Cristo náquiëꞌ Nu rudödi xtídzaꞌruꞌ lahuëꞌ Dios
2
Libíꞌiliꞌ,
zxíꞌinaꞌdoꞌ,
ruzúajaꞌ queë́liꞌ lu guichi lë ni,
para cabí gunliꞌ dul-laꞌ.
Naꞌa,
channö nútiꞌtës nu gun dul-laꞌ,
zoa nu rudödi xtídzaꞌruꞌ lahuëꞌ Dios Xuz,
Lëꞌ Jesucristo,
Nu naca tsahuiꞌ.
2 Naca cazëꞌ Bönniꞌ budödi cuinëꞌ,
en gútiëꞌ para bugǘëꞌ dul-laꞌ nabágaꞌruꞌ lahuëꞌ Dios.
Calë́gasö gútiëꞌ para bugǘëꞌ dul-laꞌ nabágaꞌruꞌ rëꞌu,
pero gútiëꞌ caꞌ para bugǘëꞌ dul-laꞌ nabágaꞌgaca bönachi idútë yödzölió.
3 Channö runruꞌ ca naca le gunná béꞌenëꞌ rëꞌu,
nö́ziruꞌ chinúnbëꞌëruꞌ Lëꞌ.
4 Nu rnna:
“Nedaꞌ núnbëꞌa-nëꞌ Dios” pero bitiꞌ run ca rinná bëꞌ xibá queëꞌ,
nu ni rizíꞌ yëꞌ,
en bitiꞌ run le naca idútë li.
5 Nu run ca rnna xtídzëꞌë Dios,
le nácatë nadxíꞌi nu ni Dios ca ral-laꞌ gun.
Channö runruꞌ caní,
nö́ziruꞌ néquiruꞌ queëꞌ Dios.
6 Lëscaꞌ caní,
nu rnna:
“Nedaꞌ néquidaꞌ queëꞌ Cristo”,
ral-laꞌ gaca nu naꞌ ca naꞌ gúquiëꞌ Cristo cateꞌ gudë́ꞌ yödzölió ni.
Tu xibá cubi
7 Böchiꞌ luzáꞌadoꞌ,
ruzúajaꞌ queë́liꞌ lu guichi xibá ni.
Bitiꞌ naca tu xibá cubi,
pero xibá gula naꞌ,
le zóalen libíꞌiliꞌ dza niꞌte.
Xibá gula naꞌ naca didzaꞌ biyö́niliꞌ dza niꞌte.
8 Lëscaꞌ naca ca ruzúajaꞌ queë́liꞌ lu guichi tu xibá cubi,
lë naꞌ le nácatë benëꞌ Jesús ca rnna,
ateꞌ runliꞌ caꞌ libíꞌiliꞌ ca rnna,
tuꞌ chiridödi que le naca chul-la que dul-laꞌ,
ateꞌ beníꞌ idú chiruzeníꞌ.
9 Nu rnna:
“Zoaꞌ lu beníꞌ”,
pero bitiꞌ riléꞌe dxiꞌa böchiꞌ luzë́ꞌe,
nu ni ni run le naca chul-la que dul-laꞌ.
10 Nu nadxíꞌi böchiꞌ luzë́ꞌe zoa lu beníꞌ,
ateꞌ le run ga nu ichixi inigui bitiꞌ zóalen nu naꞌ.
11 Le naca chul-la que dul-laꞌ run ga nu bitiꞌ riléꞌe dxiꞌa böchiꞌ luzë́ꞌe,
en ga ridá nu naꞌ ga chul-la.
Bitiꞌ nözi ga zeaj,
tuꞌ run le naca chul-la naꞌ ga nachul-la naniti nu naꞌ .
12 Ruzúajaꞌ queë́liꞌ lu guichi,
zxíꞌinaꞌdoꞌ,
tuꞌ chibunít lahuëꞌ Dios dul-laꞌ nabágaꞌliꞌ,
tuꞌ runëꞌ le guzxíꞌ lu nëꞌë gunëꞌ.
13 Ruzúajaꞌ queë́liꞌ lu guichi,
libíꞌiliꞌ nácaliꞌ xuz,
tuꞌ núnbëꞌëliꞌ Nu naꞌ zoa caz dza niꞌte.
Ruzúajaꞌ queë́liꞌ lu guichi,
biꞌi raꞌbán,
tuꞌ chibucúl-laliꞌ tuꞌ xihuiꞌ.
14 Chibuzúajaꞌ queë́liꞌ lu guichi,
zxíꞌinaꞌdoꞌ,
tuꞌ núnbëꞌëliꞌ-nëꞌ Dios Xuz.
Chibuzúajaꞌ queë́liꞌ lu guichi,
libíꞌiliꞌ nácaliꞌ xuz,
tuꞌ núnbëꞌëliꞌ Nu naꞌ zoa caz dza niꞌte.
Chibuzúajaꞌ queë́liꞌ lu guichi,
biꞌi raꞌbán,
tuꞌ nácaliꞌ biꞌi nál-la,
en nazíꞌ lu náꞌaliꞌ xtídzëꞌë Dios,
en chibucúl-laliꞌ tuꞌ xihuiꞌ.
15 Bitiꞌ idxíꞌisiliꞌ yödzölió ni,
en calëga le dë yödzölió ni.
Channö zoa nu nadxíꞌi yödzölió,
bitiꞌ nadxíꞌi Dios Xuz.
16 Caní naca,
tuꞌ naca le tun bönachi yödzölió ni le cabí rë́ꞌënëꞌ Dios Xuz,
pero naca le të́ꞌëni bönachi yödzölió ni.
Tunëꞌ le riyaza ladxiꞌ yöl-laꞌ bönáchisö quégaquiëꞌ.
Tunëꞌ le ruáꞌ döꞌ le ridani guiö́j lógaquiëꞌ.
Tun ba zxön cuíngaquiëꞌ niꞌa que le dë quégaquiëꞌ.
Caní nácagaca le ruáꞌ döꞌ tunëꞌ.
17 Huadödi que yödzölió ni,
encaꞌ que le taꞌzë́ ládxiꞌgaca bönachi,
pero nu run ca rë́ꞌënëꞌ Dios sóaticaꞌsö.
Nu ruíꞌi didzaꞌ idútë li, en nu rizíꞌ yëꞌ
18 Zxíꞌinaꞌdoꞌ,
chizóaruꞌ dza údxi,
en ca naꞌ chibiyö́niliꞌ huidëꞌ bönniꞌ ridáꞌbáguëꞌë Cristo,
lëscaꞌ naꞌa chigusí lo nacuꞌë zián bönniꞌ taꞌdáꞌbaguëꞌë Cristo.
Que lë ni naꞌ nö́ziruꞌ chizóaruꞌ dza údxi.
19 Bilaꞌrúajëꞌ bönniꞌ caní ládjaruꞌ,
pero bitiꞌ guláquiëꞌ tuz len rëꞌu.
Laꞌtuꞌ guláquiëꞌ tuz len rëꞌu,
ilaꞌcuáꞌlenticaꞌsëꞌ rëꞌu.
Naꞌa,
bilaꞌrúajëꞌ para gaca bëꞌ bitiꞌ nácagaquiëꞌ yúguꞌtëꞌ tuz len rëꞌu.
20 Naꞌa,
Böꞌ Láꞌayi nagúꞌu Nu naca láꞌayi rëꞌu,
chizóalen libíꞌiliꞌ,
ateꞌ nöz quéziliꞌ yúguꞌtë.
21 Buzúajaꞌ queë́liꞌ lu guichi,
tuꞌ chinö́ziliꞌ le naca idútë li,
en calëga tuꞌ cabí nö́ziliꞌ le.
Nö́ziliꞌ caꞌ bitiꞌ caꞌ rizíꞌ yëꞌ nu nözi le naca idútë li.
22 ¿Nuzxi caz naꞌ nu rizíꞌ yëꞌ?
¿Naruꞌ cabí naca nu naꞌ ridáꞌbagaꞌ náquiëꞌ Jesús Nu gusö́l-lëꞌë Dios?
Naca nu ni bönniꞌ ridáꞌbaguëꞌë Cristo,
tuꞌ ridáꞌbaguëꞌë náquiëꞌ Dios Xuzëꞌ Jesús,
en ridáꞌbaguëꞌë caꞌ náquiëꞌ Jesús Zxíꞌinëꞌ Dios.
23 Nútiꞌtës nu ridáꞌbagaꞌ Dios Zxíꞌini,
bitiꞌ caꞌ zóalenëꞌ Dios Xuz nu naꞌ.
Nútiꞌtës nu rnna yálajdoꞌ Jesús náquiëꞌ Zxíꞌinëꞌ Dios,
lëscaꞌ zóalenëꞌ Dios Xuz nu naꞌ.
24 Naꞌa,
guliꞌgüíꞌ lataj le biyö́niliꞌ dza niꞌte ugáꞌanalenticaꞌsö libíꞌiliꞌ.
Channö le biyö́niliꞌ dza niꞌte ugáꞌanalenticaꞌsö libíꞌiliꞌ,
lëscaꞌ libíꞌiliꞌ ugáꞌanalenticaꞌsiliꞌ-nëꞌ Dios Zxíꞌini,
encaꞌ len Dios Xuz.
25 Le guzxíꞌ lu nëꞌë Dios naca lë ni:
Gunnë́ꞌ gunnëꞌ yöl-laꞌ naꞌbán idú queë́ruꞌ.
26 Chibuzúajaꞌ queë́liꞌ lu guichi lë ni ca naca quégaca nupa taꞌzíꞌ yeꞌe libíꞌiliꞌ.
27 Naꞌa,
zóalenëꞌ Dios Böꞌ Láꞌayi libíꞌiliꞌ.
Cristo gusö́l-lëꞌë Lëꞌ queë́liꞌ,
ateꞌ Lë cazëꞌ zóalenticaꞌsëꞌ libíꞌiliꞌ.
Que lë ni naꞌ bitiꞌ riquíniliꞌ nu usedi libíꞌiliꞌ,
tuꞌ chizóalen Nu naꞌ libíꞌiliꞌ,
en rusedi libíꞌiliꞌ.
Didzaꞌ idútë li ruꞌë Lëꞌ,
en bitiꞌ rizíꞌ yëꞌë.
Ca naꞌ chinazë́daliꞌ,
guliꞌsóalenticaꞌsëꞌ Cristo.