DÍDZAꞌDOꞌ ZÍꞌALÖ BUZÚAJËꞌ JUAN
Didzaꞌ nabániruꞌ
1
Rusiyöntuꞌ libíꞌiliꞌ ca naca queëꞌ Bönniꞌ naꞌ zoa cazëꞌ dza niꞌte,
le biyö́nituꞌ bëꞌë didzaꞌ,
en le biléꞌetuꞌ ca naca queëꞌ,
en le buyutuꞌ benëꞌ Bönniꞌ naꞌ.
Gudantuꞌ Lëꞌ.
Bönniꞌ ni náquiëꞌ Jesús,
lëꞌ caꞌ Didzaꞌ Nabánigaca Bönachi.
2 Bönniꞌ naꞌ nabánigaca bönachi buluíꞌi lahuëꞌ,
ateꞌ biléꞌetuꞌ Lëꞌ.
Runtuꞌ ba nalí queëꞌ,
en ruluíꞌituꞌ libíꞌiliꞌ ca naca queëꞌ Bönniꞌ naꞌ nabániruꞌ.
Bönniꞌ ni guzóalenëꞌ Dios Xuz,
en chibuduluíꞌi lahuëꞌ ga zóaruꞌ.
3 Le biléꞌetuꞌ,
en le biyö́nituꞌ rusiyöntuꞌ libíꞌiliꞌ para gácaliꞌ caꞌ libíꞌiliꞌ tuz len netuꞌ.
Le nácatë naca yöl-laꞌ tuz queë́ruꞌ len Dios Xuz,
encaꞌ len Jesucristo Zxíꞌinëꞌ Dios.
4 Ruzúajtuꞌ queë́liꞌ lu guichi lë ni para gaca udzéjaruꞌ idú ládxiꞌruꞌ.
Dios náquiëꞌ beníꞌ
5 Lë ni naca didzaꞌ biyö́nituꞌ bë́ꞌlenëꞌ Jesús netuꞌ,
ateꞌ le rusiyöntuꞌ libíꞌiliꞌ.
Caní rnna:
Dios náquiëꞌ beníꞌ,
ateꞌ nitú le naca chul-la que dul-laꞌ bitiꞌ zóalen Lëꞌ.
6 Channö innaruꞌ:
“Nácaruꞌ tuz len Dios”,
pero channö runruꞌ le naca chul-la que dul-laꞌ,
lë ni naca bëꞌ rizíꞌ yë́ꞌëruꞌ,
en bitiꞌ runruꞌ le naca idútë li.
7 Naꞌa,
channö runruꞌ le naca tsahuiꞌ,
en ridaruꞌ lu beníꞌ ca naꞌ Lëꞌ náquiëꞌ tsahuiꞌ,
en zoëꞌ lu beníꞌ,
nácaruꞌ tuz turuꞌ len iaꞌturuꞌ,
ateꞌ xichönëꞌ Jesucristo,
Zxíꞌinëꞌ Dios ruún rëꞌu dxiꞌa,
en rugúa yúguꞌtë dul-laꞌ nabágaꞌruꞌ.
8 Channö rnnaruꞌ:
“Bitiꞌ bi dul-laꞌ runruꞌ”,
rizíꞌ yéꞌeruꞌ laꞌ cuínsiruꞌ,
en bitiꞌ nazíꞌ lu náꞌaruꞌ le naca idútë li.
9 Channö ixóalëpiruꞌ lahuëꞌ Dios dul-laꞌ nabágaꞌruꞌ,
Lëꞌ runëꞌ ca rnnëꞌ,
en náquiëꞌ tsahuiꞌ.
Uniti lahuëꞌ dul-laꞌ nabágaꞌruꞌ,
en únëꞌ rëꞌu tsahuiꞌ,
ugǘëꞌ yúguꞌtë le ruáꞌ döꞌ dzaga rëꞌu.
10 Channö innaruꞌ:
“Bitiꞌ bi dul-laꞌ nabágaꞌruꞌ”,
naca ca innaruꞌ:
“Dios rizíꞌ yëꞌë”,
ateꞌ bitiꞌ runruꞌ ca rnna xtídzëꞌë.