Lataj láꞌayi dë luyú, en lataj láꞌayi dë yehuaꞌ yubá
9
Naꞌa,
didzaꞌ rucáꞌana tsahuiꞌ naꞌ guzóa zíꞌalö,
dzágagaca xibá le ca ral-laꞌ ilaꞌyéaj ládxiꞌgaca bönachi Dios,
en lataj láꞌayi bidzága le guca que luyú ni.
2 Caní naca lataj láꞌayi naꞌ néquini guídi.
Lu lataj naꞌ dë láhuilö,
nazíꞌi le Lataj Láꞌayi,
gulaꞌcuáꞌ le nuáꞌ guíꞌ,
en bucugu láꞌayi ga niꞌ gulaꞌguꞌë yuguꞌ yöta xtildoꞌ lahuëꞌ Dios.
3 Cúdziꞌlö le buropi lariꞌ nal-laꞌ lu yuꞌu naꞌ zoa lataj niꞌ nazíꞌi le,
Lataj Idú Láꞌayi,
4 ateꞌ lu lataj niꞌ gulaꞌcuáꞌ tu bucugu néquini oro ga naꞌ buluꞌzéguiꞌë nöri,
encaꞌ tu guíꞌina ga yuꞌu didzaꞌ rucáꞌana tsahuiꞌ,
en nacu guíꞌina naꞌ oro.
Lu guíꞌina naꞌ gulaꞌcuáꞌ zxígaꞌdoꞌ naꞌ néquini oro,
le nadzáꞌ yöta xtildoꞌ naꞌ nazíꞌi le maná,
encaꞌ xuyaga queëꞌ Aarón,
lë naꞌ bubö́ꞌ niꞌa nëꞌe,
encaꞌ yuguꞌ guiö́j blaga naꞌ,
nazúaj láhuilöguequi didzaꞌ rucáꞌana tsahuiꞌ.
5,6 Lahui guíꞌina naꞌ gulaꞌcuáꞌ chopa gubáz láꞌayi néquiguequini oro, lë́gaca querubín que lataj ga buluíꞌi lahuëꞌ Dios, ateꞌ buluꞌzxóa xíliguequi láhuilö lataj ga niꞌ guluꞌë bixúz lo rön tuꞌ nözi dul-laꞌ. Caní buluꞌcuꞌë yuguꞌ lë ni. Bitiꞌ dë lataj uzúajaꞌ naꞌa idútë ca nácagaca lë ni.Taꞌyázaticaꞌsëꞌ yuguꞌ bixúz lu lataj zoa láhuilö, ga naꞌ tunëꞌ dxin quégaquiëꞌ que le taꞌyéaj ládxiꞌgaquiëꞌ Dios.
7 Tuzëꞌ bixúz lo guyáziëꞌ lu lataj buropi niꞌ tu luzuísö tu iz,
en biꞌë rön le guluꞌë lahuëꞌ Dios tuꞌ nözi dul-laꞌ nabagaꞌ cazëꞌ,
encaꞌ tuꞌ nözi dul-laꞌ nabágaꞌgaca bönachi,
dul-laꞌ gulunëꞌ le cabí guléquibeꞌenëꞌ.
8 Caní ruzéajniꞌinëꞌ Dios Böꞌ Láꞌayi rëꞌu,
bitiꞌ caꞌ guca idxinruꞌ lahuëꞌ Dios caz tsanni niꞌ tuꞌgunëꞌ dxin lataj láꞌayi naꞌ zoa láhuilö lu yuꞌu láꞌayi naꞌ néquini guídi,
lë naꞌ bidzága didzaꞌ rucáꞌana tsahuiꞌ le guzóa zíꞌalö.
9 Yuguꞌ lë ni naca tu le ruluíꞌisö que le raca naꞌa dza.
Yuguꞌ le gulaꞌguꞌë lahuëꞌ Dios,
en rön quégacabaꞌ böaꞌ bëdxi naꞌ gulútiëꞌ-baꞌ lahuëꞌ Dios bitiꞌ guca uluꞌún idú dxiꞌa icja ládxiꞌdoꞌgaquiëꞌ bönniꞌ niꞌ gulaꞌyéaj ládxiꞌgaquiëꞌ Dios caní.
10 Yuguꞌ lë ni buluíꞌi lahui quégacasö le gulëꞌaj gulahuëꞌ,
en ca ral-laꞌ ilaꞌguíbi cuíngaquiëꞌ,
en quégaca xibá ca ral-laꞌ gaca que idú ca zeaj naca cazëꞌ.
Yuguꞌ lë ni buzóëꞌ Dios quégaquiëꞌ ga bidxintë dza ral-laꞌ utsë́ꞌë yúguꞌtë.
11 Naꞌa,
chibuduluíꞌi lahuëꞌ Cristo,
en náquiëꞌ Bixúz Lo que le naca idú dxiꞌa,
le biláꞌ lahui niꞌa que le benëꞌ Lëꞌ.
Lataj láꞌayi ga naꞌ guyáziëꞌ Lëꞌ nácarö lo,
en nácarö idú,
en bitiꞌ néquini lu niꞌa lu náꞌagaca bönachi,
en bitiꞌ naca que luyú ni.
12 Naꞌa,
chiguyáziëꞌ Cristo lu lataj láꞌayi naꞌ,
calëga len xichö́ngacabaꞌ bë́dxidoꞌ,
en xichö́ngacabaꞌ chivo,
pero len rön queë cazëꞌ.
Guyáziëꞌ lu lataj idú láꞌayi tu luzuísö,
ateꞌ caní guca,
benëꞌ ga nuláruꞌ tsaz.
13 Le nácatë xichö́ngacabaꞌ bëdxi,
en chivo,
en dö queë́baꞌ bë́dxidoꞌ buluꞌzéguiꞌë-baꞌ,
yuguꞌ le gulaꞌguꞌë lu ícjagaca nupa nabágaꞌgaca dul-laꞌ,
guca uluꞌgúa dul-laꞌ naꞌ nabágaꞌgaca bönachi para uluꞌún légaquiëꞌ dxiꞌa idú ca zeaj naca cazëꞌ ca naca que yöl-laꞌ yudoꞌ quégaquiëꞌ.
14 Naꞌa,
gúntërö caꞌ xichönëꞌ Cristo,
tuꞌ budödi cuinëꞌ queëꞌ Dios,
en gúquiëꞌ idú tsahuiꞌ,
ateꞌ zóalenëꞌ Dios Böꞌ Láꞌayi Lëꞌ,
Nu zóaticaꞌsö.
Naꞌa,
xichönëꞌ Cristo ruún idú dxiꞌa icja ládxiꞌdoꞌoruꞌ lu yuguꞌ le gubágaꞌruꞌ le tun ga nu gati,
para gaca gunruꞌ xichinëꞌ Dios ban.
15 Que lë ni naꞌ náquiëꞌ Jesucristo Nu ben tsutsu didzaꞌ cubi rucáꞌana tsahuiꞌ,
tuꞌ gútiëꞌ Lëꞌ,
en bugǘëꞌ dul-laꞌ gulaꞌbagaꞌ bönachi cateꞌ niꞌ zoa didzaꞌ gula rucáꞌana tsahuiꞌ.
Gútiëꞌ caꞌ para gaca ilaꞌziꞌë lë naꞌ guzxíꞌ lu nëꞌë Dios unödzjëꞌ quégaquiëꞌ bönniꞌ bulidzëꞌ,
le zóaticaꞌsö.
16 Cateꞌ ratiëꞌ nu bönniꞌ,
en nucáꞌanëꞌ tu didzaꞌ ca ral-laꞌ ilaꞌguísiëꞌ le nequi queëꞌ,
run bayudxi gaca bëꞌ chinátiëꞌ bönniꞌ naꞌ para gaca ilunëꞌ ca rnna didzaꞌ naꞌ nucáꞌanëꞌ.
17 Cateꞌ chinátiëꞌ bönniꞌ naꞌ,
gaca ilunëꞌ ca rnna didzaꞌ naꞌ,
pero tsanni ni zoëꞌ nabanëꞌ,
bitiꞌ caꞌ gaca ilunëꞌ ca rnna didzaꞌ naꞌ.
18 Que lë ni naꞌ,
didzaꞌ naꞌ rucáꞌana tsahuiꞌ le guzóa zíꞌalö guca lesacaꞌ tuꞌ bidzága rön didzaꞌ naꞌ,
le ruluíꞌisö zoa nu guti.
19 Cateꞌ niꞌ gudíxjöiꞌinëꞌ Moisés bönachi niꞌ ca nácagaca yúguꞌtë xibá queëꞌ Dios,
gudélëꞌë rön quégacabaꞌ bë́dxidoꞌ,
en quégacabaꞌ chivo,
le nutsiꞌ nisa,
ateꞌ len tu guíxiꞌdoꞌ nazíꞌi le hisopo,
en lítsaꞌbaꞌ böꞌcuꞌ zxilaꞌ le nëꞌaj xiná,
buchéajëꞌ rön,
en nisa naꞌ lahui guichi ga naꞌ nazúaj xibá naꞌ,
encaꞌ láhuigaca bönachi.
20 Níꞌirö gudxëꞌ légaquiëꞌ:
“Lë ni naca rön le run tsutsu didzaꞌ rucáꞌana tsahuiꞌ le gunná béꞌenëꞌ Dios rëꞌu para gunruꞌ ca rnna.”
21 Lëscaꞌ caní buchéajëꞌ Moisés rön naꞌ lu lataj láꞌayi néquini guídi,
en lahui yúguꞌtë le tuꞌgunëꞌ dxin para ilaꞌyéaj ládxiꞌgaquiëꞌ Dios.
22 Ca naꞌ rinná bëꞌ xibá naꞌ,
látuꞌbiquiꞌ yúguꞌtë ral-laꞌ un dxiꞌa rön léguequi,
ateꞌ channö cabí tuꞌlaljëꞌ rön,
bitiꞌ udúa dul-laꞌ.
Xichönëꞌ Jesucristo rugúa dul-laꞌ
23 Caní naca,
ben bayudxi guzóa le bun dxiꞌa yudoꞌ luyú ni le naca tu le ruluíꞌisö ca naca lë naꞌ röꞌö yehuaꞌ yubá,
pero ca naca lë naꞌ röꞌö yehuaꞌ yubá,
ben bayudxi soa le un dxiꞌa nupa ilaꞌyaza le,
le nácarö lesacaꞌ ca xichö́ngacabaꞌ böaꞌ bë́dxidoꞌ caní.
24 Bitiꞌ guyáziëꞌ Cristo lataj láꞌayi néquini lu niꞌa lu náꞌagaca bönachi,
lë naꞌ naca tu le ruluíꞌisö ca naca le naca idú,
pero guyáziëꞌ yehuaꞌ yubá caz para gaca uluíꞌi lahuëꞌ naꞌa lahuëꞌ Dios uláz queë́ruꞌ.
25 Bixúz lo zoëꞌ luyú ni raziëꞌ lataj nácatërö láꞌayi tu tu iz len rön quégacabaꞌ böaꞌ bëdxi,
pero bitiꞌ run bayudxi tsáziëꞌ Cristo zián luzuí para udödi cuinëꞌ lahuëꞌ Dios.
26 Laꞌtuꞌ guca caní,
gun bayudxi quiꞌi sáquëꞌë Cristo,
en gátiëꞌ zián luzuí dza niꞌte cateꞌ gutaꞌ yödzölió ga ridxintë naꞌa dza,
pero naꞌa cateꞌ naca dza údxi,
tsaz buluíꞌi lahuëꞌ tu luzuísö,
en budödi cuinëꞌ lahuëꞌ Dios,
cateꞌ gútiëꞌ para bugǘëꞌ dul-laꞌ nabágaꞌruꞌ.
27 Ca naꞌ run bayudxi ilátigaca bönachi tu luzuísö ateꞌ tödi niꞌ uchiꞌa usörö́ëꞌ Dios léguequi,
28 lëscaꞌ caní,
gútiëꞌ Cristo tu luzuísö,
cateꞌ budödi cuinëꞌ lahuëꞌ Dios para bugǘëꞌ dul-laꞌ nabágaꞌgaca bönachi zián.
Naꞌa,
uluíꞌi lahuëꞌ le buropi luzuí,
calëga para ugǘëꞌ dul-laꞌ,
pero para usölë́ꞌ tsaz nupa taꞌböza Lëꞌ.