DÍDZAꞌDOꞌ BUNNI BUZÚAJËꞌ JUAN
Le naca tsahuiꞌ runëꞌ bönniꞌ lëꞌ Gayo
1
Nedaꞌ,
bönniꞌ gula run chiꞌa bönachi queëꞌ Cristo,
rugapaꞌ Dios liꞌ,
Gayo dxiꞌi ladxiꞌ.
Nadxíꞌidaꞌ liꞌ tuꞌ núnbëꞌëruꞌ le naca idútë li.
2 Bö́chaꞌadoꞌ,
rinábidaꞌ-nëꞌ Dios gunëꞌ ga gaca dxiꞌa quiuꞌ lu yúguꞌtë le runuꞌ,
en suꞌ caꞌ dxiꞌa,
ca naꞌ raca dxiꞌa que böꞌ naca cazuꞌ.
3 Rudzéjadaꞌ tuꞌ taꞌdxinëꞌ yuguꞌ bö́chiꞌruꞌ ga zoaꞌ,
en tunëꞌ ba nalí quiuꞌ,
taꞌnnë́ꞌ nacuꞌ li ladxiꞌ,
en runuꞌ ca naca le naca idútë li.
4 Bitiꞌ bi dë le runrö ga rudzéjadaꞌ ca lë ni,
riyöndaꞌ tun nupa nácagaca ca biꞌi que cazaꞌ ca rnna le naca idútë li.
5 Bö́chaꞌadoꞌ,
runuꞌ le naca tsahuiꞌ,
rácalenuꞌ bö́chiꞌruꞌ,
en runuꞌ caꞌ le nácarö lesacaꞌ,
rácalenuꞌ bö́chiꞌruꞌ bitiꞌ núnbeꞌenuꞌ légaquiëꞌ.
6 Yuguꞌ bö́chiꞌruꞌ ni tunëꞌ ba nalí quiuꞌ lógaca bönachi queëꞌ Cristo ni,
taꞌguíxjöꞌë ca naꞌ nadxíꞌinuꞌ légaquiëꞌ.
Runuꞌ le naca dxiꞌa,
rugúꞌu légaquiëꞌ nöza,
en rácalenuꞌ légaquiëꞌ ca naꞌ saꞌyéaj gunuꞌ quégaca nupa tun xichinëꞌ Dios,
para uluꞌúꞌë nöza.
7 Légaquiëꞌ bilaꞌrúajëꞌ ni tuꞌ nadxíꞌigaquiëꞌ Jesús,
en bitiꞌ bi taꞌziꞌë lu náꞌagaca bönachi bitiꞌ taꞌdáꞌ Cristo.
8 Que lë ni naꞌ ral-laꞌ gunruꞌ bal bönachi tun caní,
para gúnlenruꞌ légaquiëꞌ dxin que le naca idútë li.
Le cabí naca tsahuiꞌ runëꞌ Diótrefes
9 Chibuzúajaꞌ lu guichi le uzéajniꞌi bönachi queëꞌ Cristo niꞌ,
pero Diótrefes,
bönniꞌ niꞌ raza ládxëꞌë gáquiëꞌ lo ládjagaquiëꞌ,
bitiꞌ runëꞌ netuꞌ bal.
10 Que lë ni naꞌ,
channö huidaꞌ ga zóaliꞌ,
usáꞌa ládxiꞌliꞌ cateꞌ udúbiliꞌ ca nácagaca le runëꞌ.
Rizíꞌ quídzëꞌë netuꞌ,
en rnnëꞌ queë́tuꞌ le cabí nácatë.
Bitiꞌ rizxö́n ládxëꞌë tsa lë nisö,
pero lëscaꞌ bitiꞌ runëꞌ bal bö́chiꞌruꞌ taꞌdxinëꞌ niꞌ,
ateꞌ ruzáguëꞌë xinö́zguequi nupa niꞌ të́ꞌëni ilún légaquiëꞌ bal,
en rubéajëꞌ nupa naꞌ ladaj bönachi queëꞌ Cristo.
11 Bö́chaꞌadoꞌ,
bitiꞌ gunuꞌ ca tun nupa tuaꞌ döꞌ,
pero ca tun nupa tun le naca tsahuiꞌ gunuꞌ.
Nu run le naca tsahuiꞌ nequi queëꞌ Dios,
pero nu ruáꞌ döꞌ catu caz benbëꞌ Dios.
Le naca tsahuiꞌ runëꞌ Demetrio
12 Yúguꞌtë bö́chiꞌruꞌ tunëꞌ ba nalí queëꞌ Demetrio,
ateꞌ naca bëꞌ runëꞌ le naca idútë li.
Lëscaꞌ netuꞌ runtuꞌ ba nalí queëꞌ,
ateꞌ nö́ziliꞌ nácatë lë ni runtuꞌ ba nalí queëꞌ.
Le rinabëꞌ Juan lahuëꞌ Dios
13 Ziánrö caꞌ le gúꞌunidaꞌ uzúajaꞌ quiuꞌ lu guichi,
pero bitiꞌ rë́ꞌëndaꞌ uzúajaꞌ le lu guíchisö.
14 Naꞌa,
runaꞌ löza iléꞌetedaꞌ liꞌ,
ateꞌ güíꞌiruꞌ didzaꞌ ruáꞌa cuinruꞌ.
15 Rinábidaꞌ-nëꞌ Dios gunëꞌ ga soa dxi icja ládxiꞌdoꞌo.
Nupa ni taꞌdxíꞌi rëꞌu tuꞌgapa Dios liꞌ.
Lëscaꞌ liꞌ,
bugapa Dios tu tu nupa niꞌ taꞌdxíꞌi rëꞌu.
¡Caꞌ gaca!