Le naca bëꞌ zóalenëꞌ Dios Böꞌ Láꞌayi rëꞌu
4
Böchiꞌ luzáꞌadoꞌ,
bitiꞌ tséajlëꞌëliꞌ nútiꞌtës bönniꞌ rnnëꞌ zóalenëꞌ Dios Böꞌ Láꞌayi lëꞌ,
pero guliꞌsíꞌ bëꞌ bönniꞌ naꞌ,
channö zóalenëꞌ Dios Böꞌ Láꞌayi lëꞌ,
tuꞌ taꞌdë́ꞌ zián bönniꞌ taꞌzíꞌ yëꞌë yödzölió ni.
Taꞌnnë́ꞌ tuꞌë didzaꞌ uláz queëꞌ Dios.
2 Caní gúnbëꞌëliꞌ-nëꞌ nu bönniꞌ zóalenëꞌ Dios Böꞌ Láꞌayi lëꞌ.
Nequi queëꞌ Dios bönniꞌ naꞌ rnnëꞌ yálajdoꞌ ca bidëꞌ Jesucristo,
Nu gusö́l-lëꞌë Dios,
rnnëꞌ guca cazëꞌ bönachi.
3 Lëscaꞌ caní,
bitiꞌ nequi queëꞌ Dios nu bönniꞌ bitiꞌ rnnëꞌ yalaj lulu ca bidëꞌ Jesucristo,
rnnëꞌ bitiꞌ guca cazëꞌ bönachi.
Bönniꞌ ni néquinëꞌ que nu naꞌ ridáꞌbagaꞌ Cristo,
bönniꞌ naꞌ chibiyö́niliꞌ ral-laꞌ guídëꞌ,
ateꞌ naꞌa chiridë́ꞌ yödzölió ni.
4 Zxíꞌinaꞌdoꞌ,
néquiliꞌ queëꞌ Dios,
en chibucúl-laliꞌ nupa naꞌ taꞌzíꞌ yëꞌ,
tuꞌ náparö Nu naꞌ zóalen libíꞌiliꞌ yöl-laꞌ huáca unná bëꞌ ca nu naꞌ ridá yödzölió ni.
5 Légaquiëꞌ nácagaquiëꞌ bönachi yödzölió.
Que lë ni naꞌ tuꞌë didzaꞌ que le naca que yödzölió,
ateꞌ bönachi yödzölió ni tuꞌzë́ nágagaca légaquiëꞌ.
6 Néquiruꞌ rëꞌu queëꞌ Dios.
Nu nunbëꞌ Dios ruzë́ nagui rëꞌu.
Nu bitiꞌ nequi queëꞌ Dios bitiꞌ ruzë́ nagui rëꞌu.
Caní núnbëꞌëruꞌ nu naꞌ yuꞌu le Böꞌ ruíꞌi didzaꞌ le naca idútë li,
encaꞌ nu naꞌ yuꞌu le tu böꞌ rizíꞌ yëꞌ.
Náljalen Dios yöl-laꞌ nadxíꞌi
7 Böchiꞌ luzáꞌadoꞌ,
ral-laꞌ idxíꞌiruꞌ luzáꞌaruꞌ,
tuꞌ náljalen Dios yöl-laꞌ nadxíꞌi,
ateꞌ nútiꞌtës nu nadxíꞌi luzë́ꞌe náljalen caꞌ Dios,
en núnbeꞌe Dios.
8 Nu bitiꞌ nadxíꞌi luzë́ꞌe,
bitiꞌ núnbeꞌe Dios,
tuꞌ náljalen Dios yöl-laꞌ nadxíꞌi.
9 Caní buluꞌe lahui Dios ca nadxíꞌinëꞌ rëꞌu,
gusö́l-lëꞌë laꞌs dui Zxíꞌini cazëꞌ yödzölió ni,
para gataꞌ yöl-laꞌ naꞌbán idú queë́ruꞌ niꞌa queëꞌ Lëꞌ.
10 Caní naca bëꞌ yöl-laꞌ nadxíꞌi idú,
calëga ca nadxíꞌiruꞌ-nëꞌ Dios,
pero ca naꞌ Lëꞌ bidxíꞌinëꞌ rëꞌu,
en gusö́l-lëꞌë Zxíꞌini cazëꞌ para gútiëꞌ,
en caní bugǘëꞌ dul-laꞌ nabágaꞌruꞌ.
11 Böchiꞌ luzáꞌadoꞌ,
channö caní bidxíꞌideꞌenëꞌ Dios rëꞌu,
lëscaꞌ rëꞌu ral-laꞌ idxíꞌiruꞌ luzáꞌaruꞌ.
12 Catu caz nu biléꞌe Dios,
pero channö nadxíꞌiruꞌ luzáꞌaruꞌ,
Dios zóalenëꞌ rëꞌu,
ateꞌ naca bëꞌ nadxíꞌiruꞌ-nëꞌ Dios idú ládxiꞌruꞌ.
13 Nö́ziruꞌ zóalenruꞌ-nëꞌ Dios,
ateꞌ Lëꞌ zóalenëꞌ rëꞌu,
tuꞌ guchíziëꞌ Dios Böꞌ Láꞌayi rëꞌu.
14 Netuꞌ biléꞌetuꞌ le benëꞌ Dios Xuz,
en runtuꞌ ba nalí que.
Lëꞌ gusö́l-lëꞌë Zxíꞌini cazëꞌ Nu rusölá bönachi yödzölió.
15 Nu bönniꞌ rnnëꞌ yálajdoꞌ náquiëꞌ Jesús Zxíꞌinëꞌ Dios,
Dios zóalen cazëꞌ bönniꞌ naꞌ,
ateꞌ lëꞌ zóalenëꞌ Dios.
16 Rëꞌu ni nö́ziruꞌ,
en réajlëꞌëruꞌ nadxíꞌinëꞌ Dios rëꞌu.
Yöl-laꞌ nadxíꞌi náljalen Dios,
ateꞌ nu bönniꞌ nadxíꞌinëꞌ luzë́ꞌë,
zóalenëꞌ bönniꞌ naꞌ Dios,
ateꞌ Dios zóalenëꞌ lëꞌ.
17 Caní run dxin yöl-laꞌ nadxíꞌi lu icja ládxiꞌdoꞌoruꞌ,
run ga bítiꞌrö rádxiruꞌ dza ichúguiëꞌ Dios quégaca bönachi ilátigaca.
Ca náquiëꞌ Jesús,
nácaruꞌ caꞌ rëꞌu yödzölió ni.
18 Channö nadxíꞌiruꞌ-nëꞌ Dios,
bitiꞌ bi gádxiruꞌ.
Cateꞌ nadxíꞌiruꞌ-nëꞌ Dios idú ládxiꞌruꞌ,
runëꞌ ga bitiꞌ rádxiruꞌ.
Nu radxi,
riguíꞌi rizácaꞌa.
Nu naꞌ radxi,
bitiꞌ nadxíꞌi Dios idú ladxiꞌ.
19 Rëꞌu ni nadxíꞌiruꞌ-nëꞌ Dios,
tuꞌ zíꞌalö bidxíꞌi quézinëꞌ Lëꞌ rëꞌu.
20 Channö nu inná:
“Nedaꞌ nadxíꞌidaꞌ-nëꞌ Dios”,
pero bitiꞌ riléꞌe dxiꞌa böchiꞌ luzë́ꞌe,
nu ni rizíꞌ yëꞌ.
Nu bitiꞌ nadxíꞌi böchiꞌ luzë́ꞌe nu riléꞌe caz,
¿nacxi caz gaca idxíꞌi Dios,
en catu caz biléꞌe Lëꞌ?
21 Caní gunná béꞌenëꞌ Jesús rëꞌu.
Gunnë́ꞌ:
Nu nadxíꞌi Dios,
ral-laꞌ idxíꞌi caꞌ böchiꞌ luzë́ꞌe.