Yuguꞌ le rnna lúdxiꞌruꞌ
3
Böchiꞌ luzáꞌadoꞌ,
bitiꞌ guntëz zián cuinliꞌ bönniꞌ tuꞌsédinëꞌ bönachi,
tuꞌ chinö́z quéziliꞌ zíꞌtërö uchiꞌa usörö́ëꞌ Dios rëꞌu,
núlöruꞌ rusédiruꞌ bönachi.
2 Yúguꞌtëruꞌ runruꞌ zián le richixi riníguiruꞌ.
Channö cabí richixi riníguinëꞌ tu bönniꞌ ca naca didzaꞌ ruꞌë,
bönniꞌ ni náquiëꞌ idú tsahuiꞌ,
en raca inná beꞌe cuinëꞌ ca naca yúguꞌtë le runëꞌ.
3 Cateꞌ rigúꞌuruꞌ guíë ruáꞌagacabaꞌ böaꞌ para gunruꞌ ga ilunbaꞌ ca rë́ꞌëniruꞌ,
gaca inná béꞌeruꞌ légacabaꞌ lu idútë le tunbaꞌ.
4 Buliꞌyú caꞌ ca raca quéguequi barco.
Sal-laꞌ zxö́ntërö naca tu barco,
en récjadaꞌ böꞌ ruzéaj le,
cuídiꞌdoꞌos naca nëꞌe xiyágui barco naꞌ le ruzecaj rudxíꞌi barco para tseaj gátiꞌtës ga guë́ꞌënnëꞌ bönniꞌ rusë́ꞌë le.
5 Lëscaꞌ caní naca lúdxiꞌruꞌ.
Sal-laꞌ cuídiꞌdoꞌos naca,
ziántërö le rnna lúdxiꞌruꞌ naꞌ.
Buliꞌyútsöcaꞌ ca run guíꞌ.
Sal-laꞌ guíꞌdoꞌos ribíbiruꞌ,
tu guíꞌa sibi huayégui.
6 Lëscaꞌ lúdxiꞌruꞌ naꞌ naca ca tu guíꞌ.
Yúguꞌtë le ruáꞌ döꞌ raca yödzölió ni rnna lúdxiꞌruꞌ,
en tuꞌ dzaga lúdxiꞌruꞌ naꞌ idútë le naca cázaruꞌ,
que lë ni naꞌ run ga raca xihuiꞌ idútë le nácaruꞌ.
Le rnna lúdxiꞌruꞌ ribequi guíꞌ,
le ruzeguiꞌ rëꞌu ca naca yúguꞌtë le runruꞌ,
ateꞌ tuꞌ rnna caní lúdxiꞌruꞌ naꞌ,
naca que tsca chinaguélaꞌtë guíꞌ le nabequiꞌ tuꞌ xihuiꞌ.
7 Yúguꞌtëbaꞌ böaꞌ guixiꞌ taꞌdabaꞌ luyú,
en yuguꞌ böaꞌ zoa xíligacabaꞌ,
en yuguꞌ böaꞌ táꞌayöj lë́ꞌëbaꞌ lu yu,
encaꞌ yúguꞌtëbaꞌ böaꞌ dzö́ꞌöbaꞌ lu nísadoꞌ,
huáca ilaꞌnná beꞌe bönachi luyú ni légacabaꞌ,
8 pero cuntu nu bönniꞌ gaca inná béꞌenëꞌ lúdxëꞌë,
tuꞌ rnna lúdxiꞌruꞌ le ruáꞌ döꞌ,
en bitiꞌ gaca nu uzagaꞌ xinözi.
Ziántërö le rnna lúdxiꞌruꞌ le naca ca tu le nachë́ꞌ yöl-laꞌ guti.
9 Len laꞌ lúdxiꞌruꞌ náꞌasö rulidza tsáhuiꞌruꞌ-nëꞌ Dios Xuz,
en rulidza dítjaruꞌ caꞌ yuguꞌ bönniꞌ,
ateꞌ benëꞌ Dios légaquiëꞌ ca naca cazëꞌ Lëꞌ.
10 Caní naca,
len laꞌ ruáꞌasiruꞌ naꞌ rulidza tsáhuiꞌruꞌ bönachi,
en rulidza dítjaruꞌ bönachi.
Böchiꞌ luzáꞌadoꞌ,
bitiꞌ ral-laꞌ gaca caní.
11 Bitiꞌ caꞌ taꞌlén nisa siziáꞌ,
en nisa zönaꞌ laꞌ tuzi ga taꞌlén.
12 Böchiꞌ luzáꞌadoꞌ,
tu yaga higo bitiꞌ gaca cuía le ribía yaga olivo,
ateꞌ tu lubá uva bitiꞌ gaca cuía le ribía yaga higo naꞌ.
Lëscaꞌ caní,
nitú ga rilén nisa bitiꞌ gaca ilaꞌlén nisa zönaꞌ,
en nisa siziáꞌ.
Yöl-laꞌ réajniꞌi le naca idú
13 Channö zoëꞌ tu bönniꞌ ládjaliꞌ rácadëꞌë,
en réajniꞌdeꞌenëꞌ,
lu yöl-laꞌ nöxaj ladxiꞌ queëꞌ ral-laꞌ uluꞌë náquiëꞌ caní niꞌa que le naca tsahuiꞌ runëꞌ.
14 Naꞌa,
channö ruzxéꞌeliꞌ luzáꞌaliꞌ,
en runliꞌ dxin para ilaꞌgúꞌu bönachi libíꞌiliꞌ yöl-laꞌ ba,
bitiꞌ ral-laꞌ gun ba zxön cuinliꞌ ca naca yöl-laꞌ réajniꞌi queë́liꞌ.
Nu run caní rizíꞌ yëꞌ,
en ridáꞌbagaꞌ le naca idútë li.
15 Yöl-laꞌ réajniꞌi caní bitiꞌ naca le runödzjëꞌ Dios,
pero que yödzölió ni naca,
encaꞌ quégaca bönachi yödzölió ni,
en que tuꞌ xihuiꞌ.
16 Yuguꞌ bönniꞌ tuꞌzxéꞌenëꞌ luzáꞌagaquiëꞌ,
en të́ꞌënnëꞌ ilaꞌgúꞌu bönachi légaquiëꞌ yöl-laꞌ ba,
lëscaꞌ taꞌdil-la dídzëꞌë,
en tunëꞌ yúguꞌtë le ruáꞌ döꞌ.
17 Yuguꞌ bönniꞌ nápagaquiëꞌ yöl-laꞌ réajniꞌi naꞌ runödzjëꞌ Dios:
Tunëꞌ le naca idú tsahuiꞌ,
en taꞌbözëꞌ dxíꞌadoꞌ.
Nácagaquiëꞌ zxön ladxiꞌ,
en nöxaj ladxiꞌ.
Tuꞌhuechiꞌ ládxiꞌgaquiëꞌ bönachi,
en tunëꞌ le naca dxiꞌa.
Tuz ca tuꞌchiꞌa tuꞌsörö́ëꞌ luzáꞌagaquiëꞌ,
en bitiꞌ taꞌbéaj bëꞌë luzáꞌagaquiëꞌ.
18 Nupa tuíꞌi ládxiꞌgaca ilaꞌbequi dxi le raca,
taꞌböza dxíꞌadoꞌ,
para gaca caꞌ dxiꞌa idútë le zeaj naca caz.