Santiago rusë́ꞌë ládxiꞌgaquiëꞌ bönniꞌ dë yöl-laꞌ tsahuiꞌ quégaquiëꞌ
5
Libíꞌiliꞌ,
bönniꞌ riléꞌeliꞌ yöl-laꞌ tsahuiꞌ,
guliꞌcödxi,
en guliꞌcö́dxiꞌa,
tuꞌ siꞌ zaꞌ dza iléꞌeliꞌ yöl-laꞌ yechiꞌ.
2 Chinaca ditaj yöl-laꞌ tsahuiꞌ queë́liꞌ,
ateꞌ chinutö́gacabaꞌ le ráculiꞌ bö́ljadoꞌ que.
3 Chinaca que dumí oro,
en dumí plata queë́liꞌ ca naca que guíë nazö́n yöni que,
ateꞌ yöni que naꞌ naca ca tu le ruzegui libíꞌiliꞌ didzaꞌ,
ateꞌ gaca queë́liꞌ ca tu guíꞌ le usuniti libíꞌiliꞌ.
Caní gaca queë́liꞌ,
tuꞌ busóꞌ butúbiliꞌ queë́ziliꞌ yöl-laꞌ tsahuiꞌ dza ni zóaruꞌ chiröjsétëgaca.
4 ¡Buliꞌyútsöcaꞌ!
Yuguꞌ bönniꞌ huen dxin gulaꞌlapëꞌ yöla queë́liꞌ chitaꞌnaba yúdxinëꞌ lázxjagaquiëꞌ,
tuꞌ cabí riguízxjaniliꞌ légaquiëꞌ,
ateꞌ lë naꞌ taꞌnabëꞌ bönniꞌ huen dxin naꞌ chibidxín didzaꞌ naꞌ lahuëꞌ Xanruꞌ,
ateꞌ Lëꞌ rinná béꞌenëꞌ niꞌa nëꞌë guizxi yu.
5 Benliꞌ ga bunéꞌeliꞌ,
en güíꞌi gudáguticaꞌsiliꞌ le rnnasö queë́liꞌ lu yödzölió ni.
Buxö́n cuinliꞌ,
pero chizóa idxín dza údxi queë́liꞌ.
Gaca queë́liꞌ ca raca queë́baꞌ bëdxi renniꞌ,
chibúꞌu dza gútiruꞌ-baꞌ.
6 Richúguliꞌ quégaquiëꞌ bönniꞌ tsahuiꞌ,
en rútiliꞌ légaquiëꞌ,
ateꞌ légaquiëꞌ bitiꞌ taꞌdáꞌbaguëꞌë libíꞌiliꞌ cateꞌ rútiliꞌ légaquiëꞌ.
Cö́zaruꞌ zxön ladxiꞌ, en ulídzaruꞌ-nëꞌ Dios
7 Naꞌa,
böchiꞌ luzáꞌadoꞌ,
guliꞌcöza zxön ladxiꞌ ga idxinrö dza huödëꞌ Xanruꞌ.
Buliꞌyú ca runëꞌ tu bönniꞌ guz gúꞌuna.
Lu yöl-laꞌ riböza zxön ladxiꞌ ribözëꞌ guiö́jsiuꞌ,
en guiö́j cusu lin,
ateꞌ tödi niꞌ ulapëꞌ,
en utubëꞌ yöz zián.
8 Lëscaꞌ caní,
libíꞌiliꞌ naꞌ réajlëꞌëliꞌ Cristo,
guliꞌcöza zxön ladxiꞌ,
en buliꞌtipa ládxiꞌliꞌ,
tuꞌ chizáꞌ galaꞌ dza huödëꞌ Xanruꞌ.
9 Böchiꞌ luzáꞌadoꞌ,
bitiꞌ innëliꞌ que luzáꞌaliꞌ tuliꞌ iaꞌtuliꞌ,
para cabí ibágaꞌliꞌ xíguiaꞌ.
¡Buliꞌyútsöcaꞌ!
¡Chirudzaga lo udxinëꞌ Xanruꞌ,
ateꞌ uchiꞌa usörö́ëꞌ le runliꞌ!
10 Böchiꞌ luzáꞌadoꞌ,
buliꞌyú ca guca quégaquiëꞌ bönniꞌ guluꞌë didzaꞌ uláz queëꞌ Xanruꞌ.
Nácagaquiëꞌ ca tu le ruluíꞌi rëꞌu ca ral-laꞌ quíꞌi sácaꞌruꞌ,
en cö́zaruꞌ zxön ladxiꞌ.
11 Naꞌa,
nucuáꞌaruꞌ légaquiëꞌ ca yuguꞌ bönniꞌ guláquiëꞌ bicaꞌ ba,
nupa niꞌ gulaꞌguíꞌi gulaꞌzacaꞌ.
Chibiyö́niliꞌ ca benëꞌ Job.
Gulözëꞌ zxön ladxiꞌ sal-laꞌ gudíꞌi guzxácaꞌdëꞌë,
ateꞌ nö́ziliꞌ caꞌ ca benëꞌ Xanruꞌ queëꞌ ga búdxitë.
Ruhuéchiꞌdaꞌ ládxëꞌë Xanruꞌ rëꞌu,
en ruíꞌi ládxëꞌë rëꞌu.
12 Böchiꞌ luzáꞌadoꞌ,
le nácatërö lo naca lë ni reaꞌ libíꞌiliꞌ:
¡Bitiꞌ uzö́tjaliꞌ Nu zoa yehuaꞌ yubá,
en bitiꞌ uzö́tjaliꞌ le nacuáꞌ luyú ni,
en bitiꞌ uzö́tjaliꞌ bítiꞌtës bi run tsutsu xtídzaꞌliꞌ!
Cateꞌ innaliꞌ “Ön” ral-laꞌ innásiliꞌ “Ön.”
Cateꞌ innaliꞌ “Bitiꞌ” ral-laꞌ innásiliꞌ “Bitiꞌ.”
Caní ral-laꞌ gunliꞌ,
para cabí ibágaꞌliꞌ xíguiaꞌ lahuëꞌ Dios.
13 Channö riguíꞌi rizácaꞌ nu dzaga libíꞌiliꞌ,
ral-laꞌ ulidza Dios nu naꞌ.
Channö zoa nu rudzeja,
ral-laꞌ gul-la yöl-laꞌ ba nu naꞌ.
14 Channö reꞌe nu dzaga libíꞌiliꞌ,
ral-laꞌ ulidza bönniꞌ gula tapa chiꞌë bönachi queëꞌ Cristo,
para uluꞌlidzëꞌ Dios,
en ilaꞌnábinëꞌ Lëꞌ únëꞌ bönniꞌ huëꞌ naꞌ.
Ral-laꞌ ilaꞌguꞌë lëꞌ le za,
en uluꞌgunëꞌ dxin Lëꞌ Xanruꞌ.
15 Cateꞌ uluꞌlidzëꞌ Dios,
en taꞌyéajlëꞌë gunëꞌ Cristo ga huöáquiëꞌ bönniꞌ huëꞌ naꞌ,
níꞌirö gunëꞌ Xanruꞌ ga huöása uzóëꞌ,
en channö benëꞌ dul-laꞌ bönniꞌ huëꞌ naꞌ,
Xanruꞌ uniti lahuëꞌ lëꞌ.
16 Que lë ni naꞌ,
guliꞌxóalëpi dul-laꞌ nabágaꞌliꞌ tuliꞌ iaꞌtuliꞌ,
en guliꞌnaba que luzáꞌaliꞌ tuliꞌ iaꞌtuliꞌ lahuëꞌ Dios para únëꞌ libíꞌiliꞌ,
para urúaj yödzöhuë́ꞌ naꞌ réꞌeliꞌ.
Le rulidzëꞌ tu bönniꞌ tsahuiꞌ Dios,
le runëꞌ idú ládxëꞌë,
nácadaꞌ lesacaꞌ.
17 Elías,
bönniꞌ niꞌ bëꞌë didzaꞌ uláz queëꞌ Dios,
gúquiëꞌ tu bönniꞌ yödzölió ca nácaruꞌ rëꞌu,
pero cateꞌ bulidzëꞌ Dios,
en gunábinëꞌ Lëꞌ para cabí galaj guiö́j,
idú tsonna iz yuꞌ xopa beoꞌ bitiꞌ gulaj guiö́j luyú ni.
18 Gudödi niꞌ bulidzëꞌ Dios leyúbölö,
ateꞌ böálaj guiö́j,
ateꞌ bunödzaj le gulazëꞌ yuguꞌ bönniꞌ dza niꞌ.
19 Böchiꞌ luzáꞌadoꞌ,
lë ni ral-laꞌ inö́ziliꞌ.
Channö nunbëꞌ nu bönniꞌ dzáguiëꞌ libíꞌiliꞌ le naca idútë li,
en richixi riníguinëꞌ,
ateꞌ zoa nu gun ga ubíꞌi ládxëꞌë bönniꞌ naꞌ richixi riníguinëꞌ,
20 nu naꞌ gun ga ubíꞌi ládxëꞌë bönniꞌ dul-laꞌ naꞌ gudë́ꞌ ga yúbölö,
usölë́ꞌ bönniꞌ dul-laꞌ naꞌ lu yöl-laꞌ guti,
en gunëꞌ ga uniti lahuëꞌ Dios dul-laꞌ zián nabáguëꞌë bönniꞌ naꞌ.
¡Caꞌ gaca!