6
Que lë ni naꞌ,
bitiꞌ ral-laꞌ usë́daticaꞌsiruꞌ yuguꞌ xibá buzë́daruꞌ cateꞌ siꞌ gusí lo riyö́niruꞌ ca naca queëꞌ Cristo.
Ral-laꞌ tsöjnö́röruꞌ para gácaruꞌ idú bönachi queëꞌ Cristo.
Bitiꞌ naquíni usë́daruꞌ leyúbölö yuguꞌ xibá bitiꞌ naca böniga:
ca ral-laꞌ ubíꞌi ládxiꞌruꞌ,
en ca bítiꞌrö gunruꞌ le ruáꞌ döꞌ,
en ca ral-laꞌ tséajlëꞌëruꞌ-nëꞌ Dios,
2 en ca naca xibá que le ridílaruꞌ nisa,
en ca rixóa náꞌaruꞌ bönachi taꞌyéajlëꞌ Cristo,
en ca ral-laꞌ uluꞌbán nupa nátigaca,
en ca gunëꞌ Dios,
ichúguiëꞌ quégaca bönachi tuáꞌ döꞌ.
3 Caní gunruꞌ channö gunnëꞌ Dios rëꞌu lataj.
4-6 ¿Naruꞌ huácatsö gunruꞌ ga uluꞌbíꞌi ládxiꞌgaca leyúbölö nupa tuꞌhuö́aj ladxiꞌ,
en taꞌdáꞌbagaꞌ Dios?
Channö bidxín quéguequi beníꞌ queëꞌ Dios,
en buluꞌzíꞌ xibé le runödzjëꞌ Dios zoëꞌ yehuaꞌ yubá,
en gulaca tuz len Dios Böꞌ Láꞌayi,
en channö buluꞌzíꞌ xibé didzaꞌ dxiꞌa queëꞌ Dios en yöl-laꞌ huáca que dza siꞌ zaꞌ,
en channö níꞌirö tuꞌhuö́aj ladxiꞌ,
en taꞌdáꞌbagaꞌ Dios,
bitiꞌ caꞌ gaca nu gun ga uluꞌbíꞌi ládxiꞌgaca leyúbölö,
tuꞌ gaca tsca uluꞌdáꞌ leyúbölö Zxíꞌinëꞌ Dios lëꞌe yaga cruz en ilún tsca uluꞌtitaj Lëꞌ lahuiꞌ lógaca bönachi.
7 Nupa tun caní nácagaca ca yu naꞌ ruzíꞌ xibé nisa guiö́j le ribixi láhuilö zián luzuí.
Channö yu naꞌ runödzaj le tuꞌzíꞌ xibé nupa táꞌana yu naꞌ,
raza ládxëꞌë Dios le,
8 pero channö ruzóasö yu naꞌ lubá yötsiꞌ,
en bësigáꞌ,
naca ditaj,
en nabía döꞌ,
en naca para nu uzegui le.
Le runruꞌ löza le run ga nácaruꞌ tsutsu
9 Sal-laꞌ ruíꞌituꞌ caní didzaꞌ,
libíꞌiliꞌ naꞌ nadxíꞌituꞌ,
réquituꞌ ruzíꞌiliꞌ xibé le nácagacarö dxiꞌa,
le tuꞌzíꞌ xibé nupa nulágaca.
10 Dios náquiëꞌ tsahuiꞌ,
en bitiꞌ gal-la ládxëꞌë dxin tsahuiꞌ benliꞌ,
en yuguꞌ le benliꞌ tuꞌ nadxíꞌiliꞌ Lëꞌ.
Gúcalenliꞌ nupa néquiguequi quez queëꞌ Dios,
en runliꞌ xichínguequi.
11 Naꞌa,
rë́ꞌënituꞌ güíꞌi ládxiꞌliꞌ luzáꞌaliꞌ tu iaꞌtuliꞌ,
en gunliꞌ caní ga idxinrö dza údxi,
para gataꞌ idú queë́liꞌ lë naꞌ runliꞌ löza.
12 Rë́ꞌënituꞌ cabí gácaliꞌ xöhuëdi,
pero gunliꞌ ca tun nupa taꞌyéajlëꞌ Dios,
en taꞌböza zxön ladxiꞌ,
para idéliꞌliꞌ yuguꞌ le guzxíꞌ lu nëꞌë Dios gunnëꞌ queë́ruꞌ.
13 Caní gaca,
tuꞌ benëꞌ tsutsu Dios xtídzëꞌë cateꞌ guzxíꞌ lu nëꞌë bi gunnëꞌ queëꞌ Abraham.
Tuꞌ cabí zoa nu nácarö lo ca Dios,
que lë ni naꞌ buzetaj cuinëꞌ,
cateꞌ niꞌ benëꞌ tsutsu xtídzëꞌë.
14 Caní gunnë́ꞌ Dios:
“Le nácatë gunaꞌ ga gaca dxiꞌa quiuꞌ,
en gunaꞌ ga ilaꞌyándaꞌabiꞌ zxíꞌini xiꞌsúꞌ.”
15 Gulözëꞌ Abraham zxön ladxiꞌ,
ateꞌ bidéliꞌnëꞌ le guzxíꞌ lu nëꞌë Dios gunnëꞌ queëꞌ.
16 Cateꞌ tu bönniꞌ runëꞌ tsutsu xtídzëꞌë,
ruzötjëꞌ nu nácatërö lo ca lëꞌ,
ateꞌ lë ni ruzóa dxisö yúguꞌtë didzaꞌ bizxaj,
tuꞌ nunëꞌ tsutsu xtídzëꞌë.
17 Que lë ni naꞌ Dios benëꞌ tsutsu le guzxíꞌ lu nëꞌë gunëꞌ,
en buzötaj cuinëꞌ,
tuꞌ gúꞌunnëꞌ uluíꞌinëꞌ nupa uluꞌzíꞌ xibé le guzxíꞌ lu nëꞌë unödzjëꞌ quéguequi,
nácadaꞌ löza,
en tsaz naca le nuzóa lahuëꞌ gunëꞌ.
18 Le guzxíꞌ lu nëꞌë Dios,
en le benëꞌ tsutsu,
chopa ni catu caz idzáꞌgaca,
en ca naca quégaca chopa ni,
bitiꞌ gaca siꞌ yëꞌë Dios.
Caní benëꞌ Dios para gácadaꞌ löza queë́ruꞌ tu le huë tsahuiꞌ rëꞌu.
Ruzxöni ládxiꞌruꞌ Lëꞌ idéliꞌruꞌ lë naꞌ runruꞌ löza le gunnë́ꞌ síꞌiruꞌ.
19 Lë naꞌ runruꞌ löza ruzóaticaꞌsö tsutsu icja ládxiꞌdoꞌoruꞌ,
en naca ca tu du guíë ruzóa dxisö barco.
Lë naꞌ runruꞌ löza run chiꞌë Cristo niꞌa queë́ruꞌ ga niꞌ zoëꞌ Dios yehuaꞌ yubá,
le nadxín lu lataj láꞌayi naꞌ zoa cúdziꞌlö lariꞌ nalaꞌ lu yudoꞌ röꞌö yehuaꞌ yubá.
20 Guyáziëꞌ Jesús uláz queë́ruꞌ ca Nu röjnöru loruꞌ ga niꞌ zoëꞌ Dios,
ateꞌ Dios nuzóëꞌ Lëꞌ náquiëꞌ tsaz bixúz lo ca naꞌ gúquiëꞌ Melquisedec bixúz lo.