Nupa tun zxön le nacuáꞌ yödzölió
4
¿Bizx que naꞌ ridíl-laliꞌ,
en raca didzaꞌ bizxaj queë́liꞌ?
Raca caní queë́liꞌ tuꞌ rizë́ ládxiꞌliꞌ zián le rizë́ ládxiꞌliꞌ tu tuliꞌ,
en que lë ni naꞌ ridíl-lalenliꞌ luzáꞌaliꞌ.
2 Zián le ruhuídiꞌliꞌ,
en tuꞌ cabí rizíꞌiliꞌ le,
que lë ni naꞌ rútiliꞌ bönachi.
Ruzxéꞌeliꞌ le dë que luzáꞌaliꞌ,
en tuꞌ cabí ridéliꞌliꞌ le,
que lë ni naꞌ rizóa ribö́ꞌöliꞌ,
en ridíl-laliꞌ.
Bitiꞌ rataꞌ queë́liꞌ le rë́ꞌëniliꞌ,
tuꞌ cabí rinábiliꞌ-nëꞌ Dios lë naꞌ.
3 Sal-laꞌ zoa bi rinábaliꞌ,
bitiꞌ bi rizíꞌiliꞌ,
tuꞌ cabí naca dxiꞌa ca rinábaliꞌ,
tuꞌ rë́ꞌëniliꞌ lë naꞌ rinábaliꞌ para ugunliꞌ le dxin ca raza ládxiꞌsiliꞌ.
4 Libíꞌiliꞌ,
bönachi nusanliꞌ-nëꞌ Dios,
¿naruꞌ cabí nö́ziliꞌ channö runliꞌ zxön le nacuáꞌ yödzölió ni,
chinuhuöácaliꞌ ca nu bitiꞌ riléꞌe Dios dxiꞌa?
Nútiꞌtës nu rë́ꞌëni gun zxön le nacuáꞌ yödzölió ni,
nuhuöáca ca nu bitiꞌ riléꞌe Dios dxiꞌa.
5 Bitiꞌ rnnasö caꞌ le nazúaj lu guichi láꞌayi le rnna:
“Dios risö́l-lëꞌë Dios Böꞌ Láꞌayi queë́ruꞌ,
Nu zóalen rëꞌu,
ateꞌ Lëꞌ nadxíꞌinëꞌ rëꞌu,
en rudúliꞌnëꞌ rëꞌu channö rusanruꞌ-nëꞌ.”
6 Naꞌa,
zxö́ntërö le ruzáꞌ ládxëꞌë Dios queë́ruꞌ,
tuꞌ nazúaj lu guichi láꞌayi le rnna:
“Dios ruzáguëꞌë xinö́zguequi nupa tun ba zxön cuínguequi,
pero ruzáꞌ ládxëꞌë quégaca nupa nácagaca nöxaj ladxiꞌ.”
7 Que lë ni naꞌ,
guliꞌsóa nöxaj ladxiꞌ lahuëꞌ Dios.
Guliꞌnná beꞌe tuꞌ xihuiꞌ,
ateꞌ uzxunnaj ga zóaliꞌ.
8 Guliꞌgüíꞌ ládxiꞌliꞌ sóalenliꞌ-nëꞌ Dios,
ateꞌ Lëꞌ idisóalenëꞌ libíꞌiliꞌ.
Libíꞌiliꞌ,
bönachi dul-laꞌ,
guliꞌgaca tsahuiꞌ,
en bítiꞌrö gunliꞌ dul-laꞌ.
Libíꞌiliꞌ,
núlöliꞌ reaj böꞌ ládxiꞌdoꞌoliꞌ,
en chopa le nadxíꞌiliꞌ,
guliꞌgún dxiꞌa icja ládxiꞌdoꞌoliꞌ.
9 Guliꞌsëbi ládxiꞌliꞌ,
en buliꞌhuíꞌini,
en guliꞌcödxi.
Naꞌa ruzxídxili,
pero ral-laꞌ cö́dxiliꞌ.
Rudzéjaliꞌ,
pero ral-laꞌ huíꞌiniliꞌ.
10 Guliꞌgaca nöxaj ladxiꞌ lahuëꞌ Xanruꞌ,
ateꞌ Lëꞌ gunëꞌ ga tsë́pisëliꞌ.
Bitiꞌ ral-laꞌ ichugu bë́ꞌëruꞌ le run luzáꞌaruꞌ
11 Böchiꞌ luzáꞌadoꞌ,
bitiꞌ innëliꞌ que luzáꞌaliꞌ tuliꞌ iaꞌtuliꞌ.
Nu bönniꞌ rinnë́ꞌ que böchiꞌ luzë́ꞌë,
en rilaga yudxëꞌ le runëꞌ,
bönniꞌ ni rinnë́ꞌ que xibá queëꞌ Dios,
en ruchiꞌa rusörö́ëꞌ le rinná bëꞌ xibá naꞌ.
Naꞌa,
channö ruchiꞌa rusörö́uꞌ le rinná bëꞌ xibá naꞌ,
run cuinuꞌ nu ruchiꞌa rusörö́ëꞌ le,
en bitiꞌ runuꞌ ca rinná bëꞌ xibá naꞌ.
12 Naꞌa,
tuzëꞌ náquiëꞌ Dios,
Nu ben xibá naꞌ,
en náquiëꞌ caꞌ Nu ruchiꞌa rusörö́ëꞌ le runruꞌ.
Lë cazëꞌ gaca usölë́ꞌ bönachi o usunítiëꞌ bönachi naꞌ.
Naꞌa,
¿núzxitë run cuinuꞌ,
rilaga yudxuꞌ luzóꞌo?
Bitiꞌ gaca gunruꞌ löza le gaca cuxö́ huidzaj
13 Naꞌa,
buliꞌzë́ nágaliꞌ,
núlöliꞌ rnnaliꞌ:
“Cuxö́ huidzaj tséajtuꞌ yödzö niꞌ,
ateꞌ sóatuꞌ niꞌ tu iz,
en zián le gáꞌutuꞌ,
en útiꞌtuꞌ,
ateꞌ caní gátaꞌdaꞌ dumí queë́tuꞌ.”
14 Bitiꞌ nö́ziliꞌ bizxi gaca cuxö́ huidzaj.
¿Nacxi caz naca queë́ruꞌ,
tsca zóaruꞌ yödzölió ni?
Nácaruꞌ ca bö́chila le naláꞌ tu chíꞌidoꞌosö,
en laꞌ rinítitë.
15 Que lë ni naꞌ,
caní ral-laꞌ innaliꞌ:
“Channö guë́ꞌënnëꞌ Xanruꞌ,
sóaruꞌ ibanruꞌ,
en tu iaꞌtú le gunruꞌ.”
16 Naꞌa,
libíꞌiliꞌ,
lu yöl-laꞌ run ba zxön queë́liꞌ rigúꞌuliꞌ yöl-laꞌ ba laꞌ cuínsiliꞌ.
Yúguꞌtë le caní le runliꞌ zeaj naca le ruáꞌ döꞌ.
17 Channö nö́ziruꞌ le naca dxiꞌa le ral-laꞌ gunruꞌ,
en bitiꞌ gunruꞌ lë naꞌ,
runruꞌ dul-laꞌ.