Le ral-laꞌ gunruꞌ le raza ládxëꞌë Dios
13
Ral-laꞌ idxíꞌiticaꞌsiliꞌ luzáꞌaliꞌ tuliꞌ iaꞌtuliꞌ.
2 Guliꞌtsöjné ral-laꞌ uzóaliꞌ lídxiliꞌ nu idxín ga zóaliꞌ.
Cateꞌ gulún caní bal-la bönachi,
buluꞌcuáꞌ lídxiguequi gubáz láꞌayi que yehuaꞌ yubá queëꞌ Dios,
sal-laꞌ bitiꞌ guléquibeꞌe nácagaquiëꞌ gubáz láꞌayi.
3 Guliꞌtsöjné nupa nadzúngaca lidxi guíë tsca nunliꞌ légaquiëꞌ tsözxö́n,
nadzunliꞌ caꞌ lidxi guíë.
Guliꞌgüíꞌ ládxiꞌliꞌ yuguꞌ bönniꞌ taꞌbía ládxiꞌgaca bönachi légaquiëꞌ,
tsca libíꞌiliꞌ riguíꞌi rizácaꞌlenliꞌ légaquiëꞌ tsözxö́n.
4 Ral-laꞌ gunliꞌ bal yöl-laꞌ nutsaga naꞌ,
ateꞌ tu tuëꞌ bönniꞌ ral-laꞌ sóalenëꞌ-nu nigula queëꞌ lu yöl-laꞌ baꞌa ladxiꞌ queëꞌ,
tuꞌ ichúguiëꞌ Dios quégaca nupa tun le ruáꞌ döꞌ,
en nupa taꞌguítsaj xibá que yöl-laꞌ nutsaga naꞌ.
5 Bitiꞌ bi uhuídiꞌliꞌ,
pero guliꞌtsaza ládxiꞌliꞌ tsca le dë queë́liꞌ naꞌa,
tuꞌ chigunnë́ꞌ Dios:
“Catu caz ucáꞌanaꞌ liꞌ,
en bitiꞌ caꞌ ubéaj ládxaꞌa liꞌ.”
6 Caní naca,
huáca innaruꞌ idú ládxiꞌruꞌ lë naꞌ rnna:
Xanruꞌ náquiëꞌ Nu rácalen nedaꞌ.
Bitiꞌ caꞌ gádxidaꞌ bi gun bönachi quiaꞌ.
7 Guliꞌtsöjné yuguꞌ bönniꞌ tuꞌyúëꞌ libíꞌiliꞌ,
nupa naꞌ tuꞌsédinëꞌ libíꞌiliꞌ xtídzëꞌë Dios.
Buliꞌyú ca nadéliꞌgaquiëꞌ,
en guliꞌgún ca tunëꞌ lu yöl-laꞌ réajlëꞌ quégaquiëꞌ Dios.
8 Lë́bisö ca náquiëꞌ Jesucristo,
néaje,
en naꞌa,
en cáꞌticaꞌsö.
9 Bitiꞌ güíꞌiliꞌ lataj yuguꞌ xibá izáꞌa,
en xibá nadzáꞌ ichë́ꞌgaca libíꞌiliꞌ nöza yúbölö.
Naca dxiꞌa gunliꞌ tsutsu icja ládxiꞌdoꞌoliꞌ ca naca le ruzáꞌ ládxëꞌë Dios queë́liꞌ,
en calëga ca nácagaca xibá que le rëꞌaj ráguruꞌ,
lë naꞌ bitiꞌ uluꞌzíꞌ xibé nupa tuíꞌi ládxiꞌgaca léguequi.
10 Zoa queë́ruꞌ tu bucugu láꞌayi,
le cabí uluꞌzíꞌ xibé nupa tun dxin que didzaꞌ rucáꞌana tsahuiꞌ naꞌ biláꞌ zíꞌalö.
11 Bixúz lo que yuꞌu láꞌayi naꞌ guluꞌë xichö́ngacabaꞌ böaꞌ bëdxi lu lataj idú láꞌayi tuꞌ nözi dul-laꞌ,
pero buluꞌzéguië bëlaꞌ cáꞌasö quégacabaꞌ ga naca níꞌilö raꞌ yödzö.
12 Lëscaꞌ caní gudíꞌi guzxáquëꞌë Jesús níꞌilö raꞌ yödzö para bunëꞌ bönachi dxiꞌa len rön queë cazëꞌ.
13 Tsöjtáꞌaruꞌ-nëꞌ Jesús,
sal-laꞌ ilaꞌbéaj bönachi rëꞌu lu yödzö,
en síꞌiruꞌ tsözxö́n len Lëꞌ lë naꞌ buluꞌlidza ditaj bönachi Lëꞌ.
14 Bitiꞌ zoa tu yödzö queë́ruꞌ yödzölió ni le soa tsaz,
pero riguíljaruꞌ lë naꞌ siꞌ zaꞌ.
15 Que lë ni naꞌ,
ral-laꞌ cúꞌuticaꞌsiruꞌ-nëꞌ Dios yöl-laꞌ ba,
ugunruꞌ dxin Lëꞌ Jesucristo.
Yöl-laꞌ ba naꞌ naca ca tu le rigúꞌuruꞌ lahuëꞌ Dios.
Len ruáꞌa cuinruꞌ guië́ruꞌ-nëꞌ Dios:
“Xclenuꞌ” niꞌa que le náquiëꞌ Lëꞌ.
16 Bitiꞌ gal-la ládxiꞌliꞌ gunliꞌ le naca dxiꞌa,
en gácalenliꞌ luzáꞌaliꞌ tuliꞌ iaꞌtuliꞌ,
tuꞌ naca lë ni ca tu le rigúꞌuruꞌ lahuëꞌ Dios le raza ládxëꞌë Lëꞌ.
17 Guliꞌgún ca rnna xtídzaꞌgaquiëꞌ bö́chiꞌruꞌ tuꞌyúëꞌ libíꞌiliꞌ,
en guliꞌgüíꞌ lataj ilaꞌnná béꞌenëꞌ libíꞌiliꞌ,
tuꞌ tapa chiꞌë böꞌ naca cázaliꞌ,
ca tunëꞌ yuguꞌ bönniꞌ ral-laꞌ ilaꞌguíxjöꞌë lahuëꞌ Dios le núngaquiëꞌ.
Guliꞌgún caní para ilunëꞌ dxin naꞌ lu yöl-laꞌ rudzeja quégaquiëꞌ,
en calëga lu yöl-laꞌ risëbi ladxiꞌ quégaquiëꞌ,
tuꞌ cabí uzíꞌiliꞌ xibé dxin naꞌ ilunëꞌ lu yöl-laꞌ risëbi ladxiꞌ quégaquiëꞌ.
18 Buliꞌlidzëꞌ Dios,
inábiliꞌ-nëꞌ gácalenëꞌ netuꞌ,
tuꞌ runtuꞌ löza soa dxi icja ládxiꞌdoꞌotuꞌ,
para cabí uxösa netuꞌ,
ateꞌ ruíꞌi ládxiꞌtuꞌ gúnticaꞌsituꞌ le naca dxiꞌa.
19 Le nácarö lo,
rátaꞌyuaꞌ loliꞌ inábiliꞌ-nëꞌ Dios uguꞌë nedaꞌ tu nöza para udxinaꞌ ga zóaliꞌ bayö́ntë.
Dios uzáꞌ ládxëꞌë queë́ruꞌ le gácalen rëꞌu
20 Naꞌa,
rinábituꞌ-nëꞌ Dios,
Nu run le rucáꞌana rëꞌu tsahuiꞌ,
en Nu busubán Xanruꞌ Jesucristo lu yöl-laꞌ guti,
Nu naꞌ naca Bönniꞌ Lo Uyú Böꞌcuꞌ Zxilaꞌ,
tuꞌ bulaljëꞌ rön queëꞌ le run tsutsu didzaꞌ rucáꞌana tsahuiꞌ,
le zoa tsaz,
21 rinábituꞌ-nëꞌ gunëꞌ ga gácaliꞌ idú tsahuiꞌ,
para gaca gunliꞌ yúguꞌtë dxin dxiꞌa,
en gunliꞌ ca rë́ꞌënëꞌ Lëꞌ,
ateꞌ gunëꞌ queë́liꞌ le raza ládxëꞌë Lëꞌ,
tuꞌ néquiliꞌ queëꞌ Jesucristo.
¡Queëꞌ Cristo gácaticaꞌsö yöl-laꞌ ba!
¡Caꞌ gaca!
22 Rátaꞌyuaꞌ loliꞌ,
böchiꞌ luzáꞌadoꞌ,
güíꞌi ládxiꞌliꞌ didzaꞌ ni ruzéajniꞌi libíꞌiliꞌ,
tuꞌ naca látiꞌdoꞌos lë ni ruzúajaꞌ queë́liꞌ.
23 Ral-laꞌ inö́ziliꞌ chiburúajbiꞌ biꞌi Timoteo,
biꞌi bö́chiꞌruꞌdoꞌ,
lidxi guíë,
ateꞌ channö idxíntëbiꞌ ga zoaꞌ ni,
gunbiꞌ nedaꞌ tsözxö́n uduyútuꞌ libíꞌiliꞌ.
24 Buliꞌgapa Dios bö́chiꞌruꞌ tuꞌyúëꞌ libíꞌiliꞌ,
encaꞌ yúguꞌtë bönachi rö queëꞌ Dios.
Tuꞌgapa Dios libíꞌiliꞌ bönachi taꞌyéajlëꞌ Cristo nacuáꞌ luyú Italia.
25 ¡Dios uzáꞌ ládxëꞌë queë́liꞌ yúguꞌtëliꞌ!
¡Caꞌ gaca!