Pedro ruzéajniꞌinëꞌ nupa taꞌyéajlëꞌ Cristo
5
Naꞌa,
ruzéajniꞌidaꞌ libíꞌiliꞌ,
bönniꞌ gula tapa chíꞌiliꞌ nupa néquiguequi queëꞌ Cristo,
tuꞌ nacaꞌ nedaꞌ caꞌ bönniꞌ gula ca nácaliꞌ libíꞌiliꞌ,
en biléꞌedaꞌ le gudíꞌi guzxáquëꞌë Cristo,
ateꞌ gunaꞌ caꞌ tsözxö́n libíꞌiliꞌ,
uzíꞌiruꞌ xibé yöl-laꞌ zxön naꞌ iláꞌ lahui.
2 Guliꞌgaca ca bönniꞌ tuꞌyúëꞌ böꞌcuꞌ zxilaꞌ,
gun chíꞌiliꞌ bönachi naꞌ Dios guluꞌë lu náꞌaliꞌ.
Guliꞌgún caní idú ládxiꞌliꞌ ca rë́ꞌënëꞌ Dios,
en calëga tuꞌ run bayudxi queë́liꞌ,
o tuꞌ rizë́ ládxiꞌliꞌ dumí.
Guliꞌgún xichinliꞌ tu rë́ꞌënisiliꞌ,
3 en calëga tuꞌ rë́ꞌëniliꞌ inná béꞌesiliꞌ nupa naꞌ naguꞌë lu náꞌaliꞌ.
Guliꞌgüíꞌ ládxiꞌliꞌ gácaliꞌ tu le ruluíꞌi ca ral-laꞌ ilaca nupa naꞌ run chíꞌiliꞌ.
4 Caní naca,
cateꞌ uluíꞌi lahuëꞌ Cristo,
bönniꞌ lo uyú böꞌcuꞌ zxilaꞌ,
idéliꞌliꞌ tu le uzíꞌiliꞌ xibé le catu caz initi.
5 Lëscaꞌ caní,
biꞌi cuidiꞌ,
guliꞌgún ca taꞌnnë́ꞌ yuguꞌ bönniꞌ gula.
Yúguꞌtëliꞌ ral-laꞌ gunliꞌ bal luzáꞌaliꞌ,
tuliꞌ iaꞌtuliꞌ,
lu yöl-laꞌ nöxaj ladxiꞌ queë́liꞌ,
tuꞌ nazúaj lu guichi láꞌayi le rnna:
Dios ruzáguëꞌë xinö́zguequi nupa tun ba zxön cuínguequi
pero rácalenëꞌ nupa nácagaca nöxaj ladxiꞌ.
6 Guliꞌsóa nöxaj ladxiꞌ lu nëꞌë Dios,
ateꞌ Lëꞌ uchisëꞌ libíꞌiliꞌ cateꞌ izáꞌa dza.
7 Guliꞌcúꞌu yúguꞌtë le run ga ruúbi ruguíꞌiliꞌ lu nëꞌë Dios,
tuꞌ ruíꞌi ládxëꞌë libíꞌiliꞌ.
8 Guliꞌgaca baꞌa ladxiꞌ,
en buliꞌsubán ládxiꞌliꞌ,
tuꞌ zoa tuꞌ xihuiꞌ,
nu bitiꞌ riléꞌe libíꞌiliꞌ dxiꞌa,
ridá idú gásibiꞌilö,
en naca ca tubaꞌ bëdxi guixiꞌ ribö́dxiꞌabaꞌ,
riguiljbaꞌ nu gágubaꞌ.
9 Guliꞌgaca tsutsu ca réajlëꞌëliꞌ Cristo,
en guliꞌzágaꞌ xinöza tuꞌ xihuiꞌ,
tuꞌ nö́ziliꞌ taꞌguíꞌi taꞌzáquëꞌë böchiꞌ luzáꞌaliꞌ idútë yödzölió ni ca naꞌ riguíꞌi rizácaꞌliꞌ libíꞌiliꞌ.
10 Níꞌirö cateꞌ chigudíꞌi guzxácaꞌliꞌ tu chíꞌisö,
Dios gunëꞌ ga gácaliꞌ idú tsahuiꞌ,
en ga gácaliꞌ tsutsu,
en ga gálaliꞌ,
en ga sóaliꞌ tsaz.
Lë cazëꞌ Dios ruzáꞌ ládxëꞌë queë́ruꞌ yúguꞌtë le ruzíꞌiruꞌ xibé,
en bulidzëꞌ rëꞌu para uzíꞌiruꞌ xibé yöl-laꞌ zxön queëꞌ le zóaticaꞌsö tuꞌ nácaruꞌ tuz len Jesucristo.
11 ¡Gácaticaꞌsö yöl-laꞌ ba,
en yöl-laꞌ unná bëꞌ queëꞌ Lëꞌ!
¡Caꞌ gaca!
Pedro ruzenëꞌ didzaꞌ nupa taꞌdáꞌ Cristo
12 Dídzaꞌdoꞌ ni ruzúajaꞌ queë́liꞌ lu guichi lu nëꞌë Silvano.
Réquidaꞌ náquiëꞌ bö́chiꞌruꞌ idú ladxiꞌ.
Rë́ꞌëndaꞌ utipaꞌ ládxiꞌliꞌ,
en runaꞌ ba nalí loliꞌ,
le nácatë lë ni naca le ruzáꞌ ládxëꞌë queë́ruꞌ Dios.
¡Guliꞌgaca tsutsu tuꞌ ruzíꞌiliꞌ xibé lë ni!
13 Yuguꞌ bönachi queëꞌ Cristo nacuáꞌ Babilonia tuꞌgapa Dios libíꞌiliꞌ.
Dios gurö́ cazëꞌ léguequi ca naꞌ gurö́ëꞌ libíꞌiliꞌ.
Lëscaꞌ biꞌi Marcos rugápabiꞌ Dios libíꞌiliꞌ.
Nácabiꞌ ca zxíꞌini cazaꞌ.
14 Guliꞌgapa Dios luzáꞌaliꞌ tuliꞌ iaꞌtuliꞌ,
en lu yöl-laꞌ nadxíꞌi queë́liꞌ luzáꞌaliꞌ unídaꞌliꞌ luzáꞌaliꞌ tuliꞌ iaꞌtuliꞌ.
Rinábidaꞌ-nëꞌ Dios gunëꞌ ga soa dxi icja ládxiꞌdoꞌoliꞌ,
yúguꞌtëliꞌ naꞌ néquiliꞌ queëꞌ Jesucristo.
¡Caꞌ gaca!