Jesús náquiëꞌ Bixúz Lo queë́ruꞌ
8
Naꞌa,
ca rnna lë naꞌ siꞌ gunníaꞌ,
naca caní:
Zoa queë́ruꞌ tu Bixúz Lo caní.
Guröꞌë cuita lëꞌë ibëla Dios,
ateꞌ röꞌë,
rinná bëꞌë yehuaꞌ yubá niꞌ.
2 Lëꞌ runëꞌ dxin ca Bixúz Lo lu lataj nácatërö láꞌayi,
le naca yudoꞌ le naca idútë,
lë naꞌ buchisëꞌ Xanruꞌ,
en calëga bönachi.
3 Dios rucuꞌë yúguꞌtë bixúz lo para ilaꞌguꞌë yuguꞌ le tuꞌnödzaj bönachi,
encaꞌ xichö́ngacabaꞌ böaꞌ bëdxi lahuëꞌ Dios.
Que lë ni naꞌ ben bayudxi soa bi guluꞌë Cristo lahuëꞌ Dios.
4 Laꞌtuꞌ zoëꞌ luyú ni,
bitiꞌ caꞌ gáquiëꞌ bixúz,
tuꞌ nacuáꞌticaꞌsëꞌ bixúz ni,
nupa taꞌgúꞌu yuguꞌ le tuꞌnödzaj bönachi lahuëꞌ Dios ca rinná bëꞌ xibá queëꞌ Moisés.
5 Yuguꞌ bixúz ni tunëꞌ dxin que tu le ruluíꞌisö,
en le naca ca tu bixín que lë naꞌ röꞌö yehuaꞌ yubá.
Caní naca,
tuꞌ gúdxidëꞌë Dios Moisés cateꞌ siꞌ uchisëꞌ yúꞌudoꞌ naꞌ néquini guídi,
gunnë́ꞌ:
“Buyútsöcaꞌ,
ben yúguꞌtë idú ca naca lë naꞌ buluíꞌidaꞌ liꞌ lu guíꞌa niꞌ.”
6 Naꞌa,
Bixúz Lo queë́ruꞌ ni runëꞌ dxin que le nácatërö lesacaꞌ,
ateꞌ niꞌa que le benëꞌ Lëꞌ zoa tu didzaꞌ rucáꞌana tsahuiꞌ queë́ruꞌ le nácatërö lesacaꞌ,
en le ruíꞌi didzaꞌ que le nácatërö lesacaꞌ guzxíꞌ lu nëꞌë Dios gataꞌ queë́ruꞌ.
7 Laꞌtuꞌ gudapa didzaꞌ naꞌ rucáꞌana tsahuiꞌ le guzóa zíꞌalö idútë yöl-laꞌ huáca,
bitiꞌ ben bayudxi soa didzaꞌ buropi ni rucáꞌana tsahuiꞌ.
8 Naꞌa,
Dios ruluꞌë bitiꞌ gulaca bönachi niꞌ idú dxiꞌa cateꞌ bëꞌë didzaꞌ ca naꞌ nazúaj lu guichi láꞌayi,
gunnë́ꞌ:
Buliꞌyútsöcaꞌ,
gunnë́ꞌ Xanruꞌ:
Záꞌgaca dza
cateꞌ uzóaꞌ tu didzaꞌ cubi ucáꞌana tsahuiꞌ,
le gúnlenaꞌ bönachi Israel,
en bönachi Judá.
9 Bitiꞌ gaca ca guca didzaꞌ rucáꞌana tsahuiꞌ naꞌ,
lë naꞌ bénlenaꞌ xuz xtóꞌogaquiëꞌ,
dza niꞌ gudélaꞌa náꞌagaquiëꞌ,
en bubéajaꞌ légaquiëꞌ luyú Egipto.
Tuꞌ buluꞌcáꞌanëꞌ didzaꞌ quiaꞌ rucáꞌana tsahuiꞌ,
nedaꞌ bucáꞌanaꞌ légaquiëꞌ,
rnnëꞌ Xanruꞌ.
10 Que lë ni naꞌ,
caní gaca didzaꞌ ucáꞌana tsahuiꞌ
gúnlenaꞌ bönachi Israel
tödi yuguꞌ dza niꞌ,
rnnëꞌ Xanruꞌ.
Uchíziaꞌ icja ládxiꞌdoꞌgaquiëꞌ xibá quiaꞌ
en uzúajaꞌ le lu icja ládxiꞌdoꞌgaquiëꞌ.
Níꞌirö gacaꞌ Dios quégaquiëꞌ
ateꞌ légaquiëꞌ iláquiëꞌ bönachi quiaꞌ.
11 Bitiꞌ gun bayudxi nu usedi luzë́ꞌe,
inná:
Bénbëꞌë Xanruꞌ,
tuꞌ ilúnbëꞌë yúguꞌtëꞌ nedaꞌ,
ga isí lo nu naca cáꞌasö,
ga idxintë nu naca lo.
12 Huéchiꞌ ládxaꞌa légaquiëꞌ,
en uniti lahuaꞌ le cabí naca tsahuiꞌ gulunëꞌ,
en bítiꞌrö tsöjnedaꞌ dul-laꞌ nabágaꞌgaquiëꞌ.
13 Cateꞌ niꞌ ruꞌë Dios didzaꞌ que tu didzaꞌ cubi rucáꞌana tsahuiꞌ,
naca tuꞌ chibigula lë naꞌ guzóa zíꞌalö,
ateꞌ chizóa idúa lë naꞌ nagula,
en chinaca gulasi.