10
Xibá naꞌ gunná bëꞌë Moisés guca tu le ruluíꞌisö ca zeaj naca le tsahuiꞌ siꞌ záꞌgaca,
en bitiꞌ guca idú ca nácagaca.
Que lë ni naꞌ,
xibá naꞌ queëꞌ Moisés bitiꞌ guca un idú tsahuiꞌ nupa niꞌ bilaꞌdxín lahuëꞌ Dios,
en biáꞌgaca rön quégacabaꞌ böaꞌ bë́dxidoꞌ,
lë naꞌ gulaꞌgúꞌuticaꞌsëꞌ lahuëꞌ Dios yuguꞌ iz.
2 Laꞌtuꞌ guca un légaquiëꞌ idú tsahuiꞌ,
bitiꞌ gulaꞌgúꞌuticaꞌsëꞌ rön niꞌ lahuëꞌ Dios,
tuꞌ cabirö iléquibeꞌenëꞌ bönniꞌ guca caní quégaquiëꞌ nabágaꞌgaquiëꞌ dul-laꞌ channö chibuluꞌhuöáquiëꞌ idú tsahuiꞌ.
3 Rön niꞌ gulaꞌguꞌë lahuëꞌ Dios yuguꞌ iz busáꞌ ládxiꞌgaquiëꞌ nabágaꞌgaquiëꞌ dul-laꞌ.
4 Caní guca,
tuꞌ cabí guca xichö́ngacabaꞌ bëdxi,
en chivo ugúa dul-laꞌ.
5 Que lë ni naꞌ,
cateꞌ bidxinëꞌ Cristo yödzölió ni,
gudxëꞌ Dios ca naꞌ nazúaj lu guichi láꞌayi le rnna:
Bitiꞌ rë́ꞌënuꞌ nu cuꞌu rön quégacabaꞌ böaꞌ bëdxi loꞌ
pero benuꞌ ga nacaꞌ bönáchisö.
6 Bitiꞌ raza ládxuꞌu nu uzeguiꞌ-baꞌ böaꞌ bëdxi loꞌ,
o nu cuꞌu xichö́ngacabaꞌ loꞌ tuꞌ nözi dul-laꞌ.
7 Níꞌirö gunníaꞌ:
Ni zoaꞌ para gunaꞌ ca rë́ꞌënuꞌ Liꞌ,
Dios.
Naca ca naꞌ nazúaj lu guichi láꞌayi ca gaca quiaꞌ.
8 Lë naꞌ nazúaj zíꞌalö rnna:
“Bitiꞌ rë́ꞌënëꞌ Dios nu cuꞌu rön quégacabaꞌ böaꞌ bëdxi lahuëꞌ.”
Didzaꞌ ni ruluíꞌi rëꞌu bítiꞌrö raza ládxëꞌë Dios lë ni sal-laꞌ lu xibá queëꞌ Moisés rinná béꞌenëꞌ Dios nu gun caní.
9 Gudödi niꞌ rnna:
“Ni zoaꞌ para gunaꞌ ca rë́ꞌënuꞌ Liꞌ,
Dios.”
Didzaꞌ ni ruluíꞌi rëꞌu rugǘëꞌ Dios lë naꞌ gulaꞌguꞌë lahuëꞌ zíꞌalö,
en ruzóëꞌ xilataj le guluꞌë Zxíꞌini cazëꞌ lahuëꞌ.
10 Naꞌa,
Dios ruúnëꞌ rëꞌu idú tsahuiꞌ tuꞌ benëꞌ Cristo ca rë́ꞌënëꞌ Dios cateꞌ niꞌ budödi cuinëꞌ lahuëꞌ Dios uláz queë́ruꞌ,
en gútiëꞌ tu luzuísö.
11 Le nácatë yúguꞌtë bixúz luyú ni zuíguequinëꞌ yuguꞌ dza,
en tunëꞌ xichíngaquiëꞌ,
en laꞌ tuz ca tunëꞌ,
taꞌguꞌë lahuëꞌ Dios zián luzuí xichö́ngacabaꞌ böaꞌ bëdxi,
yuguꞌ le cabí gaca uluꞌgúa dul-laꞌ.
12 Naꞌa,
Cristo,
tu le guluꞌë tsaz lahuëꞌ Dios tu luzuísö tuꞌ nözi dul-laꞌ,
ateꞌ níꞌirö yöjchöꞌë cuita lëꞌë ibëla Dios.
13 Ribözëꞌ niꞌ dza gunëꞌ Dios ga uluꞌzechu zxíbigaca lahuëꞌ nupa bitiꞌ taꞌléꞌe Lëꞌ dxiꞌa.
14 Niꞌa que tuz le guluꞌë lahuëꞌ Dios,
tsaz benëꞌ ga nácagaca idú tsahuiꞌ nupa naꞌ bunëꞌ dxiꞌa,
en bubéajëꞌ léguequi quez queëꞌ Dios.
15 Lëscaꞌ caní Dios Böꞌ Láꞌayi runëꞌ ba nalí loruꞌ,
tuꞌ gunnë́ꞌ zíꞌalö lë naꞌ nazúaj lu guichi le rnna:
16 Caní gaca didzaꞌ ucáꞌana tsahuiꞌ gúnlenaꞌ légaquiëꞌ
tödi yuguꞌ dza niꞌ,
rnnëꞌ Xanruꞌ.
Uchíziaꞌ icja ládxiꞌdoꞌgaquiëꞌ xibá quiaꞌ,
en uzúajaꞌ le lu icja ládxiꞌdoꞌgaquiëꞌ.
17 Gudödi naꞌ gunnë́ꞌ:
Bítiꞌrö tsöjnedaꞌ dul-laꞌ nabágaꞌgaquiëꞌ
en döꞌ biáꞌgaquiëꞌ.
18 Que lë ni naꞌ,
channö chinadúa dul-laꞌ,
bítiꞌrö run bayudxi nu bi cuꞌu lahuëꞌ Dios tuꞌ nözi dul-laꞌ.
Huáca ibígaꞌruꞌ galaꞌ ga zoëꞌ Dios
19 Naꞌa,
yuguꞌ böchiꞌ luzáꞌadoꞌ,
idú ládxiꞌruꞌ gaca idxinruꞌ lahuëꞌ Dios caz,
niꞌa que xichönëꞌ Jesucristo.
20 Tséajlenruꞌ tu nöza cubi,
en idú tsahuiꞌ le nuzóëꞌ Cristo,
le ridxín cúdziꞌlö lariꞌ naꞌ busayaj ga nu riyaza lataj idú láꞌayi naꞌ,
o huáca innaruꞌ,
nöza naꞌ gusaljëꞌ Cristo niꞌa queë́ruꞌ tuꞌ budödëꞌ idútë le naca cazëꞌ.
21 Jesús náquiëꞌ queë́ruꞌ tu bixúz nayë́pisëtërëꞌ,
en rinná béꞌenëꞌ bönachi queëꞌ Dios.
22 Que lë ni naꞌ huáca ibígaꞌruꞌ galaꞌ ga zoëꞌ Dios idú ládxiꞌruꞌ,
en lu yöl-laꞌ run löza queë́ruꞌ,
tuꞌ réajlëꞌëruꞌ Cristo,
tuꞌ chibunëꞌ dxiꞌa icja ládxiꞌdoꞌoruꞌ,
para cabí uxösa ládxiꞌdoꞌoruꞌ rëꞌu,
ateꞌ gudibëꞌ idútë le naca cázaruꞌ len le naca tu nisa nácatërö idú.
23 Ral-laꞌ gácaruꞌ tsutsu,
en cabí gaca chopa ládxiꞌruꞌ ca naca le runruꞌ löza que le nazíꞌ lu náꞌaruꞌ,
le guzxíꞌ lu nëꞌë Dios gunnëꞌ queë́ruꞌ,
ateꞌ Lëꞌ runëꞌ ca rnnëꞌ.
24 Ral-laꞌ utipa ládxiꞌruꞌ turuꞌ iaꞌturuꞌ,
para gunruꞌ ga idxíꞌiröruꞌ luzáꞌaruꞌ,
en gúnröruꞌ caꞌ le naca tsahuiꞌ.
25 Bal-la bönachi bítiꞌrö tuꞌdubi len rëꞌu.
Bitiꞌ ral-laꞌ gunruꞌ ca tun bönachi naꞌ,
pero ral-laꞌ utipa ládxiꞌruꞌ turuꞌ iaꞌturuꞌ,
en gúnröruꞌ caní tuꞌ riléꞌeruꞌ chizóa idxín dza huödëꞌ Xanruꞌ.
26 Channö zéajlenruꞌ runruꞌ dul-laꞌ tödi núnbëꞌëruꞌ le naca idútë li,
bitiꞌ caꞌ nagáꞌana bi gaca cúꞌuruꞌ lahuëꞌ Dios le ugúa dul-laꞌ.
27 Yuguꞌ bönniꞌ tunëꞌ caní,
lu yöl-laꞌ radxi ridzöbi quégaquiëꞌ taꞌbözëꞌ dza ichúguiëꞌ Dios quégaquiëꞌ ilaꞌyáziëꞌ lu guíꞌ gabila,
lë naꞌ uzéguiticaꞌsö nupa taꞌdáꞌbagaꞌ Dios.
28 Cateꞌ nu bönniꞌ buzóëꞌ xibá queëꞌ Moisés tsöláꞌalö,
gulútiëꞌ lëꞌ channö chopa tsonna bönachi gulún ba nalí que le benëꞌ,
ateꞌ cuntu nu buéchiꞌ ladxiꞌ bönniꞌ naꞌ.
29 Naꞌa,
nu bönniꞌ uzóëꞌ tsöláꞌalö Zxíꞌinëꞌ Dios,
en uzóëꞌ tsöláꞌalö caꞌ xichönëꞌ le run tsutsu didzaꞌ rucáꞌana tsahuiꞌ,
le ruún rëꞌu dxiꞌa,
ibágaꞌrëꞌ caꞌ xíguiaꞌ.
Nu bönniꞌ gunëꞌ caní ucáꞌanëꞌ cáꞌasö Dios Böꞌ Láꞌayi,
Nu ruzáꞌ ladxiꞌ queë́ruꞌ le riquíniruꞌ.
30 Caní gaca,
tuꞌ núnbëꞌëruꞌ-nëꞌ Dios,
Nu gunná:
“Quiaꞌ nedaꞌ nequi yöl-laꞌ ruzíꞌ lëbi.
Nedaꞌ ubiꞌa quégaca bönachi,
rnnëꞌ Xanruꞌ.”
Lëscaꞌ caní gunnë́ꞌ:
“Xanruꞌ uchiꞌa usörö́ëꞌ bönachi queëꞌ.”
31 Ral-laꞌ gadxi idzöbi nu ral-laꞌ siꞌ xíguiaꞌ lu nëꞌë Dios ban.
32 Guliꞌtsöjné yuguꞌ dza chigulaꞌdödi cateꞌ niꞌ siꞌ bidxín queë́liꞌ beníꞌ,
ateꞌ biáꞌ gulenliꞌ zián le buluꞌsacaꞌ ziꞌë libíꞌiliꞌ.
33 Buluꞌlidza ditaj bönachi libíꞌiliꞌ,
en buluꞌdxía libíꞌiliꞌ döꞌ lahuiꞌ lógaca bönachi,
ateꞌ benliꞌ tsözxö́n caꞌ nupa gulaꞌguíꞌi gulaꞌzacaꞌ caní.
34 Caní guca,
tuꞌ buéchiꞌ ládxiꞌliꞌ nupa nadzúngaca lidxi guíë,
en lu yöl-laꞌ rudzeja queë́liꞌ biáꞌ gulenliꞌ nupa gulaꞌbéaj lídxiliꞌ yuguꞌ le gutaꞌ queë́liꞌ.
Caní benliꞌ tuꞌ nö́ziliꞌ nequi queë́liꞌ le nácarö dxiꞌa,
en le zóaticaꞌsö niꞌ yehuaꞌ yubá.
35 Naꞌa,
bitiꞌ ucáꞌanaliꞌ lë naꞌ runliꞌ löza,
le nachë́ꞌ tu le zxön ubiꞌë Dios queë́liꞌ.
36 Run bayudxi cö́zaliꞌ zxön ladxiꞌ,
para cateꞌ chibenliꞌ ca rë́ꞌënëꞌ Dios,
síꞌiliꞌ le guzxíꞌ lu nëꞌë gunnëꞌ queë́liꞌ,
ca naꞌ nazúaj lu guichi láꞌayi,
ca gunnë́ꞌ Dios le rnna:
37 Iaꞌtú chíꞌidoꞌosö idxinëꞌ Bönniꞌ naꞌ ral-laꞌ guídëꞌ.
Bitiꞌ caꞌ tsenëꞌ.
38 Níꞌirö nu naca tsahuiꞌ lahuaꞌ nedaꞌ,
ulá nu naꞌ tuꞌ réajlëꞌ nedaꞌ.
Channö huö́aj ladxiꞌ,
en táꞌbagaꞌ nedaꞌ,
bítiꞌrö tsaz ládxaꞌa nu naꞌ.
39 Naꞌa,
rëꞌu ni,
bitiꞌ nácaruꞌ ca nupa tuꞌhuö́aj ladxiꞌ,
en taꞌdáꞌbagaꞌ Dios,
en ilaꞌniti,
pero réajlëꞌëruꞌ Cristo,
en nadéliꞌruꞌ yöl-laꞌ rusölá.