4 Dios bitiꞌ buniti lahuëꞌ yuguꞌ gubáz láꞌayi queëꞌ naꞌ gulunëꞌ dul-laꞌ,

pero gurúꞌunëꞌ légaquiëꞌ lataj chul-la.

Nágaꞌgaquiëꞌ du guíë ga naca chul-la naꞌ,

ga naꞌ taꞌbözëꞌ dza usiúdxëꞌ Dios légaquiëꞌ.

5 Lëscaꞌ caní,

bitiꞌ buniti lahuëꞌ bönachi gulaꞌcuáꞌ dza niꞌte cateꞌ gusö́l-lëꞌë nisa guiö́j le busuniti yödzölió le beti bönachi nácagaca xihuiꞌ,

pero busölë́ꞌ Noé lu nisa naꞌ,

bönniꞌ niꞌ benëꞌ libán que le naca tsahuiꞌ.

Dios busölë́ꞌ caꞌ iaꞌgadxi diꞌa dza queëꞌ Noé naꞌ lu nisa.

6 Lëscaꞌ caní,

Dios guchúguiëꞌ quégaca bönachi gulaꞌcuáꞌ yödzö Sodoma,

en yödzö Gomorra.

Busunítiëꞌ léguequi lu guíꞌ,

ateꞌ buluꞌhuöáca dö.

Le guca quéguequi naca tu le ruluíꞌi le run gadxi nupa tuaꞌ döꞌ.

7 Cateꞌ busunítiëꞌ yuguꞌ yödzö naꞌ,

Dios busölë́ꞌ Lot,

tu bönniꞌ tsahuiꞌ,

lu guíꞌ naꞌ.

Buíꞌinidaꞌ ládxëꞌë Lot cateꞌ biléꞌenëꞌ le xihuiꞌ gulún bönachi tuáꞌ döꞌ naꞌ.

8 Caní guca,

tuꞌ guzóalenëꞌ bönniꞌ tsahuiꞌ naꞌ léguequi,

ateꞌ biléꞌenëꞌ,

en biyönnëꞌ le ruáꞌ döꞌ naꞌ gulúngaca,

ateꞌ tuꞌ gúquiëꞌ tsahuiꞌ gusëbi ládxëꞌë yúguꞌtë dza niꞌa que yuguꞌ le cabí naca tsahuiꞌ gulúngaca.

9 Caní naca,

Xanruꞌ nö́zinëꞌ usölë́ꞌ nupa naꞌ tadxi Lëꞌ lu naꞌ nu run ga tsázagaca bönachi nöza dul-laꞌ,

pero nucö́zëꞌ xíguiaꞌ gunëꞌ nupa bitiꞌ nácagaca tsahuiꞌ ga idxinrö dza ichúguiëꞌ quéguequi ilaꞌniti tsaz.

10 Ichúgudaꞌarö quégaquiëꞌ bönniꞌ ni tunëꞌ yuguꞌ le taꞌzë́ ládxëꞌë le ruáꞌ döꞌ,

en taꞌdáꞌbaguiëꞌ yöl-laꞌ unná bëꞌ queëꞌ Xanruꞌ.

Nácagaquiëꞌ rugu ladxiꞌ,

en zidi ladxiꞌ.

Bitiꞌ tádxinëꞌ tuꞌlidza ditjëꞌ gubáz láꞌayi taꞌdë́ꞌ lu beníꞌ.

11 Gubáz láꞌayi naꞌ nápagacatërëꞌ yöl-laꞌ unná bëꞌ,

en yöl-laꞌ huáca ca yuguꞌ bönniꞌ naꞌ,

pero gubáz láꞌayi naꞌ bitiꞌ tuꞌhuázxjanëꞌ nu uluꞌzéguiëꞌ didzaꞌ lahuëꞌ Xanruꞌ.

12 Yuguꞌ bönniꞌ ni nácagaquiëꞌ ca böaꞌ guixiꞌ,

bitiꞌ bi taꞌyéajniꞌibaꞌ,

pero náljagacabaꞌ para nu sön légacabaꞌ,

en guti légacabaꞌ.

Taꞌnnë́ xihuëꞌë que le cabí taꞌyéajniꞌinëꞌ,

ateꞌ ilaꞌnítiëꞌ tsaz ca raca quégacabaꞌ böaꞌ guixiꞌ naꞌ.

13 Dios ubiꞌë quégaquiëꞌ le ilaꞌguíꞌi ilaꞌzáquëꞌë,

tuꞌ buluꞌsacaꞌ ziꞌë bönachi.

Téquinëꞌ naca xibágaquiëꞌ tuꞌziꞌë xibé le raca naꞌa dza.

Nácagaquiëꞌ ca tu huëꞌ nudzuꞌ,

en tu le run ditaj cateꞌ niꞌ tahuëꞌ tsözxö́n len libíꞌiliꞌ,

ateꞌ tuꞌdzéjanëꞌ tuꞌ taꞌzíꞌ yéꞌenëꞌ libíꞌiliꞌ.

14 Lu yöl-laꞌ rizë́ ladxiꞌ quégaquiëꞌ le ruáꞌ döꞌ tuꞌyúëꞌ-nu yuguꞌ nigula.

Bitiꞌ nacuꞌë dxisö túngaquiëꞌ dul-laꞌ.

Túngaquiëꞌ ga taꞌchixi taꞌnigui nupa bitiꞌ nácagaca tsutsu ca taꞌyéajlëꞌ Cristo.

Taꞌguíljaticaꞌsëꞌ yuguꞌ le tuꞌhuídiꞌnëꞌ.

Dios chinuchúguiëꞌ quégaquiëꞌ ilátigaquiëꞌ.

15 Buluꞌcáꞌanëꞌ le naca idútë li,

ateꞌ nachul-la nanítigaquiëꞌ.

Tunëꞌ ca benëꞌ Balaam,

zxíꞌinëꞌ Beor,

bönniꞌ niꞌ bidxíꞌinëꞌ dumí,

ateꞌ benëꞌ le ruáꞌ döꞌ tuꞌ nazxjëꞌ.

16 Dios buzenëꞌ le bach Balaam naꞌ tuꞌ benëꞌ le ruáꞌ döꞌ naꞌ.

Tubaꞌ búrrodoꞌ bë́ꞌlenbaꞌ lëꞌ didzaꞌ ca naꞌ tuíꞌi didzaꞌ bönachi,

ateꞌ buzágaꞌbaꞌ xinözëꞌ Balaam ga naꞌ saꞌyéajëꞌ lu yöl-laꞌ ridáꞌbagaꞌ queëꞌ.

17 Nácagaquiëꞌ bönniꞌ ni ca tu buduáꞌ chibuíꞌi nisa que,

encaꞌ ca tu böaj le richë́ꞌ böꞌ budunuꞌ.

Chinabáꞌa xilátjagaquiëꞌ lataj chul-la.

18 Caní nácagaquiëꞌ tuꞌ tuꞌë didzaꞌ yuguꞌ le zxön lu yöl-laꞌ bitiꞌ bi nözi quégaquiëꞌ,

en tuꞌgunëꞌ dxin yuguꞌ le taꞌzë́ ládxiꞌgaca bönachi le ruáꞌ döꞌ,

en tunëꞌ ga taꞌchixi taꞌnigui nupa siꞌ buluꞌlá ladaj nupa nácagaca chul-la niti.

19 Tëꞌ bönachi ilaꞌdeliꞌ yöl-laꞌ rusölá,

pero légaca cazëꞌ nadzúngaquiëꞌ,

en tunëꞌ bayudxi le ruáꞌ döꞌ.

Nadzúngaquiëꞌ yúguꞌtë bönniꞌ lu naꞌ bi rinná beꞌe icja ládxiꞌdoꞌgaquiëꞌ.

20 Channö buluꞌlë́ꞌ lu le cabí naca tsahuiꞌ nacuáꞌ yödzölió ni tuꞌ gulúnbëꞌë Xanruꞌ Jesucristo,

Nu rusölá rëꞌu,

ateꞌ níꞌirö taꞌröli le cabí naca tsahuiꞌ naꞌ légaquiëꞌ leyúbölö,

en taꞌnná beꞌe légaquiëꞌ,

le nácatë nabágaꞌgacatërëꞌ xíguiaꞌ ga röjsetë ca le gulaꞌbáguëꞌë zíꞌalö.

21 Dxíꞌarö gaca quégaquiëꞌ laꞌtuꞌ catu caz ilúnbëꞌë Nu ruzóa rëꞌu nöza tsahuiꞌ ca le gaca quégaquiëꞌ channö gulúnbëꞌë Lëꞌ,

ateꞌ níꞌirö buluꞌcáꞌanëꞌ xibá láꞌayi bëꞌë Dios quégaquiëꞌ.

22 Chibudxín quégaquiëꞌ didzaꞌ naꞌ rnna: