yuꞌu böꞌ,
chinati,
lëscaꞌ caní naca que le réajlëꞌëruꞌ Cristo channö cabí naláꞌ yöl-laꞌ run que,
bitiꞌ naca lesacaꞌ.