Jesús náquiëꞌ bixúz lo ca gúquiëꞌ Melquisedec
7
Melquisedec gúquiëꞌ bönniꞌ naꞌ gunná bëꞌë lu yödzö Salem,
encaꞌ bixúz queëꞌ Dios,
nayë́pisëtërëꞌ.
Cateꞌ suzë́ꞌë Abraham,
söhuö́jëꞌ gudödi guca gudil-la cateꞌ bucul-lëꞌ yuguꞌ bönniꞌ taꞌnná bëꞌë,
birúajëꞌ Melquisedec naꞌ,
yöjtságuiëꞌ Abraham,
en gunábinëꞌ Dios gun láꞌayëꞌ Abraham.
2 Abraham bëꞌë queëꞌ tu cöꞌ tuꞌ chi cöꞌ que yúguꞌtë le bidéliꞌnëꞌ lu gudil-la naꞌ.
Ca lëꞌ Melquisedec naꞌ rnna lu didzaꞌ xidzaꞌ:
“Bönniꞌ Unná Bëꞌ Tsahuiꞌ”,
en náquiëꞌ caꞌ Bönniꞌ unná bëꞌ que yödzö Salem,
le rnna lu didzaꞌ xidzaꞌ:
“Bönniꞌ Unná Bëꞌ Ribequi Dxíëꞌ.”
3 Bitiꞌ zoa lu guichi le rnna gulaꞌcuꞌë xuz xinë́ꞌë,
o xuz xtáꞌahuëꞌ,
en bitiꞌ nazúaj dza guljëꞌ o dza gútiëꞌ,
pero náquiëꞌ ca náquiëꞌ Zxíꞌinëꞌ Dios tuꞌ náquiëꞌ tsaz bixúz lo.
4 Buliꞌyútsöcaꞌ naꞌa,
ca naꞌ gúquiëꞌ zxön Melquisedec naꞌ,
tuꞌ lë cazëꞌ xúziruꞌ Abraham bëꞌë queëꞌ tu cöꞌ tuꞌ chi cöꞌ que lë naꞌ guléajëꞌ lu náꞌagaquiëꞌ bönniꞌ taꞌnná bëꞌë niꞌ bucul-lëꞌ lu gudil-la.
5 Lu xibá queëꞌ Moisés,
Dios rinná béꞌenëꞌ yuguꞌ zxíꞌini xiꞌsóëꞌ Leví,
nupa nácagaca bixúz,
ilaꞌziꞌë tu cöꞌ tuꞌ chi cöꞌ que le taꞌzíꞌ bönachi Israel,
sal-laꞌ nácagaca diꞌa dza quégaquiëꞌ,
tuꞌ nácagaquiëꞌ yúguꞌtëꞌ zxíꞌini xiꞌsóëꞌ Abraham.
6 Melquisedec naꞌ bitiꞌ náquiëꞌ diꞌa dza quégaquiëꞌ,
pero guzxiꞌë tu cöꞌ tuꞌ chi cöꞌ lu nëꞌë Abraham,
nu naꞌ bideliꞌ yuguꞌ le guzxíꞌ lu nëꞌë Dios gunnëꞌ queëꞌ.
Lëscaꞌ Melquisedec naꞌ gunábinëꞌ Dios gun láꞌayëꞌ Abraham,
7 ateꞌ cuntu nu gaca táꞌbagaꞌ lë naꞌ rnna:
Nu nadéliꞌrö lahuëꞌ Dios rinábini Dios gun láꞌayëꞌ nu nacuídiꞌrö.
8 Naꞌa,
dza ni zóaruꞌ naꞌa,
nupa taꞌzíꞌ tu cöꞌ tuꞌ chi cöꞌ lu náꞌagaca bönachi nácagaca caꞌ bönachi tati caz,
pero Melquisedec naꞌ,
zoa le run ba nalí queëꞌ le rnna zoëꞌ nabanëꞌ.
9 Naꞌa,
huáca innaruꞌ queëꞌ Leví,
en quégaca zxíꞌini xiꞌsóëꞌ,
nupa naꞌ taꞌzíꞌ tu cöꞌ tuꞌ chi cöꞌ lu náꞌagaca bönachi,
lëscaꞌ gulaꞌguízxjëꞌ tu cöꞌ tuꞌ chi cöꞌ cateꞌ niꞌ Melquisedec naꞌ guzxiꞌë tu cöꞌ tuꞌ chi cöꞌ lu nëꞌë Abraham,
xuz gula gudödi quégaquiëꞌ.
10 Caní naca,
tuꞌ huáca innaruꞌ Abraham niꞌ nuꞌë lëꞌë Leví,
en yuguꞌ zxíꞌini xiꞌsóëꞌ cateꞌ niꞌ yöjtságuiëꞌ Melquisedec lëꞌ,
tuꞌ cabí náljaniguequinëꞌ.
11 Taꞌzíꞌ bönachi Israel xibá gunná bëꞌë Moisés lu náꞌagaca bixúz,
nupa nácagaca zxíꞌini xiꞌsóëꞌ Leví ga nababëꞌ caꞌ Aarón,
bixúz lo.
Naꞌa,
laꞌtuꞌ guca uluꞌhuöáca bönachi idú tsahuiꞌ lahuëꞌ Dios tuꞌ tun ca rinná bëꞌ xibá queëꞌ Moisés,
bitiꞌ ben bayudxi soa iaꞌtúëꞌ bixúz ca gúquiëꞌ Melquisedec,
en calëga ca gúquiëꞌ Aarón.
12 Channö rutsë́ꞌë Dios ca ral-laꞌ gáquiëꞌ bixúz,
run bayudxi utsë́ꞌë caꞌ ca naca xibá queëꞌ.
13 Xanruꞌ,
Nu naꞌ nazúaj lu guichi ca naca queëꞌ yuguꞌ lë ni,
nababëꞌ iaꞌturö cöꞌ zxíꞌini xiꞌsóëꞌ Israel ca le nababëꞌ Leví naꞌ,
ateꞌ que cöꞌ zxíꞌini xiꞌsóëꞌ ga nababëꞌ Xanruꞌ,
cuntu nu guca bixúz lahuëꞌ Dios.
14 Naca caní tuꞌ naca bëꞌ guljëꞌ Xanruꞌ lu cöꞌ diꞌa dza queëꞌ Judá,
ateꞌ Moisés bitiꞌ bëꞌë didzaꞌ queëꞌ Judá naꞌ cateꞌ bëꞌë didzaꞌ quégaca nupa ral-laꞌ ilaca bixúz.
15 Nácatërö bëꞌ lë ni niꞌa que le raca naꞌa.
Ca naꞌ gúquiëꞌ Melquisedec bixúz,
chibuluíꞌi lahuëꞌ iaꞌturëꞌ bixúz,
Jesús.
16 Bönniꞌ ni,
bitiꞌ gúquiëꞌ bixúz tuꞌ rinná bëꞌ xibá ca ral-laꞌ ilaca diꞌa dza queëꞌ,
pero náquiëꞌ bixúz tuꞌ napëꞌ yöl-laꞌ huáca que yöl-laꞌ naꞌbán le catu caz údxi.
17 Nazúaj lu guichi láꞌayi le run ba nalí queëꞌ le rnna:
Tsaz nacuꞌ bixúz
ca naꞌ gúquiëꞌ Melquisedec bixúz.
18 Naꞌa,
nadúa xibá gula niꞌ,
tuꞌ cabí gudapa yöl-laꞌ huáca unná bëꞌ,
en bitiꞌ bi guca gun.
19 Xibá queëꞌ Moisés naꞌ bitiꞌ guca un bönachi idú tsahuiꞌ.
Naꞌa,
chiguyúꞌu tu le runruꞌ löza le nácarö dxiꞌa,
le run ga gaca ibígaꞌruꞌ galaꞌ ga zoëꞌ Dios.
20 Cateꞌ benëꞌ Dios ga náquiëꞌ Jesús bixúz ,
benëꞌ tsutsu xtídzëꞌë.
21 Dios bitiꞌ benëꞌ tsutsu xtídzëꞌë cateꞌ bucuꞌë bönachi niꞌ ca bixúz,
pero cateꞌ benëꞌ ga náquiëꞌ Jesús bixúz,
benëꞌ tsutsu xtídzëꞌë,
gunnë́ꞌ:
Benaꞌ tsutsu xtídzaꞌa nedaꞌ,
Xanuꞌ,
gunníaꞌ:
“Bitiꞌ utsáꞌa ca gunaꞌ.
Tsaz nacuꞌ bixúz
ca naꞌ gúquiëꞌ Melquisedec bixúz.”
22 Que lë ni naꞌ,
Cristo náquiëꞌ Nu run ga naca löza didzaꞌ rucáꞌana tsahuiꞌ le nácarö dxiꞌa ca lë naꞌ guca zíꞌalö.
23 Yuguꞌ bixúz niꞌ guláquiëꞌ bönniꞌ zián,
tuꞌ cabí guca uluꞌgáꞌanëꞌ yödzölió ni tuꞌ gulátiëꞌ,
24 pero tuꞌ zóaticaꞌsëꞌ Jesús,
tsaz náquiëꞌ bixúz,
en bitiꞌ gaca nu huöáza xilatjëꞌ para gaca bixúz.
25 Que lë ni naꞌ,
tsaz gaca usölë́ꞌ nupa taꞌbigaꞌ galaꞌ ga zoëꞌ Dios,
nupa tuꞌgún dxin Lëꞌ,
tuꞌ zóaticaꞌsëꞌ nabanëꞌ,
en rnnëꞌ dxiꞌa uláz quégaquiëꞌ lahuëꞌ Dios.
26 Ben bayudxi soa tu bixúz lo caní queë́ruꞌ.
Náquiëꞌ láꞌayi,
en idú tsahuiꞌ,
en bitiꞌ náquiëꞌ tsözxö́n bönachi dul-laꞌ,
pero nayë́pisëtërëꞌ ca yúguꞌtë le nacuáꞌ niꞌ yehuaꞌ yubá.
27 Jesús ni,
bitiꞌ náquiëꞌ ca yuguꞌ bixúz lo yödzölió ni,
tuꞌ ben bayudxi gulaꞌguꞌë rön lahuëꞌ Dios yuguꞌ dza,
ateꞌ gulútiëꞌ-baꞌ böaꞌ bëdxi lahuëꞌ Lëꞌ tuꞌ nözi dul-laꞌ nabágaꞌgaca cazëꞌ,
ateꞌ gudödi niꞌ gulunëꞌ caní tuꞌ nözi dul-laꞌ nabágaꞌgaca bönachi.
Naꞌa,
Jesús,
tsaz guluꞌë rön lahuëꞌ Dios,
cateꞌ niꞌ budödi cuinëꞌ lahuëꞌ Dios,
en bulaljëꞌ xichö́n cazëꞌ tuꞌ nözi dul-laꞌ nabágaꞌgaca yúguꞌtë bönachi.
28 Lu xibá queëꞌ Moisés bönachi bitiꞌ nácagaca idú dxiꞌa nácagaca bixúz,
pero gudödi bidxín xibá queëꞌ Moisés,
Dios benëꞌ tsutsu xtídzëꞌë,
cateꞌ benëꞌ ga náquiëꞌ Zxíꞌini cazëꞌ bixúz lo,
tuꞌ náquiëꞌ idú tsahuiꞌ ca ral-laꞌ gáquiëꞌ bixúz.