DÍDZAꞌDOꞌ ZÍꞌALÖ BUZÚAJËꞌ PEDRO
Pedro rugapëꞌ Dios nupa taꞌdáꞌ Cristo
1
Nedaꞌ,
Pedro,
nacaꞌ gubáz nasö́l-lëꞌë Jesucristo.
Ruzúajaꞌ queë́liꞌ lu guichi ni,
libíꞌiliꞌ násilasiliꞌ ziꞌtuꞌ gapa dë ládzaliꞌ,
zóaliꞌ luyú Ponto,
en luyú Galacia,
en luyú Capadocia,
en luyú Asia,
en luyú Bitinia.
2 Gurö́ cazëꞌ Xúziruꞌ Dios libíꞌiliꞌ ca naꞌ bucözëꞌ dza niꞌte,
para guéquiliꞌ quez queëꞌ lu nëꞌë Dios Böꞌ Láꞌayi,
en gunliꞌ ca rnna xtídzëꞌë Cristo,
en gácaliꞌ idú tsahuiꞌ niꞌa que xichönëꞌ Cristo.
Rinábidaꞌ-nëꞌ Dios uzáꞌ ládxëꞌë queë́liꞌ,
en gunëꞌ ga soa dxi icja ládxiꞌdoꞌoliꞌ.
Le rúnticaꞌsiruꞌ löza
3 ¡Yöl-laꞌ ba Dios,
Xuzëꞌ Xanruꞌ Jesucristo!
¡Lu yöl-laꞌ ruhuéchiꞌ ladxiꞌ zxön queëꞌ bucubëꞌ yöl-laꞌ naꞌbán queë́ruꞌ tuꞌ busubanëꞌ Jesucristo lu yöl-laꞌ guti!
¡Lë ni run ga rúnticaꞌsiruꞌ löza,
4 en gun ga idéliꞌruꞌ lë naꞌ rapa chiꞌë Dios queë́ruꞌ yehuaꞌ yubá!
Lë naꞌ rapa chiꞌë Dios,
le unödzjëꞌ quégaca bönachi queëꞌ,
bitiꞌ initi,
en bitiꞌ itëbi,
en bitiꞌ igula.
5 Tuꞌ réajlëꞌëliꞌ Lëꞌ,
lu yöl-laꞌ huáca zxön queëꞌ,
Dios gun chiꞌë libíꞌiliꞌ cateꞌ idxinrö dza niꞌ uzíꞌiliꞌ xibé yöl-laꞌ rusölá idú naꞌ chinupë́ꞌë queë́ruꞌ,
en uluꞌë lahui dza údxi.
6 Que lë ni naꞌ rudzéjadeꞌeliꞌ,
sal-laꞌ naꞌa ral-laꞌ quíꞌi sácaꞌliꞌ tu chíꞌidoꞌ tuꞌ taca zián le taꞌzíꞌ bëꞌ libíꞌiliꞌ.
7 Tuꞌ ruáꞌ rilenliꞌ yuguꞌ lë naꞌ taꞌzíꞌ bëꞌ libíꞌiliꞌ,
naca bëꞌ naca idú ca réajlëꞌëliꞌ Cristo.
Lëscaꞌ caní rizíꞌ bë́ꞌëruꞌ oro,
le initi,
cateꞌ ruchíꞌaruꞌ le lu guíꞌ.
Que lë ni naꞌ,
cateꞌ chinazíꞌ bëꞌ yöl-laꞌ réajlëꞌ queë́liꞌ Cristo,
le nácarö lesacaꞌ ca oro,
gaca queë́liꞌ yöl-laꞌ zxön,
en yöl-laꞌ run bal dza niꞌ uluíꞌi lahuëꞌ Jesucristo.
8 Libíꞌiliꞌ nadxíꞌiliꞌ-nëꞌ Cristo sal-laꞌ catu caz biléꞌeliꞌ Lëꞌ.
Réajlëꞌëliꞌ Lëꞌ sal-laꞌ bitiꞌ riléꞌeliꞌ-nëꞌ naꞌa,
ateꞌ rudzéjaliꞌ.
Yöl-laꞌ rudzeja zxön queë́liꞌ le cabí gaca quíxjöꞌöruꞌ tsca naca,
naca idútë li.
9 Caní naca,
tuꞌ ridéliꞌliꞌ yöl-laꞌ rusölá que böꞌ naca cázaliꞌ,
le rataꞌ queë́liꞌ tuꞌ réajlëꞌëliꞌ-nëꞌ Cristo.
10 Dza niꞌte yuguꞌ bönniꞌ guluꞌë didzaꞌ uláz queëꞌ Dios buluꞌsëdëꞌ dxíꞌadoꞌ ca naca yöl-laꞌ rusölá naꞌ dë queë́ruꞌ naꞌa,
ateꞌ guluꞌë didzaꞌ ca naca le ruzáꞌ ládxëꞌë Dios queë́ruꞌ.
11 Böꞌ Láꞌayi dzáguiëꞌ Cristo buzéajniꞌinëꞌ zíꞌatëlö bönniꞌ naꞌ guluꞌë didzaꞌ uláz queëꞌ Dios,
en buluíꞌinëꞌ légaquiëꞌ ca ral-laꞌ quiꞌi sáquëꞌë Cristo,
encaꞌ ca gaca queëꞌ yöl-laꞌ zxön tödi naꞌ.
Que lë ni naꞌ guluíꞌi ládxiꞌgaquiëꞌ ilaꞌnö́zinëꞌ bátaxi gaca lë ni,
en nuzxi naꞌ gaca que lë naꞌ buluíꞌinëꞌ Böꞌ dzáguiëꞌ Cristo légaquiëꞌ.
12 Dios buluíꞌinëꞌ bönniꞌ naꞌ guluꞌë didzaꞌ uláz queëꞌ bitiꞌ naca tu le ilaꞌléꞌenëꞌ légaquiëꞌ,
pero rëꞌu ni riléꞌeruꞌ lë naꞌ guluꞌë didzaꞌ que,
ateꞌ libíꞌiliꞌ riyö́niliꞌ naꞌa ca naca que.
Yuguꞌ bönniꞌ tunëꞌ libán que didzaꞌ dxiꞌa tuꞌë didzaꞌ que lë ni,
ateꞌ zóalen yöl-laꞌ huáca queëꞌ Dios Böꞌ Láꞌayi légaquiëꞌ,
Nu naꞌ risö́l-lëꞌë Dios zoëꞌ yehuaꞌ yubá queë́ruꞌ,
ateꞌ të́ꞌënnëꞌ gubáz láꞌayi queëꞌ Dios ilaꞌnö́zinëꞌ ca naca lë naꞌ guluꞌë didzaꞌ que dza niꞌte.
Dios rulidzëꞌ rëꞌu para gácaruꞌ láꞌayi
13 Que lë ni naꞌ,
guliꞌsóa ban ladxiꞌ,
en guliꞌcö́zaticaꞌsö báꞌadoꞌ.
Idú ládxiꞌliꞌ buliꞌzxöni ládxiꞌliꞌ lë naꞌ uzáꞌ ládxëꞌë queë́liꞌ Dios dza niꞌ uluíꞌi lahuëꞌ Jesucristo.
14 Guliꞌgún ca rnna xtídzëꞌë Dios,
en bitiꞌ güíꞌiliꞌ lataj yuguꞌ le rizë́ ládxiꞌliꞌ ilaꞌchë́ꞌ libíꞌiliꞌ ga yúbölö,
ca naꞌ benliꞌ dza niꞌ bitiꞌ núnbëꞌëniliꞌ-nëꞌ Dios.
15 Ral-laꞌ gácaliꞌ láꞌayi ca naca yúguꞌtë le runliꞌ,
ca naꞌ náquiëꞌ láꞌayi Dios,
en bulidzëꞌ libíꞌiliꞌ para guéquiliꞌ queëꞌ.
16 Lëscaꞌ caní nazúaj lu guichi láꞌayi,
ca naꞌ gunnë́ꞌ Dios le rnna:
“Guliꞌgaca láꞌayi,
tuꞌ nacaꞌ nedaꞌ láꞌayi.”
17 Rëliꞌ-nëꞌ:
“Xuztuꞌ” cateꞌ rulídzaliꞌ-nëꞌ Dios,
ateꞌ Lëꞌ,
lë́bisö ca ruchiꞌa rusörö́ëꞌ yúguꞌtë bönachi tsca naca le núngaca tu tu bönachi naꞌ.
Que lë ni naꞌ ral-laꞌ gádxiliꞌ Lëꞌ tsanni ni zóaliꞌ yödzölió ni,
le cabí naca idú ládzaliꞌ.
18 Dios busölë́ꞌ libíꞌiliꞌ lu lë naꞌ gúcaliꞌ dza niꞌ cateꞌ benliꞌ ca nácagaca le cáꞌasö buluꞌdödëꞌ xuz xtóꞌoliꞌ loliꞌ.
Nöz quéziliꞌ böáꞌuëꞌ libíꞌiliꞌ,
calëga len tu le initi ca naca oro,
en plata,
19 pero len xichönëꞌ Jesucristo le nácatërö lesacaꞌ,
tuꞌ budödi cuinëꞌ,
en gúquiëꞌ ca tubaꞌ böꞌcuꞌ zxilaꞌ nácabaꞌ idú dxiꞌa,
böaꞌdoꞌ tutiëꞌ-baꞌ lahuëꞌ Dios para ugúa dul-laꞌ.
20 Dios gurö́ cazëꞌ Cristo zíꞌatëlö ca benëꞌ yödzölió ni,
ateꞌ dza ni zóaruꞌ naꞌa benëꞌ ga buluíꞌi lahuëꞌ para uzíꞌiliꞌ xibë́ꞌ.
21 Niꞌa que le benëꞌ Cristo réajlëꞌëliꞌ-nëꞌ Dios,
busubanëꞌ Lëꞌ lu yöl-laꞌ guti,
en benëꞌ ga náquiëꞌ lo.
Caní naca,
réajlëꞌëliꞌ-nëꞌ Dios,
en ruzxöni ládxiꞌliꞌ Lëꞌ.
22 Naꞌa,
chinún cuinliꞌ dxiꞌa tuꞌ runliꞌ ca rnna le naca idútë li,
en naca idú ca nadxíꞌiliꞌ yuguꞌ böchiꞌ luzáꞌaliꞌ taꞌyéajlëꞌë Cristo.
Que lë ni naꞌ,
idú ládxiꞌliꞌ ral-laꞌ idxíꞌiliꞌ luzáꞌaliꞌ tuliꞌ iaꞌtuliꞌ.
23 Chiböáljaliꞌ leyúbölö,
calëga tuꞌ nuzóagaca bönachi tati caz libíꞌiliꞌ,
pero nuzóa Nu zoa caz libíꞌiliꞌ,
en náljalenliꞌ xtídzëꞌë Dios,
le naca ban,
en le zóaticaꞌsö.
24 Caní naca,
tuꞌ nazúaj lu guichi láꞌayi le rnna:
Yúguꞌtë bönachi nácagaca ca naca guixiꞌ.
Yöl-laꞌ lachi quéguequi naca ca xiyija guixiꞌ naꞌ.
Ribidxi guixiꞌ naꞌ,
en riguinnaj xiyija,
25 pero xtídzëꞌë Dios zóaticaꞌsö.
Didzaꞌ ni bidxín queë́liꞌ lu didzaꞌ dxiꞌa.