2
Que lë ni naꞌ,
guliꞌcáꞌana yúguꞌtë le ruáꞌ döꞌ.
Bítiꞌrö siꞌ yë́ꞌëliꞌ,
en bitiꞌ ubéaj dxiꞌa cuinliꞌ lógaca bönachi.
Bítiꞌrö uzxéꞌeliꞌ,
en bitiꞌ innëliꞌ que luzáꞌaliꞌ.
2 Ral-laꞌ së ládxiꞌliꞌ le naca queëꞌ Dios Böꞌ Láꞌayi para gálaliꞌ ca naꞌ tunbiꞌ biꞌi huë́ꞌënidoꞌ,
taꞌzë́ ládxiꞌbiꞌ nidxiꞌ.
Caní ral-laꞌ gunliꞌ ga idxinrö dza uláliꞌ,
3 channö réquibeꞌeliꞌ náquiëꞌ Xanruꞌ dxiꞌi ladxiꞌ.
Cristo náquiëꞌ ca tu guiö́j naca ban
4 Guliꞌbigaꞌ ga zoëꞌ Xanruꞌ.
Náquiëꞌ ca tu guiö́j naca ban.
Náquiëꞌ ca tu guiö́j buluꞌcáꞌana bönachi cáꞌasö pero naca tu le gurö́ cazëꞌ Dios le nazácaꞌtërö.
5 Lëscaꞌ caní,
libíꞌiliꞌ nácaliꞌ ca yuguꞌ guiö́j nabángaca.
Guliꞌgüíꞌ Dios lataj ugunëꞌ libíꞌiliꞌ dxin,
ateꞌ gunëꞌ ga gácaliꞌ ca tu yudoꞌ ga soëꞌ Dios Böꞌ Láꞌayi.
Lu yudoꞌ naꞌ gácaliꞌ ca bixúz néquiguequinëꞌ quez queëꞌ Dios,
ateꞌ lu nëꞌë Jesucristo gaca udö́diliꞌ yuguꞌ le runnëꞌ Dios Böꞌ Láꞌayi queë́liꞌ lahuëꞌ Dios,
lë naꞌ raza ládxëꞌë Dios.
6 Que lë ni naꞌ nazúaj caꞌ lu guichi láꞌayi le rnna:
Riguꞌa lu zöꞌö yödzö Sión tu guiö́j lo squin zöꞌö,
le gurö́ cazaꞌ nedaꞌ,
en naca lesacaꞌ.
Nu réajlëꞌ Lëꞌ,
bitiꞌ ichixi inigui.
7 Naca guiö́j ni queë́liꞌ libíꞌiliꞌ naꞌ réajlëꞌëliꞌ Cristo tu le nazácaꞌdaꞌ,
pero quégaca nupa bitiꞌ taꞌyéajlëꞌ Cristo,
naca ca naꞌ nazúaj lu guichi láꞌayi le rnna:
Guiö́j naꞌ buluꞌzóëꞌ bönniꞌ tuꞌcuꞌë zöꞌö tsöláꞌalö,
tuꞌ guléquinëꞌ naca cáꞌasö,
guiö́j ni chinaca guiö́j lo squin zöꞌö.
8 Lëscaꞌ caní nazúaj lu guichi láꞌayi le rnna:
Guiö́j ni gun ga tsöjchéguꞌgaca bönachi,
en gun ga tsöjtsö́ꞌögaca.
Le nácatë yöjchéguꞌgaquiëꞌ bönniꞌ bitiꞌ taꞌyéajlëꞌë Cristo,
tuꞌ gulaꞌchíxinëꞌ cateꞌ buluꞌzóëꞌ xtídzëꞌë Dios tsöláꞌalö.
Dios bucuꞌë légaquiëꞌ para ilunëꞌ caní.
Nupa néquiguequi quez queëꞌ Dios
9 Libíꞌiliꞌ nácaliꞌ bönachi gurö́ cazëꞌ Dios.
Yúguꞌtëliꞌ nácaliꞌ bixúz queëꞌ Bönniꞌ Unná Bëꞌ Láꞌayi.
Nácaliꞌ ca tu yödzö nequi quez queëꞌ Dios.
Nácaliꞌ bönachi que cazëꞌ Dios.
Caní nácaliꞌ para gaca gunliꞌ libán que le zxön benëꞌ Dios,
Bönniꞌ naꞌ bulidzëꞌ libíꞌiliꞌ para birúajliꞌ ga naca chul-la que dul-laꞌ,
en guyázaliꞌ lu beníꞌ idú queëꞌ.
10 Zíꞌatëlö bitiꞌ gúcaliꞌ bönachi queëꞌ Dios,
pero naꞌa chinácaliꞌ bönachi queëꞌ.
Zíꞌatëlö cuntu nu buéchiꞌ ladxiꞌ libíꞌiliꞌ,
pero naꞌa Dios caz ruhuéchiꞌ ládxëꞌë libíꞌiliꞌ.
Zóaruꞌ nabanruꞌ para gunruꞌ ca rë́ꞌënëꞌ Dios
11 Böchiꞌ luzáꞌadoꞌ,
nácaliꞌ ca bönachi ziꞌtuꞌ,
en ridásiliꞌ yödzölió ni.
Que lë ni naꞌ,
rátaꞌyuaꞌ loliꞌ,
bitiꞌ güíꞌiliꞌ lataj ilaꞌnná beꞌe le rizësö ládxiꞌliꞌ libíꞌiliꞌ,
yuguꞌ le taꞌdíl-lalen böꞌ naca cázaliꞌ.
12 Guliꞌgún le naca dxiꞌa lógaca bönachi bitiꞌ núnbëꞌgaquiëꞌ Dios.
Caní gaca,
channö uluꞌzegui libíꞌiliꞌ didzaꞌ,
en ilaꞌnná tútiliꞌ bönachi,
gaca ilaꞌléꞌe bönachi yuguꞌ le dxiꞌa runliꞌ,
ateꞌ dza huödëꞌ Xanruꞌ ilaꞌguꞌë Dios yöl-laꞌ ba niꞌa que le naca cázaliꞌ.
13 Tuꞌ néquiliꞌ queëꞌ Xanruꞌ,
guliꞌgún bal yúguꞌtë bönniꞌ taꞌnná bëꞌë,
bönniꞌ naꞌ nucuáꞌagaca bönachi légaquiëꞌ,
sal-laꞌ náquiëꞌ bönniꞌ rinná béꞌenëꞌ idútë yödzölió,
tuꞌ náquiëꞌ bönniꞌ lo unná bëꞌ,
14 o channö náquiëꞌ bönniꞌ rinná béꞌenëꞌ tu yödzö,
nu naꞌ nuzóëꞌ bönniꞌ lo unná bëꞌ naꞌ para gunëꞌ xíguiaꞌ nupa tuaꞌ döꞌ,
en gunëꞌ bal nupa tun le naca dxiꞌa.
15 Caní rë́ꞌënëꞌ Dios gunliꞌ para ilaꞌbö́ꞌ dxíëꞌ yuguꞌ bönniꞌ bitiꞌ bi nö́zguequinëꞌ,
en bitiꞌ núnbëꞌgaquiëꞌ Lëꞌ,
cateꞌ ilaꞌléꞌenëꞌ le naca dxiꞌa naꞌ runliꞌ.
16 Guliꞌgaca ca yuguꞌ bönniꞌ nazángaquiëꞌ,
pero bitiꞌ ugunliꞌ dxin yöl-laꞌ nazán queë́liꞌ para gunliꞌ le ruáꞌ döꞌ.
Guliꞌgaca ca yuguꞌ bönniꞌ nadóꞌogaquiëꞌ queëꞌ Dios.
17 Guliꞌgún bal yúguꞌtë bönachi.
Guliꞌdxíꞌi yuguꞌ böchiꞌ luzáꞌaliꞌ.
Guliꞌgadxi-nëꞌ Dios.
Guliꞌgún bal bönniꞌ naꞌ rinná béꞌenëꞌ idútë yödzölió.
Le gudíꞌi guzxáquëꞌë Cristo ruzéajniꞌi rëꞌu ca ral-laꞌ gunruꞌ
18 Núlöliꞌ nácaliꞌ bönniꞌ nadóꞌogaca,
guliꞌgadxi bönniꞌ xanliꞌ,
en guliꞌgún légaquiëꞌ bal,
calë́gasö gunliꞌ bal yuguꞌ bönniꞌ xanliꞌ naꞌ nácagaquiëꞌ tsahuiꞌ,
en tuíꞌi ládxiꞌgaquiëꞌ libíꞌiliꞌ,
pero guliꞌgún bal caꞌ yuguꞌ bönniꞌ xanliꞌ naꞌ tuꞌsacaꞌ ziꞌë libíꞌiliꞌ lu dxin runliꞌ quégaquiëꞌ.
19 Channö quíꞌi sácaꞌliꞌ,
en bitiꞌ bi nabágaꞌliꞌ,
ateꞌ guáꞌ ilenliꞌ lë naꞌ tuꞌ réquiliꞌ naca ca rë́ꞌënëꞌ Dios,
urúajliꞌ tsahuiꞌ lahuëꞌ Dios.
20 Naꞌa,
channö ruáꞌaliꞌ döꞌ,
ateꞌ yuguꞌ bönniꞌ yúlahuiꞌ ilunëꞌ libíꞌiliꞌ xíguiaꞌ,
¿nacxi caz uzíꞌiliꞌ xibé sal-laꞌ len yöl-laꞌ riböza zxön ladxiꞌ queë́liꞌ guáꞌ ilenliꞌ lë naꞌ gaca queë́liꞌ?
Channö ribö́zaliꞌ zxön ladxiꞌ,
en ruáꞌ rilenliꞌ le riguíꞌi rizácaꞌliꞌ,
ateꞌ benliꞌ le naca dxiꞌa,
níꞌirö urúajliꞌ dxiꞌa lahuëꞌ Dios.
21 Dios bulidzëꞌ libíꞌiliꞌ para quíꞌi sácaꞌliꞌ caní,
tuꞌ gudíꞌi guzxáquëꞌë Lë cazëꞌ Cristo uláz queë́liꞌ,
en buzóëꞌ queë́liꞌ tu le ruluíꞌi libíꞌiliꞌ ca ral-laꞌ gunliꞌ,
para quíꞌi sácaꞌliꞌ ca naꞌ gudíꞌi guzxáquëꞌë Lëꞌ.
22 Cristo bitiꞌ bi dul-laꞌ benëꞌ,
en catu caz guzxíꞌ yëꞌë.
23 Cateꞌ buluꞌdídzaꞌ yúdxinëꞌ Lëꞌ,
bitiꞌ butsagui yúdxinëꞌ légaquiëꞌ.
Cateꞌ buluꞌsacaꞌ ziꞌë Lëꞌ,
bitiꞌ buzenëꞌ légaquiëꞌ le bach,
pero budödi cuinëꞌ lu nëꞌë Dios,
Nu naꞌ ruchiꞌa rusörö́ëꞌ le runruꞌ ca saꞌyéaj.
24 Lë cazëꞌ Cristo guzxiꞌë dul-laꞌ queë́ruꞌ lu idú le naca cazëꞌ cateꞌ niꞌ gútiëꞌ lëꞌe yaga cruz,
para gácaruꞌ ca yuguꞌ bönniꞌ nati,
para cabirö gunruꞌ dul-laꞌ,
pero sóaruꞌ ibanruꞌ para gunruꞌ le naca dxiꞌa.
Lëꞌ gúquiëꞌ huëꞌ uláz queë́ruꞌ para huöácaruꞌ rëꞌu dxiꞌa.
25 Gúcaliꞌ ca yuguꞌ böꞌcuꞌ zxilaꞌ nanítigacabaꞌ,
pero naꞌa budxinliꞌ queëꞌ Cristo,
Nu ruyú libíꞌiliꞌ,
en rapa chiꞌë böꞌ naca cázaliꞌ.
Náquiëꞌ queë́liꞌ ca tuꞌ bönniꞌ uyú böꞌcuꞌ zxilaꞌ.