Nupa nácagaca zxíꞌinëꞌ Dios
3
Buliꞌyú ca nadxíꞌideꞌenëꞌ Dios Xuz rëꞌu,
benëꞌ ga nazíꞌi laruꞌ zxíꞌinëꞌ Dios caz.
Que lë ni naꞌ bönachi yödzölió ni bitiꞌ caꞌ núnbëꞌgaca le nácaruꞌ,
tuꞌ cabí gulúnbeꞌe Jesús.
2 Böchiꞌ luzáꞌadoꞌ,
naꞌa chinácaruꞌ zxíꞌinëꞌ Dios,
en bitiꞌ naca béꞌeni le ral-laꞌ gácaruꞌ.
Nö́ziruꞌ cateꞌ uluíꞌi lahuëꞌ Jesús,
gácaruꞌ ca náquiëꞌ Lëꞌ,
ateꞌ iléꞌeruꞌ-nëꞌ catëz náquiëꞌ Lëꞌ.
3 Nútiꞌtës nu run löza gaca ca náquiëꞌ Jesús,
ruíꞌi ladxiꞌ nu naꞌ gaca dxiꞌa ca naꞌ náquiëꞌ Jesús dxiꞌa.
4 Nútiꞌtës nu run dul-laꞌ riguitsaj xibá queëꞌ Dios,
tuꞌ naca dul-laꞌ le riguitsaj xibá.
5 Nö́ziliꞌ buluíꞌi lahuëꞌ Jesús para bugǘëꞌ dul-laꞌ nabágaꞌruꞌ,
en bitiꞌ bi dul-laꞌ runëꞌ Lëꞌ.
6 Nútiꞌtës nu dzaga Lëꞌ bitiꞌ run dul-laꞌ.
Nútiꞌtës nu run dul-laꞌ catu caz biléꞌe Jesús,
en bitiꞌ núnbeꞌe Lëꞌ.
7 Zxíꞌinaꞌdoꞌ,
guliꞌgún chiꞌi cuinliꞌ para cabí nu siꞌ yeꞌe libíꞌiliꞌ.
Nu run le naca tsahuiꞌ,
naca tsahuiꞌ nu naꞌ ca naꞌ náquiëꞌ Jesús tsahuiꞌ.
8 Nu rúnticaꞌsö dul-laꞌ nequi que tuꞌ xihuiꞌ,
tuꞌ run dul-laꞌ tuꞌ xihuiꞌ dza niꞌte.
Que lë ni naꞌ buduluíꞌi lahuëꞌ Zxíꞌinëꞌ Dios,
para usunítiëꞌ yuguꞌ le nun tuꞌ xihuiꞌ.
9 Nútiꞌtës nu naca zxíꞌinëꞌ Dios bitiꞌ rúnticaꞌsö dul-laꞌ,
tuꞌ zóalenticaꞌsö le guzxíꞌ lu nëꞌë Dios Xuz nu naꞌ.
10 Caní naca bëꞌ nupa nácagaca zxíꞌinëꞌ Dios,
en nupa nácagaca zxíꞌini tuꞌ xihuiꞌ.
Nútiꞌtës nu bitiꞌ run le naca tsahuiꞌ,
en bitiꞌ nadxíꞌi böchiꞌ luzë́ꞌe bitiꞌ nequi queëꞌ Dios.
Ral-laꞌ idxíꞌiruꞌ yuguꞌ bö́chiꞌruꞌ taꞌyéajlëꞌë Cristo
11 Lë ni naca didzaꞌ biyö́niliꞌ dza niꞌte,
le rnna:
Ral-laꞌ idxíꞌiruꞌ luzáꞌaruꞌ turuꞌ iaꞌturuꞌ.
12 Bitiꞌ ral-laꞌ gunruꞌ ca naꞌ benëꞌ Caín.
Gúquiëꞌ Caín que tuꞌ xihuiꞌ,
ateꞌ bë́tiëꞌ-biꞌ biꞌi bö́chëꞌë.
¿Bizx que bë́tiëꞌ-biꞌ biꞌi bö́chëꞌë?
Bë́tiëꞌ-biꞌ tuꞌ gulaca le benëꞌ Caín naꞌ le ruáꞌ döꞌ,
pero le benbiꞌ biꞌi bö́chëꞌë,
gulaca tsahuiꞌ.
13 Bö́chaꞌadoꞌ,
bitiꞌ ubániliꞌ channö cabí taꞌléꞌe bönachi yödzölió ni libíꞌiliꞌ dxiꞌa.
14 Nö́ziruꞌ chigudö́diruꞌ lu yöl-laꞌ guti,
en chidë́ yöl-laꞌ naꞌbán idú queë́ruꞌ tuꞌ nadxíꞌiruꞌ yuguꞌ bö́chiꞌruꞌ.
Nu bitiꞌ nadxíꞌi böchiꞌ luzë́ꞌe,
chinati caz nu naꞌ.
15 Nútiꞌtës nu bitiꞌ riléꞌe dxiꞌa böchiꞌ luzë́ꞌe,
naca huëti bönachi nu naꞌ,
ateꞌ nö́ziliꞌ nu ruti bönachi bitiꞌ dë yöl-laꞌ naꞌbán idú que.
16 Caní núnbëꞌëruꞌ yöl-laꞌ nadxíꞌi le naca idú.
Naca ca budödëꞌ Jesús yöl-laꞌ naꞌbán queëꞌ,
en gútiëꞌ uláz queë́ruꞌ.
Lëscaꞌ caní rëꞌu ral-laꞌ udö́diruꞌ yöl-laꞌ naꞌbán queë́ruꞌ,
para gácalenruꞌ yuguꞌ bö́chiꞌruꞌ.
17 Naꞌa,
nútiꞌtës nu dë yöl-laꞌ tsahuiꞌ que,
lë naꞌ dë yödzölió ni,
ateꞌ riléꞌe böchiꞌ luzë́ꞌe,
bi riyadzaj queëꞌ,
en bitiꞌ ruhuéchiꞌ ladxiꞌ lëꞌ,
bi unödzaj queëꞌ,
¿naruꞌ nadxíꞌitsö nu naꞌ Dios?
18 Libíꞌiliꞌ,
zxíꞌinaꞌdoꞌ,
ral-laꞌ idxíꞌiruꞌ luzáꞌaruꞌ,
calëga len dídzaꞌsö o lu yöl-laꞌ rinnësö queë́ruꞌ,
pero idú ládxiꞌruꞌ,
encaꞌ len idútë yöl-laꞌ run queë́ruꞌ ral-laꞌ idxíꞌiruꞌ luzáꞌaruꞌ.
Le runruꞌ löza lahuëꞌ Dios
19,20 Channö caní nadxíꞌiruꞌ yuguꞌ böchiꞌ luzáꞌaruꞌ, nö́ziruꞌ néquiruꞌ que Nu naꞌ naca idútë li, ateꞌ lahuëꞌ Dios huáca cöꞌ dxi icja ládxiꞌdoꞌoruꞌ channö ruxösa ládxiꞌdoꞌoruꞌ rëꞌu, tuꞌ rácadaꞌarëꞌ Dios ca ládxiꞌdoꞌoruꞌ, ateꞌ Lëꞌ nö́zinëꞌ yúguꞌtë.
21 Böchiꞌ luzáꞌadoꞌ,
channö cabí ruxösa ládxiꞌdoꞌoruꞌ rëꞌu,
dë le runruꞌ löza lahuëꞌ Dios
22 tuꞌ nö́ziruꞌ gunnëꞌ queë́ruꞌ bítiꞌtës bi inábaruꞌ lahuëꞌ.
Caní naca,
tuꞌ runruꞌ ca rinná bëꞌ xibá queëꞌ,
en le raza ládxëꞌë Lëꞌ.
23 Lë ni naca xibá queëꞌ,
para tséajlëꞌëruꞌ-nëꞌ Jesucristo,
Zxíꞌinëꞌ Dios,
en idxíꞌiruꞌ luzáꞌaruꞌ ca naꞌ chigunná béꞌenëꞌ rëꞌu.
24 Zóalen Dios nu run ca rinná bëꞌ xibá queëꞌ,
ateꞌ Dios caz zóalenëꞌ nu naꞌ.
Caní nö́ziruꞌ dzágaticaꞌsëꞌ Lëꞌ rëꞌu,
tuꞌ chigusö́l-lëꞌë Dios Böꞌ Láꞌayi queë́ruꞌ.