3 Tuꞌ réajlëꞌëruꞌ Dios,

réquibeꞌeruꞌ benëꞌ Lëꞌ yödzölió ni len didzaꞌ bë́ꞌësëꞌ.

Lëscaꞌ caní,

cateꞌ benëꞌ Dios yúguꞌtë le riléꞌeruꞌ,

bugunëꞌ dxin le cabí naláꞌ.

4 Tuꞌ guyéajlëꞌë Abel Dios,

guluꞌë rön queë́baꞌ böaꞌ bë́dxidoꞌ lahuëꞌ Dios,

tu le nácatërö lesacaꞌ ca le guluꞌë Caín lahuëꞌ Dios,

en que lë ni naꞌ Dios benëꞌ ba nalí queëꞌ Abel naꞌ,

gunnë́ꞌ náquiëꞌ tsahuiꞌ,

en benëꞌ bal lë naꞌ guluꞌë lahuëꞌ.

Sal-laꞌ chinátiëꞌ Abel naꞌ,

ga ridxintë naꞌa dza,

naca tsca ruꞌë didzaꞌ,

tuꞌ guyéajlëꞌë Dios.

5 Tuꞌ guyéajlëꞌë Enoc Dios,

gudödëꞌ niꞌ yehuaꞌ yubá,

en bitiꞌ caꞌ gútiëꞌ,

ateꞌ bítiꞌrö nu budzöli lëꞌ,

tuꞌ buchë́ꞌë Dios lëꞌ,

ateꞌ nazúaj lu guichi láꞌayi ca naca queëꞌ le rnna:

“Zíꞌalö ca buchë́ꞌë Dios lëꞌ,

benëꞌ Enoc le raza ládxëꞌë Dios.”

6 Naꞌa,

channö cabí réajlëꞌëruꞌ Dios,

bitiꞌ gaca gunruꞌ le raza ládxëꞌë Lëꞌ,

ateꞌ para ibígaꞌruꞌ galaꞌ ga zoëꞌ Dios,

run bayudxi tséajlëꞌëruꞌ zoa cazëꞌ Lëꞌ,

en rubiꞌë que nu ruíꞌi ladxiꞌ Lëꞌ.

7 Cateꞌ niꞌ Dios buzéajniꞌinëꞌ Noé ca ral-laꞌ ilaca le cabí riléꞌeninëꞌ Noé naꞌ,

tuꞌ guyéajlëꞌë Noé Dios,

benëꞌ ca rnna xtídzëꞌë Dios.

Bupë́ꞌë barco zxön naꞌ nazíꞌi le Arca,

ateꞌ lëꞌe barco naꞌ buluꞌlá bönachi diꞌa dza queëꞌ Noé.

Tuꞌ guyéajlëꞌë Noé Dios,

benëꞌ ga naca bëꞌ narugu quégaca bönachi yödzölió ilátigaca,

ateꞌ bidéliꞌnëꞌ gúquiëꞌ tsahuiꞌ lahuëꞌ Dios,

le taꞌdeliꞌ nupa taꞌyéajlëꞌ Lëꞌ.

8 Cateꞌ niꞌ Dios bulidzëꞌ Abraham,

tuꞌ guyéajlëꞌë Abraham Lëꞌ,

benëꞌ ca rnna xtídzëꞌë Dios,

en buzë́ꞌë ladzëꞌ para tsejëꞌ lataj niꞌ ral-laꞌ siꞌë ca tu le guequi tsaz queëꞌ,

ateꞌ birúajëꞌ ladzëꞌ sal-laꞌ bitiꞌ nö́zinëꞌ gazxi naꞌ ral-laꞌ tsejëꞌ.

9 Tuꞌ guyéajlëꞌë Abraham Dios,

gúquiëꞌ ca tu bönniꞌ ziꞌtuꞌ,

en guzóëꞌ luyú naꞌ Dios guzxíꞌ lu nëꞌë unödzjëꞌ queëꞌ.

Guzóëꞌ lu yuꞌu guídidoꞌ,

en lë́bisö ca gulunëꞌ Isaac,

en Jacob,

zxíꞌini xiꞌsóëꞌ Abraham,

nupa niꞌ guzxíꞌ lu nëꞌë Dios unödzjëꞌ quéguequi lë naꞌ guzxíꞌ lu nëꞌë unödzjëꞌ queëꞌ Abraham.

10 Caní benëꞌ Abraham,

tuꞌ benëꞌ löza idéliꞌnëꞌ yödzö naꞌ röꞌö tsaz xilibi zöꞌö que,

le nuzóëꞌ Dios xilibi zöꞌö que,

ateꞌ guluꞌë le ga naꞌ zoëꞌ Lë cazëꞌ.

11 Lëscaꞌ caní Sara,

sal-laꞌ chinácanu nigula huödx,

guyéajlëꞌënu Dios,

ateꞌ Lëꞌ bëꞌë queë́nu yöl-laꞌ huáca buzóanu-biꞌ bíꞌidoꞌ.

Buzóanu-biꞌ biꞌi bö́nniꞌdoꞌ sal-laꞌ chigudödi izi queë́nu,

tuꞌ guyéajlëꞌënu Dios gunëꞌ ca rnna xtídzëꞌë naꞌ guzxíꞌ lu nëꞌë queë́nu.

12 Que lë ni naꞌ,

sal-laꞌ chibigúladëꞌë Abraham,

gulaꞌcuáꞌabiꞌ ziántëröbiꞌ zxíꞌini xiꞌsóëꞌ.

Gulaꞌcuáꞌabiꞌ tsca rö́ꞌöbaꞌ bölaj lúzxiba,

en tsca röꞌö yuzxi tu raꞌ nisa zxön,

cuntu nu gaca ulaba légacabiꞌ.

13 Yúguꞌtë bönniꞌ ni gulátiëꞌ,

en bitiꞌ gulaꞌziꞌë lë naꞌ guzxíꞌ lu nëꞌë Dios unödzjëꞌ quégaquiëꞌ,

pero gulaꞌyéajlëꞌë Dios,

ateꞌ ziꞌtuꞌ zíꞌtuꞌsö bilaꞌléꞌenëꞌ lë naꞌ ral-laꞌ ilaꞌziꞌë.

Gulaꞌyéajlëꞌë Dios,

en gulunëꞌ ba nalí que lë ni.

Caní guca,

buluꞌluꞌë nácagaquiëꞌ ca bönniꞌ ziꞌtuꞌ,

en bönniꞌ taꞌdazëꞌ yödzölió ni.

14 Yuguꞌ bönniꞌ tuꞌë caní didzaꞌ,

tuꞌluꞌë taꞌguiljëꞌ tu lataj le gaca ládzagaquiëꞌ.

15 Laꞌtuꞌ gulaꞌzáꞌ ládxiꞌgaquiëꞌ caní que luyú ga niꞌ bilaꞌrúajëꞌ,

le nácatë uluꞌdzö́linëꞌ nacxi huö́ajgaquiëꞌ niꞌ,

16 pero gulaꞌzáꞌ ládxiꞌgaquiëꞌ que luyú naꞌ nácarö dxiꞌa,

le röꞌ yehuaꞌ yubá.

Que lë ni naꞌ bitiꞌ rutuíꞌinëꞌ Dios cateꞌ taꞌnnë́ꞌ náquiëꞌ Dios quégaquiëꞌ,

tuꞌ chinupë́ꞌë tu yödzö quégaquiëꞌ.

17 Tuꞌ guyéajlëꞌë Abraham Dios,

cateꞌ guzxíꞌ bëꞌë Dios lëꞌ,

budödëꞌ-biꞌ biꞌi Isaac queëꞌ lahuëꞌ Dios ca naꞌ tuꞌdödëꞌ-baꞌ yuguꞌ böaꞌ bëdxi tútigaquiëꞌ-baꞌ lahuëꞌ Dios.

Guzóëꞌ sinaꞌ Abraham gútiëꞌ-biꞌ biꞌi bönniꞌ zíꞌalö queëꞌ naꞌ lahuëꞌ Dios sal-laꞌ nácabiꞌ biꞌi naꞌ guzxíꞌ lu nëꞌë Dios unödzjëꞌ queëꞌ.

18 Caní benëꞌ sal-laꞌ gudxëꞌ Dios lëꞌ,

gunnë́ꞌ:

“Lu náꞌabiꞌ biꞌi Isaac quiuꞌ ichísagacaꞌ-biꞌ zxíꞌini xiꞌsúꞌ.”

19 Caní benëꞌ Abraham,

tuꞌ gúquibeꞌenëꞌ napëꞌ Dios yöl-laꞌ huáca usubanëꞌ-biꞌ lu yöl-laꞌ guti,

ateꞌ ca tu lugáꞌa luséquiꞌ,

huáca innaruꞌ buziꞌë-biꞌ lu yöl-laꞌ guti sal-laꞌ bitiꞌ guti cázabiꞌ.

20 Tuꞌ guyéajlëꞌë Isaac Dios,

gunábinëꞌ Dios gun láꞌayëꞌ-biꞌ biꞌi Jacob,

encaꞌ biꞌi Esaú ca zeaj naca le uluꞌzíꞌibiꞌ xibé dza siꞌ zaꞌ.

21 Tuꞌ guyéajlëꞌë Jacob Dios,

cateꞌ niꞌ chizóa gátiëꞌ gunábinëꞌ Dios gun láꞌayëꞌ-biꞌ tu tubiꞌ zxíꞌinëꞌ José,

ateꞌ guyéaj ládxëꞌë Dios,

niꞌ nayéchuëꞌ lu xiyaga queëꞌ.

22 Tuꞌ guyéajlëꞌë José Dios,

cateꞌ niꞌ chizóa gátiëꞌ,

bëꞌë didzaꞌ que dza naꞌ ilaꞌrúajëꞌ zxíꞌini xiꞌsóëꞌ Israel luyú Egipto,

ateꞌ gunná bëꞌë ca ral-laꞌ iluꞌë dxita queëꞌ luyú ga naꞌ tsöjcuꞌë.

23 Tuꞌ gulaꞌyéajlëꞌë Dios,

cateꞌ gúljabiꞌ bíꞌidoꞌ Moisés,

xuz xináꞌabiꞌ buluꞌcáchëꞌë-biꞌ idú ca tsonna beoꞌ,

tuꞌ bilaꞌléꞌenëꞌ nácabiꞌ biꞌi bö́nniꞌdoꞌ naꞌ lachi,

en bitiꞌ guládxinëꞌ bönniꞌ rinná béꞌenëꞌ bönachi Egipto,

bönniꞌ naꞌ gunná bëꞌë ilútiëꞌ-biꞌ yuguꞌ biꞌi bö́nniꞌdoꞌ naꞌ.

24 Tuꞌ guyéajlëꞌëbiꞌ Moisés Dios,

cateꞌ guzxönbiꞌ,

bítiꞌrö bë́ꞌëbiꞌ lataj nu uzóa lëbiꞌ biꞌi bönniꞌ queë́nu nigula zxíꞌinëꞌ Faraón,

bönniꞌ naꞌ rinná béꞌenëꞌ bönachi Egipto.

25 Caní benbiꞌ tuꞌ gúquibiꞌ nácarö dxiꞌa nu usacaꞌ ziꞌ lëbiꞌ tsözxö́n len bönachi queëꞌ Dios ca uzíꞌibiꞌ xibé tu chíꞌisö yuguꞌ le tuꞌzíꞌ xibé nupa tun dul-laꞌ.

26 Gúquibiꞌ nácarö lesacaꞌ nu ulidza ditaj lëbiꞌ,

ca naꞌ gaca caꞌ queëꞌ Cristo,

ca idéliꞌbiꞌ yuguꞌ yöl-laꞌ tsahuiꞌ quégaca bönachi Egipto,

tuꞌ guzáꞌ ládxiꞌbiꞌ ca naca le ubiꞌë Dios queë́biꞌ.

27 Gudödi niꞌ,

tuꞌ guyéajlëꞌë Moisés Dios,

birúajëꞌ luyú Egipto,

en bitiꞌ gúdxinëꞌ yöl-laꞌ rilé queëꞌ bönniꞌ rinná béꞌenëꞌ bönachi Egipto,

ateꞌ biáꞌ gulénëꞌ ca run nu riléꞌe Dios,

Nu naꞌ bitiꞌ gaca iléꞌeruꞌ.

28 Tuꞌ guyéajlëꞌë Moisés Dios,

benëꞌ Laní Pascua ca gunná béꞌenëꞌ Dios lëꞌ,

en buchéajëꞌ rön raꞌ yuꞌu lídxigaquiëꞌ,

para cabí guti zxíꞌinigaquiëꞌ nu naꞌ ral-laꞌ usuniti yuguꞌ biꞌi bönniꞌ zíꞌalö quégaca bönachi Egipto.

29 Tuꞌ gulaꞌyéajlëꞌë yuguꞌ bönniꞌ Israel Dios,

gulaꞌdödëꞌ luyú bidxi gatsaj láhuiꞌlö nísadoꞌ nazíꞌi le Nisa Xiná.

Cateꞌ gulë́ꞌënnëꞌ ilaꞌdödëꞌ caꞌ bönniꞌ Egipto niꞌ,

gulaꞌyë́pinëꞌ nisa,

en gulátigaquiëꞌ lu Nisa Xiná naꞌ.

30 Tuꞌ gulaꞌyéajlëꞌë bönniꞌ Israel Dios,

cateꞌ budxi gulaꞌdödëꞌ idú gásibiꞌilö yödzö Jericó yuguꞌ dza idú gadxi dza,

bilaꞌguínnaj yuguꞌ zöꞌö gulún chiꞌi yödzö naꞌ.

31 Tuꞌ guyéajlëꞌënu Rahab Dios,

nigula ruíꞌinu lataj bönachi,

bitiꞌ gútinu tsözxö́n len bönachi Jericó naꞌ bitiꞌ gulún ca rnna xtídzëꞌë Dios,

tuꞌ bennu bal bönniꞌ Israel naꞌ buduyúlangaquiëꞌ le rácalen bönachi Jericó.

32 ¿Bízxirö ral-laꞌ inníaꞌ?

Riyadzaj lataj uzúajaꞌ ca gulunëꞌ Gedeón,

en Barac,

en Sansón,

en Jefté,

en David,

en Samuel,

encaꞌ yuguꞌ bönniꞌ guluꞌë didzaꞌ uláz queëꞌ Dios.

Iaꞌbal-lëꞌ bönniꞌ niꞌ gulátiëꞌ lu náꞌagaquiëꞌ bönniꞌ niꞌ buluꞌsacaꞌ ziꞌë légaquiëꞌ,

en tuꞌ cabí gulë́ꞌënnëꞌ uluꞌcáꞌanëꞌ Dios,

bitiꞌ gulaꞌziꞌë lataj nu usán légaquiëꞌ.

Caní gulunëꞌ para ilaꞌdéliꞌnëꞌ yöl-laꞌ rubán lu yöl-laꞌ guti,

lë naꞌ guléquinëꞌ nazácaꞌrö.

36 Iaꞌbal-lëꞌ biáꞌ guléngaquiëꞌ yöl-laꞌ rutitaj,

en xíguiaꞌ que gubáꞌayi,

ateꞌ gulaꞌdzunëꞌ lidxi guíë,

nágaꞌgaquiëꞌ du guíë.

37 Buluꞌladxiꞌ bönachi bal-lëꞌ guiö́j,

en gulaꞌchözëꞌ iaꞌbal-lëꞌ.

Gulaꞌzíꞌ bëꞌë légaquiëꞌ,

en gulútigaca ziángaquiëꞌ len guíë tuchiꞌ.

Gulaꞌdödëꞌ náꞌalö níꞌilö,

nácugaquiëꞌ guídi zxágacabaꞌ böꞌcuꞌ zxilaꞌ,

en chivo.

Guláquiëꞌ yechiꞌ,

en gulaꞌguíꞌi gulaꞌzáquëꞌë,

ateꞌ buluꞌdxía bönachi légaquiëꞌ döꞌ.

38 Caní guláquiëꞌ bönniꞌ naꞌ,

ateꞌ bitiꞌ gulaca bönachi yödzölió ni lesacaꞌ uluꞌzíꞌ xibégaquiëꞌ.

Gulaꞌdasëꞌ lu lataj cáꞌasö,

en yuguꞌ lu guíꞌa,

ateꞌ gulaꞌcuáꞌasëꞌ yuguꞌ zxan bulóaj,

en yuguꞌ yeru luyú.

39 Yúguꞌtëꞌ buluꞌrúajëꞌ tsahuiꞌ lahuëꞌ Dios tuꞌ gulaꞌyéajlëꞌë Lëꞌ,

sal-laꞌ bitiꞌ gulaꞌziꞌë luyú ni le guzxíꞌ lu nëꞌë Dios unödzjëꞌ quégaquiëꞌ.

40 Caní guca,

tuꞌ nupë́ꞌë Dios niꞌa queë́ruꞌ tu le nácarö dxiꞌa para cateꞌ únëꞌ légaquiëꞌ idú dxiꞌa,

rëꞌu ni gunruꞌ légaquiëꞌ tsözxö́n.