Ca ral-laꞌ ilún nupa nutsaga náꞌgaca
3
1,2 Lëscaꞌ caní, libíꞌiliꞌ nigula, ral-laꞌ gunliꞌ bal bönniꞌ que queë́liꞌ, en channö cabí taꞌyéajlëꞌë xtídzëꞌë Cristo, ilaꞌyéajlëꞌë Lëꞌ cateꞌ ilaꞌléꞌenëꞌ le naca dxiꞌa runliꞌ, en ca naꞌ nácaliꞌ baꞌa ladxiꞌ, en runliꞌ légaquiëꞌ bal, sal-laꞌ bitiꞌ bi didzaꞌ ruíꞌilenliꞌ légaquiëꞌ ca naca queëꞌ Cristo. 3 Yöl-laꞌ lachi queë́liꞌ bitiꞌ naca le zoa láhuisö,
tsca rupáꞌaliꞌ ícjaliꞌ,
en tsca nácagaca le néquini oro nusíꞌ cuinliꞌ,
en lariꞌ nazácaꞌdaꞌ náculiꞌ.
4 Yöl-laꞌ lachi queë́liꞌ ral-laꞌ gaca le yuꞌu icja ládxiꞌdoꞌoliꞌ.
Yöl-laꞌ lachi le ridiáꞌticaꞌsö naca yöl-laꞌ nöxaj ladxiꞌ,
en yöl-laꞌ baꞌa ladxiꞌ,
le nazácaꞌdaꞌgaca lahuëꞌ Dios.
5 Lëscaꞌ caní guca yöl-laꞌ lachi quégacanu nigula gulaꞌyéaj ládxiꞌnu Dios,
nigula naꞌ gulaꞌcuáꞌanu dza niꞌte.
Buluꞌzxöni ládxiꞌnu Dios,
en gulunnu bal bönniꞌ que queë́gacanu.
6 Caní bennu Sara,
tuꞌ bennu ca rnna xtídzëꞌë Abraham,
bönniꞌ queë́nu,
en bulídzanu lëꞌ,
gunnánu:
“Xan.”
Libíꞌiliꞌ caꞌ gunliꞌ ca bennu Sara naꞌ channö gunliꞌ le naca dxiꞌa,
en bitiꞌ bi gádxiliꞌ.
7 Lëscaꞌ caní,
libíꞌiliꞌ,
bönniꞌ,
ral-laꞌ güíꞌi ládxiꞌliꞌ nigula que queë́liꞌ.
Guliꞌgún légacanu bal,
calë́gasö tuꞌ nö́taꞌgacanu ca yöl-laꞌ nál-la queë́liꞌ,
pero lëscaꞌ tuꞌ nadéliꞌgacanu yöl-laꞌ naꞌbán naꞌ runnëꞌ Dios queë́ruꞌ,
lë́bisö ca nadéliꞌliꞌ libíꞌiliꞌ.
Guliꞌgún caní para cabí uzagaꞌ tuꞌ xihuiꞌ xinö́ziliꞌ cateꞌ ulídzaliꞌ-nëꞌ Dios.
Huaguíꞌi huazácaꞌruꞌ sal-laꞌ gunruꞌ le naca dxiꞌa
8 Ga ruúdxitë,
guliꞌgaca tuz tuliꞌ len iaꞌtuliꞌ yúguꞌtëliꞌ,
en guliꞌgüíꞌ ládxiꞌliꞌ luzáꞌaliꞌ tuliꞌ iaꞌtuliꞌ.
Guliꞌgaca dxiꞌi ladxiꞌ,
en zxön ladxiꞌ.
9 Bitiꞌ ubíꞌiliꞌ,
cabí guáꞌaliꞌ döꞌ que nu ruáꞌ döꞌ queë́liꞌ,
en bitiꞌ utsaga yúdxiliꞌ nu rutsaga yudxi libíꞌiliꞌ,
pero caní ubíꞌiliꞌ,
inábiliꞌ-nëꞌ Dios gunëꞌ ga gaca bicaꞌ ba nu naꞌ,
tuꞌ bulidzëꞌ Dios libíꞌiliꞌ para gácaliꞌ bicaꞌ ba.
10 Caní naca le nazúaj lu guichi láꞌayi le rnna:
Nu bönniꞌ rë́ꞌënëꞌ uziꞌë xibé yöl-laꞌ naꞌbán queëꞌ,
en cözëꞌ dxíꞌadoꞌ,
ral-laꞌ ucáꞌanëꞌ didzaꞌ xihuiꞌ,
en cabirö siꞌ yëꞌë.
11 Ral-laꞌ ucáꞌanëꞌ le ruáꞌ döꞌ,
en gunëꞌ le naca dxiꞌa.
Ral-laꞌ güíꞌi ládxëꞌë cözëꞌ zxön ladxiꞌ,
en gúnticaꞌsëꞌ caní,
12 Xanruꞌ rapa chiꞌë yuguꞌ bönniꞌ tsahuiꞌ
en ruzë́ náguiëꞌ le tuꞌlidzëꞌ Lëꞌ,
pero ruzáguëꞌë xinö́zguequi nupa tuaꞌ döꞌ.
13 ¿Nuzxi caz guáꞌ döꞌ queë́liꞌ channö ruíꞌi ládxiꞌliꞌ gúnticaꞌsiliꞌ le naca tsahuiꞌ?
14 Sal-laꞌ quíꞌi sácaꞌliꞌ cateꞌ runliꞌ le naca tsahuiꞌ,
gácaliꞌ bicaꞌ ba.
Cuntu nu gádxiliꞌ,
en bitiꞌ ubi uguíꞌiliꞌ
15 pero buliꞌzxöni ládxiꞌliꞌ-nëꞌ Cristo,
en güíꞌiliꞌ Lëꞌ lataj inná béꞌenëꞌ lu icja ládxiꞌdoꞌoliꞌ.
Guliꞌsóa sinaꞌ quíxjöiꞌiliꞌ yúguꞌtë nupa ilaꞌnabi libíꞌiliꞌ bizx que runliꞌ löza Cristo,
en gunliꞌ lë ni lu yöl-laꞌ nöxaj ladxiꞌ queë́liꞌ,
en lu yöl-laꞌ run bal nupa naꞌ.
16 Guliꞌgúnticaꞌsö le naca dxiꞌa lahuëꞌ Dios,
en channö nacuáꞌ nupa taꞌnnë́ xihuiꞌ que le naca tsahuiꞌ runliꞌ tuꞌ réajlëꞌëliꞌ Cristo,
níꞌirö uluꞌtuíꞌi tuꞌ nözi le taꞌnnë́ queë́liꞌ.
17 Channö quíꞌi sácaꞌliꞌ,
dxíꞌarö gaca channö naca tuꞌ runliꞌ le naca dxiꞌa,
en calëga tuꞌ ruáꞌaliꞌ döꞌ,
channö Dios rë́ꞌënëꞌ quiꞌi sácaꞌliꞌ caní.
18 Lë cazëꞌ Cristo gudíꞌi guzxáquëꞌë,
en gútiëꞌ uláz queë́ruꞌ para bugǘëꞌ dul-laꞌ nabágaꞌruꞌ.
Lëꞌ náquiëꞌ dxiꞌa,
pero gútiëꞌ niꞌa queë́ruꞌ,
yuguꞌ bönniꞌ dul-laꞌ.
Caní benëꞌ para bunëꞌ rëꞌu tuz len Dios.
Lu yöl-laꞌ bönachi queëꞌ gútiëꞌ pero lu böꞌ naca cazëꞌ ni zoëꞌ nabanëꞌ lu le cubi le naca cazëꞌ.
19 Lu böꞌ naca cazëꞌ guyijëꞌ yöjenëꞌ libán lógaca böꞌ nadzúngaca.
20 Böꞌ ni gulaca cazëꞌ yuguꞌ bönniꞌ,
dza niꞌte gulaꞌdáꞌbaguëꞌë xtídzëꞌë Dios,
dza niꞌ zoëꞌ Noé,
cateꞌ niꞌ gulözëꞌ Dios lu yöl-laꞌ riböza zxön ladxiꞌ queëꞌ,
en bitiꞌ busiúdxëꞌ légaquiëꞌ,
tsanni niꞌ benëꞌ Noé barco zxön naꞌ.
Lëꞌe barco naꞌ buluꞌlá nabábasö bönachi lu nisa.
Gulaca xunuꞌ bönachi,
bönniꞌ,
en nigula.
21 Nisa niꞌ naca tu le ruluíꞌi ca naca nisa ga naꞌ ridílaruꞌ nisa,
le naca bëꞌ nuláruꞌ lu yöl-laꞌ guti tuꞌ bubanëꞌ Jesucristo lu yöl-laꞌ guti.
Lë naꞌ ridílaruꞌ nisa bitiꞌ naca tu le run dxiꞌa le nácaruꞌ láhuisö,
pero ruluíꞌi ruíꞌi ládxiꞌruꞌ gaca dxiꞌa icja ládxiꞌdoꞌoruꞌ lahuëꞌ Dios.
22 Jesucristo bubenëꞌ yehuaꞌ yubá,
ga naꞌ yöjchöꞌë cuita lëꞌë ibëla Dios,
en rinná béꞌenëꞌ yuguꞌ gubáz láꞌayi,
en nupa niꞌ taꞌnná bëꞌ,
en nupa nadéliꞌgaca yöl-laꞌ zxön.