Ral-laꞌ ugunruꞌ dxin yöl-laꞌ huáca queëꞌ Dios para gunruꞌ xichinëꞌ Cristo
4
Que lë ni naꞌ,
ca naꞌ gudíꞌi guzxáquëꞌë Cristo lu le naca cazëꞌ,
lëscaꞌ libíꞌiliꞌ ral-laꞌ soa cö́zaliꞌ quíꞌi sácaꞌliꞌ.
Nu naꞌ riguíꞌi rizácaꞌa tuꞌ daꞌ le naca tsahuiꞌ chibucáꞌana dul-laꞌ.
2 Naꞌa isí lo,
ral-laꞌ gúnticaꞌsiliꞌ ca rë́ꞌënëꞌ Dios,
en calëga ca rizësö ládxiꞌliꞌ lu yöl-laꞌ bönachi queë́liꞌ.
3 Tscaꞌtiꞌ gaz le chibenliꞌ chibenliꞌ.
Bítiꞌrö gunliꞌ ca naꞌ tun nupa bitiꞌ núnbëꞌgaca Dios.
Dza niꞌte benliꞌ yuguꞌ le cabí ral-laꞌ gunliꞌ.
Guzë́ ládxiꞌliꞌ le ruáꞌ döꞌ.
Guzúdxiliꞌ.
Gudödi bëꞌ güíꞌi gudáguliꞌ,
en guyéaj ládxiꞌliꞌ budóꞌ guiö́j budóꞌ yaga,
le rigútinëꞌ Dios.
4 Naꞌa,
tuꞌbáninëꞌ bönniꞌ tunëꞌ caní tuꞌ cabirö runliꞌ tsözxö́n légaquiëꞌ cateꞌ tunëꞌ le ruáꞌ döꞌ caní,
en que lë ni naꞌ tuꞌtsaga yúdxinëꞌ libíꞌiliꞌ.
5 Légaquiëꞌ run bayudxi uluꞌluíꞌi cuíngaquiëꞌ lahuëꞌ Dios,
ateꞌ Lëꞌ chizóa uchiꞌa usörö́ëꞌ nupa nabángaca,
en nupa chinátigaca.
6 Que lë ni naꞌ guca libán que didzaꞌ dxiꞌa lógaca nupa chinátigaca,
nupa naꞌ Dios buchiꞌa busörö́ëꞌ léguequi cateꞌ niꞌ gulaꞌcuáꞌ yödzölió ni,
ca naꞌ ruchiꞌa rusörö́ëꞌ yúguꞌtë bönachi.
Guca libán lóguequi para ilaꞌcuáꞌ lu yöl-laꞌ naꞌbán lu böꞌ nácagaca caz,
ca naꞌ zoa cazëꞌ Dios lu yöl-laꞌ naꞌbán.
7 Chizóa idxín dza údxi que yúguꞌtë le dë.
Que lë ni naꞌ,
guliꞌgaca baꞌa ladxiꞌ,
en buliꞌsubán ládxiꞌliꞌ para gaca ulídzaliꞌ-nëꞌ Dios.
8 Tuꞌ runtë bayudxi,
guliꞌdxíꞌi luzáꞌaliꞌ tuliꞌ iaꞌtuliꞌ,
ateꞌ channö dzágaliꞌ lu yöl-laꞌ nadxíꞌi,
gácaliꞌ sinaꞌ uniti loliꞌ yuguꞌ luzáꞌaliꞌ tuaꞌ döꞌ queë́liꞌ.
9 Guliꞌgüíꞌ lataj ilaꞌcuáꞌ böchiꞌ luzáꞌaliꞌ lídxiliꞌ,
en bitiꞌ innëliꞌ quégaquiëꞌ.
10 Ral-laꞌ ugunliꞌ dxíꞌadoꞌ dxin yuguꞌ le buzáꞌ ládxëꞌë Dios queë́liꞌ,
en gácalenliꞌ luzáꞌaliꞌ tuliꞌ iaꞌtuliꞌ.
11 Nu bönniꞌ runëꞌ ba nalí,
ral-laꞌ gunëꞌ ba nalí que xtídzëꞌë Dios,
ateꞌ nu bönniꞌ runëꞌ xichinëꞌ Cristo,
ral-laꞌ ugunëꞌ dxin yöl-laꞌ huáca naꞌ runnëꞌ Dios queëꞌ,
ateꞌ niꞌa que yúguꞌtë le runliꞌ,
gaca yöl-laꞌ ba queëꞌ Dios niꞌa que le nunëꞌ Jesucristo.
¡Gácaticaꞌsö queëꞌ Dios yöl-laꞌ ba,
en yöl-laꞌ unná bëꞌ!
¡Caꞌ gaca!
Le ilaꞌguíꞌi ilaꞌzacaꞌ bönachi taꞌyéajlëꞌ Cristo
12 Böchiꞌ luzáꞌadoꞌ,
bitiꞌ ubániliꞌ tuꞌ nözi le taꞌzíꞌ bëꞌdaꞌ libíꞌiliꞌ.
Bitiꞌ naca tu le cabí núnbëꞌgaca bönachi.
13 Guliꞌdzéjadeꞌe tuꞌ dë lataj queë́liꞌ gunliꞌ-nëꞌ tsözxö́n Cristo lu le riguíꞌi rizáquëꞌë Lëꞌ niꞌa que bönachi queëꞌ para gaca udzéjaliꞌ caꞌ dza naꞌ huödëꞌ Cristo,
cateꞌ iléꞌeliꞌ yöl-laꞌ zxön queëꞌ.
14 Channö tuꞌdzaga yudxi bönachi libíꞌiliꞌ tuꞌ dáꞌaliꞌ Cristo,
bicaꞌ ba libíꞌiliꞌ,
tuꞌ naca bëꞌ zóalenëꞌ Dios Böꞌ Láꞌayi libíꞌiliꞌ,
Nu naꞌ zaꞌ yehuaꞌ yubá.
Bönachi yödzölió ni tuꞌdzaga yudxi Lëꞌ,
pero libíꞌiliꞌ runliꞌ-nëꞌ bal.
15 Channö riguíꞌi rizáquëꞌë nu bönniꞌ dzáguiëꞌ libíꞌiliꞌ,
ral-laꞌ gaca caní tuꞌ dëꞌë Cristo,
en calëga tuꞌ rútiëꞌ bönachi,
o ribanëꞌ,
o ruꞌë döꞌ,
o tuꞌ yöjgútsëꞌë ga yúbölö.
16 Naꞌa,
channö núlöliꞌ riguíꞌi rizácaꞌliꞌ tuꞌ dáꞌaliꞌ Cristo,
bitiꞌ ral-laꞌ utuíꞌiliꞌ,
pero guliꞌcuꞌë Dios yöl-laꞌ ba tuꞌ nazíꞌ laliꞌ bönachi queëꞌ Cristo.
17 Chibidxín dza isí lahuëꞌ Dios uchiꞌa usörö́ëꞌ bönachi rö queëꞌ.
Channö zíꞌalö uchiꞌa usörö́ëꞌ rëꞌu,
¿nácxitërö gaca quégaca nupa bitiꞌ túngaca ca rnna didzaꞌ dxiꞌa queëꞌ Dios?
18 Channö naca böniga uluꞌlágaca nupa tun le naca dxiꞌa,
¿nácxitërö gaca quégaca nupa taꞌdáꞌbagaꞌ Dios,
en tun dul-laꞌ?
19 Caní naca,
yuguꞌ bönniꞌ ni taꞌguíꞌi taꞌzaquëꞌë tuꞌ rë́ꞌënëꞌ Dios gaca caní,
ral-laꞌ ilúnticaꞌsëꞌ le naca tsahuiꞌ,
en uluꞌdödëꞌ böꞌ nácagaca cazëꞌ lu nëꞌë Dios,
tuꞌ ben cazëꞌ Lëꞌ légaquiëꞌ,
en runëꞌ ca rnna xtídzëꞌë.