Ca gaca idéliꞌruꞌ lu le raca queë́ruꞌ yödzölió ni
5
Nútiꞌtës bönniꞌ réajlëꞌë Jesús náquiëꞌ Cristo,
náquiëꞌ zxíꞌinëꞌ Dios,
ateꞌ nútiꞌtës bönniꞌ nadxíꞌinëꞌ Dios Nu buzóa lëꞌ,
ral-laꞌ idxíꞌinëꞌ caꞌ luzë́ꞌë nu naca biꞌi queëꞌ Dios.
2 Caní réquibeꞌeruꞌ nadxíꞌiruꞌ yuguꞌ biꞌi queëꞌ Dios.
Naca caní channö nadxíꞌiruꞌ-nëꞌ Dios,
en runruꞌ ca rinná béꞌenëꞌ rëꞌu.
3 Caní naca bëꞌ nadxíꞌiruꞌ-nëꞌ Dios.
Naca caní channö runruꞌ ca rinná béꞌenëꞌ rëꞌu,
ateꞌ lë naꞌ rinná béꞌenëꞌ rëꞌu bitiꞌ naca böniga.
4 Nútiꞌtës bönniꞌ náquiëꞌ biꞌi queëꞌ Dios ridéliꞌnëꞌ lu le raca yödzölió ni.
Chibidéliꞌruꞌ lu le raca yödzölió tuꞌ réajlëꞌëruꞌ-nëꞌ Dios.
5 ¿Nuzxi naꞌ rideliꞌ lu le raca yödzölió?
Run caní nu réajlëꞌ náquiëꞌ Jesús Zxíꞌinëꞌ Dios.
Dios Böꞌ Láꞌayi runëꞌ ba nalí queëꞌ Cristo
6 Caní blëꞌë Jesucristo.
Bidëꞌ bidilëꞌ nisa,
en bulaljëꞌ xichönëꞌ.
Calë́gasö bidilëꞌ nisa,
pero lëscaꞌ bulaljëꞌ xichönëꞌ.
Dios Böꞌ Láꞌayi náquiëꞌ Nu run ba nalí queëꞌ,
tuꞌ naca idútë li didzaꞌ ruꞌë Dios Böꞌ Láꞌayi.
7 Tsonna nupa tun ba nalí queëꞌ Jesús yehuaꞌ yubá niꞌ,
Dios Xuz,
en Dios Zxíꞌini,
lëꞌ caꞌ Didzaꞌ,
en Dios Böꞌ Láꞌayi.
Yonnëꞌ ni nácagaquiëꞌ tuz.
8 Lëscaꞌ caní,
tsonna le tun ba nalí queëꞌ luyú ni,
ca naꞌ zóalenëꞌ Dios Böꞌ Láꞌayi Lëꞌ,
en le bidilëꞌ Jesús nisa,
en rön niꞌ bulaljëꞌ lëꞌe yaga cruz,
ateꞌ yonna ni,
tuz ca taꞌnná.
9 Channö siꞌ lu náꞌaruꞌ le tun ba nalí bönachi,
le runëꞌ ba nalí Dios nácatërö lesacaꞌ.
Lë naꞌ benëꞌ ba nalí Dios naca le benëꞌ ba nalí queëꞌ Jesús,
gunnë́ꞌ náquiëꞌ Zxíꞌini cazëꞌ.
10 Nu réajlëꞌ Zxíꞌinëꞌ Dios,
nazíꞌ lu nëꞌe le nunëꞌ ba nalí Dios.
Nu cabí réajlëꞌ Dios,
naca ca rnna nu naꞌ:
Dios rizíꞌ yëꞌë.
Caní naca,
tuꞌ cabí guyéajlëꞌ le benëꞌ ba nalí Dios queëꞌ Zxíꞌinëꞌ.
11 Lë ni naca le benëꞌ ba nalí Dios.
Gunnë́ꞌ chibennëꞌ yöl-laꞌ naꞌbán idú queë́ruꞌ,
ateꞌ Zxíꞌinëꞌ naꞌ náquiëꞌ Nu nabániruꞌ caní.
12 Nu bönniꞌ zóalenëꞌ Zxíꞌinëꞌ Dios lëꞌ,
dë yöl-laꞌ naꞌbán idú queëꞌ.
Nu bönniꞌ bitiꞌ zóalenëꞌ Zxíꞌinëꞌ Dios lëꞌ,
bitiꞌ dë yöl-laꞌ naꞌbán idú queëꞌ.
Ca nö́ziruꞌ dë yöl-laꞌ naꞌbán idú queë́ruꞌ
13 Libíꞌiliꞌ naꞌ réajlëꞌëliꞌ-nëꞌ Zxíꞌinëꞌ Dios,
ruzúajaꞌ queë́liꞌ lu guichi lë ni para inö́ziliꞌ chidë́ yöl-laꞌ naꞌbán idú queë́liꞌ,
en para gaca idú ca réajlëꞌëliꞌ-nëꞌ Zxíꞌinëꞌ Dios.
14 Lë ni naca le ruzxöni ládxiꞌruꞌ Lëꞌ.
Channö bi inábiruꞌ Lëꞌ ca rë́ꞌënëꞌ Lëꞌ,
Lëꞌ riyönnëꞌ rëꞌu.
15 Channö nö́ziruꞌ riyönnëꞌ rëꞌu ca naca bi rinábiruꞌ Lëꞌ,
nö́ziruꞌ caꞌ ideliꞌ quéziruꞌ lë naꞌ rinábaruꞌ.
16 Channö iléꞌeruꞌ böchiꞌ luzáꞌaruꞌ runëꞌ dul-laꞌ le cabí nachë́ꞌ yöl-laꞌ guti,
ral-laꞌ inábaruꞌ queëꞌ lahuëꞌ Dios,
ateꞌ Lëꞌ unödzjëꞌ yöl-laꞌ naꞌbán queëꞌ.
Caní rnníaꞌ:
Ral-laꞌ inábaliꞌ quégaca nupa tun dul-laꞌ le cabí nachë́ꞌ yöl-laꞌ guti.
Dë dul-laꞌ le nachë́ꞌ yöl-laꞌ guti.
Bitiꞌ rnníaꞌ inábaliꞌ que nu run dul-laꞌ caní.
17 Yúguꞌtë le cabí naca tsahuiꞌ naca dul-laꞌ,
pero dë dul-laꞌ le cabí nachë́ꞌ yöl-laꞌ guti.
18 Nö́ziruꞌ bitiꞌ rúnticaꞌsö dul-laꞌ nu naca zxíꞌinëꞌ Dios,
tuꞌ rapa chiꞌë Zxíꞌini cazëꞌ Dios nu naꞌ,
ateꞌ tuꞌ xihuiꞌ bitiꞌ sequiꞌ bi gun que.
19 Nö́ziruꞌ yúꞌuruꞌ lu nëꞌë Dios,
ateꞌ yúguꞌtë bönachi tuíꞌi ládxiꞌgaca le dë yödzölió ni yúꞌugaca lu naꞌ tuꞌ xihuiꞌ.
20 Naꞌa,
nö́ziruꞌ chibidëꞌ Zxíꞌinëꞌ Dios,
en bennëꞌ yöl-laꞌ réajniꞌi queë́ruꞌ,
para gúnbëꞌëruꞌ Nu naꞌ naca idútë li.
Zóalenruꞌ Nu naꞌ naca idútë li tuꞌ zóalenruꞌ-nëꞌ Jesucristo,
Zxíꞌinëꞌ Dios.
Nu ni naca Dios idú,
en Nu runna yöl-laꞌ naꞌbán idú queë́ruꞌ.
21 Zxíꞌinaꞌdoꞌ,
guliꞌgún chiꞌi cuinliꞌ para cabí tseaj ládxiꞌliꞌ yuguꞌ budóꞌ guiö́j budóꞌ yaga.
¡Caꞌ gaca!