Naca löza huödëꞌ Xanruꞌ
3
Didzaꞌ ni naca le buropi ruzúajaꞌ queë́liꞌ lu guichi,
böchiꞌ luzáꞌadoꞌ.
Lu irópatë guichi naꞌ ruíꞌi ládxaꞌa usubanaꞌ ládxiꞌliꞌ ca nácagaca lë ni.
2 Guliꞌtsöjné yuguꞌ didzaꞌ guluꞌë bönniꞌ queëꞌ Dios zíꞌatëlö,
ca guluꞌë didzaꞌ uláz queëꞌ.
Guliꞌtsöjné caꞌ xibá naꞌ Xanruꞌ,
Nu rusölá rëꞌu,
gunná béꞌenëꞌ rëꞌu,
lë naꞌ buluꞌsédinëꞌ bönniꞌ gubáz nasö́l-lëꞌë Lëꞌ libíꞌiliꞌ.
3 Ral-laꞌ tsöjnéliꞌ lë ni naca lo.
Dza tsöjsétëgaca uluꞌluíꞌi lahuëꞌ bönniꞌ ilunëꞌ le taꞌzë́ ládxëꞌë le ruáꞌ döꞌ.
4 Uluꞌtitjëꞌ,
ilaꞌnnë́ꞌ:
“¿Gazxi caz lë naꞌ guzxíꞌ lu nëꞌë Cristo?
Gunnë́ꞌ:
Huödaꞌ leyúbölö.
Dza niꞌte cateꞌ gulátiëꞌ xuz xtóꞌoruꞌ,
yúguꞌtë raca tuz ca guca cateꞌ gusí lo rataꞌ yödzölió ga ridxintë naꞌa dza.”
5 Tuꞌzóëꞌ tsöláꞌalö le guca dza niꞌte.
Bëꞌë didzaꞌ Dios,
ateꞌ gulataꞌ lúzxiba,
en luyú.
Birúaj luyú naꞌ lu nisa ateꞌ zoa gatsaj láhuiꞌlö nisa.
6 Len nisa caꞌ busunítiëꞌ Dios yödzölió dza niꞌte cateꞌ niꞌ gusö́l-lëꞌë nisa guiö́j le beti yuguꞌ bönachi dul-laꞌ.
7 Lúzxiba,
en yödzölió ni le nacuáꞌ naꞌa dza,
Dios nucuꞌë léguequi ga idxinrö dza usunítiëꞌ léguequi lu guíꞌ.
Caní gaca tuꞌ gunnë́ꞌ caní Dios caz.
Uzéguiꞌë léguequi dza niꞌ ichúguiëꞌ quégaca bönachi bitiꞌ nácagaca tsahuiꞌ gátigaca.
8 Bitiꞌ gal-la ládxiꞌliꞌ lë ni,
böchiꞌ luzáꞌadoꞌ.
Tu dza naca queëꞌ Xanruꞌ ca zián gayuáꞌ iz,
ateꞌ zián gayuáꞌ iz nácagaca queëꞌ ca tu dza.
9 Bitiꞌ ridzenëꞌ Xanruꞌ gunëꞌ le guzxíꞌ lu nëꞌë gunëꞌ.
Téquiguequi bal-la bönachi ridzenëꞌ,
pero ribözëꞌ zxön ladxiꞌ,
en ruáꞌ rilenëꞌ rëꞌu tuꞌ cabí rë́ꞌënëꞌ initi nitú bönachi,
pero rë́ꞌënëꞌ uluꞌbíꞌi ládxiꞌgaca yúguꞌtë bönachi.
10 Tsálidoꞌos idxín dza huödëꞌ Xanruꞌ ca ridxinëꞌ tu bönniꞌ gubán chiꞌi dzö́ꞌölö.
Lu dza naꞌ huadödi que lúzxiba len tu bö zxön.
Ilaꞌniti yúguꞌtë le nacuáꞌ lu guíꞌ zxön.
Ilaꞌyegui yödzölió ni,
en le nacuáꞌ yödzölió ni.
11 Channö caní gaca,
ilaꞌniti yúguꞌtë lë ni,
¿bizxi caz ral-laꞌ gunliꞌ?
Ral-laꞌ gácaliꞌ baꞌa ladxiꞌ,
en udödi cuinliꞌ lu nëꞌë Dios.
12 Ral-laꞌ cö́zaliꞌ dza huödëꞌ Xanruꞌ,
en güíꞌi ládxiꞌliꞌ gunliꞌ ga idxinrö bayö́n dza niꞌ cateꞌ initi lúzxiba,
ateꞌ ilaꞌniti yúguꞌtë le nacuáꞌ ni lu guíꞌ.
13 Caní gaca,
pero rëꞌu ribö́zaruꞌ le guzxíꞌ lu nëꞌë Dios.
Gunëꞌ tu lúzxiba cubi,
en tu luyú cubi ga niꞌ soa le naca tsahuiꞌ.
14 Que lë ni naꞌ,
böchiꞌ luzáꞌadoꞌ,
tsanni ni ribö́zaliꞌ yuguꞌ lë ni,
guliꞌgüíꞌ ládxiꞌliꞌ gácaliꞌ idú tsahuiꞌ lahuëꞌ Dios,
ateꞌ gunliꞌ ga cuntu nu bi gaca innë́ queë́liꞌ,
en cö́zaliꞌ dxíꞌadoꞌ cateꞌ idxinrö dza niꞌ.
15 Ral-laꞌ inö́ziliꞌ ribözëꞌ Dios zxön ladxiꞌ para gataꞌ quégaca bönachi lataj uluꞌlágaca,
ca naꞌ gunnë́ꞌ caꞌ bö́chiꞌruꞌ Pablo.
Buzúajëꞌ queë́liꞌ lu guichi,
zóalen lëꞌ yöl-laꞌ réajniꞌi naꞌ bëꞌë Xanruꞌ queëꞌ.
16 Yúguꞌtë lu guichi ruzúajëꞌ,
ruꞌë didzaꞌ ca nácagaca lë ni,
sal-laꞌ nútsaꞌgaca caꞌ léguequi yuguꞌ didzaꞌ nácagaca böniga tséajniꞌiruꞌ.
Yuguꞌ didzaꞌ caní tuꞌchíxinëꞌ bönniꞌ bitiꞌ nö́zguequinëꞌ,
en bönniꞌ bitiꞌ naca idú ládxiꞌgaquiëꞌ.
Lëscaꞌ caní tunëꞌ quégaca iaꞌbal-la didzaꞌ nazúajgaca lu guichi láꞌayi,
le gun ga usunítiëꞌ Dios légaquiëꞌ.
17 Chinö́z quéziliꞌ lë ni,
böchiꞌ luzáꞌadoꞌ.
Que lë ni naꞌ guliꞌgún chiꞌi cuinliꞌ,
para cabí ilaꞌzíꞌ yeꞌe bönachi bitiꞌ nácagaca tsahuiꞌ libíꞌiliꞌ,
en para cabí ilún ga tseaj böꞌ icja ládxiꞌdoꞌoliꞌ ca réajlëꞌëliꞌ Cristo.
18 Guliꞌgüíꞌ ládxiꞌliꞌ gácarö idú ca núnbëꞌëliꞌ-nëꞌ Xanruꞌ Jesucristo,
Nu rusölá rëꞌu,
ateꞌ ruzíꞌiliꞌ xibë́ꞌ.
¡Yöl-laꞌ ba Lëꞌ naꞌa dza,
en yúguꞌtë dza záꞌgaca!
¡Caꞌ gaca!