DÍDZAꞌDOꞌ BUROPI BUZÚAJËꞌ JUAN
Núnbëꞌëruꞌ le naca idútë li, en yöl-laꞌ nadxíꞌi
1
Nedaꞌ,
bönniꞌ gula run chiꞌa bönachi queëꞌ Cristo,
rugapaꞌ liꞌ Dios,
nigula rö queëꞌ Dios,
tsözxö́n len yúguꞌtë zxíꞌinuꞌ.
Nadxíꞌidaꞌ libíꞌiliꞌ tuꞌ núnbëꞌëruꞌ le naca idútë li,
en calë́gasö nedaꞌ,
pero lëscaꞌ yúguꞌtë nupa chinúnbëꞌgaca le naca idútë li taꞌdxíꞌi libíꞌiliꞌ.
2 Nadxíꞌituꞌ libíꞌiliꞌ tuꞌ núnbëꞌëruꞌ le naca idútë li,
le zóalenticaꞌsö rëꞌu.
3 Rinábidaꞌ-nëꞌ Dios Xuz,
en Xanruꞌ Jesucristo,
Zxíꞌini cazëꞌ Dios,
uzáꞌ ládxëꞌë queë́liꞌ,
en huéchiꞌ ládxëꞌë libíꞌiliꞌ,
en gunëꞌ ga soa dxi icja ládxiꞌdoꞌoliꞌ tuꞌ núnbëꞌëliꞌ le naca idútë li,
en nadxíꞌiliꞌ luzáꞌaliꞌ.
4 Budzéjadeꞌedaꞌ cateꞌ biyöndaꞌ tunbiꞌ zxíꞌinuꞌ ca naca le naca idútë li,
tuꞌ tunbiꞌ ca naꞌ gunná béꞌenëꞌ Dios Xuz rëꞌu.
5 Naꞌa,
rátaꞌyuaꞌ loꞌ,
nigúladoꞌ,
gunuꞌ ca rinná bëꞌ xibá queëꞌ Cristo.
Bitiꞌ ruzúajaꞌ quiuꞌ lu guichi tu xibá cubi.
Ruzúajaꞌ laꞌ lë́bisö lë naꞌ gunná béꞌenëꞌ rëꞌu dza niꞌte.
Gunnë́ꞌ ral-laꞌ idxíꞌiruꞌ luzáꞌaruꞌ.
6 Caní naca bëꞌ nadxíꞌiruꞌ-nëꞌ Dios.
Naca caní channö runruꞌ ca rnna le gunná béꞌenëꞌ rëꞌu.
Lë naꞌ gunná béꞌenëꞌ rëꞌu naca para idxíꞌiruꞌ luzáꞌaruꞌ ca naꞌ chibiyö́niliꞌ dza niꞌte.
Nupa të́ꞌëni ilaꞌzíꞌ yeꞌe rëꞌu
7 Lë ni riguíxjöiꞌidaꞌ libíꞌiliꞌ,
tuꞌ chitaꞌdá zián nupa taꞌzíꞌ yëꞌ yödzölió ni,
nupa naꞌ bitiꞌ taꞌzíꞌ lu në́ꞌeguequi ca bidëꞌ Jesucristo,
gúquiëꞌ idú bönachi.
Nu naꞌ run caní,
naca nu rizíꞌ yëꞌ,
en nu ridáꞌbagaꞌ Cristo.
8 Guliꞌgún chiꞌi cuinliꞌ para cabí initi le nadéliꞌliꞌ tuꞌ guzxíꞌ lu naꞌliꞌ Cristo,
pero guliꞌgüíꞌ ládxiꞌliꞌ idéliꞌliꞌ idútë le ral-laꞌ síꞌiliꞌ lu nëꞌë Dios.
9 Nútiꞌtës nu riguelaꞌ nöza yúbölö,
en rucáꞌana xtídzëꞌë Cristo,
bitiꞌ zóalenëꞌ Dios nu naꞌ.
Nu dáꞌticaꞌsö xtídzëꞌë Cristo,
zóalenëꞌ Dios Xuz,
encaꞌ Zxíꞌinëꞌ nu naꞌ.
10 Channö nútiꞌtës nu zaꞌ ga zóaliꞌ,
en rusedi xibá yúbölö,
bitiꞌ ulë́biliꞌ nu naꞌ lídxiliꞌ,
en bitiꞌ guië́liꞌ le:
“Guyúꞌu len netuꞌ.”
11 Nu rë le:
“Guyúꞌu len netuꞌ”,
run tsözxö́n nu naꞌ ca naca le ruáꞌ döꞌ run nu naꞌ.
Runëꞌ Juan löza idxinëꞌ ga nacuꞌë böchiꞌ luzë́ꞌë
12 Sal-laꞌ le zián ral-laꞌ uzúajaꞌ queë́liꞌ lu guichi,
bitiꞌ rë́ꞌëndaꞌ uzúajaꞌ yúguꞌtë lu guichi.
Runaꞌ löza guídaꞌ ga zóaliꞌ,
ateꞌ güíꞌiruꞌ didzaꞌ ruáꞌa cuinruꞌ,
para gaca udzéjaruꞌ idú ládxiꞌruꞌ.
13 Zxíꞌininu nigula zxiluꞌ,
nigula rö queëꞌ Dios,
tuꞌgápabiꞌ Dios liꞌ .
¡Caꞌ gaca!