DÍDZAꞌDOꞌ BUZÚAJËꞌ JUDAS
Judas rugapëꞌ Dios nupa nulidzëꞌ Dios
1
Nedaꞌ,
Judas,
tsaz nacaꞌ huen dxin queëꞌ Jesucristo,
en nacaꞌ caꞌ bö́chëꞌë Jacobo.
Rugapaꞌ Dios libíꞌiliꞌ,
nulidzëꞌ Dios Xuz libíꞌiliꞌ,
en nadxíꞌinëꞌ libíꞌiliꞌ,
en rapa chiꞌë libíꞌiliꞌ tuꞌ nácaliꞌ tuz len Jesucristo.
2 Rë́ꞌëndaꞌ inö́ziliꞌ ca ruhuéchiꞌdaꞌ ládxëꞌë Dios libíꞌiliꞌ,
en nadxíꞌideꞌenëꞌ libíꞌiliꞌ,
encaꞌ ruzóadëꞌë dxi icja ládxiꞌdoꞌoliꞌ.
Nupa tuꞌsedi le cabí nácatë
3 Libíꞌiliꞌ,
böchiꞌ luzáꞌadoꞌ,
gúcadaꞌ ládxaꞌa uzúajaꞌ queë́liꞌ lu guichi ca naca yöl-laꞌ rusölá nadéliꞌruꞌ,
pero run bayudxi uchíziaꞌ icja nágaliꞌ para idú ládxiꞌliꞌ tíl-lalenliꞌ nupa taꞌdáꞌbagaꞌ le réajlëꞌëruꞌ-nëꞌ Dios,
lë naꞌ budödëꞌ Dios tsaz lu náꞌagaca nupa néquiguequi quez queëꞌ para uluꞌzë́ didzaꞌ que lógaca yúguꞌtë bönachi.
4 Caní run bayudxi gunaꞌ tuꞌ bagáchiꞌsö chigulaꞌyázalenëꞌ bal-lëꞌ bönniꞌ rëꞌu,
Dios buzóëꞌ quégaquiëꞌ dza niꞌte ichúguiëꞌ quégaquiëꞌ ilaꞌnítiëꞌ tsaz.
Bitiꞌ taꞌyéaj ládxiꞌgaquiëꞌ Dios bönniꞌ caní.
Tuꞌ zoa le ruzáꞌ ládxëꞌë Dios queë́ruꞌ,
téquinëꞌ huáca ilunëꞌ le ruáꞌ döꞌ.
Taꞌdáꞌbaguëꞌë Xanruꞌ Jesucristo.
Tuzëꞌ Lëꞌ rinná béꞌenëꞌ rëꞌu.
5 Chinö́z quéziliꞌ lë ni,
pero rë́ꞌëndaꞌ usáꞌa ládxiꞌliꞌ ca benëꞌ Xanruꞌ Dios.
Sal-laꞌ busölë́ꞌ bönachi Israel cateꞌ bubéajëꞌ léguequi luyú Egipto,
gudödi niꞌ busunítiëꞌ nupa bítsaꞌgaca ládjaguequi,
en bitiꞌ gulaꞌyéajlëꞌ Lëꞌ.
6 Lëscaꞌ caní,
yuguꞌ gubáz láꞌayi queëꞌ Dios,
nupa niꞌ bitiꞌ gulún xichíngaquiëꞌ,
pero buluꞌcáꞌanëꞌ xilátjagaquiëꞌ,
Dios busayjëꞌ légaquiëꞌ tu lataj chul-la.
Nágaꞌgaquiëꞌ tsaz niꞌ ga idxinrö dza usiúdxëꞌ Dios yödzölió ni.
7 Lëscaꞌ caní guca quégaca yödzö Sodoma,
en yödzö Gomorra,
encaꞌ yuguꞌ yödzö dzágagaca léguequi.
Ca naꞌ gulunëꞌ gubáz láꞌayi naꞌ,
gulaꞌdáꞌbaguëꞌë Dios,
lëscaꞌ caní gulunëꞌ bönniꞌ yuguꞌ lu yödzö naꞌ.
Buluꞌdödi cuíngaquiëꞌ para gulunëꞌ le ruáꞌ döꞌ,
en le gulaꞌzësö ládxiꞌgaquiëꞌ le tun ga nu rutuíꞌi.
Naꞌa,
tuꞌ busacaꞌ ziꞌë Dios légaquiëꞌ lu guíꞌ le cabirö ulu,
lë naꞌ guca quégaquiëꞌ naca tu le run gadxi yúguꞌtëruꞌ,
para cabí gunruꞌ laꞌ lë́bisö.
8 Sal-laꞌ gulaca lë ni,
laꞌ canísö tunëꞌ bönniꞌ ni,
bönniꞌ röjácalenëꞌ yëla taꞌnénëꞌ.
Tun dítjanëꞌ idútë le naca cazëꞌ.
Taꞌdáꞌbaguëꞌë le rinná béꞌenëꞌ Dios rëꞌu,
en taꞌnnë́ ziꞌë quégaca nupa taꞌnná bëꞌ yehuaꞌ yubá.
9 Miguel caz,
gubáz láꞌayi lo,
cateꞌ gudíl-lalenëꞌ tuꞌ xihuiꞌ para gaca uꞌë idú le naca cazëꞌ Moisés,
bitiꞌ burúguinëꞌ udxíëꞌ döꞌ tuꞌ xihuiꞌ naꞌ,
pero gudxëꞌ le:
“Xanruꞌ uzenëꞌ liꞌ bach.”
10 Yuguꞌ bönniꞌ ni taꞌnnë́ ziꞌë quégaca le runëꞌ Dios,
yuguꞌ le bitiꞌ taꞌyéajniꞌinëꞌ,
ateꞌ yuguꞌ le taꞌyéajniꞌinëꞌ rácasö quégaquiëꞌ ca naꞌ tunbaꞌ böaꞌ guixiꞌ bitiꞌ taꞌyéajniꞌibaꞌ,
lë ni tuꞌgunëꞌ dxin,
en caní tuꞌdxía döꞌ cuíngaquiëꞌ.
11 Bicaꞌ bayechiꞌ légaquiëꞌ tuꞌ chigulunëꞌ dul-laꞌ ca naꞌ benëꞌ Caín,
ateꞌ lu yöl-laꞌ ruhuidiꞌ quégaquiëꞌ chigulaꞌchixi gulaꞌníguinëꞌ ca naꞌ guchixi guníguinëꞌ Balaam para siꞌë dumí,
ateꞌ chinarugu quégaquiëꞌ ilátiëꞌ ca naꞌ gútiëꞌ Coré cateꞌ gudáꞌbaguiëꞌ Moisés.
12 Yuguꞌ bönniꞌ ni tágulenëꞌ tsözxö́n libíꞌiliꞌ cateꞌ ráguliꞌ yuguꞌ güíꞌi huagu lu yöl-laꞌ nadxíꞌi queë́liꞌ.
Tunëꞌ ga taꞌchixi taꞌnigui nupa dzágagaca libíꞌiliꞌ,
tuꞌ tëꞌaj tagu lizëꞌ.
Nácagaquiëꞌ ca yuguꞌ bönniꞌ ral-laꞌ uluꞌgágugaquiëꞌ-baꞌ böꞌcuꞌ zxilaꞌ,
pero laꞌ cuíngacasëꞌ tuꞌgahuëꞌ.
Nácagaquiëꞌ ca böaj lúzxiba bitiꞌ nachë́ꞌgaca nisa,
ateꞌ ruáꞌ böꞌ léguequi náꞌalö níꞌilö.
Nácagaquiëꞌ caꞌ ca yuguꞌ yaga chibidxín dza bi ilaꞌbía,
pero bitiꞌ bi taꞌbía.
Nácagaquiëꞌ caꞌ ca yuguꞌ yaga chigulaꞌbidxi idú luí,
en chinaládzuꞌgaca.
13 Nácagaquiëꞌ caꞌ ca nísadoꞌ cateꞌ riyasa ridxía,
ateꞌ ribö́ꞌ bidxinaꞌ que,
lë naꞌ ruluíꞌi ca naca yöl-laꞌ stuꞌ tunëꞌ.
Nácagaquiëꞌ ca yuguꞌ bölaj lúzxiba nucáꞌanagacabaꞌ xinö́zgacabaꞌ.
Dios chinunëꞌ quégaquiëꞌ ilaꞌyáziëꞌ tsaz lataj chul-la.
14 Ca naca quégaquiëꞌ bëꞌë caꞌ didzaꞌ Enoc uláz queëꞌ Dios.
Enoc naꞌ gúquiëꞌ tu bönniꞌ gubábalenëꞌ le igadxi cöꞌ zxíꞌini xiꞌsóëꞌ Adán.
Gunnë́ꞌ:
“Buliꞌyútsöcaꞌ,
zëꞌë Xanruꞌ,
ateꞌ dzágagaca Lëꞌ zián gayuáꞌ bönachi néquiguequi quez queëꞌ.
15 Zëꞌë para gunëꞌ xíguiaꞌ yúguꞌtë bönachi,
en ichúguiëꞌ quégaca yúguꞌtë nupa tuaꞌ döꞌ ilaꞌniti tsaz.”
Caní gunëꞌ tuꞌ nözi yúguꞌtë didzaꞌ ziꞌ gulaꞌnnë́ꞌ bönniꞌ dul-laꞌ naꞌ queëꞌ Lëꞌ.
16 Yuguꞌ bönniꞌ caní taꞌnnë́ꞌ queëꞌ,
en taꞌzíꞌ quídzëꞌë,
en tunëꞌ ca naca le taꞌzësö ládxiꞌgaquiëꞌ.
Tuꞌë didzaꞌ lu yöl-laꞌ run ba zxön cuíngaquiëꞌ,
en para uluꞌziꞌë xibéguequi,
tuꞌë didzaꞌ le taꞌgúꞌu bönachi yöl-laꞌ zxön.
Judas rusë́ꞌë ládxiꞌgaca nupa taꞌyéajlëꞌ Cristo
17 Naꞌa,
böchiꞌ luzáꞌadoꞌ,
guliꞌtsöjné yuguꞌ didzaꞌ guluꞌë bönniꞌ gubáz queëꞌ Xanruꞌ Jesucristo dza niꞌte.
18 Yuguꞌ bönniꞌ naꞌ gulë́ꞌ libíꞌiliꞌ:
“Yuguꞌ dza tsöjsétëgaca uluꞌluíꞌi lógaquiëꞌ bönniꞌ uluꞌtitjëꞌ le naca láꞌayi,
en ilunëꞌ ca naca le taꞌzësö ládxiꞌgaquiëꞌ le ruáꞌ döꞌ.”
19 Yuguꞌ bönniꞌ ni tunëꞌ ga irúajliꞌ choplö.
Tuꞌë didzaꞌ lu yöl-laꞌ bönáchisö quégaquiëꞌ,
en bitiꞌ zóalenëꞌ Dios Böꞌ Láꞌayi légaquiëꞌ.
20 Naꞌa,
böchiꞌ luzáꞌadoꞌ,
guliꞌsóa tsutsu lu yöl-laꞌ réajlëꞌ queë́liꞌ Dios le naca idú láꞌayi.
Buliꞌlidzëꞌ Dios,
ugunliꞌ dxin yöl-laꞌ huáca queëꞌ Dios Böꞌ Láꞌayi.
21 Buliꞌgáꞌanalenëꞌ Dios,
Nu nadxíꞌi rëꞌu,
en guliꞌcöza dza niꞌ uluíꞌi lahuëꞌ Xanruꞌ Jesucristo,
Nu ruhuéchiꞌ ládxëꞌë rëꞌu para gataꞌ yöl-laꞌ naꞌbán idú queë́ruꞌ.
22 Guliꞌgún ga ilaꞌdipa ládxiꞌgaca nupa raca chopa ládxiꞌgaca.
23 Guliꞌgún ga uluꞌlë́ꞌ,
le gaca tsca ubéajliꞌ légaquiëꞌ lu guíꞌ.
Lu yöl-laꞌ radxi queë́liꞌ buliꞌhuéchiꞌ ládxiꞌliꞌ iaꞌzícaꞌrö bönachi.
Guliꞌgún chiꞌi cuinliꞌ,
para cabí gunliꞌ tsözxö́n légaquiëꞌ,
en cabí gútsaꞌliꞌ le ruáꞌ döꞌ tunëꞌ.
Le rigúꞌuruꞌ Dios yöl-laꞌ zxön
24,25 Dios laꞌs dui, Nu nözi caz yúguꞌtë, en Nu busölá rëꞌu niꞌa que le benëꞌ Xanruꞌ Jesucristo, napëꞌ yöl-laꞌ huáca gun chiꞌë libíꞌiliꞌ, para cabí ichixi iníguiliꞌ, en usudxinëꞌ libíꞌiliꞌ lahuëꞌ Lëꞌ ga zoëꞌ lu beníꞌ idú. Gunëꞌ ga gácaliꞌ idú tsahuiꞌ, en ga udzéjadeꞌeliꞌ. ¡Gaca caz queëꞌ Dios yöl-laꞌ ba, en yöl-laꞌ zxön, en yöl-laꞌ naca lo, en yöl-laꞌ unná bëꞌ, naꞌa dza, en yúguꞌtë dza záꞌgaca! ¡Caꞌ gaca!