DÍDZAꞌDOꞌ BUROPI BUZÚAJËꞌ PEDRO
Pedro rugapëꞌ Dios nupa taꞌdáꞌ Cristo
1
Nedaꞌ,
Simón Pedro,
nacaꞌ huen dxin queëꞌ Jesucristo,
en gubáz nasö́l-lëꞌë Lëꞌ.
Rugapaꞌ Dios libíꞌiliꞌ,
réajlëꞌëliꞌ-nëꞌ Jesús.
Lë́bisö ca nazácaꞌgaca yöl-laꞌ réajlëꞌ queë́liꞌ Lëꞌ,
en yöl-laꞌ réajlëꞌ queë́tuꞌ Lëꞌ.
Dios benëꞌ ga réajlëꞌëliꞌ Lëꞌ tuꞌ naca cazëꞌ tsahuiꞌ,
en tuꞌ náquiëꞌ caꞌ Xanruꞌ Jesucristo,
Nu naꞌ rusölá rëꞌu,
tsahuiꞌ.
2 Rinábidaꞌ-nëꞌ Dios gunëꞌ ga gataꞌ queë́liꞌ idútë le ruzáꞌ ládxëꞌë queë́ruꞌ,
en gunëꞌ ga soa dxi icja ládxiꞌdoꞌoliꞌ tuꞌ núnbëꞌëliꞌ-nëꞌ Dios,
encaꞌ Xanruꞌ Jesús.
Le nácagaca nupa taꞌyéajlëꞌ Cristo
3 Lu yöl-laꞌ huáca zxön queëꞌ,
Dios chibennëꞌ queë́ruꞌ yúguꞌtë le riquíniruꞌ para gataꞌ queë́ruꞌ yöl-laꞌ naꞌbán idú,
en para gácaruꞌ baꞌa ladxiꞌ,
tuꞌ núnbëꞌëruꞌ Nu naꞌ bulidza rëꞌu para gataꞌ queë́ruꞌ yöl-laꞌ zxön queëꞌ,
en le naca tsahuiꞌ queëꞌ.
4 Tuꞌ runëꞌ caní,
benëꞌ ga gaca uzíꞌiruꞌ xibé yuguꞌ le zxön,
en le naca tsahuiꞌ guzxíꞌ lu nëꞌë gunnëꞌ queë́ruꞌ,
ateꞌ tuꞌ naca caní nuláruꞌ lu le ruáꞌ döꞌ raca yödzölió ni tuꞌ taꞌzë́ ládxiꞌgaca bönachi le cabí naca tsahuiꞌ.
Nuláruꞌ para gácaruꞌ ca náquiëꞌ Lë cazëꞌ Dios.
5 Que lë ni naꞌ:
Channö réajlëꞌëliꞌ Cristo,
guliꞌgüíꞌ ládxiꞌliꞌ gácaliꞌ dxiꞌi ladxiꞌ.
Channö chinácaliꞌ dxiꞌi ladxiꞌ,
guliꞌgüíꞌ ládxiꞌliꞌ gataꞌ caꞌ queë́liꞌ yöl-laꞌ rácadaꞌ.
6 Channö nápaliꞌ yöl-laꞌ rácadaꞌ,
guliꞌgüíꞌ ládxiꞌliꞌ inná beꞌe cuinliꞌ.
Channö rinná beꞌe cuinliꞌ,
guliꞌcöza zxön ladxiꞌ.
Channö ribö́zaliꞌ zxön ladxiꞌ,
guliꞌsóa baꞌa ladxiꞌ.
7 Channö zóaliꞌ baꞌa ladxiꞌ,
guliꞌdxíꞌi luzáꞌaliꞌ.
Channö nadxíꞌiliꞌ luzáꞌaliꞌ,
guliꞌdxíꞌi caꞌ yúguꞌtë bönachi.
8 Channö caní runliꞌ,
en zeaj rácarö idú ca runliꞌ caní,
lë ni gun ga bitiꞌ gaca nítisö yöl-laꞌ réajlëꞌ queë́liꞌ Lëꞌ,
ateꞌ tseaj gácarö idú ca núnbëꞌëliꞌ-nëꞌ Xanruꞌ Jesucristo.
9 Nu bönniꞌ bitiꞌ ruíꞌi ládxëꞌë gunëꞌ caní,
náquiëꞌ ca tu bönniꞌ nachul-la nanítiëꞌ,
tuꞌ chizáꞌ ral-la ládxëꞌë bunëꞌ Cristo lëꞌ tsahuiꞌ,
en bugǘëꞌ yuguꞌ dul-laꞌ gubáguëꞌë zíꞌatëlö.
10 Que lë ni naꞌ,
böchiꞌ luzáꞌadoꞌ,
ral-laꞌ güíꞌitërö ládxiꞌliꞌ guéquibeꞌeliꞌ bulidzëꞌ Dios libíꞌiliꞌ,
en gurö́ cazëꞌ libíꞌiliꞌ.
Channö gunliꞌ caní,
bitiꞌ caꞌ ichixi iníguiliꞌ.
11 Caní gaca,
idú ládxëꞌë Dios gúnnasëꞌ queë́liꞌ lataj tsázaliꞌ ga inná bë́ꞌticaꞌsëꞌ Xanruꞌ Jesucristo,
Nu rusölá rëꞌu.
12 Que lë ni naꞌ gúnticaꞌsaꞌ ga tsöjnéliꞌ yuguꞌ lë ni sal-laꞌ chinö́z quéziliꞌ le,
en rugunliꞌ dxin le naca idútë li naꞌ chiguzxíꞌ lu náꞌaliꞌ.
13 Runi nedaꞌ ral-laꞌ usubanaꞌ ládxiꞌliꞌ ca nácagaca lë ni tsanni ni zoaꞌ nabanaꞌ.
14 Ral-laꞌ gunaꞌ caní tuꞌ nözdaꞌ siꞌ gátiaꞌ.
Xanruꞌ Jesucristo chigudxi cazëꞌ nedaꞌ gaca caní quiaꞌ.
15 Que lë ni naꞌ ruíꞌidaꞌ ládxaꞌa gunaꞌ ga tsöjnéticaꞌsiliꞌ yuguꞌ lë ni tödi gátiaꞌ.
Nupa bilaꞌléꞌe yöl-laꞌ zxön queëꞌ Cristo
16 Bitiꞌ bë́ꞌlentuꞌ libíꞌiliꞌ tu didzaꞌ ridasö lu yöl-laꞌ sinaꞌ queë́tuꞌ,
cateꞌ buzéajniꞌituꞌ libíꞌiliꞌ ca ral-laꞌ idxín dza huödëꞌ Xanruꞌ Jesucristo,
napëꞌ yöl-laꞌ unná bëꞌ zxön.
Netuꞌ biléꞌe quézituꞌ yöl-laꞌ zxön queëꞌ.
17 Biléꞌetuꞌ Lëꞌ cateꞌ Xúziruꞌ Dios benëꞌ Lëꞌ bal,
en bëꞌë Lëꞌ yöl-laꞌ zxön,
ateꞌ biyö́n chiꞌë Dios,
le birúaj lataj beníꞌ queëꞌ,
cateꞌ gunnë́ꞌ:
“Bönniꞌ ni náquiëꞌ Zxíꞌinaꞌ.
Nadxíꞌidaꞌ Lëꞌ,
en raza ládxaꞌa Lëꞌ.”
18 Netuꞌ biyö́n quézituꞌ chiꞌë naꞌ le birúaj yehuaꞌ yubá cateꞌ niꞌ guzóalentuꞌ-nëꞌ Xanruꞌ lu guíꞌa láꞌayi naꞌ.
19 Lë naꞌ guca,
naca bëꞌdaꞌ zeaj nácatë didzaꞌ guluꞌë yuguꞌ bönniꞌ uláz queëꞌ Dios,
ateꞌ ral-laꞌ güíꞌi ládxiꞌliꞌ didzaꞌ naꞌ,
tuꞌ naca ca tu guíꞌ ruzeníꞌ tu ga naca chul-la ga idxintë dza uzeníꞌ lu icja ládxiꞌdoꞌoliꞌ Nu naꞌ naca ca bölaj hui sila queë́ruꞌ.
20 Lë ni rundaꞌ bayudxi tséajniꞌiliꞌ:
Cuntu nu bönniꞌ,
rácasö queëꞌ bitiꞌ gaca tséajniꞌinëꞌ didzaꞌ bëꞌë tu bönniꞌ uláz queëꞌ Dios.
21 Yuguꞌ didzaꞌ guluꞌë yuguꞌ bönniꞌ uláz queëꞌ Dios bitiꞌ caꞌ guluꞌë tuꞌ gulë́ꞌëni quézinëꞌ,
pero guluꞌë didzaꞌ uláz queëꞌ Dios le guchíziëꞌ Dios Böꞌ Láꞌayi icja ládxiꞌdoꞌgaquiëꞌ.