Ral-laꞌ uyuruꞌ-nëꞌ Cristo
12
Que lë ni naꞌ,
lëscaꞌ rëꞌu,
tuꞌ nacuáꞌ idú gásibiꞌilö ga ni zóaruꞌ ziántërö nupa tun ba nalí ca taꞌyéajlëꞌ Dios,
ral-laꞌ ucáꞌanaruꞌ yúguꞌtë le ruáꞌ döꞌ le naca ca tu le naca ziꞌi nuáꞌaruꞌ,
encaꞌ yúguꞌtë dul-laꞌ nazö́ngaca rëꞌu,
ateꞌ lu yöl-laꞌ riböza zxön ladxiꞌ queë́ruꞌ,
ral-laꞌ gunruꞌ xichinëꞌ Dios,
le naca tsca xítiꞌruꞌ lu huitaj le zoa loruꞌ.
2 Ral-laꞌ uyuruꞌ-nëꞌ Jesús,
Nu naꞌ run ga gaca tséajlëꞌëruꞌ Dios,
en Nu run ga raca idú yöl-laꞌ réajlëꞌ queë́ruꞌ Lëꞌ.
Jesús gudíꞌi guzxáquëꞌë lëꞌe yaga cruz,
en biáꞌ gulénëꞌ yöl-laꞌ rutuíꞌi que,
tuꞌ gúꞌunnëꞌ idéliꞌnëꞌ yöl-laꞌ rudzeja naꞌ uziꞌë xibé,
ateꞌ yöjchöꞌë cuita lëꞌë ibëla Dios,
ga niꞌ röꞌë rinná bëꞌë.
3 Buliꞌyúëꞌ Jesús,
ca naꞌ gudíꞌi guzxáquëꞌë le buluꞌsacaꞌ ziꞌë bönniꞌ dul-laꞌ Lëꞌ,
para cabí icuídiꞌliꞌ,
en para cabí gaca chopa ládxiꞌliꞌ.
4 Ga ridxintë naꞌa dza,
bitiꞌ bi biáꞌ gulenliꞌ ga idxintë nu gun libíꞌiliꞌ huëꞌ tuꞌ ridáꞌbagaꞌliꞌ le naca dul-laꞌ.
5 Nadxi caꞌ chizáꞌ ral-la ládxiꞌliꞌ lë naꞌ ruzéajniꞌinëꞌ Dios libíꞌiliꞌ.
Nácaliꞌ ca yuguꞌ zxíꞌini cazëꞌ,
ca naꞌ nazúaj lu guichi le rnnëꞌ:
Zxíꞌinaꞌ,
bitiꞌ uzúꞌ tsöláꞌalö le gunëꞌ Xanruꞌ,
cateꞌ usëdi uzéajniꞌinëꞌ liꞌ,
en bitiꞌ huö́aj ládxuꞌu cateꞌ uníꞌinëꞌ liꞌ.
6 Xanruꞌ runíꞌinëꞌ nu nadxíꞌinëꞌ,
en rusëdi ruzéajniꞌinëꞌ yúguꞌtë nupa taꞌzíꞌ lu nëꞌe ilaca zxíꞌini cazëꞌ.
7 Ral-laꞌ guáꞌ ilenliꞌ le uníꞌinëꞌ Dios libíꞌiliꞌ,
tuꞌ runëꞌ Dios caní queë́liꞌ tsca nácaliꞌ zxíꞌini cazëꞌ.
Bitiꞌ caꞌ zóabiꞌ tubiꞌ bíꞌidoꞌ bitiꞌ uníꞌinëꞌ-biꞌ xúzibiꞌ.
8 Naꞌa,
channö cabí runíꞌinëꞌ Dios libíꞌiliꞌ ca naꞌ runëꞌ quégaca yúguꞌtë zxíꞌini cazëꞌ,
níꞌirö nácaliꞌ ca yuguꞌ biꞌi lan,
en bitiꞌ nácaliꞌ idú zxíꞌinëꞌ Dios.
9 Iaꞌstú,
cateꞌ niꞌ nácaruꞌ bíꞌidoꞌ,
gulaꞌcuꞌë xuz xináꞌaruꞌ luyú ni,
buluꞌníꞌinëꞌ rëꞌu,
pero runruꞌ légaquiëꞌ bal.
Caꞌ naca,
ral-laꞌ gúnröruꞌ ca rnna xtídzëꞌë Xúziruꞌ zoëꞌ yehuaꞌ yubá para sóaruꞌ ibanruꞌ tsaz.
10 Yuguꞌ xuz xináꞌaruꞌ,
tu chíꞌisö buluꞌníꞌinëꞌ rëꞌu tsca le guléquisinëꞌ naca dxiꞌa,
pero cateꞌ runíꞌinëꞌ Dios rëꞌu,
naca para gaca tu le uzíꞌiruꞌ xibé,
para gácaruꞌ idú láꞌayi ca naca cazëꞌ Lëꞌ.
11 Le nácatë bitiꞌ naláꞌ lahui naꞌa le uzíꞌiruꞌ xibé que le runíꞌinëꞌ rëꞌu,
pero run ga ruhuíꞌiniruꞌ.
Channö güíꞌiruꞌ lataj usëdi rëꞌu le runíꞌinëꞌ rëꞌu,
gun ga cö́zaruꞌ dxíꞌadoꞌ,
en ga gácaruꞌ tsahuiꞌ.
Soa bönadxi queë́ruꞌ channö cabí uzë́ nágaruꞌ chiꞌë Dios
12 Que lë ni naꞌ buliꞌún tsutsu náꞌaliꞌ le röjxéquiꞌguequi,
encaꞌ zxíbiliꞌ le taꞌzxizi,
en idipa ládxiꞌliꞌ para gunliꞌ le naca dxiꞌa.
13 Guliꞌsóa nöza tsahuiꞌ,
para cabí gunliꞌ ga ucáꞌana nu ricuidiꞌ ladxiꞌ nöza naꞌ,
pero guliꞌgún ga huöáca ladxiꞌ nu naꞌ.
14 Guliꞌgüíꞌ ládxiꞌliꞌ cö́zalenliꞌ dxiꞌa yúguꞌtë bönachi,
en gácaliꞌ tsahuiꞌ lahuëꞌ Dios,
tuꞌ channö cabí gunliꞌ caní,
bitiꞌ gaca iléꞌeliꞌ-nëꞌ Xanruꞌ.
15 Guliꞌgún chiꞌi cuinliꞌ para cabí soa nu ucáꞌana le ruzáꞌ ládxëꞌë Dios queë́ruꞌ,
en para cabí soa nu gaca ca tu guixiꞌ siláꞌ,
para cabí utsáꞌ libíꞌiliꞌ,
en cabí gun ga cabí gácaliꞌ tsahuiꞌ zianliꞌ libíꞌiliꞌ.
16 Guliꞌgún chiꞌi cuinliꞌ para cabí gun nu dzaga libíꞌiliꞌ le ruáꞌ döꞌ,
o le cabí naca tsahuiꞌ,
ca naꞌ benëꞌ Esaú,
zxíꞌinëꞌ Isáac.
Esaú naꞌ bë́tiꞌë le ral-laꞌ gataꞌ lu nëꞌë tuꞌ náquiëꞌ biꞌi bönniꞌ huaca queëꞌ xuzëꞌ para guzxiꞌë tu le doꞌ gudahuëꞌ.
17 Chinö́z quéziliꞌ ca naꞌ guca queëꞌ Esaú gudödi niꞌ cateꞌ gúꞌunnëꞌ idéliꞌnëꞌ le inabëꞌ xuzëꞌ lahuëꞌ Dios para gaca le tsahuiꞌ queëꞌ.
Buéchiꞌ ládxëꞌë xuzëꞌ lëꞌ,
pero bitiꞌ gutaꞌ lataj ubíꞌi ládxëꞌë Esaú naꞌ sal-laꞌ gudilaj ládxëꞌë le len yöl-laꞌ ribödxi queëꞌ.
18 Ca raca queë́liꞌ bitiꞌ naca ca guca quégaquiëꞌ bönniꞌ Israel.
Légaquiëꞌ gulaꞌbiguëꞌë galaꞌ ga zoa tu guíꞌa le gaca nu can,
ateꞌ guyegui guíꞌa niꞌ,
en böáca chul-la lahuiꞌ dza tuꞌ gurö́ꞌö böaj gasaj,
en guyécjadaꞌ böꞌ.
19 Bilaꞌyönnëꞌ taꞌbödxi lúzubaꞌ böaꞌ,
encaꞌ chiꞌë Dios Nu bëꞌ didzaꞌ.
Cateꞌ bilaꞌyönnëꞌ lë ni,
gulátaꞌyuëꞌ lahuëꞌ Moisés para cabirö güíꞌilenëꞌ Dios légaquiëꞌ didzaꞌ.
20 Caní gulunëꞌ tuꞌ cabí guca guáꞌ iléngaquiëꞌ lë naꞌ gunná béꞌenëꞌ Dios légaquiëꞌ,
gunnë́ꞌ:
“Channö tsöjlíbibaꞌ tubaꞌ böaꞌ guíxiꞌdoꞌos guíꞌa ni,
ral-laꞌ uluꞌládxëꞌë-baꞌ guiö́j,
o uluꞌdödëꞌ-baꞌ yaga tuchiꞌ.”
21 Lë naꞌ bilaꞌléꞌenëꞌ ben gádxidaꞌ légaquiëꞌ,
ateꞌ Moisés gunnë́ꞌ:
“Radxi ridzö́bidaꞌ,
en rizxízidaꞌa.”
22 Naꞌa,
libíꞌiliꞌ ral-laꞌ gádxitëröliꞌ tuꞌ ribígaꞌliꞌ galaꞌ tu lu guíꞌa nazíꞌi le Sión,
en ga zoa yödzö queëꞌ Dios ban,
le nazíꞌi le Jerusalén que yehuaꞌ yubá,
ga naꞌ nacuꞌë gubáz láꞌayi guizxi yu queëꞌ Dios.
23 Ribígaꞌliꞌ galaꞌ ga niꞌ nudúbigaca zxíꞌini cazëꞌ Dios lahuëꞌ Lëꞌ,
nupa naꞌ nazúajgaca láguequi lu guichi niꞌ yehuaꞌ yubá,
encaꞌ ga zoëꞌ Dios Nu ruchiꞌa rusörö́ëꞌ yúguꞌtë bönachi,
en ga naꞌ nacuáꞌ yuguꞌ böꞌ gulaca cazëꞌ yuguꞌ bönniꞌ tsahuiꞌ,
tuꞌ bunëꞌ Dios légaquiëꞌ tsahuiꞌ.
24 Ribígaꞌliꞌ caꞌ ga zoëꞌ Jesús,
Nu ben tsutsu didzaꞌ cubi naꞌ rucáꞌana tsahuiꞌ,
encaꞌ ga naguꞌë Jesús rön queëꞌ le run ga runiti lahuëꞌ Dios rëꞌu,
rön naꞌ run le nácarö dxiꞌa ca le ben xichönëꞌ Abel,
lë naꞌ ben ga guchúguiëꞌ Dios queë́biꞌ biꞌi bö́chëꞌë.
25 Que lë ni naꞌ,
guliꞌgún chiꞌi cuinliꞌ para cabí táꞌbagaꞌliꞌ Nu naꞌ ruíꞌi didzaꞌ.
Bitiꞌ caꞌ buluꞌlá nupa niꞌ gulaꞌdáꞌbagaꞌ nu naꞌ bulidza légaquiëꞌ luyú ni.
Nácatërö löza bitiꞌ caꞌ uláruꞌ rëꞌu channö táꞌbagaꞌruꞌ Nu naꞌ rulidza rëꞌu,
zoëꞌ yehuaꞌ yubá.
26 Dza niꞌ guzxizi luyú ni tuꞌ biyö́n chiꞌë Dios,
pero naꞌa chiguzxíꞌ lu nëꞌë,
gunnë́ꞌ:
“Iaꞌtú luzuísö,
en calë́gasö luyú uxíziaꞌ,
pero lúzxiba caꞌ uxíziaꞌ.”
27 Cateꞌ niꞌ rnnëꞌ:
“Iaꞌtú luzuísö”,
lë ni ruluíꞌi rëꞌu ral-laꞌ udúa yuguꞌ le gaca ilaꞌzxízi,
lë naꞌ röꞌö yödzölió ni,
ateꞌ uluꞌgáꞌana le cabí gaca ilaꞌzxízi,
lë naꞌ röꞌ yehuaꞌ yubá.
28 Que lë ni naꞌ,
tuꞌ ral-laꞌ idéliꞌruꞌ tu lataj ga inná bë́ꞌëruꞌ,
le cabí izxizi,
ral-laꞌ guië́ruꞌ-nëꞌ Dios:
“Xclenuꞌ”,
ateꞌ lu yöl-laꞌ baꞌa ladxiꞌ,
en lu yöl-laꞌ radxi Lëꞌ tseaj ládxiꞌruꞌ Lëꞌ ca naꞌ raza ládxëꞌë Lëꞌ,
29 tuꞌ náquiëꞌ Dios queë́ruꞌ ca tu guíꞌ le rusuniti le cabí naca idú tsahuiꞌ.