LE BULUÍꞌINËꞌ DIOS JUAN
Apocalipsis
Le buluꞌe lahui Dios ca naca queëꞌ Jesucristo
1
Lë ni naca le buluꞌe lahui Jesucristo,
le bëꞌë Lëꞌ lataj Dios uluíꞌinëꞌ yuguꞌ huen dxin queëꞌ ca naca le run bayudxi ilácatë.
Jesucristo gusö́l-lëꞌë tuëꞌ gubáz láꞌayi queëꞌ,
nu naꞌ buzéajniꞌi nedaꞌ,
Juan,
huen dxin queëꞌ Cristo.
Gubáz láꞌayi naꞌ buluíꞌinëꞌ nedaꞌ ca naca lë ni.
2 Nedaꞌ,
Juan,
ruzúajaꞌ lu guichi ni le naca idútë li ca naca yúguꞌtë le biléꞌedaꞌ,
en runaꞌ ba nalí que xtídzëꞌë Dios,
en que le benëꞌ ba nalí Jesucristo.
3 Bicaꞌ ba nu ulaba didzaꞌ ni,
ateꞌ bicaꞌ bágaca nupa uluꞌzë́ nágagaca nu naꞌ ulaba xtídzëꞌë Dios ni,
en ilún ca rnna lë ni nazúaj lu guichi,
tuꞌ chizóa gaca.
Juan ruzúajëꞌ le uzéajniꞌi gadxi cöꞌ bönachi queëꞌ Cristo
4 Nedaꞌ,
Juan,
ruzúajaꞌ lu guichi didzaꞌ ni le uzéajniꞌi gadxi cöꞌ bönachi queëꞌ Cristo nacuáꞌ luyú Asia.
Dios,
Bönniꞌ zoa cazëꞌ,
en guzóaticaꞌsëꞌ,
en ral-laꞌ huödëꞌ,
rinábidaꞌ-nëꞌ uzáꞌ ládxëꞌë queë́liꞌ,
en gunëꞌ ga cöꞌö dxi icja ládxiꞌdoꞌoliꞌ,
ateꞌ dzágagaca gadxi böꞌ Lëꞌ nacuáꞌ lahuëꞌ Lëꞌ ga niꞌ röꞌë rinná bëꞌë.
5 Dzáguiëꞌ caꞌ Jesucristo Lëꞌ.
Jesús ni runëꞌ ca rnnëꞌ,
en runëꞌ ba nalí queëꞌ Dios.
Zíꞌalö Lëꞌ bubanëꞌ tsaz lu yöl-laꞌ guti,
en rinná béꞌenëꞌ bönniꞌ taꞌnná bëꞌë yödzölió ni.
Lëꞌ nadxíꞌinëꞌ rëꞌu,
en gudibëꞌ rëꞌu,
tuꞌ bugǘëꞌ dul-laꞌ nabágaꞌruꞌ len xichönëꞌ le bulaljëꞌ lëꞌe yaga cruz,
cateꞌ gútiëꞌ uláz queë́ruꞌ.
6 Jesucristo benëꞌ ga rinná bë́ꞌëruꞌ,
en ga nácaruꞌ yuguꞌ bixúz,
para cúꞌuruꞌ-nëꞌ Dios,
Xuzëꞌ Jesús,
yöl-laꞌ ba.
¡Yöl-laꞌ ba Lëꞌ,
en gácaticaꞌsö queëꞌ yöl-laꞌ unná bëꞌ!
¡Caꞌ gaca!
7 ¡Buliꞌyútsöcaꞌ!
¡Zëꞌë Cristo lu böaj lúzxiba!
¡Ilaꞌléꞌe Lëꞌ yúguꞌtë bönachi,
encaꞌ nupa niꞌ gulún Lëꞌ huëꞌ,
en bë́tigaca Lëꞌ!
¡Ilaꞌbödxi yechiꞌ yúguꞌtë bönachi yödzölió ni cateꞌ ilaꞌléꞌe Lëꞌ!
¡Laꞌtuꞌ gácatë caní!
¡Caꞌ gaca!
8 Caní rnnëꞌ Lëꞌ:
“Nedaꞌ nacaꞌ Bönniꞌ zoëꞌ zíꞌalö,
encaꞌ Bönniꞌ röjsétiëꞌ ca naca le risí lo,
en le ruúdxitë.”
Caní rnnëꞌ Xanruꞌ,
Bönniꞌ napa cazëꞌ yöl-laꞌ huáca.
¡Zoa cazëꞌ Lëꞌ,
en guzóaticaꞌsëꞌ,
en siꞌ ulë́ꞌë!
Riléꞌenëꞌ Juan yöl-laꞌ zxön queëꞌ Jesucristo
9 Nedaꞌ,
Juan,
nacaꞌ böchiꞌ luzáꞌaliꞌ,
en tsözxö́n riguíꞌi rizácaꞌlenaꞌ libíꞌiliꞌ,
en tsözxö́n len libíꞌiliꞌ ruziꞌa xibé le rinná bëꞌë Dios,
en nadéliꞌdaꞌ yöl-laꞌ riböza zxön ladxiꞌ naꞌ runnëꞌ Jesucristo queë́ruꞌ.
Nadzunaꞌ tu luyú bidxi ni gatsaj láhuiꞌlö nísadoꞌ,
nazíꞌi le Patmos.
Nadzunaꞌ tuꞌ benaꞌ libán que xtídzëꞌë Dios,
en tuꞌ benaꞌ ba nalí queëꞌ Jesucristo.
10 Lu dza láꞌayi queëꞌ Xanruꞌ,
guzóalenëꞌ Dios Böꞌ Láꞌayi nedaꞌ,
ateꞌ biyöndaꞌ cúdzuꞌlaꞌ chiꞌë tu bönniꞌ rulidzëꞌ zidzaj.
Biyö́n chiꞌë ca ribödxi lúzubaꞌ böaꞌ bëdxi.
11 Bönniꞌ ni gudxëꞌ nedaꞌ:
“Nedaꞌ nacaꞌ Bönniꞌ zoëꞌ zíꞌalö,
en Bönniꞌ röjsétiëꞌ ca naca le risí lo,
en le ruúdxitë.
Buzúaj lu guichi le riyönnuꞌ,
en riléꞌenuꞌ,
ateꞌ gusö́l-laꞌ le quéguequi gadxi cöꞌ bönachi quiaꞌ nacuáꞌ luyú Asia,
nupa nacuáꞌ:
Lu yödzö Éfeso,
lu yödzö Esmirna,
lu yödzö Pérgamo,
lu yödzö Tiatira,
lu yödzö Sardis,
lu yödzö Filadelfia,
lu yödzö Laodicea.”
12 Buécjaꞌ para iléꞌedaꞌ Bönniꞌ naꞌ rulidzëꞌ nedaꞌ.
Cateꞌ buécjaꞌ,
biléꞌedaꞌ gadxi le nuáꞌgaca guíꞌ le néquiguequini oro.
13 Ladaj gadxi le nuáꞌgaca guíꞌ naꞌ biléꞌedaꞌ tu Bönniꞌ rinë́ꞌë ca tu bönniꞌ.
Nácuëꞌ tu lariꞌ tunna le ridxín xiniꞌë,
en luchuꞌë nasíëꞌ tu le néquini oro.
14 Chiguíchidoꞌos naca guitsaꞌ icjëꞌ ca naca zxilaꞌ o ca rináꞌ böguiꞌ,
ateꞌ rëpi yösa beníꞌ guiö́j lahuëꞌ ca guíꞌ.
15 Rëpi yösa beníꞌ niꞌë ca guíë bronce dxílidoꞌ,
le nudzéꞌedaꞌ lu guíꞌ ca boꞌ yalaj.
Zidzaj biyö́n chiꞌë ca riyö́n tu yegu zxön.
16 Lu nëꞌë ibëla zxóagacabaꞌ gadxi bölaj beníꞌ,
ateꞌ rirúaj didzaꞌ ruꞌë le naca ca tu guíë tuchiꞌ natuchiꞌ iropa laꞌa.
Rëpi yösa beníꞌ lahuëꞌ ca gubidza cateꞌ rudzáꞌa.
17 Cateꞌ biléꞌedaꞌ Lëꞌ gudzöꞌa xiniꞌë ca tu bönniꞌ nati.
Níꞌirö Lëꞌ guxóa nëꞌë nedaꞌ len nëꞌë ibëla,
en gudxëꞌ nedaꞌ:
“Bitiꞌ gádxinuꞌ.
Nedaꞌ nacaꞌ Bönniꞌ zoëꞌ zíꞌalö,
en röjsétiëꞌ.
18 Nacaꞌ Nu nabán caz.
Gútiaꞌ,
ateꞌ naꞌa zóatícaꞌsaꞌ nabanaꞌ.
Dë lu naꞌa inná béꞌedaꞌ yöl-laꞌ guti,
en lataj ga nacuáꞌ nupa nátigaca.
19 Buzúaj lu guichi lë naꞌ chibiléꞌenuꞌ,
en le raca naꞌa,
encaꞌ le ral-laꞌ gaca tödi naꞌa.
20 Lë ni naca le nagachiꞌ ca naca quégacabaꞌ gadxi bölaj beníꞌ naꞌ biléꞌenuꞌ zxóagacabaꞌ lu naꞌa ibëla,
en ca naca gadxi le nuáꞌgaca guíꞌ le néquiguequini oro.
Gadxi bölaj beníꞌ naꞌ saꞌyéajgacabaꞌ gadxi gubáz quégaca gadxi cöꞌ bönachi quiaꞌ,
ateꞌ gadxi le nuáꞌgaca guíꞌ naꞌ saꞌyéajgaca gadxi cöꞌ bönachi quiaꞌ naꞌ.”